Uli Anjam 2:13 - Yesus Aqa Anjam Bole

¹³ Qure ni di unum qaji naŋgo kumbra e geregere qalieonum. Qure di Satan a na taqatejunu. Aqa awo jaram koba qure dia unu. Ariya e qalie, ni ijo ñam siŋgila na ojesosim e qa ino areqalo siŋgilateqnum. Ino areqalo di ni na ulitosaieqnum. Nami ijo anjam palonto tamo Antipas a niŋgi koba na wauoqnej. Antipas a ijo anjam geregere dauryoqnej deqa jeu tamo naŋgi nuŋgo qureq dia a qalnab moiej. Moinaqa ni di unsimqa deqa ni e qoreibosai. Qure dia agi Satan a unu.

Uli Anjam 2:13 ပူးပေါင်းရင်းမြစ်များ

Matyu 10:23

Qure bei beiq dia tamo uŋgasari naŋgi na niŋgi ugeugeiŋgoqnibqa niŋgi naŋgo qure di uratoqnsib olo qure beiq giloqniye. Niŋgi quiye. E bole merŋgwai. Niŋgi Israel naŋgo qure qure kalil keretosaisoqnibqa e Tamo Aŋgro olo bqai.

Matyu 24:9

“Bati deqa naŋgi na niŋgi ojsib jaqatiŋ ti gulube ti eŋgwab. Osib niŋgi luŋgsib moiotŋgwab. Niŋgi ijo ñam ejunub deqa tamo uŋgasari kalil naŋgi niŋgi qa are tulaŋ ugeinjroqnqas.

Matyu 4:10

Onaqa Yesus na minjej, “Satan, ni ulaŋ. Qotei aqa anjam bei nami endegsib neŋgreŋyeb unu, ‘Ino Tamo Koba Qotei a segi qa louoqnsimqa aqa sorgomq di soqne.’”

Luk 21:17

Niŋgi ijo ñam ejunub deqa tamo uŋgasari kalil naŋgi niŋgi qa tulaŋ ugeoqnsib jeutŋgoqnqab.

Aposel 9:14

Deqa ni que. Atra tamo kokba naŋgi na Sol qariŋyonab Damaskus qure endeq bej. A qure endia tamo uŋgasari ino ñam qa loueqnub qaji naŋgi tontnjrsim joqsim Jerusalem gilqajqa deqa bej.”

1 Tesalonaika 5:21

Anjam kalil niŋgi queqnub qaji di niŋgi geregere quoqnsib tenemtoqnsib pegiyoqniye. Osib kumbra kalil dego pegiyoqnsib kumbra bole segi siŋgilatosib ojesoqniye.

1 Timoti 5:8

Ariya ni que. Tamo bei na aqa segi leŋ naŋgi ti aqa tal qujai naŋgi ti geregereinjrqasai di a kumbra tulaŋ ugedamu yqo. A Yesus qa aqa areqalo siŋgilatqa uratobulqo. Ni une. Tamo naŋgi Qotei qaliesai qaji naŋgi kumbra uge deqaji yosaieqnub.

2 Timoti 1:13

O Timoti, anjam bole kalil e nami ni mermoqnem qaji di ni geregere siŋgilatsim dauryoqne. Osim Kristus Yesus qa ino areqalo siŋgilatoqnsim a qalaqalaiyoqne. Osim kumbra dena ni na tamo uŋgasari naŋgi Qotei aqa anjam minjroqne.

2 Timoti 2:12

Iga siŋgila na tigeloqnsim gulube kalil qoboiyoqnsim unum deqa mondoŋ iga Kristus ombla mandor kokba sqom. Ariya iga a qoreiyqom di a na kamba iga qoreigwas.

Hibru 10:23

Gago areqalo iga Qotei qa siŋgilatejunum qaji deqa ti iŋgi bole bole iga mondoŋ oqajqa tariŋeqnum qaji deqa ti iga maroqnsim laqnum. Ariya gago areqalo di iga olo siŋgila na ojesqom. Iga ulaosim areqalo aiyeltqasai. Iga qalie, kumbra kalil Qotei a nami yqa marej qaji di a yqas.

Hibru 3:6

Ariya Kristus a Qotei aqa Ŋiri. Deqa Qotei na a wau yonaqa a na Qotei aqa tamo uŋgasari naŋgi taqatnjroqnej. Tamo uŋgasari naŋgi di Qotei aqa tal bul. Kristus a Qotei aqa anjam geregere dauryoqnsiq wau di yoqnej. Deqa iga gaigai Kristus qa gago areqalo siŋgilatoqnsim a olo bqajqa deqa tariŋoqnsim sqom. Iga degyqom di iga dego Qotei aqa tal bul sqom.

Jems 2:7

Qotei na aqa Ŋiri Kristus aqa ñam boledamu nuŋgoq di atej unu. Ariya tamo yai naŋgi na ñam di olo misiliŋyeqnub? Silali tamo naŋgi segi na degyeqnub.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 11:3

Bati deqa e na ijo anjam palonto tamo aiyel qariŋnjritqa naŋgi are ugeo qaji gara jigsib ijo anjam palontoqnibqa bati 1,260 gilqas.”

Uli Anjam 12:11

Gago was naŋgi naŋgo segi jejamu qa ulaosaioqneb. Naŋgi mandamq endia bole sqajqa deqa are koba qalosaioqneb. Kaja Du moisiq aqa leŋ aiej kumbra dena naŋgi siŋgila osib aqa anjam mare mare laqajqa siŋgilaoqneb. Naŋgi endegsib are qaloqneb, ‘Uŋgum, jeu tamo naŋgi na iga lugwa osib lugeb. Iga deqa ulaqasai.’ Naŋgo kumbra dena naŋgi qoto siŋgilaosib jeu tamo naŋgi di gotraŋyoqneb.

Uli Anjam 13:2

Wagme juwaŋ e unem qaji di pusi juwaŋ bul kobaquja. Pusi di aqa ñam lepat. Aqa siŋga bea aqa siŋga bul. Aqa medabu laion aqa medabu bul. Amal uge kobaquja a na aqa segi siŋgila wagme juwaŋ di yosiqa minjej, “Ni e ombla mandor kokba sqom.” Osiqa a siŋgila kobaquja yej.

Uli Anjam 14:12

Kumbra di brantimqa Qotei aqa segi tamo uŋgasari naŋgi unsibqa siŋgila na tigelesoqnebe. Tamo uŋgasari naŋgi di agi Qotei aqa dal anjam geregere dauryoqnsibqa naŋgo areqalo Yesus qa siŋgilateqnub.

Uli Anjam 17:14

Osib Kaja Du qa ŋiriŋosib qoto itqab. Amqa Kaja Du a qoto siŋgilaosimqa naŋgi ñumqas. Kaja Du a tamo kokba kalil naŋgo Tamo Koba. A mandor kokba kalil naŋgo Mandor Koba. Tamo kalil a ombla unub qaji naŋgi a ti qoto siŋgilaqab. Naŋgi di Kaja Du na metnjrsiq aqa segi tamo uŋgasari sqajqa giltnjrej qaji. Deqa naŋgi aqa anjam bole dauryeqnub.”

Uli Anjam 17:6

Uŋa dena Qotei aqa segi tamo uŋgasari naŋgi ugeugeinjroqnsiqa ñumeleŋeqnaq naŋgi moreŋoqneb. Tamo uŋgasari naŋgi di Yesus qa naŋgo areqalo siŋgilatosib aqa ñam marsib laqneb qaji. Uŋa dena naŋgi ñumeqnaq naŋgi moreŋosib naŋgo leŋ aieqnaqa a leŋ di wain bul uyoqnsiq nanarieqnaq e degsi unsimqa tulaŋ koba prugugetosim are koba qaloqnem.

Uli Anjam 2:2

Ino kumbra ti ino wau ti di e qalieonum. E qalie, ni siŋgila na tigeloqnsimqa tamo uge naŋgi qa tulaŋ asgimeqnu. Tamo naŋgi di endegsib mermeqnub, “Iga dego Qotei aqa anjam marqajqa deqa qariŋgwo.” Di gisaŋ. Qotei na naŋgi qariŋnjrosai. Ni naŋgo anjam di tenemtosim ni qalieonum, naŋgi gisaŋ tamo. Ni keretsim qalieonum.

Uli Anjam 3:11

E ni qa boqujatqai. Deqa anjam ni ojejunum qaji di siŋgila na ojesoqne. Amqa tamo bei na ino awai bole yaimqasai.

Uli Anjam 3:3

Anjam bole ni nami qusim dauryem qaji deqa olo are qale. Are qalsim anjam di geregere dauryosim are bulye. Ni ŋam sirosim tigelqasai di e bajiŋ tamo bul ni qa boqujatqai. Bati gembu e inoq bqai di ni qalieqa keresai.