1 Pètrò 1:3 - Mokpwe: Bakwery (New Testament)

³ Jèka ì hwɛ nà Lohwɛ̀ è Tatɛ̀ yà ama è Rzàŋgo wà arzu Yerzù Krirztò. À mà hvùmùlɛ̀ Yerzù Krirztò ò kpelì. Ò eŋgànɛ̀lɛ̀ i mà luwa lòŋgɛ lì hvènya. Nà oma mɔ̀ à gbèyi nanù, à mà jò ŋgba lìhvìta là lòŋgɛ là gbìndèyà.

1 Pètrò 1:3 ပူးပေါင်းရင်းမြစ်များ

Yòwanìrzɛ̀ 1:13

Wɔ̀ hwa rza enje ndi hwàànà hwa ama Lohwɛ̀ nàa hwatò hwa hwènàmà hwa ŋyàa hwànà. Hwa rzi hwɛ ndi hwàànà hwa ama Lohwɛ̀ nàa ò à ɛnɛ ema mòtò wà hwènàmà ndi à hwa ŋyàayi. Lohwɛ̀ mɔ̀ ŋmìti ndi à hwèlì è Tatɛ̀ yà awu.

Ròmànì 12:12

Inyɛ̀ tɔ̀ ima mòtò a hwɛnɛ mɔ̀nyɛ̀ŋgì na lìhvìtà ema a hwɛni. Inyɛ̀ tɔ̀ ima mòtò a àjùlɛ̀ ò tenì ya mètàkà. Tɔ̀ ima mòtò àjùlɛ̀ ò tenì ya màkanɛ̀.

Ròmànì 15:13

Nà kànɛ nanù ema, Lohwɛ̀ ema mɔ̀ ndi à ŋgbàà lìhvìtà, a e gbeye e ònde na mɔ̀nyɛ̀ŋgì mò arzɛ na ò lì hwɛ na ɛ̀yɔ̀lɛ̀ ò nyòla lì lòkɛ̀ ema e lòkɛ̀. Ène eyà e gbeyà e ŋginyà ya Èlìŋgɛ̀ yà Wòtani e gbeyà lì lòkɛ̀ la anyu lì nyàla rzayi-rzayi.

Ròmànì 4:25

O nyòla wòhwe wò arzu ɔ̀ndeŋgàtɛ̀ Lohwɛ̀ à mà ŋgba Krirztò ema a jò ŋwèeyà. A ma hvùmùlɛhwɛ ò kpelì, aŋga nanù a jò tɛmìrzɛ ehve-ehve na Lohwɛ̀.

Ròmànì 5:10

È hvònda ema i ma hwɛ hwàkɔ̀ɔ̀yèlì hwa ama Lohwɛ̀, e kpelì ema e ŋmanà wa eni à mà ŋwe è mà gbeyà nanù ema jò òhvɛnɛ màrzèèlì na Lohwɛ̀. Nà òma i ma ukɛ màrzèèlì na Lohwɛ̀ na òma e ŋmanà wa eni a hwèlì ò lòŋgɛ, ò lìrzùkù a ò jò rzùŋgà.

Ròmànì 8:11

È hwèlì tɛ nanù ema, Èlìŋgɛ̀ ya ama Lohwɛ̀ ema e ma hvùmùlɛ̀ Yerzù ò kpelì e hwèlì tɛ ò tenì ya anyu, nanù òma tɔ̀ e nyàmà nyò ya anyu ema e hwɛni lì ŋwa e ma màa tɛ lì ŋwa, nanù òma Lohwɛ̀ ema à mà hvùmùlɛ̀ Krirztò ò kpelì a hwɛni lì e hvùmùlɛ̀ yɔ hvɛ. A gbeyà ene na e ŋginyà ya Èlìŋgɛ̀ ema e hwèlì ò tenì ya anyu.

Ròmànì 8:24

Kanatɛ i ma luwe lìrzùŋgàhwà la arzu ja àhvìtɛ̀ nanù ema i luwa mamɛ ema Lohwɛ̀ à mà kàkɛ̀nɛ̀ nanù ema a gbeyà. Ndi je ɛnɛ tɛ yòma ema ja ikayi mèèmà me arzu nanù ema i luwa, nanù òma rzeketɛ lìhvìtà là jɔ̀kɛ̀. Njɛnɛ a tànɛyi ò lì ika ŋmèma mò eni ò lì luwa yòma ema à mà màa lì luwa e?

1 Kɔ̀rintìyà 13:13

O hwèlì hweyà hweyàwò ema hwe hwèlì, ndi lì lòkɛ̀, lìhvìtà, nà e ndìŋgɛ, ndi eyɔ ema e akayi hwe arzɛ e hwèlì ndi e ndìŋgɛ.

1 Kɔ̀rintìyà 15:20

Ndi e jɔ̀kɛ̀ e hwèlì ndi nanù ema, Lohwɛ̀ ama hvùmùlɛ̀ Krirztò o kpelì. Krirztò ndi à hwèlì e mòtò wa worzò o lì hvùmùwà o kpelì, o tenì ya hwatò hwa arzɛ e ma hwà mà ŋwɛɛ.

2 Kɔ̀rintìyà 1:3

Inyɛ̀ ì ŋgbe Lohwɛ̀ jèka, è Tatɛ̀ yà ama Rzàŋgo yà arzu Yerzù Krirztò. Mɔ̀ ndi à hwèlì Tatɛ̀ wà ììlì ja arzɛ nà Lòohwà ema lì ètirzɛ mèèmà mè hwatò hwa arzɛ.

Gàletìyà 6:16

Ò nàŋgɛ rzɔ, inyɛ ɛ̀yɔ̀lɛ̀ nà ììlì jà ama Lohwɛ̀ ì hwɛ nà hwaŋga hwatò hwa arzɛ ema hwa nɔ̀ŋgɔ hwène hwèyòkòlèlì. Hwàŋga hwatò ndi hwa hwèlì hwatò ema hwa hvɔ̀rzɔ̀hwì nà Lohwɛ̀.

Ɛ̀hvìrzìyà 1:17

Ndèŋgànɛ̀lɛ̀ nà kanɛ̀ ndi nanù ema Lòohwà là ama Rzàŋgo yà arzu Yerzù Krirztò, Tatɛ̀ yà èluhwe, à è ŋgbe Èlìŋgɛ̀ yà Wòtani nà ò lì rzɔ̀ŋgìtɛ̀nɛ̀ iŋgi wùndɛ̀ jà hweyà ema hwe utamì aŋga nanù è hwe hwiya gbamù.

Ɛ̀hvìrzìyà 1:3

Inyɛ̀ je eke Lohwɛ̀. Mɔ̀ ndi à hwèlì Lòohwà la ama Rzàŋgo wa arzu Yerzù Krirztò na Tatɛ̀ ya eni. Lohwɛ̀ ndi à hwèlì e mɔ̀ ema à mà jo nàmìrzɛ̀ na menàmirzelì me arzɛ ema me uwɛ̀lɛ̀lɛ̀yi o ŋmanyu yà lohwà. A gbèyi ndi nanù èhwanja irzɔ ima hwɛ ndi mɔ̀kɔ na Krirztò.

Ɛ̀hvìrzìyà 1:7

Nà oma i hwèlì mɔ̀kɔ nà Krirztò, ndèŋgànà màyija mà eni ema à jò kòmelì ɔ̀ndeŋgàtɛ̀ i kɔ̀tɔ̀hwì ò lì làkìrzɛ̀ là wòhwe wò arzu. Nà oma Lohwɛ̀ à mà gbeyɛ ene, à jò uŋmɛ̀lɛ̀ nanù ema è ndèli yà eni è olo.

Ɛ̀hvìrzìyà 2:4

Ndi Lohwɛ̀ ema a ondi na ììlì, na lì jo hwɛneya hvɛ ndìŋgɛ ndɛɛnɛ̀,

Ɛ̀hvìrzìyà 3:20

Lohwɛ̀ à hwɛni ŋginyà ò lì gbeyà hweyà hwe ndɛnɛ ema hwe akayi hweyà ema è mò ijòwa. À gbèeyà hweyà lì aka tɔ̀ mamɛ ema irzɔ i lùtèyà nanù ema à tànɛyi lì gbeyà. À gbeyàna è ŋginyà yà èni ema è hwèlì ò tenì yà arzu ò lì gbeyà hwene hweyà.

Kòlòrzìyà 1:23

Inyɛ̀ è hwɛ ndi nanù ema lì lòkɛ̀ là anyu lì àŋgàmɛ̀nɛ̀yi lì imbama, è inyàmɛ̀nɛ̀ hwètɛ̀mèlì hwe matàŋga mà anyu ò mɔ̀nyɛ̀, ndèŋgànɛ̀lɛ̀ è ika mèèmà mè anyu ò ŋmɛ̀ndì mò gbamù ema è mà hwèyɛ. Moŋgo ŋmɛ̀ndì mò gbamù ema inyɔ è mà màa lì hweyà, mò hwèlì ndi ŋmɛ̀ndì mò gbamù ema mò mà nyàlɛ̀ ò è rze yà arzɛ, ndeŋgànɛlɛ mɔ̀ ndi imba Pàwolò nà atìmbìrzɛ̀yi è mògbèèlì wà ama Lohwɛ̀ ò lì gbeyà.

Kòlòrzìyà 1:27

Lohwɛ̀ à arza nanù ema hwatò hwa eni hwa hwiye nanù ema mònàmɛ̀ nà è ndèli yà ama Krirztò è hwèlì hvɛ nanù mɛnɛ ò hwatò ema hwa rza enje wònyà Yudà. È wùndɛ̀ ema è hwèlì ò tenì è hwèlì ndi ema inyɔ e ika mèèmà mè anyu nanù ema, inyɔ è lùwa è ndèli ema Lohwɛ̀ à ohwi nanù ema à ŋgba hwatò wà eni.

1 Tɛ̀rzàlonìyà 1:3

Irzɔ ì kanɛ̀ tɛ Tatɛ̀ Lohwɛ̀ là arzu, jè è ɔ̀ŋgɛ̀lɛ̀nɛ̀ èwòlò ema è gbeyà ò nyòla lìlòkɛ̀ ema è hwɛni. Jò ɔ̀ŋgɛ̀lɛ̀ è ndìŋgɛ ema è hwɛ̀nèlì hwahvɛhvɛ hwatò ema è mà gbeyà inyɔ è gbeyà hweya rzayi-rzayi ò lì hwa oŋgowàna, nà oma inyɔ è ikayi mèèmà mè anyu ò hwèjèelì hwe ama è Rzàŋgo yà arzu Yerzù Krirztò. Ène eyà è gbeyà màtàŋga mà anyu mà inyàmɛ̀nɛ̀ ò rze.

1 Tɛ̀rzàlonìyà 4:13

Ìi wònyàmòwe kòkò, ja arza nanù ema e hwiye e jɔ̀kɛ̀ lì hvomɛ̀nɛ̀ hwaŋga ema hwà mà ŋwɛɛ, aŋga nanù e rza ɛhwɛ nàa hwatò ema hwa rza hwɛnɛ lìhvìtà.

2 Tɛ̀rzàlonìyà 2:16

Inyɛ̀ Rzàŋgo wà arzu, Yerzù Krirztò mɔ̀ ŋmìti nà Lohwɛ̀, Tatɛ̀ wà arzu, mɔ̀ ema à mà jò lìŋgàna ndèŋgànɛ̀lɛ̀ ò è ndèli yà eni, à jò ètìrzɛ̀ mèèmà mè arzu nà gbèti ema wò rza kuwa, ndèŋgànɛlɛ à jò ŋgbe lìhvìtà ò hweyà hwe gbamù.

1 Tìmotì 1:14

Rzàŋgo ya arzu a ma no ŋgba e ndèli ya eni ema e rza ohvɛɛ lìmɛni. A no gbèyi hvɛ nanù ema na mo lòkɛ̀ na o lì lìŋgana hwahvɛhvɛ hwatò èhwanja i hwèlì mɔ̀kɔ na Yerzù Krirztò.

Tàyìtùrzì 2:13

Inyɛ̀ i gbeye nanù, na oma ja ambɛ̀lɛ̀ na lìhvìtà hwèèmà ema hwe o jɛ̀ɛ̀ o wòŋgo wùnyà ema Lòohwà la arzu, e mɔ̀ ema a Kàrzàmi na e Mòrzùŋgèlì hwa arzu Yerzù Krirztò à ò jà nà èluhwe ya eni.

Hibrù 3:6

Ndi Krirztò nàa è Ŋmanà wà munyanà wa ama Lohwɛ̀, à mà hwɛ lì kànèyà e ndawò yà Lohwà na ŋmèma mɔ̀kɔ. Irzɔ hvɛ i hwèlì ndì hwatò hwa lìtumba la e ndawò ya ama Lohwɛ̀, e hwèlì tɛ nanù ema jo ohvi etembe, ndèŋgànɛ̀lɛ̀ ji ikayi mèèmà me arzu na eyà ema ja àyèkìrzɛ̀nɛ̀ ema ji ikayi màhvìtà mà arzu.

Jèmìrzì 1:18

Lohwɛ̀ à mà kàkɛ̀nɛ̀ nanù ema a jo ŋgba lòŋgɛ lì hvènya, e hvonda ema à mà jo ŋgbe eyà ya eni ya jɔ̀kɛ̀. A ma gbeyà ndi nanù, aŋga nanù o ìtììtènì ja ewèkelì ya eni ya arzɛ irzɔ i hwɛ ndi nàa e mbota ya eni ya worzo ema e mo ŋgbààhwà nàa làhweyà.

1 Pètrò 1:13

O eŋgànɛlɛ rzɔ, e a kpatɛ, e woŋgirzɛnɛ o lì gbeyà èwòlò ema Lohwɛ̀ a arza nanù ema e gbeye. È wowe hvonda ndèŋgànɛ̀lɛ̀ e ika mèèmà me anyu o e ndèli ema Lohwɛ̀ a e ŋgba o e hvonda ema Yerzù Krirztò a jà o lì e àwuŋmɛ̀lɛ̀.

1 Pètrò 1:21

Krirztò a gbèyi inyɔ e ma lòkɛ̀ Lohwɛ̀. È tanɛyi lì lokɛ Lohwɛ̀ na lì ika mèèmà me anyu me arzɛ na mɔ̀ èhwanja mɔ̀ à mà hvùmùlɛ̀ Krirztò o kpelì na lì uŋmɛ̀lɛ̀ èluhwe ya ama Krirztò.

1 Pètrò 1:23

È hwɛni lì hwiya nanù ema Lohwɛ̀ à mà è ŋgbàà lòŋgɛ lì hvènya ò lì akeyà nà è mbɔrzi yà eni. Èŋge mbɔrzi è mà jana lòŋgɛ, ndèŋgànɛ̀lɛ̀, è rza enje ndi eyà ema è hvaŋgèya. È ò hwɛ natɛ̀ɛ nà ò mòlìkɛ̀. Lohwɛ̀ ema à hwèlì ò gbìndèyà, mɔ̀ ndi à è ŋgbelì lìŋgi lòŋgɛ, rzeketɛ è mòtò wà hwènàmà.

1 Pètrò 2:2

È aŋgàmɛ̀nɛ̀yi lì keka lì ana o lì luwa mòlelì mo èlìŋgɛ̀ ema mo rzàŋgi, nyayi hvɔ̀kɔ nàa mɛ̀ɛŋgɛ̀ me hwàna me èyeya mànyɔ̀ŋgɔ̀ ma màhwɛ, aŋga nanù, e lelì tɛ, e oŋga o lì luwa lìrzùŋgahwà lì anyu.

1 Pètrò 3:15

È ŋgbe Krirztò èluhwe nanù ema mɔ̀ ndi à hwèlì e Rzàŋgo ya mòŋgɛ ma anyu. È awoŋgirzɛnɛ o ihvonda ja arzɛ o lì alàhwɛ̀ tɔ̀ imà mòtò ema a e ijòwa o lì ohwa lì hvomɛ̀nɛ̀ lìhvìta ema e ohvani Krirztò.

1 Pètrò 3:21

Ndeŋgànɛ̀lɛ̀ manù malìhwà mà tɛmelì ndi lìlùhwìrzɛ̀. O naŋgɛ, lìŋgi lìlùhwìrzɛ̀ lɔ ndi lì gbèyi ɔ̀ndeŋgàtɛ̀ hwatò hwa rzùŋgahwì o lì akeyà na e ŋginyà ya hwèhvùmuwèlì hwe ama Yerzù Krirztò. Lìlùhwìrzɛ̀ lì rza enje ndi o lì ulɛ la ŋmiŋgo ò nyo, ndi lì hwèlì ndi o lì emeyà o lì gbèeyà Lohwɛ̀ na ŋmèma mo rzàŋgi.

1 Pètrò 3:5

Èhwànja nanù ndi hwalana hwa wòtani hwa kòòhwàà ema hwà mà ika màhvìtà mà awu na Lohwɛ̀ hwà mà hwɛ lì gbeyà o lì uŋmɛ̀lɛ meloŋga me awu. Hwà mà arzihwirzɛ wɔ̀ hwiti o mèjòmɛ̀ me awu.

1 Yòwanìrzɛ̀ 2:29

Inyɛ̀ è hwiye nanù ema Krirztò mɔ̀ à gbeyà hweyà ema hwe hvomɛ̀nɛ̀yi ò worzo wò ama Lohwɛ̀, ò eŋgànɛlɛ inyɛ è hwìye nanù ema tɔ̀ ima mòtò ema à gbèyi mamɛ ema è hvomɛ̀nɛ̀yi ò worzo wò ama Lohwɛ̀ à hwèlì ndi è ŋmanà wà ama Lohwɛ̀.

1 Yòwanìrzɛ̀ 3:3

Tɔ̀ njɛnɛ ema a hwɛni lìni lìhvìtà o ma Krirztò, a arzàŋgìrzɛ̀ mɔ̀ ŋmìti ŋgànà hvɔ̀kɔ hvɛ na oma Krirztò a rzàŋgi.

1 Yòwanìrzɛ̀ 3:9

Tɔ̀ mɔ̀kɔ hwa hwaŋga ema à hwèlì è ŋmanà wà ama Lohwɛ̀ à rza tànɛ lì lìmeyà ò lì gbeyà wòhwe. Èhwànja hwèhwɛ̀ɛ̀lì hwe ama Lohwɛ̀ hwe hwèlì ò tenì yà awu. Hwa rza tanɛ lì lìmeyà ò lì gbeyà wòhwe hvɛ ehwànja Lohwɛ̀ à hwèlì ndi Tatɛ̀ wà awu.

1 Yòwanìrzɛ̀ 4:7

Imbùnda jà ami kòkò, inyɛ jà alìŋgànɛ mɔ̀kɔ nà ɔ̀nɛyi, ehwànja Lohwɛ̀ ndi à jò gbèeyà ema ì lìŋgàne hwatò. Tɔ̀ ima mòtò ema à lìŋgàni hwatò nanù oma à hwèlì ndi nàa è ŋmanà wà ama Lohwɛ̀ ndèŋgànɛlɛ à hwi Lohwɛ̀.

1 Yòwanìrzɛ̀ 5:1

Tɔ̀ ima mòtò ema à lòkɛ̀ nanù ema Yerzù mɔ̀ ndi à hwèlì è Mɔ̀ ema à Ɔ̀kirzɛ̀hwɛ̀yi à hwèlì ndi nàa è ŋmanà wà ama Lohwɛ̀, ndèŋgàna tɔ̀ njɛnɛ ema à lìŋgàni Tatɛ̀ nanù oma à lìŋgàni hvɛ è Ŋmanà wà eni.

1 Yòwanìrzɛ̀ 5:18

Ì hwi nanù ema tɔ̀ ima mòtò ema à mà jɛ̀ɛ̀ è ŋmanà wà ama Lohwɛ̀ à rza tànɛ lì eleyà ò wòhwe. Oŋgo ema à mà jɛ̀ɛ̀ è ŋmanà wà ama Lohwɛ̀, Yerzù à mò kombɛ̀ komba-komba aŋga nanù è Mɔ̀ wà Wòhwe à rza mò gbeyà tɔ̀ eyà yà wòhwe.

1 Yòwanìrzɛ̀ 5:4

Èhwanja tɔ̀ njɛnɛ ema à hwèlì è ŋmanà wà ama Lohwɛ̀ à mà màa lì rzuwànà è rze. Lìtiŋga ema mɔ̀ à mà màà lì rzuwànà è rze lì hwèlì ndi nanù ema, irzɔ ì lòkɛ̀ nanù ema Yerzù ndi à hwèlì è Mɔ̀ ema à Ɔ̀kirzɛ̀hwɛ̀yi nà Lohwɛ̀.