Uli Anjam 9:20 - Yesus Aqa Anjam Bole

²⁰ Naŋgi ugeugeinjreqnabqa tamo uŋgasari qudei gulube qalub dena ñumosai qaji naŋgi di unsibqa naŋgi deqa are bulyosai. Naŋgo baŋ na sulum gereiyeleŋeb qaji di dego naŋgi uratosai. Naŋgi na mondor uge uge ti qotei gisa gisaŋ naŋgi ti sulum kalil naŋgo baŋ na gereiyeleŋeb qaji naŋgi ti di biŋinjroqneb. Naŋgo kumbra uge di naŋgi uratosaioqneb. Sulum di gol na silva na bras na meniŋ na ŋamtaŋ na ti gereiyeleŋeb. Sulum di qunuŋ saiqoji. Deqa naŋgi ŋam atqa keresai. Naŋgi anjam quqwa keresai. Naŋgi walwelqa keresai.

Uli Anjam 9:20 ပူးပေါင်းရင်းမြစ်များ

Matyu 21:32

Di kiyaqa? Jon yansnjro qaji tamo a nuŋgoq bosiqa Qotei aqa kumbra bole niŋgi osorŋgonaqa niŋgi Jon aqa anjam quetosai. Ariya takis o qaji tamo ti gam qaji uŋa ti naŋgi Jon aqa anjam geregere queteb. Naŋgi quetonabqa niŋgi unsibqa ariya niŋgi olo are bulyosai. Osib niŋgi Jon aqa anjam quetosai dego.”

Aposel 17:29

Di bole. Iga Qotei aqa aŋgro. Deqa niŋgi quiye. Qotei a sulum bul sai. Tamo naŋgi gol na silva na meniŋ na ti sulum gereiyeqnub Qotei a dego sai. Tamo naŋgo segi baŋ na ti qalie na ti sulum gereiyeqnub. Qotei a sulum deqaji bul unu niŋgi degaib.

Aposel 19:26

Ariya Pol a na gago wau endi ugeteqnu. Agi a gam endena ugeteqnu. A na tamo uŋgasari gargekoba naŋgi are tigeltetnjroqnsiqa minjreqnu, ‘Tamo naŋgi baŋ na qotei gereiyo qaji di qotei bolesai. Di qotei gisaŋ.’ Yeqnaqa naŋgi aqa anjam di dauryosib qotei Artemis qoreiyeqnub. Osib naŋgi Artemis aqa atra tal sulum dego awaiyqa urateqnub. Pol aqa kumbra di niŋgi uneqnub. Aqa anjam di dego niŋgi queqnub. Aqa kumbra di Efesus qureq endia segi yosai. Esia sawa keretoqnsiqa dia dego a kumbra di yeqnu.

Aposel 7:41

Onaqa bati deqa gago moma naŋgi bulmakau sigitosib aqa sulum gereiyeb. Gereiyosib qotei gisaŋ di atraiyosib areboleboleinjrej.

2 Korin 12:21

E olo niŋgi qa bosiy nuŋgo ambleq di tamo gargekoba nami une yoqneb qaji naŋgi are bulyosaiunub degsi unqai kio? Degsi unqai di ijo Qotei a nuŋgo ŋamgalaq di e jemai ebqas. Tamo naŋgi di naŋgo une nami yoqneb qaji agiende. Naŋgi kumbra uge jiga ti yoqneb. Naŋgi sambala kumbra yoqneb. Naŋgi kumbra uge yqajqa are prugnjroqnej. E niŋgi qa bosiy tamo naŋgi di naŋgo une olo qoreiyosai degsi unqai di e naŋgi qa are gulubeibqas. E deqa ulaeqnum.

1 Timoti 4:1

Qotei aqa Mondor a anjam endegsi babtej. Mondoŋ diŋo bati jojomoqnimqa tamo qudei naŋgi Kristus qa naŋgo areqalo siŋgilatqa uratqab. Di kiyaqa? Naŋgi gisaŋ mondor ti mondor uge uge ti naŋgo anjam qusib dauryqab deqa.

Uli Anjam 15:1

Onaqa maŋwa kobaquja bei laŋ goge di brantonaq unem. Unsimqa tulaŋ koba prugugetem. Laŋ aŋgro 7-pela naŋgi iŋgi uge 7-pela ojesonab uneleŋem. Tamo uŋgasari naŋgi ugeugeinjrqajqa deqa iŋgi uge di ojesoqneb. Iŋgi uge di koboamqa gulube bei brantqasai. Iŋgi uge 7-pela di koboamqa Qotei aqa minjiŋ torei koboqas.

Uli Anjam 16:8

Onaqa laŋ aŋgro namba 4 a gilsiqa aqa tabir seŋq di bilentonaqa Qotei na odonaqa seŋ tulaŋ kaŋkaŋosiqa tamo naŋgo jejamu koitetnjrej.

Uli Anjam 9:19

Hos naŋgo siŋgila naŋgo medabuqsi weruqsi unu. Naŋgo weru amal bul, gate ti. Naŋgo weru dena tamo uŋgasari naŋgi ugeugeinjroqneb.

Uli Anjam 9:21

Ariya tamo naŋgi di naŋgo kumbra tulaŋ uge. Naŋgo kumbra uge agi ubtsiy marqai. Naŋgi na tamo ñumoqnsib moiotnjroqneb. Naŋgi gumaniŋoqneb. Naŋgi quñam qaloqneb. Naŋgi laŋa laŋa sambalaoqneb. Naŋgi bajiŋoqneb. Naŋgo kumbra uge uge kalil di naŋgi uratosaioqneb. Deqa naŋgi are bulyosaioqneb.