2 Pètrò 2:3 - Mokpwe: Bakwery (New Testament)

³ O tenì ya e njɔ̀ŋgu ya awu, hwanu hwà-òkòlèlì hwa mòlaŋgà, hwa o luwa morzɛ̀ŋgi o lì e ohweyà màyìtò ema wɔ̀ hwa weki e lì e hvùmana hwèèmà. Lohwɛ̀ mɔ̀ à mà màa lì akɛlɛ e mbàko na e koohwa nanù ema a o hwa kɔ̀kìrzɛ̀. Èŋge kɔ̀kìrzɛ̀ e hwa ambɛ̀lɛ̀, ndèŋgànɛ̀lɛ̀ mòŋgo mokona mo hwa ambɛ̀lɛ̀.

2 Pètrò 2:3 ပူးပေါင်းရင်းမြစ်များ

Lukàrzɛ̀ 18:8

Nà è òhweyà nanù ema, Lohwɛ̀ à òŋgòwànà hwatò wa eni kàrzì-kàrzì. Ndi è lòkɛ̀ nanù ema è Ŋmanà wà è Mòtò wà Hwènàmà à jelì tɛ, à ùŋmànɛ̀lɛ̀ lìlòkɛ̀ ò rze e?”

Lukàrzɛ̀ 20:20

Hwà-òkòlèlì hwà mbenda nà Ìpìlìrzì ndɛnɛ̀ hwà mà hwɛ lì arza ŋmanò mò jɔ̀kɛ̀ ò lì ŋgbaŋgɛ Yerzù. Hwa mà hvɔ̀rzɔ̀ hwatò, hwa hwà tàŋgeyà, ema hwa mò nɔ̀ŋge ò mburzà. Hwàŋga hwatò hwà mà hwɛnɛ lì ahwàŋgɛ̀lɛ̀ nanù ema hwa mò nɔ̀ŋgɔ̀nɔ̀ ndi ŋmèma mɔ̀kɔ. Hwà mà gbeyà ndi nanù, aŋga nanù, òma hwà mà mò lɛ̀mbɛnɛ njɔ̀mì. Èŋge hvònda rzɔ òma hwà mà mò akɛlɛlɛ e Gɔhwina ya Ròmànì ema mɔ̀ ndi à kànèyà.

Lukàrzɛ̀ 22:47

Nà òmà Yerzù à mà hwɛ lì òhwà, ŋgìndì ndɛnɛ̀ è mà jà. È mòtò ema à mà hwa tìmba à mà hwɛ ndi Jùdàrzì, mɔ̀kɔ hwà lìyòmɛ̀ la hwà-òkòwèlì wà eni nà hwàhwàkɛ̀. Jùdàrzì à mà ɛ̀ndeya Yerzù, rzìi à mò arzàŋgànɛ̀lɛ̀.

Yòwanìrzɛ̀ 2:16

À mà òhwèyà hvɛ hwaŋga hwatò ema hwà mà hwɛ lì àhwirzɛ̀ imbèŋga nanù ema, “È ulɛ hwenè hwema anù. Nɛ rzɔ inyɔ e tànɛyi lì timbirzɛ e Ndawò ya ama Tatɛ̀ wa ami èki ya èlùwà e?”

Ròmànì 16:18

È rzi keka lì hwa òŋgama èhwanja hwa rza gbèeyà ndi e Rzàŋgò ya arzu Krirztò, ndi hwa gbèeyà ndi nanù ò lì òndìrzɛ̀ e nyɔ̀ŋgi ya awu. Hwa gbeyàna e mbɔrzi ya awu ya gbamù na jòòhwì ja gbamù ò lì lukɛlɛ hwatò ema hwa rza rzɔ̀ŋgɔ lì rzɔ̀ŋgìtɛ̀nɛ̀.

2 Kɔ̀rintìyà 2:17

O èŋgànɛ̀lɛ̀ rzɔ, i rza enje ndi nàa rzayi-rzayi ja hwanɛyi hwatò ema hwa ohwa eyà ya Lohwɛ̀ o lì yalɛ wolì. O irzɔ i rza gbeyà nanù èhwanja Lohwɛ̀ à mà jo òma o lì ohwa ŋmɛ̀ndì mò gbamù ndèŋgànɛlɛ i ma ohwa na ŋmèma mɔ̀kɔ na oma irzɔ i hwèlì mɔ̀kɔ na Krirztò. Irzɔ i hwi hvɛ nanù ema Lohwɛ̀ ndi à jo òmi o lì gbeyà ene èwòlò.

1 Tɛ̀rzàlonìyà 2:5

Inyɔ hwiti e hwi nanù ema na oma i ma hwɛ na inyɔ, i rzi e ohweyà ndi mbɔrzi ema e tɛɛ, ndèŋgànɛ̀lɛ̀ i rzi hwɛ njɔ̀ŋgu. Lohwɛ̀ mɔ̀ ŋmìti a jo tɛmelì mboŋgi.

1 Tɛ̀rzàlonìyà 5:3

Ò lìrzàkò ema hwatò hwa ohwa nanù ema, “Ò hwèlì ɛ̀yɔ̀lɛ̀ ndèŋgànɛ̀lɛ̀ ò rza enje tɔ̀ mòhvùŋgu,” lìwokimɛnɛ, wɔ̀ hwa ò hvàŋgahwà. È ò hwɛ ndi nyàyi hvɔ̀kɔ nàa mòrziyò mò lìyàlì mò lɛ̀mbɛɛ molàna ema à arza lì ŋya. Rzìi tɔ̀ mòtò à rza ò kàrzowà.

1 Tìmotì 3:3

Ène nyayi ya mòtò, a rza hwɛni lì hwɛ mòtò wa mboma, tɔ̀ mòtò ema a jànà mòhvùŋgu. Ndi a hwɛni ndi lì hwɛ mòto ema a hwèlì ŋmɛ̀ɛ na mòtò ema a rza tɔ̀wɔ mòtaŋgo, a rza hwɛni lì hwɛ mòtò ema a lìŋgàni wolì.

1 Tìmotì 3:8

Hwatò ema hwa oŋgowàna o lì gbèeyà èwòlò ò ŋmèmba hwa hwɛni ndi lì hwɛnɛ ɛ̀ɛ̀mɛ̀ ya gbamù na o lì hwɛ hwatò ema hwa ohwa hweyà na ŋmèma mɔ̀kɔ. Hwa rza hwɛni lì hwɛ hwatò hwa mboma, tɔ̀ lì hwɛ hwatò ema hwa hwèlì njɔ̀ŋgu ya wolì.

1 Tìmotì 6:5

Ène e ma hwa gbeyà ema hwa tɔ̀wɔ mòtaŋgo ihvonda ja arzɛ ŋgàna ema o ambi wɔ̀ lì hwiya mamɛ ema e hvomɛ̀nɛ̀. Hwa rza tànɛyi lì rzɔŋgìtɛ̀nɛ̀ eyà ema e hwèlì e jɔ̀kɛ̀ na e yɔ ema e hwèlì mòlàŋgà. Wɔ̀ hwa ɔ̀ŋgɛ̀lɛ̀ nanù ema, hwa gbèelì tɛ Lohwɛ̀, oma hwà mà tuwa hwèwàŋgì.

Tàyìtùrzì 1:11

O rzi keka lì emeyà nanù ema hwaŋga hwatò hwa okolɛ ehwànja wɔ̀ hwà mà hvuŋguhwa rzayi-rzayi ja màtumbà mà hwatò hwa ama Krirztò na oma wɔ̀ hwa okolɛ hweyà ema hwa rza ohvɛ e wònja o lì hwe okolɛ. Wɔ̀ hwa okolɛ ndi ini nyayi ja hweyà aŋga nanù wɔ̀ hwa luwa wolì.

Tàyìtùrzì 1:7

Kànàtɛ e mòtimbèlì wa ŋmèmba ndi à kànèyà ewòlo ya ama Lohwɛ̀, a àŋgàmɛ̀nɛ̀yi ndi lì hwɛ mòtò ema a rza ohvɛ tɔ̀ njɔ̀mi. A àŋgàmɛ̀nɛ̀ ndi lì hwɛ mòtò ema a rza enje lìhvàma, na mòtò ema a ambi lì tata. A rza àŋgàmɛ̀nɛ̀ lì hwɛ mòtò ema a aŋgbɛ mɔ̀ ŋmìti o lì nyɔ la mimba, tɔ̀ mòtò ema a jànà mòhvùŋgu. Ndèŋgànɛ̀lɛ̀ a rza àŋgàmɛ̀nɛ̀ lì hwɛ njɔ̀ŋgu.

1 Pètrò 2:8

Ndeŋgànɛ̀lɛ̀ e tìlahwì hvɛ o ehvɛhvɛ kààti ya Lohwà nanù ema, “Mɔ̀ ndi à hwèlì lìŋyàyi ema lì o nòŋgolɛ hwatò, nàa ewòmɛ ya lìŋyàyi ema e hwa kpìrzɛ. Hwàto hwa nòŋgowa ehwànja hwa rza hweyàna Lohwɛ̀. Nànù ndi Lohwɛ̀ à mà kàkɛ̀nɛ nanù ema e hwa gbèyɛ̀nɛ.”

1 Pètrò 5:2

e hwɛ ndi nàa hwà-ɔ̀ŋgelì hwa mɛ̀lɛ̀ŋgù o hwatò hwa ama Lohwɛ̀ ema hwa hwèlì o rze ya anyu. È hwa ɔŋgeya, rzeketɛ ema ehwànja e hwɛni lì hwa ɔŋgeya, ndi ehwànja e hwɛni nyɔ̀ŋgi o lì gbeyà nanù na oma Lohwɛ̀ a arza nanù ema e hwɛ. È gbeye èwòlò ya anyu e rzi hwɛ lì oŋgama mɔ̀rzɛ̀ŋgì ndi ehwànja e hwɛni mèèmà me lì e gbeyà.

2 Pètrò 1:16

Rzeketɛ màyìtò ema hwatò hwà mà wòndɛ̀yi ndi i ma hwɛ lì e ohweyà, e hvonda ema i ma hwɛ lì ohwa nanù ema e Rzàŋgo ya arzu Yerzù Krirztò e jà hvɛ na ŋginyà. Irzɔ hwitɛ-hwitɛ je ɛnɛ ŋmàye mo eni na mìirzɔ ma arzu.

2 Pètrò 2:1

Ò è hvonda yà kòhwàà ò mà wurza hwà-òhwèlì hwa hwèlìŋgɛ̀ hwa mòlaŋgà ò ìtììtènì jà hwatò. Ŋgànà hvɔ̀kɔ hvɛ nanù mɛnɛ ɔndi hwà-òkòlèlì hwa mòlaŋgà hwa ò wurzɛ ò ìtììtènì jà anyu. Wɔ̀ hwa ò gbeyàna meyàno ò lì okòlɛ̀ hwèyòkòlèlì hwe mòlaŋgà, hweŋge hwèyòkòlèlì hwe ò hvàŋga hwatò ema hwa hwe lòkɛ̀. Hwàŋga hwà-òkòlèlì hwa mòlàŋga hwa ò rzɔ̀rzɔ̀ è Rzàŋgo ema mɔ̀ ndi à hwa ulɛ̀yi ò tenì yà wòhwe. Ène eyà è ò gbeyà hwa ò ahvàŋgelɛ wɔ̀ hwiti kàrzi-kàrzi.

2 Pètrò 2:9

O eŋgànɛ̀lɛ̀ rzɔ, e Rzàŋgo e hwi nɛ a kombɛ hwatò ema hwa hwi Lohwɛ̀ o màkèkirzɛnɛ ma awu. Nà nɛ hvɛ o lì ika hwatò hwa wòhwe o rze ya hwèkɔ̀kìrzèlì o lì ambɛ̀lɛ̀ Wùnyà wo hwèkàyìrzèlì.

Judɛ 1:11

Èwoma na wɔ̀! Wɔ̀ hvɛ hwa gbeyà ndi na oma Keni à mà gbeye ema à mà oŋwe ŋmanyàŋgò wa eni. O nyòla wolì wɔ̀ hwa tànɛyi lì gbeyà tɔ̀ mamɛ nàa Bàlàamì. Maniyà mà awu mɔ̀ hvɛ ma mà hwa gbeyà o lì ŋwa nyayi hvɔ̀kɔ hvɛ na oma Kora à mà ŋwe ehwànja à rzi hweyàne Lohwɛ̀.

Judɛ 1:15

Mɔ̀ à ò kàyìrzɛ hwatò hwa arzɛ hwa è rze yà mɔ̀nyɛ̀. Hwàto hwa arzɛ ema ɛ̀ɛ̀mɛ̀ yà awu è rza enje nàa ɛ̀ɛ̀mɛ̀ yà hwatò hwa Lohwà mɔ̀ à hwa tùùlɛ̀ ŋmàŋgo, ndèŋgànɛlɛ à ò kɔ̀kìrzɛ̀ hwatò hwa wòhwe ema hwa rza oka Lohwɛ̀ wɔ̀ŋgɔ̀. À ò hwa kɔ̀kìrzɛ̀ ò nyòla hweyà hwe wòhwe ema wɔ̀ hwa ohwa ò lì mò tèŋgɛ̀nɛ̀.”

Judɛ 1:16

Hwanù hwatò hwa lìyelì ndi ò lì arzàrzòwɛ ndeŋgànɛlɛ hwa hwɛlɛ hwahvɛhvɛ hwatò. Hwa oŋgama è nyɔ̀ŋgì yà awu yà wòhwe, hwa à èkìrzɛ̀, nà lì ohwàna jɛ̀ɛ̀mɛ̀ ema ì tɛ̀ɛ̀ aŋga nanù hwa luwànà hwatò hwèèmà.

Judɛ 1:4

Nà ohwa ndi nanù èhwanja lòŋgò là hwatò ema hwa rza hwɛnɛ ɛ̀ɛ̀mɛ̀ yà ama hwatò hwa ama Lohwɛ̀, hwa mà kpèeyà ò ìtììtènì jà anyu ò jùtùtà. Hwaŋga hwatò hwa ohwa nanù ema, è ndèli ema Lohwɛ̀ à mà jò ŋgbɛ, ndèŋganɛlɛ nà oma à mà jò làkìrzɛ̀ wòhwe wò arzu, è mà jò ŋgbàà è wònjà ò lì gbeyà hweyà hwe mbindo. Lohwɛ̀ mɔ̀ à mà màa lì tɛ̀yirzɛ̀ è kɔ̀kìrzɛ̀ ema hwaŋga hwatò hwa ò lùwɛ natɛ̀ɛ nà è kòhwàa. Hwàŋga hwatò hwa rza emelì Yerzù Krirztò na oma è hwèlì nanù ema Yerzù mɛnɛ ndi à hwèlì è Rzàŋgo yà arzu nà è mòkànèlì wà arzu.

Judɛ 1:7

È ɔ̀ŋgɛ̀lɛ̀ hvɛ màmbowà mà Rzodomi nà Gòmòrà nà màŋga màmbowà emà ma mà hwa kombɛ̀nɛ̀. Hwàto ema hwa mà hwɛ ò tenì yà màŋga màmbowà, hwa mà aŋgbɛ wɔ̀ hwiti ò lì gbeyà hweyà hwe mòrzònje, ndèŋgànɛlɛ wɔ̀ hwa mà hwɛ ndi ò lì oŋgàma hweyàrzèlì hwe e nyàma nyo ema e mòtò wa hwènàma a rza àŋgàmɛ̀nɛ̀yi lì gbeyà. Hwà mà luwa ɛkɔ̀kìrzɛ̀ ya mùnya ema mo rza lìma. Ène kɔ̀kìrzɛ̀ e hwèlì ndi o lì okolɛ hwahvɛhvɛ hwatò nanù ema ene eyà e tànɛyi e hwa gbèyɛ̀nɛ.