1 Yòwanìrzɛ̀ 2:19 - Mokpwe: Bakwery (New Testament)

¹⁹ Ò jɔ̀kɛ̀ jɔ̀kɛ̀ hwaŋga hwatò hwa rzi hwɛ ò mòndèŋge mò arzu. Ɔndèŋgàtɛ̀ hwa mà jò akàkòwɛ̀. Wɔ̀ hwa mà hwɛ tɛ ò mòndèŋge mò arzu, oma hwa mà lìya nà irzɔ. Ndi lì akakowɛ là awu lì uŋmɛ̀lɛ̀ nanù ema ò jɔ̀kɛ̀ hwa rzi hwɛ ò mòndèŋge mò arzu.

1 Yòwanìrzɛ̀ 2:19 ပူးပေါင်းရင်းမြစ်များ

Matiyò 24:24

Èhwanja rzayi-rzayi ja hwatò hwa ò wurza lì kɔ̀ hweyà a lì òhwa ema wɔ̀ ndi hwa hwèlì hwaŋga ema hwa ɔ̀kirzɛ̀hwɛyi. Nà hwà-òhwèlì hwa hwèlìŋgɛ̀ hwa mòlaŋgà hwa ò wurza, hwa ò gbeyà hweyà hwe ndɛnɛ hwe mànyakà nà lì uŋmɛ̀lɛ̀ hwèembànèlì hwe ndɛnɛ hwe mànyakà. Hwa ò gbeyà ndi nanù ò lì lùkɛlɛ hwatò ema Lohwɛ̀ a hvɔ̀rzì, wɔ hwa lu tɛ njiya ya lì hwa lukɛlɛ.

Makòrzì 13:22

Rzayì-rzayì ja hwatò hwa ò ja, tɔ̀ ima mɔ̀ à ò kɔ hweyà nanù ema mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi. Rzìi hwà-òhwèlì hwa hwèlìŋgɛ̀ hwa mèlàŋgà wɔ̀ hvɛ hwa ò wurza. Hwa ò gbeyà hweyà hwe mànyaka na lì uŋmɛ̀lɛ̀ hwèèmbànèlì hwe nyàyì na nyàyì. Hwa ò gbeyà nanù ò lì arza nanù ema hwa lùkɛlɛ hwaŋga ema Lohwɛ̀ à mà lòme lì hvɔ̀rzɔ̀, hwa lù tɛ hvèyò yà lì hwa lùkɛ̀lɛ.

Lukàrzɛ̀ 8:13

Ìhvɔ̀ŋgɔ̀ hvɛ ema ì mà unda ò èwòmà yà lìŋyayì, jɔ̀ hvɛ ì tɛ̀mèlì ndi hwatò ema hwa mà hwèya Eyà yà Lohwà, rzìi hwa è wòwà nà mɔ̀nyɛ̀ŋgì. Ndi Eyà yà ama Lohwɛ̀ è rzi rzɔ̀ŋgɔ ò mèèmà mè awu. Ò ŋmanà hvòkà hvònda hwa mà lòkɛ̀ Lohwɛ̀, ndi màkèkìrzɛ̀nɛ̀ ma mà jèe, hwa mà tìmbeyà ò mburzà.

Yòwanìrzɛ̀ 15:2

A kɛ tɔ̀ ima ɛkɔkɔ e nò hwèlì ema e rza ŋya hwehvùma a e rzenjòwe hvɛ tɔ̀ ima ɛkɔkɔ ema e ŋyàa hwehvùma, ò lì gbeyà nanù ema e hwɛ gbamù ò lì ŋya hwehvùma.

Yòwanìrzɛ̀ 4:14

Ndi tɔ̀ njɛnɛ ema a nyɔ̀lì malìhwa ema imba na mò ŋgba, a rza ò hwɛnɛ ahwɛ̀nɛ̀ nyìrzɛ hvɛ. Maŋga malìhwa ema imba na mò ŋgba, ma hwɛ ndi ò tenì ya eni nàa itùŋgu ema i rza hwànja. Maŋga malìhwà mà mò ŋgba lòŋgɛ la gbìndèyà.”

Hwègbèèlì 15:24

Irzɔ i ma hweyà nanù ema lòŋgò la hwatò ema hwa uwɛ̀lɛ̀lɛ̀yi ò mba arzu lì e jèeya, wɔ hwa e emirzɛyi na hweyà ema hwa òhwa. Ndi inyɔ e hwɛni lì hwiya nanù ema i rzi hwa ŋgbelì tɔ wònjà ò lì gbeyà nanù.

Hwègbèèlì 20:30

O ò jà hvònda ema hwatò hwa ò uwɛ̀lɛ̀lɛ̀yi ò ìtììtènì ja anyu, ema hwa ò rzɛŋgɛnɛ hweyà hwe lì kɔ, aŋga nanù hwatò ema hwa lòkɛ̀ Yerzù hwa ò hwa òŋgama.

Ròmànì 9:6

Nà rza òhwa ndi nanù ema Lohwɛ̀ a rza ò gbeyà mamɛ ema à mà òhwa nanù ema a gbeyà. Èhwanja rzeketɛ hwatò hwa arzɛ ema hwa uwɛ̀lɛ̀lɛ̀yi ò mòtendè mò Irzàyɛ̀lì ndi hwa hwèlì hwatò hwa ama Lohwɛ̀.

1 Kɔ̀rintìyà 11:19

O tɛ̀ɛ̀tɛ̀ɛ o hwɛnì lì hwɛ la akahwanɛ̀ɛ o ìtììtènì ja anyu aŋga nanù hwaŋga ema hwa hwèlì hwa nɔŋgelì hwa jɔ̀kɛ̀ hwa ama Lohwà, hwa ɛnɛhwɛ na e jɔ̀kɛ̀.

2 Tìmotì 2:10

O eŋgànɛ̀lɛ̀ na àjùlɛ̀nɛ̀ mono mòtàkà, aŋga nanù hwatò ema Lohwɛ̀ à hvɔ̀rzì wɔ̀hvɛ hwa ò luwa lìrzùŋgàhwa ema lì uwɛ̀lɛ̀lɛ̀yi ò mà Yerzù Krirztò, ndèŋgàna hwa o hwɛ ndi o rze ya èluhwe ya ama Lohwɛ̀ o gbìndèyà na o gbìndèyà.

2 Tìmotì 2:19

Ndi tɔ̀ nanù hweyà ema Lohwɛ̀ à mà rzeeya, hwe rza tikowahwa. Ndèŋgana e tìlahwì o ŋmanyu ya eni nanù ema, “È Rzàŋgo e hwi hwaŋga hwatò ema hwa hwèlì e hwe eni,” ndèŋgàna e tìlahwì nanù ema, “Hwaŋga hwatò hwa arzɛ ema hwa ohwa nanù ema wɔ̀ hwa hwèlì ndi na e Rzàŋgo, hwa hwɛni lì kumbɛ e mburza o hwègbèèlì hwe wòhwe.”

2 Tìmotì 3:9

Ndi wɔ̀ hwa o lukɛlɛ ndi hwatò ò ŋmanà hvoka hvonda mɛnɛ, èhwanja hwatò hwa o ayembɛ èèti ya awu ŋgàna hvɔ̀kɔ nà oma e ma gbèyɛ̀nɛ hvɛ na Jànɛ̀rzi na Jàmbrɛ̀rzi.

Hibrù 10:39

Ndi irzɔ ì rza enje ndi nàa hwaŋga ema hwa timbeya ò mburzà rzi hwa wɔ̀lɛ̀nɛ̀. Ndi ì hwèlì ndi hwaŋga ema hwa lòkɛ̀yì Lohwɛ̀ rzi hwa oŋgìrzɛ̀hwɛ.

2 Yòwanìrzɛ̀ 1:7

Hwàlùkèlì rzayì-rzayì hwa mà kpèeyà ò rze, hwatò ema hwa rza emeyà nanù ema Yerzù Krirztò à mà ŋyàahwa ò rze nàa mòtò wà hwènàmà. Tɔ̀ ima mòtò wà nanù à hwèlì ndi molùkelì ndèŋgàna è mɔ̀kɔ̀yèlì wà ama Krirztò.

Judɛ 1:1

Imba Judɛ, nà hwèlì ndi Jèmirzi ŋmanyàŋgò wà eni, nà è mògbèèlì wà ama Yerzù Krirztò. Imba ndi nà è tìleyà ene kààti inyɔ ema Lohwɛ̀ à hvɔ̀rzì. È hwɛni lì hwiyà nanù ema Tatɛ̀ Lohwɛ̀ à è lìŋgàni, ndèŋgànɛlɛ Yerzù Krirztò à hwèlì à è ɔ̀ŋgeyà.

Judɛ 1:19

Hwanù hwatò ndi hwa gbeyà è à kahwanɛ̀ɛ. Wɔ̀ hwa oŋgàma ndi è nyɔ̀ŋgi yà hweyàrzèlì hwe awu hwe è nyàmà yà nyo ema è hwa kànèyà, ndèŋgànɛ̀lɛ̀ wɔ̀ hwa rza ohvi èlìŋgɛ̀ yà wòtani ò tenì yà awu.