Uli Anjam 7:14 - Yesus Aqa Anjam Bole

¹⁴ Onaqa e na kamba minjem, “O tamo koba, ni segi qalie.” Onaqa merbej, “Tamo uŋgasari naŋgi di jeu tamo naŋgi na tulaŋ ugeugeinjrsib gulube ti jaqatiŋ ti enjreb. Enjreb deqa naŋgi na Kaja Du aqa leŋ na naŋgo gara yanseleŋonab tulaŋ qatej.

Uli Anjam 7:14 ပူးပေါင်းရင်းမြစ်များ

Matyu 24:21

Bati deqa tamo uŋgasari naŋgi gulube tulaŋ kobaquja oqab. Gulube deqaji nami brantosaioqnej. Qotei na mandam atej bati deqa gulube deqaji brantosai dena bosi bosiq agi bini unum. Bunuqna laŋa ambleq di dego brantqasai. Agi bati qujai deqa brantqas.

Mak 13:19

Bati deqa tamo uŋgasari naŋgi gulube tulaŋ kobaquja oqab. Gulube deqaji nami brantosaioqnej. Qotei na mandam atej bati deqa gulube deqaji brantosai dena bosi bosiq agi bini unum. Bunuqna laŋa ambleq di dego brantqasai. Agi bati qujai deqa brantqas.

Jon 16:33

Niŋgi na e beterbosib are lawo na sqajqa deqa e na anjam endi niŋgi merŋgonum. Niŋgi mandamq endia sosib niŋgi gulube koba oqnqab. Deqa uŋgum. Niŋgi are siŋgilatiye. E segi na mandam endeqa siŋgila kalil gotraŋyosim tigelejunum.”

Aposel 14:22

Naŋgi aiyel degsib giloqnsibqa tamo uŋgasari Yesus dauryoqneb qaji naŋgo are siŋgilatetnjroqnsib minjroqneb, “Niŋgi Yesus qa nuŋgo areqalo siŋgilatosib soqniye. Bole, niŋgi gulube gargekoba iteleŋoqnqab. Di uŋgum. Gulube nuŋgoq boqnibqa Qotei a nuŋgo Mandor Koba sosim niŋgi taqatŋgoqnqas.”

Rom 5:3

Ariya iga deqa segi areboleboleigosai. Iga gulube oqnsim unum deqa ti areboleboleigeqnu. Di kiyaqa? Iga qalieonum, gulube dena gago are siŋgilatetgeqnaqa iga siŋgila na tigeleqnum.

1 Korin 6:11

Nami niŋgi qudei tamo deqaji soqneb. Ariya bunuqna niŋgi are bulyeb deqa Qotei na nuŋgo are miligi yansetŋgosiqa niŋgi aqa segi kumbra boleq di atsiqa Tamo Koba Yesus Kristus aqa ñam na ti gago Qotei aqa Mondor aqa siŋgila na ti niŋgi gereiŋgej. Deqa bini niŋgi aqa ŋamgalaq di tamo bole une saiqoji unub.

2 Tesalonaika 1:4

Utru deqa iga qure kalilq di laqnsimqa tamo uŋgasari Qotei louqa koroeqnub qaji naŋgi niŋgi qa sainjroqnsim nuŋgo ñam soqteqnum. Kumbra uge kalil jeu tamo naŋgi na niŋgi eŋgeqnub qaji deqa ti gulube kalil niŋgi qa branteqnu qaji deqa ti iga na naŋgi sainjroqnsim endegsi minjreqnum, “Tesalonaika Kristen naŋgi Yesus qa naŋgo areqalo tulaŋ siŋgilatoqnsib deqa naŋgi gulube ti jaqatiŋ ti kalil di qoboiyoqnsib siŋgila na tigelejunub.”

Hibru 13:12

Dego kere Yesus a dego Jerusalem qure qalaq aisiq dia jaqatiŋ osiq aqa segi leŋ bilentosiq tamo uŋgasari naŋgi qa moiej. Aqa leŋ dena tamo uŋgasari naŋgi yansnjrimqa naŋgi Qotei aqa segi tamo uŋgasari boledamu sqajqa deqa marsiq naŋgi qa moiej.

Hibru 9:14

Ariya Kristus aqa leŋ na wagme naŋgo leŋ tulaŋ buŋyejunu. Kristus aqa jejamuq di jiga bei saiqoji. Qotei aqa Mondor gaigai sqas qaji a na Kristus siŋgilatonaqa aqa segi jejamu ŋambile sonaqa osiqa Qotei atraiyej. Osiqa aqa leŋ na gago are miligi yansetgej. A gago jejamu segi yansetgosai. A gago une kobotetgej deqa iga qalieonum, iga Qotei aqa ŋamgalaq di une saiqoji unum. Deqa iga olo dal anjam dauryqajqa are qalqasai. Di kiyaqa? Dal anjam dena iga ŋambile sqa keresai. Ariya iga Qotei ŋambile gaigai unu qaji a qa are qaloqnsim wauetoqnqom di iga ŋambile sqom.

1 Pita 1:19

Kristus aqa leŋ aiej qaji dena niŋgi awaiŋgej. Kristus aqa leŋ di tulaŋ bolequja. Kristus aqa jejamuq di une bei saiqoji. Agi kaja du du nami Qotei atraiyoqneb qaji naŋgo jejamuq di yu bei saiqoji dego kere.

1 Jon 1:7

Qotei a suwaŋoq di unu dego kere iga dego suwaŋoq di walwelqom di iga Qotei aqa tamo uŋgasari kalil naŋgi ti areqalo qujaitosim sqom. Soqnimqa Qotei aqa Ŋiri Yesus aqa leŋ aiej qaji dena gago une kalil kobotetgoqnimqa iga aqa ŋamgalaq di tamo bole une saiqoji sqom.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 12:11

Gago was naŋgi naŋgo segi jejamu qa ulaosaioqneb. Naŋgi mandamq endia bole sqajqa deqa are koba qalosaioqneb. Kaja Du moisiq aqa leŋ aiej kumbra dena naŋgi siŋgila osib aqa anjam mare mare laqajqa siŋgilaoqneb. Naŋgi endegsib are qaloqneb, ‘Uŋgum, jeu tamo naŋgi na iga lugwa osib lugeb. Iga deqa ulaqasai.’ Naŋgo kumbra dena naŋgi qoto siŋgilaosib jeu tamo naŋgi di gotraŋyoqneb.

Uli Anjam 15:2

Onaqa e olo ŋam atsimqa iŋgi kobaquja bei yuwal baŋga bul unem. Iŋgi di tulaŋ jeqilosiq qunuŋ bulej. Yuwal babaŋ gogeq di ŋamyuo puloŋoqnej. Tamo uŋgasari nami wagme juwaŋ ti aqa sulum ti aqa ñam aqa toqor ti qoto itnjrsib qoto siŋgilaeb qaji naŋgi yuwal qalaq di tigelosib Qotei aqa gombiŋ ojeleŋesoqneb.

Uli Anjam 17:6

Uŋa dena Qotei aqa segi tamo uŋgasari naŋgi ugeugeinjroqnsiqa ñumeleŋeqnaq naŋgi moreŋoqneb. Tamo uŋgasari naŋgi di Yesus qa naŋgo areqalo siŋgilatosib aqa ñam marsib laqneb qaji. Uŋa dena naŋgi ñumeqnaq naŋgi moreŋosib naŋgo leŋ aieqnaqa a leŋ di wain bul uyoqnsiq nanarieqnaq e degsi unsimqa tulaŋ koba prugugetosim are koba qaloqnem.

Uli Anjam 2:9

Ni gulube ti jaqatiŋ ti ejunum di e qalie. Ni iŋgi tulaŋ saiqoji unum di dego e qalie. Di uŋgum. Ni laŋ qure qa iŋgi iŋgi koba eleŋejunum. E qalie, tamo qudei naŋgi na ni misiliŋmoqnsib anjam uge uge mermeqnub. Naŋgi segi qa mareqnub, “Iga Juda tamo.” Di gisaŋ. Naŋgi Satan aqa aŋgro.

Uli Anjam 22:14

“Tamo uŋgasari naŋgo gara yansonub qatqo qaji naŋgi tulaŋ areboleboleinjrim sqab. Naŋgi ŋambile qa ŋam gei osib uyqa kere. Naŋgi Qotei aqa qure koba dego miligiq gilqa kere.

Uli Anjam 5:9

Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb, “O Kaja Du, ni buk di osimqa kandel aqa namur buk qandratejunu qaji di waqtqa kere. Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub. Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.

Uli Anjam 7:9

Onaqa bunuqna e olo ŋam atsimqa tamo uŋgasari tulaŋ gargekoba koroesonab unjrem. Tamo uŋgasari naŋgi di tamo bei na sisiyqa keresai. Naŋgi tulaŋ gargekoba. Naŋgi di kalil leŋ segi segi qaji, sawa segi segi qaji, jejamu segi segi qaji, anjam maro segi segi qaji. Naŋgi Qotei aqa awo jaram ti Kaja Du ti naŋgo areq di tigelosibqa gara jugo qat olekokba jigeleŋosib naŋgo baŋ na tuwom baŋga ojeleŋesoqneb.