Rom 8:38 - Yesus Aqa Anjam Bole

^38-39 Od, Qotei na iga tulaŋ qalaqalaigeqnu. Deqa e endegsi ijo are siŋgilatosim qalieonum, iŋgi bei na Qotei getentim a na iga olo qalaqalaigwasai iŋgi dego bei sosai. Moio ti ŋambile ti laŋ aŋgro naŋgi ti mondor siŋgila naŋgi ti iŋgi iŋgi bini unub qaji naŋgi ti iŋgi iŋgi bunuqna branteleŋqab qaji naŋgi ti iŋgi iŋgi kalil siŋgila ejunub qaji naŋgi ti iŋgi iŋgi kalil laŋ goge di unub qaji naŋgi ti iŋgi iŋgi kalil mandam sorgomq di unub qaji naŋgi ti iŋgi iŋgi kalil Qotei na nami ateleŋej qaji naŋgi ti kalil dena Qotei getentqa keresai. Yim a na iga olo qalaqalaigwasai. Iga qalieonum, gago Tamo Koba Kristus Yesus aqa siŋgila na Qotei na iga qalaqalaigoqnsim sqas.

Rom 8:38 ပူးပေါင်းရင်းမြစ်များ

Jon 10:28

E naŋgi ŋambile enjritqa naŋgi ŋambile gaigai sqab. Deqa naŋgi padalqasai bolesai. Tamo bei na naŋgi ijo baŋq dena yaibqa keresai.

Rom 14:7

Iga qalie, gago ambleq di tamo bei a endegsi marqa keresai, “Ijo ŋambile di ijo segi. E segi na taqatejunum. E moiqai di e segi na marsiy moiqai.” A degsi marqa keresai.

Rom 14:8

Iga ŋambile sqom di Tamo Koba Yesus aqa segi. Ariya iga moiqom di dego Tamo Koba Yesus aqa segi. Deqa iga ŋambile sqom kio iga moiqom kio di iga Tamo Koba Yesus aqa segi tamo uŋgasari sqom.

Rom 4:21

A qalieej, anjam Qotei na nami minjej qaji di a dauryosim yqa kere.

Rom 6:23

Une na aqa wau tamo naŋgi awai enjreqnu. Awai agiende. Tamo naŋgi moreŋeqnub. Ariya Qotei na iga iŋgi boledamu laŋa egeqnu. Iŋgi boledamu di agi iga ŋambile gaigai sqom. Ŋambile di iga gago Tamo Koba Yesus Kristus aqa wau na oqom.

1 Korin 15:24

Bati deqa iŋgi iŋgi kalil koboqas. Mandor kokba ti mondor uge uge ti gate kokba ti naŋgo siŋgila ti kalil di Kristus na kobotetnjrqas. Osim a na iŋgi iŋgi kalil olo eleŋosim aqa Abu Qotei aqa baŋq di uratqas. Yim Qotei a segi Mandor Koba tigelosim iŋgi iŋgi kalil taqatesqas.

2 Korin 11:14

O was qu, niŋgi naŋgo kumbra di unsib niŋgi deqa tulaŋ prugaib. Iga qalie, Satan a dego gisaŋoqnsiqa aqa kumbra bulyoqnsiqa Qotei aqa laŋ aŋgro bole riaŋ ti unub qaji naŋgi buleqnu.

2 Korin 4:13

Iga Yesus qa gago areqalo siŋgilateqnum deqa Qotei aqa anjam bei nami neŋgreŋyeb qaji di iga dauryosim yeqnum. Anjam agiende, “E Qotei qa ijo areqalo siŋgilateqnum deqa e aqa anjam marsim laqnum.” O was qu, iga kamba dego Yesus qa gago areqalo siŋgilateqnum deqa iga dego aqa anjam marsim laqnum.

Efesus 1:21

Deqa Kristus a na mondor siŋgila ti gate kokba ti mandor ti tamo kokba ti kalil naŋgi tulaŋ buŋnjrsiqa goge kobaq di unu. A na tamo kalil bini bati endeqa ñam koba ti unub qaji naŋgi ti tamo kalil bunuqna ñam koba ti sqab qaji naŋgi ti tulaŋ buŋnjrsiqa agi goge kobaq di unu.

Kolosi 1:16

A na iŋgi iŋgi kalil laŋ goge di unub qaji ti mandamq di unub qaji ti aqa Ŋiri Yesus aqa baŋ na gereiyej. Iŋgi iŋgi kalil gago ŋamdamu na uneqnum qaji ti gago ŋamdamu na unqa keresai qaji ti di Yesus aqa baŋ na Qotei na gereiyej. Laŋ goge qaji siŋgila ti laŋ aŋgro naŋgi ti mandor kokba naŋgi ti mondor naŋgi ti kalil di Yesus aqa baŋ na Qotei na gereiyej unu. Iŋgi iŋgi kalil di Yesus a segi deqa utru. Iŋgi iŋgi kalil di aqa segi.

Kolosi 2:15

Kumbra dena a na mondor uge uge naŋgi ti naŋgo gate kokba ti kalil naŋgo siŋgila kobotej. Osiqa qoto siŋgilaosiqa naŋgi tulaŋ buŋnjrej. Kristus a ŋamburbasq di moiej wau dena qujai Qotei na kumbra di tamo kalil naŋgi osornjrej.

2 Timoti 1:12

Deqa uŋgum, e gulube oqnsiy sqai. E deqa jemaibqasai. E Yesus qa ijo areqalo siŋgilateqnum deqa e a qa bole qalieonum. A segi na wau endi ijo baŋq di atej deqa e qalieonum, a na wau di geregere taqatoqnqas. Taqatsim gilsim a olo bqajqa bati brantqas.

Hibru 11:13

O was qu, Abel na Enok na Noa na Abraham na Sara na naŋgi kalil Qotei qa naŋgo areqalo siŋgilatesosib gilsib moreŋeb. Naŋgi mandam endia sosibqa iŋgi bole bole Qotei na nami naŋgi enjrqa minjrej qaji di naŋgi eleŋosai. Ariya naŋgi iŋgi di oqajqa tariŋesosibqa tarosib laŋ qure koqyosib isaq na iŋgi di unsib deqa areboleboleinjrej. Deqa naŋgi maroqneb, “Iga mandam endi so boleiyqasai. Iga mandamq endia yauŋ tamo bulosim sokiñala sosim bunuqna iga mandam endi uratqom.” O was qu, naŋgi anjam di marqajqa jemainjrosai.

1 Pita 3:22

Onaqa Kristus a laŋ qureq oqej deqa bini a Qotei aqa baŋ woq di awejunu. Deqa laŋ aŋgro naŋgi ti laŋ qaji mondor kokba ti laŋ qaji siŋgila ti kalil naŋgi Kristus aqa sorgomq di unub.