Taitus 3:14 - Yesus Aqa Anjam Bole

¹⁴ Ni na Kristen tamo uŋgasari naŋgi gam osornjroqnimqa naŋgi wau bole yoqnqajqa geregere qalieqab. Qalieosib tamo uŋgasari iŋgi iŋgi qa truqueqnub qaji naŋgi aqaryainjroqnqab. Naŋgi laŋa sosib Qotei aqa kumbra dauryosaio uge.

Taitus 3:14 ပူးပေါင်းရင်းမြစ်များ

Matyu 21:19

Mamyonaqa ŋam atsiqa qura baŋga ti gam qalaq di tigelesonaq unsiqa aqa gei unqajqa utruq gilej. Gilsiq unej qura gei bei saiqoji. Baŋga segi sonab unej. Unsiqa qura di minjej, “Ni olo bunu geitqasai.” Degsi minjnaqa bati qujai deqa qura di utru ti kalil laosiq moiej.

Matyu 7:19

Ŋam kalil gei boletosaieqnub qaji di tamo naŋgi na qomeleŋoqnsib ŋamyuoq di breinjreqnub.

Jon 15:16

“Niŋgi na e giltbosai. E na niŋgi ijo segi qa osim giltŋgem. Osim niŋgi wau eŋgem. Yimqa niŋgi gilsib gei koba ateleŋoqnibqa nuŋgo gei bole gaigai sqas. Deqa niŋgi ijo ñam na iŋgi bei qa ijo Abu pailyqab di a na eŋgwas.

Jon 15:8

Niŋgi ŋam dani bul sosib gei koba ateleŋabqa tamo uŋgasari naŋgi nuŋgo kumbra di unsibqa niŋgi qa endegsib marqab, ‘Naŋgi Yesus aqa aŋgro bole.’ Amqa nuŋgo kumbra dena ijo Abu aqa ñam tulaŋ kobaqujaqas.

Aposel 18:3

Pol a naŋgi ti wau qujai. Deqa naŋgi koba na Korin qureq di sosibqa silali qa wauoqneb. Naŋgo silali wau agi naŋgi gara na tal gereiyoqneb.

Aposel 20:35

Kumbra kalil e nuŋgo ambleq di yoqnem qaji di niŋgi segi unoqneb. Unoqnsib endegsi poiŋgoqnej, ‘Pol aqa kumbra di bole. Deqa iga Pol aqa kumbra di dauryosim siŋgila na wauoqnsimqa tamo uŋgasari siŋgila saiqoji unub qaji naŋgi aqaryainjroqnqom. Iga Tamo Koba Yesus aqa anjam nami marej qaji deqa are qaloqnsim degsi wauoqnqom.’ Agi Yesus a segi nami endegsi marej, ‘Tamo bei na tamo bei aqaryaiyosim iŋgi bei yqas di tamo iŋgi oqas qaji a areboleboleiyqas. Ariya tamo a na iŋgi yqas qaji a olo tulaŋ arebolebolekobaiyqas.’”

Rom 12:13

Qotei aqa segi tamo uŋgasari qudei naŋgi iŋgi qa truquoqnibqa niŋgi na naŋgi aqaryainjroqniye. Tamo laŋaj naŋgi dego nuŋgo meq boqnibqa naŋgi oqnsib geregereinjroqniye.

Rom 15:28

Deqa e mati wau di kobotosiy silali di Jerusalem osiy gilsiy bunuqna e Spen sawaq aiqa osiy e niŋgi qa bosiy nuŋgwai.

Efesus 4:28

Bajiŋ tamo naŋgi olo bajiŋaib. Naŋgi naŋgo segi baŋ na wauoqnsib dena iŋgi iŋgi oqnsib tamo iŋgi qa truqueqnub qaji naŋgi aqaryainjroqnebe.

Filipai 1:11

O was qu, kumbra bole kalil Yesus Kristus a segi na babteqnu qaji di nuŋgoq di tulaŋ kobaoqnqajqa deqa e niŋgi qa pailyeqnum. Yim tamo uŋgasari naŋgi nuŋgo kumbra di unsib Qotei aqa ñam soqtoqnqab.

Filipai 4:16

Agi e Tesalonaika qureq di sonamqa niŋgi e silali qa aqaryaiboqneb.

Filipai 4:17

Niŋgi na e silali ebqajqa e deqa are qalosaieqnum. Niŋgi kumbra bole bole yoqnibqa Qotei na olo kamba niŋgi kumbra bole eŋgwajqa e deqa are qaleqnum.

Kolosi 1:10

Osib naŋgo walwel ti naŋgo kumbra ti Tamo Koba Yesus aqa walwel ti aqa kumbra ti keretqab. Yim deqa ni naŋgo kumbra kalil qa tulaŋ areboleboleimoqnqas. O Abu, ni na Kolosi Kristen naŋgi aqaryainjroqnim naŋgi kumbra bole bole degsib yoqnsib ni qa geregere qalieoqnib naŋgo qalie di tulaŋ kobaoqnqas.”

1 Tesalonaika 2:9

O was qu, niŋgi qalie, iga niŋgi koba na sosim Qotei aqa anjam bole niŋgi merŋgoqnem bati deqa iga waukobaoqnem. Iga na niŋgi gulube eŋgwa uratosim deqa iga gago segi baŋ na qanam ti qolo ti tulaŋ siŋgila na wauoqnsim dena gago segi iŋgi iŋgi awaiyosim uyoqnem. Niŋgi na iga silali qa aqaryaigwajqa iga deqa merŋgosaioqnem.

2 Tesalonaika 3:8

Iga nuŋgo iŋgi iŋgi laŋa yaiŋgosaioqnem. Iga gago segi iŋgi awaiyoqnsim uyoqnem. Iga niŋgi gulube eŋgwa uratosim deqa iga qanam ti qolo ti waukobaoqnem.

Taitus 2:8

Ni anjam bole segi tamo naŋgi minjroqnimqa naŋgi ino anjam di qusib uge qa marqa keresai. Jeu tamo naŋgi dego ino anjam di qusib deqa iga yomuigwa keresai. Naŋgi naŋgo segi areqalo uge qa jemainjrqas.

Taitus 3:8

Qotei aqa anjam di tulaŋ boledamu. Deqa iga anjam di gago areqaloq di siŋgilatqom. O Taitus, ni Qotei aqa anjam di siŋgila na palontoqnimqa tamo uŋgasari Qotei qa naŋgo areqalo siŋgilateqnub qaji naŋgi quoqnsib kumbra bole bole yoqnqab. Kumbra deqaji na tamo uŋgasari naŋgi aqaryainjreqnu. Kumbra di bolequja.

2 Pita 1:8

Niŋgi gago Tamo Koba Yesus Kristus qa bole qalieonub deqa kumbra kalil deqaji nuŋgoq di sosim kobaqujaosim tulaŋ siŋgilaqas di nuŋgo qalie di loumqa keresai. A nuŋgoq di tulaŋ siŋgilaesosim gei gargekoba ateleŋqas.