Gàletìyà 2:20 - Mokpwe: Bakwery (New Testament)

²⁰ Nà oma Yerzù à mà ŋwèeyà o mbarza, e hwèlì ndi ema imbahvɛ nà mà ŋwa. Nà rza enje lòŋgɛ hvɛ. Krirztò ndi à hwèlì o tenì ya ami. O eŋgànɛ̀lɛ̀ rzɔ tɔ̀ ima lìtumba la eyà ema na gbèeyà o rze ya mɔ̀nyɛ̀ nàŋgɛ, na e gbèeyà ndi èhwanja o lìlòkɛ̀ ema na ohvani è Ŋmanà wà ama Lohwɛ̀ ema a no lìŋgàni rzii a ŋwa o nyòla ami.

Gàletìyà 2:20 ပူးပေါင်းရင်းမြစ်များ

Matiyò 20:28

nyàyi hvɔ̀kɔ hvɛ mɛnɛ nàa è Ŋmanà wà è Mòtò wà Hwènàmà a rzìi jɛ̀ɛ̀ ema hwatò hwa mò gbèeyà, ndi mɔ̀ à jelì ò lì gbèeyà hwatò, na ò lì ŋgba lòŋgɛ la eni nàa tùŋge ò lì kɔ̀tɔ̀ rzayì-rzayì ja hwatò.”

Matiyò 4:3

Mòkarzɛ̀ rzìi à mà mò jèeyà, rzìi à mò òhwèyà nanù ema, “Ò hwèlì tɛ è Ŋmanà wà ama Lohwɛ̀, kànèyà manù màŋyàyi mà timbe, hwèhvòòtò.”

Yòwanìrzɛ̀ 1:49

Nàtànìyɛ̀lì rzìi à òhwa nanù ema, “Ìi Mòòkòlèlì, ò wà ndi ò hwèlì è Ŋmanà wà ama Lohwɛ̀. Ò wà ndi ò hwèlì è Kìŋgɛ yà Irzàyɛ̀lì.”

Yòwanìrzɛ̀ 10:11

“Imba ndi nà hwèlì e mɔ̀ɔŋgèlì wà gbamù wà mɛ̀lɛ̀ŋgù. È mɔ̀ɔ̀ŋgèlì wà gbamù wà mɛ̀lɛ̀ŋgù à wòŋgìrzɛ̀nɛ̀yi ò lì ŋwèeyà mɛ̀lɛ̀ŋgù ma eni.

Yòwanìrzɛ̀ 15:13

Mòtò a ŋwelɛlɛ tɛ imbunda i eni nanù òma a uŋmɛ̀lɛ̀yi ndìŋgɛ ema e karzami rzayi-rzayi.

Yòwanìrzɛ̀ 17:21

Ìi Tatà, na kànɛ nanù ema wɔ̀ hwa hwɛ mòtò mɔ̀kɔ. Inyɛ̀ hwa hwɛ mɔ̀kɔ na irzɔ na òma ò wa ò hwèlì mɔ̀kɔ na imba ndèŋgàna na òma imba na hwèlì mɔ̀kɔ na ò wa. Inyɛ̀ hwa hwɛ mòtò mɔ̀kɔ aŋga nanù e rze e lòkɛ̀ nanù ema ò wa ndì ò nò òmi.

Yòwanìrzɛ̀ 3:16

Lohwɛ̀ a lìŋgàni hwatò hwa ene e rze ya mɔ̀nyɛ̀ rzayì-rzayì. O èŋgànɛ̀lɛ̀, à mà òma ehvòwà ya eni ya Ŋmanà nanù ema, tɔ̀ ima mɔ̀ ema a mò lòkɛ̀ a rza ŋwa ndi à lùwa lòŋgɛ la gbìndèyà.

Yòwanìrzɛ̀ 3:35

Tatɛ̀ a lìŋgàni è Ŋmanà wà eni rzìi a ikayi hweyà hwe arzɛ ò màà mà eni.

Yòwanìrzɛ̀ 6:57

Tatɛ̀ ema a gbèyi ema hwatò hwa hwɛ lòŋgɛ mɔ̀ ndi hvɛ a na òmi, mɔ̀ ndi hvɛ a gbèyi ema na hwèlì lòŋgɛ. Nànù ndi e hwèlì na tɔ̀ njɛnɛ hvɛ ema a lelì e nyò ya ami na mò gbeyà a hwɛ lòŋgɛ.

Yòwanìrzɛ̀ 6:69

Irzɔ i lòkɛ̀yì ndèŋgàna i hwi nanù ema ò wa ndi ò hwèlì e Mɔ̀ wa Wòtani ema a uwɛ̀lɛ̀lɛ̀yi ò ma Lohwɛ̀.”

Hwègbèèlì 8:36

Nà òma hwà mà hwɛ lì ɛndɛ, rzìi hwa uka èki ema e ma hwɛ malìhwa, rzìi eŋge yumɛ e òhwa nanù ema, “Ɔŋgɔ̀ malìhwà mà anu, ò rza nò lùhwìrzɛ̀ ŋgelì hvɔ̀kɔ e?”

Hwègbèèlì 9:20

O lìwòkimɛnɛ a wòteyà lì òhwa eyà ya Lohwà ò tenì ya i ndawò ja màkanɛ̀ nanù ema, Yerzù ndi à hwèlì è Ŋmanà wà ama Lohwɛ̀.

Ròmànì 1:17

Èhwanja Ŋmɛ̀ndì mò Gbamù, mò wùluwà nɛ Lohwɛ̀ à tɛ̀yirzɛ̀ hwatò ehve-ehve ò wòrzò wà eni. Hwatò hwa èmàyɛ̀lɛ̀hwɛ̀ ò lì hwɛ ehve-ehve ò wòrzò wò ama Lohwɛ̀ èhwanja hwa lòkɛ̀yi. Lìŋgi lìlòkɛ̀ ndi lì gbèeyà hwatò lì emàyɛ̀lɛ̀hwɛ̀ ò wòrzò wò ama Lohwɛ̀ nàa hwatò ema hwa tɛ̀mì ehve-ehve. Ène eyà è hwèlì ndi nanù, nà òma è tìlahwì ò tenì yà è kààtì yà ama Lohwɛ̀ nanù ema, “È mòtò ema à emàyɛ̀lɛ̀hwɛ̀ ò wòrzò wò ama Lohwɛ̀ nàa mòtò ema à tɛ̀mì ehve-ehve èhwanja à lòkɛ̀yi à ò hwɛ lòŋgɛ.”

Ròmànì 14:7

I rza enje ndi ò lìni lòŋgɛ irzɔ hwitì, ndeŋgànɛ̀lɛ̀ i rza ŋwa ndi ò irzɔ hwiti mɛnɛ.

Ròmànì 3:22

Èŋge ŋgàna e hwèlì ndi nanù ema, tɔ̀ ima mòtò ema a lòkɛ̀ Yerzù Krirztò mɔ̀ ndi à tɛmi ehve-ehve. O rza enje tɔ̀ tìŋgɛ̀ ema mòtò a hwèlì ndi wònyà Yudà tɔ̀ a rza enje wònyà Yudà.

Ròmànì 4:25

O nyòla wòhwe wò arzu ɔ̀ndeŋgàtɛ̀ Lohwɛ̀ à mà ŋgba Krirztò ema a jò ŋwèeyà. A ma hvùmùlɛhwɛ ò kpelì, aŋga nanù a jò tɛmìrzɛ ehve-ehve na Lohwɛ̀.

Ròmànì 5:2

Mɔ̀ ndi à jò lìhvòhwèlì e njiya ya lìlòkɛ̀ aŋga nanù i hwiya e ndèli ya ama Lohwɛ̀. O èŋgànɛ̀lɛ̀ rzɔ jò òki mɔ̀nyɛ̀ŋgì rzayi-rzayi èhwanja i ma ika mèèmà me arzu nanù ema jò ò luwa ŋmàye mò ama Lohwɛ̀.

Ròmànì 5:6

Ò è hvònda ema i rzi hwɛnɛ ŋginyà ò lì àwòŋgòwànɛ̀ irzɔ hwiti, Krirztò à mà jò ŋwèeyà irzɔ hwatò hwa wòhwe ò e hvònda ema Lohwɛ̀ à mà tɛ̀yirzɛ.

Ròmànì 5:8

Ndi Lohwɛ̀ à mà jò uŋmɛ̀lɛ̀ nɛ mɔ̀ à jò lìŋgàni, èhwanja lìrzakò ema irzɔ i ma hwɛ ndi hwatò hwa wòhwe ɔ̀ndi, Krirztò à mà jò ŋwèeyà.

Ròmànì 6:13

È rzi inyɛ tɔ̀ èhvàrzù yɔ̀kɔ ya anyu ya enama ya nyò e gbeyànɛhwɛ nàa ɛ̀ɛkɛ̀ ò lì gbeyàna wòhwe. Ndi e aŋgbɛ inyɔ hwìti ò ma Lohwɛ̀ nàa hwatò ema hwa hvɔ̀ɔtɔ̀wi ò kpelì rzìi hwa ŋgbàhwi lòŋgɛ lì hvènya. È ŋgbe inyò ja anyu ja arzɛ ò ma Lohwɛ̀ aŋga nanù, mɔ̀ à e gbeyàna ò lì gbeyà hweyà ema hwe hvòmɛ̀nɛ̀yi ò wòrzò wò ama Lohwɛ̀.

Ròmànì 6:8

Nàŋgɛ na òma irzɔ i ma ŋwɛɛ na Krirztò, i lòkɛ̀ nanù ema jò ò hwɛ hvɛ ò lòŋgɛ na mɔ̀.

Ròmànì 8:10

Ndi e hwèlì tɛ ema Krirztò a hwèlì ò tenì ja anyu, nanù òma e hwèlì lòŋgɛ èhwanja Krirztò à mà e gbeyà nanù ema e imanɛlɛhwɛ ò wòrzò wò ama Lohwɛ̀ tɔ̀ nɛ ò nyòla wòhwe ema inyɔ e ma gbeyɛ, e nyàmà nyò ya anyu e hwɛni lì ŋwa.

Ròmànì 8:37

Jàyɛ̀, ò hwenè hweyà hwe arzɛ irzɔ i rzùù hvɔ̀mbɔ̀wɔ̀ lì akeyà nà Krirztò mɔ̀ ema à jò lìŋgàni, ndèŋgànɛlɛ à jò òŋgòwànà.

1 Kɔ̀rintìyà 6:17

Ndi è mòtò ema a hwèlì mɔ̀kɔ na Rzàŋgo à o jà ndi lì hwɛ mɔ̀kɔ nà mɔ̀ o èlìŋgɛ̀.

2 Kɔ̀rintìyà 1:24

I rza arza ema e hwɛ ndi nàa hwanɛyi ema, je imbɛ o lì lòkɛ̀ hweyà. Ndi irzɔ i gbèyɛ̀nɛ na inyɔ, aŋga nanù e oka mɔ̀nyɛ̀ŋgì èhwanja e tɛmi ehve-ehve o malòkɛ̀ ma anyu.

2 Kɔ̀rintìyà 10:3

È hwèlì jɔ̀kɛ̀ nanù ema i hwèlì ndi anù rze ndi i rza ana na oma hwatò hwa ene rze hwa ana.

2 Kɔ̀rintìyà 11:10

Nà oma na ohwa e jɔ̀kɛ̀ na mòtò wa Krirztò, tɔ̀ mòtò tɔ̀ mɔ̀kɔ o erzòòkà ya Àkayiyà a rza tanɛ a no tɛmirzɛ o lì kùmba lìya la ami o kòkò ema na rza lu etàŋgì na inyɔ.

2 Kɔ̀rintìyà 13:3

O eŋge hvonda ndi e o hwiyɛ nanù ema, tɔ̀ mamɛ ema na ohwa e uwɛ̀lɛ̀lɛ̀yi ndi oma Krirztò. Rzeketɛ ema Krirztò a rza imbami o hweyà hwe arzɛ ema a gbeyà, ndi à uŋmɛ̀lɛ̀ ndi e ŋginyà ya eni o ìtììtènì ja arzu.

2 Kɔ̀rintìyà 13:5

Inyɛ̀ tɔ̀ ima mɔ̀ wa anyu a àyijànè lòŋgɛ la eni kɔ̀yi-kɔ̀yi o lì hwiya ŋga a lìya ndi nàa hwatò ema hwa lòkɛ̀yì. Imba na hwi nanù ema e hwi nanù ema tɔ̀ ima mɔ̀ wa anyu a hwi nanù ema Yerzù Krirztò a hwèlì o tenì ya eni. È hwèlì tɛ nanù ema tɔ̀ ima mɔ̀ wa anyu a àyijànè mɔ̀ ŋmìti ɔ̀ndi e hwiya o jɔ̀kɛ̀ nanù ema e hwèlì na Krirztò.

2 Kɔ̀rintìyà 5:14

È ndìŋgɛ ya ama Krirztò yɔ ndi e ma wowɛ mèèmà me arzu o lì gbeyà hweyà ema i gbeyà, èhwanja i lòkɛ̀yi nanù ema Krirztò à mà ŋwèeyà hwatò hwa arzɛ. Ène ŋgàna e gbèyi ndi nàa tɔ̀ ima mòtò à mà ŋwa.

2 Kɔ̀rintìyà 5:15

A ma jo ŋwèeyà ndi irzɔ hwa arzɛ, aŋga nanù hwatò ema hwa hwèlì lòŋgɛ, mòŋgɛ ma awu ma rza uŋmɛ̀lɛ̀ nanù ema hwa lìya ndi o wɔ̀ hwiti. Ndi wɔ̀ hwa hwèlì lòŋgɛ o nyòla ya ama Krirztò ema à mà ŋwa rzìi Lohwɛ̀ a mo hvùmùlɛ̀ o nyòla awu.

2 Kɔ̀rintìyà 5:7

Irzɔ i hwèlì o lòŋgɛ na nyo ja arzu èhwanja i mo lòkɛ̀ ndi rzeketɛ ema i mo ɛnɛ.

Gàletìyà 1:4

Ò lì arza nanù ema i rzolowahwa ò lì gbeyà wòhwe ò ene rze yà yawono, Yerzù Krirztò à mà aŋgbɛ mɔ̀ ŋmìti ò lì jò ŋwèeyà ò wòhwe wò arzu. À mà gbeyà ndi nanù èhwanja nanù ndi Lohwɛ̀ è Tatɛ̀ yà arzu è mà tɛ̀yirzɛ.

Gàletìyà 2:16

Ndi tɔ̀ nɛ irzɔ i hwi nanù ema Lohwɛ̀ a rza emeyà mòtò ema a hwèlì wòtani èhwanja a nɔ̀ŋgɔ e mbenda. Ndi lì lòkɛ̀ ema mòtò a lòkɛ̀ Yerzù Krirztò lɔ ndi lì gbeyà Lohwɛ̀ a emeyà mòtò ema a tɛmi ehve-ehve. O eŋgànɛ̀lɛ̀ rzɔ irzɔ hvɛ i lòkɛ̀yi Yerzù Krirztò aŋga nanù Lohwɛ̀ a jo emeyà èhwanja i lòkɛ̀yi Yerzù ndi rzeketɛ ema èhwanja ji ikayi e mbenda. Lohwɛ̀ a rza emeyà e mòtò èhwanja a nɔ̀ŋgɔ e mbenda.

Gàletìyà 3:11

Nàŋgɛ rzɔ è uŋmɛ̀lɛ̀ tèlèlè nanù ema, tɔ̀ mòtò à rza ikàhwa ehve-ehve nà Lohwɛ̀ èhwanja à gbeyà mamɛ ema è mbenda è ohwi. Nà ohwa ndi nanù èhwanja Eyà yà Lohwà è ohwi nanù ema, “Hwatò ema hwa tɛ̀mì ehve-ehve ò worzo wò ama Lohwɛ̀ èhwanja hwa lòkɛ̀, hwa ò lùwa lòŋgɛ là gbìndèyà.”

Gàletìyà 5:24

Ndèŋgàna hwaŋga hwatò ema hwa hwèlì na Yerzù Krirztò hwa rza enje hvɛ o rze ya e nyɔ̀ŋgi ya e nyàmà nyo. È gbèyi ndi nàa hwa ɛnɛ oma hwà mà wòmeyà eŋge nyɔ̀ŋgi ya e nyàma nyo ò mbarza, ndèŋgàna e ma ŋwèeyà aŋga.

Gàletìyà 6:14

Ndi o imba na o ayèkirzɛ̀ ndi, lì ayèkirzɛ̀ la ami lì hwèlì ndi e kpelì ema e Rzàŋgo ya arzu Yerzù Krirztò e ŋwɛlɛlɛ o mbàrza o nyòla arzu. È kpelì ya eni e ma no gbeyà ema hweyà hwe ene rze hwe rza enje tɔ̀ eyà o mirzɔ̀ ma ami. Ndeŋgànɛ̀lɛ̀ na rza ohvi tɔ̀ eyà o lì gbeyàna ene rze.

Ɛ̀hvìrzìyà 3:17

Ndèŋganɛlɛ nà kànɛ̀ hvɛ nanù ema lì lòkɛ̀ là anyu ò mà Krirztò è onàhwè ò mèèmà mè anyu. Nà kànɛ̀ hvɛ nanù ema è lìŋganè Lohwɛ̀, ndèŋgànà è lìŋganè hvɛ mɔ̀kɔ nà ɔ̀nɛyi. È gbèyi tɛ nanù, ò mà è mà hwɛ ndi nàa gbee ema meyàŋga mè eni mè rzɔ̀ŋgɔ̀ ò tenì yà mɔ̀nyɛ̀, ndèŋgana è hwɛ ndi nàa ndawò ema è tɛmi gbamù ò rze.

Ɛ̀hvìrzìyà 5:2

Inyɔ e lìŋgàne hwahvɛhvɛ hwatò, ŋgànà hvɔ̀kɔ nàa oma Krirztò a me e lìŋgàne rzìi a jo ŋwèeyà. A ma aŋgbɛ̀ɛ mɔ̀ ŋmìti o ma Lohwɛ̀ nàa làhweyà na jàhwèyà ema i ma lìŋgìrzɛ Lohwɛ̀ rzayi-rzayi.

Ɛ̀hvìrzìyà 5:25

Inyɔ mèjòmɛ̀ è lìŋgàne ìjòjìyɛ̀ ja anyu, ŋgànà hvɔ̀kɔ nà omà Krirztò à lìŋgàni lì arzàŋgànɛ là hwatò hwa Lohwà, rzìi a aŋgbɛ̀ lòŋgɛ là eni ò lì hwa ŋwèeyà.

Hvìlipìyà 1:21

O imba, na oma imba na hwèlì lòŋgɛ, e hwèlì ndi o lì gbèeyà Krirztò, ndeŋgànɛlɛ e hwèlì tɛ nanù ema na ŋwelì tɛ e hwɛ gbamù na imba.

Hvìlipìyà 4:13

Nà tànɛyi lì gbeyà hweyà hwe arzɛ ema hwe no jɛlɛlɛyi o lì akeyà na e ŋginyà ema Krirztò a no ŋgbelì.

Kòlòrzìyà 1:27

Lohwɛ̀ à arza nanù ema hwatò hwa eni hwa hwiye nanù ema mònàmɛ̀ nà è ndèli yà ama Krirztò è hwèlì hvɛ nanù mɛnɛ ò hwatò ema hwa rza enje wònyà Yudà. È wùndɛ̀ ema è hwèlì ò tenì è hwèlì ndi ema inyɔ e ika mèèmà mè anyu nanù ema, inyɔ è lùwa è ndèli ema Lohwɛ̀ à ohwi nanù ema à ŋgba hwatò wà eni.

1 Tɛ̀rzàlonìyà 1:10

Hwa ohwa hvɛ nà oma inyɔ è ambɛ̀lɛ̀lɛ̀ hwèjèelì hwe è Ŋmanà wà ama Lohwɛ̀ ema à uwɛ̀lɛ̀lɛ̀yi ò ŋmanyu yà lohwà. Oŋgo Ŋmanà wà ama Lohwɛ̀ Yerzù, ema à jò rzùŋgi ò è kɔ̀kìrzɛ̀ yà ama Lohwɛ̀ ema è jà, mɔ̀ ndi Lohwɛ̀ à mà hvùmùlɛ̀.

1 Tɛ̀rzàlonìyà 5:10

Yerzù à mà jo ŋwèeyà aŋga nanù, i hwɛ lòŋgɛ tɔ̀ i ŋwa, e hvonda ema a o jɛ̀ɛ̀, irzɔ jo ò hwɛ na mɔ̀.

Tàyìtùrzì 2:14

Yerzù Krirztò à mà aŋgbɛ mɔ̀ ŋmìti o lì jo kɔ̀tɔ̀ o wòhwe wo arzu wo arzɛ. A ma jo gbèeyà o lì hwɛ hwatò ema hwa hwèlì wòtani, ndèŋgànɛ̀lɛ̀ à mà jo gbeyà o lì hwɛ hwatò hwa eni mɛnɛ, ema hwa ohvi e nyɔ̀ŋgi ya lì gbeyà hweyà hwe gbamù.

Hibrù 8:3

Tɔ̀ ima Pìlìrzì e Kàrzàmi e hvɔ̀rzɔ̀hwì o lì ŋgbà jàhwèyà, na màhwèyà ma hwèembè oma Lohwɛ̀. O èŋgànɛ̀lɛ̀ rzɔ, e Pìlìrzì e Kàrzàmi e hweni lì ohva yòma o lì ŋgbà nàa e la eni làhweyà o ma Lohwɛ̀.

1 Pètrò 1:8

Inyɔ e mo lìŋgàni, tɔ̀ nɛ e rzi mo ɛni. Inyɔ e mo lòkɛ̀yi tɔ̀ nɛ o naŋgɛ e rzi mo ɛni. O eŋgànɛ̀lɛ̀ rzɔ inyɔ e oke mɔ̀nyɛ̀ŋgi, na màlìŋgo ma ndɛnɛ ema mà rza ohwawa.

1 Yòwanìrzɛ̀ 1:7

Ndi i hwɛni tɛ lòŋgɛ la ŋmàye, na oma mɔ̀ ŋmìti hvɛ a hwɛni, aŋga nanù i hwɛ mɔ̀kɔ na ɔ̀nɛyi, ndèŋgànɛ̀lɛ̀ màyija ma ama e ŋmanà wa eni Yerzù, ma jo rzàŋgìrzɛ̀ o wòhwe wo arzu wa arzɛ.

1 Yòwanìrzɛ̀ 4:14

Ndèŋgànɛ̀lɛ̀ irzɔ ì mà ɛnɛ nà lì ohweyà hwahvɛhvɛ hwatò nanù ema Tatɛ̀ à mà oma è Ŋmanà wà eni ò lì hwɛ è Mòrzùŋgèlì hwa è rze.

1 Yòwanìrzɛ̀ 5:20

Ì hwi nanù ema è Ŋmanà wà ama Lohwɛ̀ à mà jà ò rze yà mɔ̀nyɛ̀, ndèŋgànɛ̀lɛ̀ à mà jò gbeyà ò lì hwiya Lòohwà là jɔ̀kɛ̀. Ndeŋgana irzɔ ì hwèlì ndi ò lì ahvìyànɛ̀ nà mɔ̀, nà oma jà ahvìyànɛ̀ nà è Ŋmanà wà eni Yerzù Krirztò. Mɔ̀ ndi à hwèlì Lohwà là jɔ̀kɛ̀ ndèŋgànɛlɛ mɔ̀ ndi à hwèlì è mɔ̀ ema à ŋgba lòŋgɛ là gbìndèyà.

Hwèwulùwèlì 1:5

Yerzù Krirztò mɔ̀ hvɛ à è omelì è ndèli nà ɛ̀yɔ̀lɛ̀. Mɔ̀ ndi à hwèlì è mɔ̀ ema à ohwa è jɔ̀kɛ̀ lì hvomɛ̀nɛ Lohwɛ̀ nyayi ema ì hwi nanù ema è hwèlì è jɔ̀kɛ̀. Mɔ̀ ndi à hwèlì è mòtò wà worzo ema à lomi lì hvùmùlɛ, ndèŋgànɛ̀lɛ̀ mɔ̀ ndi à hwèlì è mòkànèlì hwa ikìŋgɛ jà ene rze. À jò lìŋgàni, ndèŋganɛlɛ mɔ̀ à mà gbeyà wòhwe wò rza jò kànèyà hvɛ nà oma mɔ̀ à jo ŋwèlɛ̀lɛ̀yì ò mèyohvo mè arzu.

Hwèwulùwèlì 3:20

È ɔŋgɔ tɛ. Nà tɛmi o lìyohva la anyu ndèŋgànɛ̀lɛ̀ na hwèlì na lì kumba. Tɔ̀ njɛnɛ ema a hweyi lìlo la ami, rzìi a lìhvowa lìyohva, imba na kpèeyà, ndèŋgànɛ̀lɛ̀ na laa mòlelì na mɔ̀, ndèŋgànɛlɛ mɔ̀ hvɛ a laa mòlelì na imba.