Uli Anjam 3:5 - Yesus Aqa Anjam Bole

⁵ “‘Tamo a Satan ombla qotsim siŋgilas di e na gara qat jigetqai. Aqa ñam Qotei a nami ŋambile qa buk miligiq di neŋgreŋyej qaji di e na olo nuntqasai. E ijo Abu aqa laŋ aŋgro naŋgi ti naŋgo ulatamuq dia aqa ñam ubtqai.

Uli Anjam 3:5 ပူးပေါင်းရင်းမြစ်များ

Matyu 10:32

Osiqa Yesus a olo anjam endegsi minjrej, “Tamo naŋgi ijo ñam tamo uŋgasari naŋgo ulatamuq dia mareqnub qaji mondoŋ e kamba ijo Abu laŋ qureq di unu qaji aqa ulatamuq dia naŋgo ñam dego marqai.

Luk 10:20

Mondor uge naŋgi nuŋgo anjam dauryosib jaraieqnub niŋgi deqa tulaŋ areboleboleiŋgaiq. Nuŋgo ñam ijo Abu na laŋ qureq dia neŋgreŋyqo unu. Niŋgi deqa tulaŋ areboleboleiŋgem.”

Luk 12:8

Osiqa Yesus a olo anjam endegsi minjrej, “Tamo naŋgi ijo ñam tamo uŋgasari naŋgo ulatamuq dia mareqnub qaji mondoŋ e Tamo Aŋgro na kamba Qotei aqa laŋ aŋgro naŋgo ulatamuq dia naŋgo ñam dego marqai.

Filipai 4:3

O was, e ni dego endegsi mermqai. Aqo ombla wau qujai deqa ni na uŋa aiyel naŋgi di aqaryainjrimqa naŋgi are qujaitosib sqab. Naŋgi aiyel uŋa bole. Naŋgi e daurbosib ombla na Yesus aqa anjam mare mare laqnub qaji. E na tamo qudei e koba na waueqnub qaji naŋgi ti Klemem ombla na naŋgi dego minjritqa naŋgi na uŋa aiyel naŋgi di aqaryainjrebe. Naŋgo ñam di agi Qotei na ŋambile qa buk miligiq di neŋgreŋyej unu.

Jut 1:24

O was qu, Qotei a na niŋgi taqatŋgoqneme. Yim niŋgi uloŋqasai. Mondoŋ a na niŋgi joqsim laŋ qureq osi oqimqa niŋgi aqa riaŋ unsib une saiqoji sosib tulaŋ areboleboleiŋgim sqab.

Uli Anjam 13:8

Deqa tamo uŋgasari kalil mandamq endi unub qaji naŋgi na wagme juwaŋ di biŋiyoqnsib aqa ñam tulaŋ koba soqtoqneb. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai. Buk di agi Kaja Du nami qalnab moiej qaji aqa segi buk.

Uli Anjam 17:8

Wagme juwaŋ ni unonum qaji di a nami soqnej. Ariya a bini sosai. Bunuqna a olo sub guma kobaq dena brantosim torei padalqas. Amqa tamo uŋgasari kalil mandamq di unub qaji naŋgi na wagme juwaŋ di unsibqa naŋgi prugugetqab. Wagme juwaŋ di agi a nami soqnej. A bini sosai. A olo bunuqna brantqas. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai.

Uli Anjam 19:8

Qotei na a gara qat tulaŋ naimyo jigetqo. Gara di tulaŋ milalosiq suwaŋejunu.” Gara qat naimyo di agi kumbra bole tiŋtiŋ kalil Qotei aqa segi tamo uŋgasari naŋgi yeqnub qaji.

Uli Anjam 2:11

“‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di a moio bunu qaji turqasai. Moio dena a ugetqa keresai. Sai bole sai.’ O Jon, ni anjam degsim neŋgreŋyosim Smerna naŋgo laŋ aŋgro aqaq qariŋye.”

Uli Anjam 2:7

“‘Tamo a dabkala ti sqas di a anjam Qotei aqa Mondor Bole na tamo uŋgasari qure qureq dia ijo ñam qa koroosib loueqnub qaji naŋgi minjreqnu di geregere quem. Tamo a Satan ombla qotsim siŋgilaqas di e na laŋ qure qa ŋam gei osiy anaiyit a uysim dena ŋambile gaigai sqas. Ŋam di agi Qotei aqa laŋ qureq di unu.’ O Jon, ni anjam degsim neŋgreŋyosim Efesus naŋgo laŋ aŋgro aqaq qariŋye.”

Uli Anjam 20:12

Onaqa e olo ŋam atem di tamo uŋgasari nami moreŋeb qaji naŋgi Qotei aqa awo jaram namoq di tigelesonab unjrem. Tamo ñam ti tamo laŋaj ti kalil unjrem. Unjreqnam laŋ aŋgro qudei naŋgi na buk qudei osi bosib waqteleŋeb. Buk miligiq di kumbra kalil tamo uŋgasari naŋgi nami yoqneb qaji di Qotei na neŋgreŋyonaq soqneb. Buk bei dego laŋ aŋgro naŋgi osi bosib waqteb. Buk di ŋambile gai-gai sqajqa buk. Ariya Qotei a awo jaram kobaqujaq di aweso-siqa anjam kalil buk qudei miligiq di neŋgreŋyonaq soqnej qaji di sisiyosiq anjam dena tamo uŋgasari moreŋo qaji naŋgo kumbra kalil qa naŋgi peginjrej.

Uli Anjam 20:15

Tamo uŋgasari kalil naŋgo ñam ŋambile qa buk miligiq di sosai qaji naŋgi di Qotei na breinjrnaq ŋamyuoq aieleŋeb.

Uli Anjam 21:27

Ariya iŋgi jiga ti tamo naŋgi kumbra uge uge yeqnub qaji naŋgi ti tamo naŋgi gisaŋ anjam mareqnub qaji naŋgi ti qure di miligiq gilqa keresai. Tamo uŋgasari naŋgo ñam ŋambile qa buk miligiq di Qotei na neŋgreŋyej qaji naŋgi segi qure di miligiq gilqa kere. Ŋambile qa buk di agi Kaja Du aqa segi buk.

Uli Anjam 22:19

Ariya tamo bei a Qotei aqa anjam e buk endia neŋgreŋyonum qaji mutu bei osim taqal waiyqas di Qotei na kamba tamo di taqal waiyimqa a ŋambile qa ŋam gei osim uyqasai. A Qotei aqa qure koba dego miligiq gilqasai.

Uli Anjam 3:12

“‘Tamo a Satan ombla qotsim siŋgilaqas di e na a osiy ijo Qotei aqa tal aqa tamo bul namoq di tigeltit sqas. Deqa a olo bunu Qotei aqa talq dena oqedqasai. Aqa jejamuq di e na ijo Qotei aqa ñam ti ijo Qotei aqa qure koba agi Jerusalem bunuj aqa ñam ti ijo segi ñam bunuj ti neŋgreŋyqai. Jerusalem bunuj agi laŋ qureq di unu. Qure di ijo Qotei aqaq dena mandamq aiqas.

Uli Anjam 3:4

“‘Ariya tamo uŋgasari qudei Sardis qureq di unub qaji naŋgo kumbra bolequja. Naŋgo gara jigatosai deqa naŋgi gara qat jigsib e ombla walweloqnqab.

Uli Anjam 6:11

Onaqa Qotei a gara jugo qat olekokba eleŋosiqa naŋgi segi segi jigetnjrsiqa minjrej, “Niŋgi mati kiñala aqaratosib tariŋoqnsib soqniye. Jeu tamo naŋgi na niŋgi liŋgeb dego nuŋgo kadoi naŋgi ti nuŋgo was naŋgi ti degsib olo ñumqab. Tamo gembub jeu tamo naŋgi na ñumqab di e segi na maritqa naŋgi kalil ñumekritib kereamqa bati deqa e kamba naŋgi ñumqai. Naŋgi na niŋgi liŋgnab nuŋgo leŋ aiej deqa e kamba naŋgi ñumit naŋgo leŋ aiqas.”