Uli Anjam 13:13 - Yesus Aqa Anjam Bole

¹³ Wagme juwaŋ bunu brantej qaji di a maŋwa tulaŋ kokba yeqnaq unem. Maŋwa bei endegsi yoqnej. A na tamo uŋgasari naŋgo ŋamgalaq dia laŋ goge tarosiq ŋamyuo meteqnaqa laŋ goge dena ŋamyuo brantoqnsiqa mandamq aioqnej.

Uli Anjam 13:13 ပူးပေါင်းရင်းမြစ်များ

Matyu 16:1

Onaqa Farisi naŋgi ti Sadyusi naŋgi ti Yesus aqa areq bosibqa a anjam bei grotimqa qusib naŋgi a ojqajqa deqa gisaŋyosib minjeb, “Ni endego Qotei aqa maŋwa bei babtimqa iga unsim dena poigwas, ni Qotei aqa wau ojeqnum.”

Matyu 24:24

Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

Mak 13:22

Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

2 Timoti 3:8

Nami Janes wo Jambres wo naŋgi aiyel Moses jeutoqneb. Dego kere bini gisaŋ tamo naŋgi di dego Qotei aqa anjam bole jeuteqnub. Naŋgo areqalo tulaŋ niñaqejunu. Naŋgi Qotei qa naŋgo areqalo siŋgilaboletosai.

Uli Anjam 11:5

Tamo qudei naŋgi na naŋgi aiyel ugeugeinjrqa maroqnibqa naŋgo aiyel medabuq na ŋamyuo brantosim naŋgo jeu tamo naŋgi di koitnjrim yuekritsib moreŋqab. Deqa tamo bei na naŋgi aiyel ugeugeinjrqa marimqa kumbra dena qujai a segi moiqas.

Uli Anjam 16:14

Mondor uge qalub dena maŋwa uge uge siŋgila kokba yoqnsibqa mandor kokba sawa sawa kalil taqate-junub qaji naŋgoq giloqnsib minjreqnub, “Niŋgi na nuŋgo qaja tamo kalil koroinjrsib minjribqa tamo uŋgasari naŋgo une qa peginjrqa batiamqa naŋgi qoteleŋqab.” Naŋgi degsib minjreqnub. Qotqajqa bati di agi Qotei siŋgila koba ti unu qaji aqa bati koba.

Uli Anjam 19:20

Ariya tamo hos quraq di awesoqnej qaji a na wagme juwaŋ wo Satan aqa gisaŋ anjam maro tamo wo naŋgi aiyel ŋambile sonab ojsiqa wainjrnaq ŋamyuoq aieb. Ŋamyuoq dia meniŋ kalil yusiq ñaŋgaeqnu. Satan aqa gisaŋ anjam maro tamo di nami wagme juwaŋ aqa ŋamgalaq dia maŋwa tulaŋ kokba yoqnej. Aqa kumbra dena a na tamo uŋgasari wagme juwaŋ aqa toqor osib aqa sulum biŋiyoqneb qaji naŋgi gisa gisaŋnjroqnej.

Uli Anjam 20:9

Naŋgi sawa sawa kalilq dena olo beleŋosib Qotei aqa segi qure koba a na tulaŋ qalaqalaiyeqnu qaji di agutesqab. Osib Qotei aqa segi tamo uŋga-sari naŋgo so sawa dego agutesqab. Qaja tamo naŋgi di bosib Qotei aqa qure di agutesoqnibqa laŋ goge dena ŋamyuo aisim naŋgi koitnjrqas.