2 Pètrò 1:9 - Mokpwe: Bakwery (New Testament)

⁹ Ndi tɔ̀ njɛnɛ ema a rza hwɛnɛ ɛ̀ɛ̀mɛ̀ ya gbamù, nanù o ma mɔ̀ à gbèyi ndi nàa mòtò ema a rza ɛnɛ hvoo, tɔ̀ ema a hwèlì ndìmà. Mɔ̀ à mà hvoŋga nanù ema Lohwɛ̀ à mà mo rzàŋgìrzɛ, ndèŋgànɛ̀lɛ̀ à mà mo làkìrzɛ wòhwe wo eni.

2 Pètrò 1:9 ပူးပေါင်းရင်းမြစ်များ

Makòrzì 10:21

Yerzù rzìi a mò ɔ̀ŋgɔ nà ŋmèma mò ndiŋgɛ rzìi a òhwa nanù ema, “O lìyelì eyà yɔ̀kɔ ò lì gbeyà, ɛ̀ndɛ ò ahwìrzɛ hwèèmà hwe aŋgɔ̀ hwe arzɛ ema ò òhvi, ò wòwe wòŋgò wòlì ò ŋgbe mèlìrza me hwatò, ò gbèyi tɛ nanù, ò òhva mònàmɛ̀ ò ŋmanyu yà lohwà. Èŋge hvònda, ò je ò nò nɔ̀ŋge.”

Lukàrzɛ̀ 18:22

Yerzù à mà hweye nanù, rzìi a mò òhweyà nanù ema, “O lìyelì eyà yɔ̀kɔ ema ò àŋgàmɛ̀nɛ̀ lì gbeyà. Ahwirzɛ erzàŋgò ya aŋgɔ̀ ya arzɛ, ò kahweyà mèlìrza me hwatò wòŋgò wòlì. O gbèyi tɛ nanù ò lùwà mònàmɛ̀ ò ŋmanyu ya Lohwà. O mburzà nanù, ò jèe ò nò òŋgame”

Ròmànì 6:11

Ŋgàna hvɔ̀kɔ hvɛ mɛnɛ inyɔ e hwɛni ndi lì a ɛnɛ inyɔ hwiti hvɛ nàa hwàtò ema hwà mà ŋwɛɛ, aŋga nanù wòhwe wò rza hwɛni lì e kànèyà hvɛ. Ndèŋgana e àŋgàmɛ̀nɛ̀ ndi ò lì a ɛnɛ inyɔ hwiti hvɛ na hwàtò ema hwa hwèlì ò lòŋgɛ na Lohwɛ̀ ò lì akeyà na Yerzù Krirztò.

Gàletìyà 5:13

Wònyamòwè kòkò, Lohwɛ̀ a e hwɛlɛ o lì anjiya o èki ema hwa e kànɛ̀yi. Kànatɛ e rza kànyɛ̀hwɛ̀ hvɛ, eŋge e rza e ŋgbelì e wònja o lì gbeyà tɔ̀ mamɛ ema e nyàmà ya nyo ya anyu e arza. Ndi ema tɔ̀ ima mɔ̀ wa anyu a gbèeyà ɔ̀nɛyi na ndìŋgɛ.

Gàletìyà 5:6

Ŋga wà endà mòtò tɔ̀ wà rzi mò endè eŋge è rza ohvi tɔ̀ eyà ò lì gbeyà nà lì hwɛ là arzu nà Krirztò. Mamɛ ema è hwèlì wòlìto è hwèlì ndi ò lì lòkɛ̀ Krirztò. Lìŋgi lì lòkɛ̀ lì àŋgàmɛ̀nɛ̀yi lì àwùlùhwɛ̀ ò è ndìŋgɛ ema jà à àwùŋmɛ̀lɛ̀nɛ̀ mɔ̀kɔ nà ɔ̀nɛyi.

Ɛ̀hvìrzìyà 5:26

À mà hwa ŋwèeyà aŋga nanù hwa hwɛ worzaŋgi. À mà gbeyàna malìhwa nà è mbɔrzi yà eni ò lì rzaŋgirzɛ là arzàŋganɛ là hwatò hwa Lohwà.

Tàyìtùrzì 2:14

Yerzù Krirztò à mà aŋgbɛ mɔ̀ ŋmìti o lì jo kɔ̀tɔ̀ o wòhwe wo arzu wo arzɛ. A ma jo gbèeyà o lì hwɛ hwatò ema hwa hwèlì wòtani, ndèŋgànɛ̀lɛ̀ à mà jo gbeyà o lì hwɛ hwatò hwa eni mɛnɛ, ema hwa ohvi e nyɔ̀ŋgi ya lì gbeyà hweyà hwe gbamù.

Hibrù 9:14

È hwèlì tɛ ema màyija ma hwèembè ma tanɛ ma hwɛnɛ màyìmbì ma lì rzàŋgirzɛ hwatò, nanù oma màyija ma ama Yerzù ma hwɛni màyìmbì rzayi-rzayi o lì rzàŋgirzɛ hwatò. Krirztò ema a rza ohvɛ tɔ̀ wòhwe tɔ̀ wɔ̀kɔ à mà aŋgbɛ mɔ̀ ŋmìti nàa jàhwèyà o lì jo kɔ̀tɔ̀ irzɔ hwa arzɛ. A ma gbeyà ndi ene eyà nanù o lì akeyà na èlìŋgɛ̀ yà wòtani ema e hwɛ natɛ̀ɛ na o gbìndèyà. Màyìjà ma eni mɔ̀ ndi ma jo rzàŋgirzɛyi mèèmà me arzu, ema i rza gbeyà hweyà hwe wòhwe ema hwe jo jàneyà e kpelì. Ndi e àŋgàmɛ̀nɛ̀yi lì gbèeyà Lòohwà la lòŋgɛ.

1 Pètrò 3:21

Ndeŋgànɛ̀lɛ̀ manù malìhwà mà tɛmelì ndi lìlùhwìrzɛ̀. O naŋgɛ, lìŋgi lìlùhwìrzɛ̀ lɔ ndi lì gbèyi ɔ̀ndeŋgàtɛ̀ hwatò hwa rzùŋgahwì o lì akeyà na e ŋginyà ya hwèhvùmuwèlì hwe ama Yerzù Krirztò. Lìlùhwìrzɛ̀ lì rza enje ndi o lì ulɛ la ŋmiŋgo ò nyo, ndi lì hwèlì ndi o lì emeyà o lì gbèeyà Lohwɛ̀ na ŋmèma mo rzàŋgi.

1 Yòwanìrzɛ̀ 1:7

Ndi i hwɛni tɛ lòŋgɛ la ŋmàye, na oma mɔ̀ ŋmìti hvɛ a hwɛni, aŋga nanù i hwɛ mɔ̀kɔ na ɔ̀nɛyi, ndèŋgànɛ̀lɛ̀ màyija ma ama e ŋmanà wa eni Yerzù, ma jo rzàŋgìrzɛ̀ o wòhwe wo arzu wa arzɛ.

Hwèwulùwèlì 3:17

Inyɔ e ohwa nanù ema, ‘È hwèlì ndi hwèwàŋgì, e ohvi hwèèmà hwe arzɛ, e rza takeya tɔ̀ yoma.’ Ndi inyɔ e rza hwi nanù ema e hwèlì ndi hwatò ema e taka rzayi-rzayi hwatò ema e okahwɛlɛ ìilì, hwatò ema e hwèlì mèlìrza, hwatò ema e hwèlì ndima ndèŋgànɛ̀lɛ̀ hwatò ema e hwèlì mèrzombo.