2 Tɛ̀rzàlonìyà 1:9 - Mokpwe: Bakwery (New Testament)

⁹ Rzàŋgo Yerzù à ò hwa kɔ̀kìrzɛ̀ nà mètàkà mè gbìndèyà. Wɔ̀ hwa rza ò hwɛ èki ema Rzàŋgo à hwèlì, ndèŋgànɛlɛ wɔ̀ hwa rza ò ɛnɛ hwèyòlòwèlì hwe ŋmàye mò eni.

2 Tɛ̀rzàlonìyà 1:9 ပူးပေါင်းရင်းမြစ်များ

Matiyò 16:27

Nà è òhweyà hwene hweyà hwe arzɛ nanù èhwanja è Ŋmanà wà è Mòtò wà Hwènàmà à ò jà ò èluhwe yà ama è Tatɛ̀ wà eni nà ì aŋgèlì jà eni. À jelì tɛ, à kɔ̀kìrzɛ̀ nà lì nàmìrzɛ̀ tɔ̀ ima mòtò ò lì hvòmɛ̀nɛ̀ mamɛ ema tɔ̀ ima mòtò à mà gbèèyɛ̀.

Matiyò 22:13

O èŋgànɛ̀lɛ̀ e kiŋgɛ rzìi e òhweyà hwàgbèèlì ema hwà mà hwɛ lì gbèeyà hwàyɛ̀nì hwa eŋge ndèma nanù ema, ‘È mò kake màa na matàŋgà, e mò hvimbe ò èwòka, ò tenì ya jììtìtì. Aŋga ndi à eeya na lì kɔ̀kɔ̀ mehvehve.’”

Matiyò 24:30

O eŋge hvònda e ò ɛnɛ èmɛ̀nɛ̀nì ya è Ŋmanà wà è Mòtò wà Hwènàmà e uwɛ̀lɛ̀lɛ̀yi ò lìwòhwɛ̀ la ŋmanyu, rzìi matumbà mà arzɛ ma hwatò ma e rze ya arzɛ ma ò wòteyà lì ahvahvɛ. Hwatò hwa ò ɛnɛ è Ŋmanà wà è Mòtò wà Hwènàmà na òma a jà ò lìmbàkì la e ŋmanyu yà lohwà na ŋginyà na èluhwe ndɛnɛ.

Matiyò 25:41

“Ndi e Kiŋgɛ̀ e ò ayèŋgòwɛ̀lɛ̀lɛ̀ hwaŋga ema hwa ò hwɛ ò lìya la eni la ŋmalì rzìi a hwa òhweyà nanù ema, ‘È nò anjiya anu inyɔ ema e jemahwi na Lohwɛ̀! È ɛndɛ e kpèeyà ò ehvɔ̀ndi ya mùnya ema Lohwɛ̀ à mà rzekeya Mòkarzɛ̀ na i aŋgèlì ja eni.

Matiyò 25:46

Hwanù hwa arzɛ hwa ò òmahwa ndi ò e kɔ̀kìrzɛ̀ ya gbìndèyà, ndi e wɔ̀ hwa ehve-ehve hvɛ hwa ò ɛndɛ ndi ò lòŋgɛ la gbìndèyà.”

Matiyò 26:24

È Ŋmanà wà è Mòtò wà Hwènàmà à hwɛnì lì ŋwa nà òma è kààtì yà Lohwà è òhwi, è ò hwɛ màwɔ̀ŋgɔ̀ nà òŋgò mòtò ema à ò nò ahwìrzɛ. È mà lɔ̀wu ema òŋgò mòtò à rzìi ŋyahwe hvɛ tɔ̀.”

Matiyò 7:23

Rzìi nà hwa òhweyà nanù ema, ‘Imba nà rza è hwi. È nò anjiya anù, inyɔ ema è gbeyà wòhwe!’”

Lukàrzɛ̀ 13:27

È Rzàŋgò yà è ndawò ya àlahwɛ̀ nanù ema, ‘Nà rza è hwi. Nà rzà hwi hvɛ tɔ̀ èki ema e uwɛ̀lɛ̀lɛ̀yi. È nò anjiya ò mìirzɔ̀ ma ami. Inyɔ hwatò hwa wòhwe!’

Yòwanìrzɛ̀ 5:14

O mburzà ya hvònda Yerzù à mà ɛnɛ òŋgò mòtò ò Ndawò yà Lohwà. Nà òma à mà mò ɛnɛ rzìi a mò òhweyà nanù ema, “Onò òkànèyà tɛ, nàŋgɛ nanù ò ma wɔ̀wìrzɛ̀hwɛ̀ ò rzi gbeyà hvɛ hweyà hwe wòhwe. Èhwanja ò gbèyi hvɛ tɛ wòhwe, ò taka lì aka nanù.”

Hvìlipìyà 3:19

Ini nyayi ja hwatò, lìrzùkù la awu lì o hwɛ ndi o ɛhvɔ̀ndi ya mùnya. Eyà ema e hwa kànèyà e hwèlì ndi hweyà ema hwe hwèlì e nyɔ̀ŋgi ya e nyàma nyo ya awu. Hwa lìŋgàni o lì gbeyà hweyà ema hwe hwa jàneya irzɔ̀ni, wɔ̀ hwa lùteyà ndi hwèèmà hwe e rze ya mɔ̀nyɛ̀.

1 Tɛ̀rzàlonìyà 5:3

Ò lìrzàkò ema hwatò hwa ohwa nanù ema, “Ò hwèlì ɛ̀yɔ̀lɛ̀ ndèŋgànɛ̀lɛ̀ ò rza enje tɔ̀ mòhvùŋgu,” lìwokimɛnɛ, wɔ̀ hwa ò hvàŋgahwà. È ò hwɛ ndi nyàyi hvɔ̀kɔ nàa mòrziyò mò lìyàlì mò lɛ̀mbɛɛ molàna ema à arza lì ŋya. Rzìi tɔ̀ mòtò à rza ò kàrzowà.

2 Tɛ̀rzàlonìyà 2:8

Èŋge hvonda ndi e mòtò wa wòhwe a o wuluwahwɛ. Mɔ̀ a hwèlì ndi mòtò ema Rzàŋgo Yerzù a o òŋwɛ na muulu mo e wàna ya eni, ndèŋgànɛlɛ a o mo hvàŋga na ŋmàye mo eni mo nyo ema mo mɔ̀tɛ̀lɛ̀ rzàyi-rzàyi e hvonda ema mɔ̀ à o jɛ̀ɛ̀.

Tàyìtùrzì 2:13

Inyɛ̀ i gbeye nanù, na oma ja ambɛ̀lɛ̀ na lìhvìtà hwèèmà ema hwe o jɛ̀ɛ̀ o wòŋgo wùnyà ema Lòohwà la arzu, e mɔ̀ ema a Kàrzàmi na e Mòrzùŋgèlì hwa arzu Yerzù Krirztò à ò jà nà èluhwe ya eni.

Hibrù 10:29

Mòtò a rza wowi tɛ e Ŋmanà wà mùnyanà wa ama Lohwɛ̀ nàa tɔ̀ eyà, nanù oma mɔ̀ à rza wowi màyija ma yòòmbò ya ama Lohwɛ̀ ema mà mo gbèyi ema a hwɛ worzaŋgi nàa tɔ̀ eyà. Ndèŋgàna e hwèlì tɛ ema mɔ̀ à hwɛnyɛ Èlìŋgɛ̀ ema e jànà ndèli nɛ rzɔ e kɔ̀kìrzɛ̀ ya ama ene nyayi ya mòtò e tànɛyi lì hwɛ e?

2 Pètrò 2:17

Hwanu hwatò hwa hwèlì ndi nàa hwetùŋgu hwe màlìhwa ema hwe rzɔ̀njɔ̀. Wɔ̀ hwa hwèlì ndi nàa lìmbàki ema mùùlì mò lìŋgòwànà. Lohwɛ̀ à mà màà lì hwa rzekeya èki ò tenì yà jììtìtì ndɛnɛ.

2 Pètrò 3:7

Èŋge mbɔrzi mɛnɛ ema Lohwɛ̀ à mà gbeyàne o lì wèka e ŋmanyu yà lohwà na e rze, ɔndi mɔ̀ à gbeyànì o lì kombɛ e ŋmanyu yà lohwà na e rze aŋga nanù a hwe rzɛlɛnɛ mùnya. A hwèlì a ambɛlɛlɛ e ŋmanyu yà lohwà na e rze na hwèkàyìrzèlèlì. Woŋgo wùnyà ɔndi mɔ̀ à o hvàŋgɛ hwatò ema hwa rza ohvi ɛ̀ɛ̀mɛ̀ ya hwatò hwa Lohwɛ̀.

Judɛ 1:13

Hwanu hwatò hwa gbèyi ndi nàa hwèehwè hwe ndɛnɛ ema hwe hvemàa ò ŋmànja. Nà oma hwe hvema, hwe oma è mbindo ò mokòkò mò ŋmànja. Nànù ndi ɛ̀ɛ̀mɛ̀ ya awu ya wòhwe è wurza. Hwa gbèyi ndi nàa mbɛtɛtu ema jà amàmìyɛ̀nɛ̀ èki yà arzɛ. Jììtìti ema i rzɔ̀ɔŋgɔ̀wu ɔndi Lohwɛ̀ à mà hwa uteya ndèŋgànɛlɛ jò ò hwɛ̀ɛ natɛ̀ɛ nà ò gbìndèyà.

Hwèwulùwèlì 20:11

Nà ma ɛnɛ kònda ndɛnɛ̀ yà lìkànèyà ema e tanà, na e mòtò ema à mà e lìya o ŋmanyu. Aŋga ndi e rze ya mɔ̀nyɛ̀ na lìwòhwɛ la ŋmanyu hwe ma nyɔ̀ŋge o worzò wo eni, ndèŋgànɛ̀lɛ̀ hwe rzi ɛnɛhwɛ hvɛ.

Hwèwulùwèlì 20:14

È kpelì nà èkomè yà hwatò ema hwa mà ŋwɛ̀ɛ̀ hwa mà komàhwa ò tenì yà yùlu yà mùnya. Ène kpelì yà yùlu yà mùnya è hwèlì ndi kpelì yà hwèlìŋgɛ̀.

Hwèwulùwèlì 21:8

Ndi nà hwatò ema hwa ohvi erzorze ò tenì yà awu, hwaŋga ema hwa rza lòkɛ̀, hwaŋga ema hwa gbeyà hweyà hwe mbindo, hwatò ema hwa oŋwa hwahvɛhvɛ hwatò, hwatò ema hwa gbeyà hweyà hwe mòrzònje, hwa aŋgba mààŋga, hwatò ema hwa gbèeyà mòòhwà mà mòlàŋga nà hwatò hwa arzɛ hwa mòlàŋga, èki yà awu è hwèlì ndi yùlu yà mùnya ema è tùmbana rzayi-rzayi. Ène kpelì ndi e hwèlì e kpelì ya hwèlìŋgɛ̀.”

Hwèwulùwèlì 22:15

Hwàto ema hwa rza o kpeeyɛ o tenì ya eŋge mbowà ndɛɛndɛ, hwa hwèlì ndi hwatò ema hwa gbeyà hweyà hwe mbìndo, hwatò ema hwa aŋgba màaŋga, hwatò ema hwa gbeyà mòrzònje, hwatò ema hwa oŋwa hwatò, hwatò ema hwa kanɛ̀ mòohwà mà mòlàŋga, hwatò ema hwa lìŋgàni lì kɔ̀ɔ hweyà na e wɔ̀ ema hwa kɔ̀ɔ hweyà.