Rom 8:15 - Yesus Aqa Anjam Bole

¹⁵ Qotei na niŋgi laŋa wau tamo sqajqa deqa aqa Mondor niŋgi eŋgosai. Niŋgi laŋa wau tamo sqab di niŋgi ulaqab. Qotei na niŋgi aqa segi aŋgro tiŋtiŋ sqajqa deqa aqa Mondor niŋgi eŋgej. Deqa aqa siŋgila na niŋgi endegsib Qotei meteqnub, “O ni gago Abu.”

Rom 8:15 ပူးပေါင်းရင်းမြစ်များ

Matyu 25:25

Deqa e ni qa ulaosim ino 1,000 kina ebem qaji di osi gilsimqa mandamq di sub bogsim sub miligiq di ulitonam soqnej agiende.’

Luk 11:2

Onaqa Yesus na aqa aŋgro naŋgi endegsi minjrej, “Niŋgi Qotei pailyqa osibqa endegsib pailyiye, ‘O Abu, ino ñam tulaŋ boledamu. Deqa iga na ino ñam getentoqnqom. Ni bosim gago Mandor Koba sosim iga taqatgoqnime.

Luk 22:42

A endegsi pailyej, “O Abu, ni na marimqa gulube endi e qa baiq.” Degsi pailyosiqa olo urur are qalsiq endegsi pailyej, “Uŋgum, ni ijo areqalo dauryaim. Ni ino segi areqalo dauryosim ye.”

Luk 8:28

Deqa a Yesus unsiqa tulaŋ koba leleŋosiqa bosiq Yesus aqa areq di siŋga pulutosiqa minjej, “O Yesus, Tamo Koba Qotei aqa Ŋiri, ni e kierbqa bonum? E ni endegsi mermqai, ni e jaqatiŋ ebaim.”

Luk 8:37

Yesus a maŋwa di babtej deqa tamo uŋgasari kalil Gerasa sawaq di soqneb qaji naŋgi tulaŋ ulaugetosib Yesus minjeb, “Ni iga uratgosim ulaŋ.” Onaqa Yesus a qobuŋ gogetosiqa naŋgi uratnjrsiq aiej.

Jon 16:8

Bosim mandam endeqa tamo uŋgasari naŋgo une babtoqnim naŋgi poinjroqnqas. Kumbra bole qa utru di dego a na osornjroqnim naŋgi qalieoqnqab. Qotei a mondoŋ tamo uŋgasari naŋgo une qa naŋgi peginjrqas. Kumbra di dego naŋgi qalieqajqa deqa Qotei aqa Mondor na naŋgi osornjroqnqas.

Jon 20:17

Onaqa Yesus na Maria minjej, “Ni e ojaim. Di kiyaqa? E ijo Abu aqaq oqosaiunum deqa. Ariya ni ijo was naŋgoq gilsim endegsi minjre, ‘Yesus a marqo, “E ijo Abu aqaq olo oqwai. Ijo Abu agi nuŋgo Abu dego. Ijo Qotei agi nuŋgo Qotei dego.” ’ Ni gilsim naŋgi degsi minjre.”

Aposel 16:29

Pol a degsiqa tonto tal taqato tamo di minjnaqa a na qaja tamo qudei naŋgi metnjrnaq lam osi bosib tonto talq di atnab suwaŋej. Onaqa a tulaŋ ulaugetosiq gindagindaŋosiq urur ti warum miligiq gilsiq Pol wo Sailas wo naŋgo siŋgaq dia ŋam quosiq ŋeiej. Dena tigelosiqa naŋgi aiyel joqsi oqedosiq nenemnjrej, “O tamo kokba aiyel, e kumbra kie yitqa Qotei na e oqas?”

Aposel 2:37

Onaqa naŋgi Pita aqa anjam di qunabqa anjam dena naŋgo are qametnjrej. Deqa naŋgi na Yesus aqa aŋgro naŋgi Pita ombla minjreb, “O gago was niŋgi na mergiye. Iga kieronamqa Qotei na iga eleŋamqa iga padalqasai?”

Rom 8:16

Qotei aqa Mondor a segi gago are miligiq di waueqnu deqa iga endegsi boleq di mareqnum, bole, iga Qotei aqa aŋgro unum.

Rom 8:23

Iŋgi iŋgi kalil di naŋgi segi akamosai. Iga Qotei aqa Mondor ejunum deqa iga dego akamoqnsim unum. Qotei na aqa Mondor iga namo egej. Iga Qotei aqa aŋgro unum deqa iga dego jaqatiŋ oqnsim akamoqnsim unum. Mondoŋ Qotei na iga aqa segi aŋgro qa boleq na endegsi marqas, “Naŋgi ijo aŋgro kalil.” O was qu, bati di brantqajqa deqa iga tariŋoqnsim unum. Bati di brantimqa Qotei na gago jejamu bulyetgosim jejamu bunuj egwas.

Rom 8:26

Iga siŋgila saiqoji unum deqa Qotei aqa Mondor a dego iga aqaryaigeqnu. Iga iŋgi kie qa pailyqajqa di iga geregere qaliesai. Deqa Qotei aqa Mondor a segi na iga aqaryaigwa osiqa iga qa pailyeqnu. A akamoqnsiq boleq na marosaieqnu.

Rom 9:4

Jekop aqa leŋ naŋgi Israel tamo. Deqa Qotei na naŋgi aqa segi aŋgro qa minjrej. Naŋgi Qotei aqa riaŋ ti aqa siŋgila ti uneb. A na aqa anjam bunuj ti aqa dal anjam ti louqajqa kumbra ti naŋgi enjrej. Osiqa iŋgi bole kalil a na nami naŋgi enjrqa marej qaji di enjrej.

1 Korin 2:12

O was qu, iga mandam qaji mondor osai. Iga Mondor Bole Qotei aqaq dena bej qaji di em. Deqa iŋgi iŋgi kalil Qotei na iga egeqnu qaji di Mondor na iga osorgeqnu deqa iga qalie.

2 Korin 11:4

E ulaonum. Di kiyaqa? E qalieonum, tamo qudei naŋgi niŋgi qa boqnsib gisaŋgoqnsib Yesus bei qa anjam palontosib merŋgeqnub. Yesus deqa iga nami anjam palontosaioqnem. Tamo naŋgi di mondor bei qa dego niŋgi merŋgeqnub. Di gisaŋ mondor. Mondor deqa iga nami niŋgi merŋgosaioqnem. Yesus aqa anjam bole iga nami niŋgi merŋgoqnem qaji di dego tamo qudei naŋgi bulbulyoqnsib olo anjam bei niŋgi merŋgeqnub. E qalieonum, naŋgi anjam di niŋgi merŋgeqnab niŋgi quoqnsib bole edegoqnsib dauryeqnub. O was qu, niŋgi degaib.

Galesia 2:4

Bole, Kristen tamo qudei naŋgi uli na gago koro miligiq aieb. Naŋgi Kristen tamo bolesai. Naŋgi gisaŋ tamo. Nami iga dal anjam aqa sorgomq di soqnem bati deqa Kristus Yesus a na iga olo eleŋej deqa dal anjam na iga olo taqatgosai. Ariya tamo naŋgi di gago kumbra di lumu na unqajqa deqa gago koro miligiq aieb. Naŋgi na iga olo osib dal anjam aqa sorgomq di atqajqa deqa are qalsib gago koro miligiq aieb.

Galesia 5:1

Kristus a na iga eleŋej deqa dal anjam na iga olo bunu taqatgwasai. Deqa niŋgi siŋgila na tigelosib tamo qudei naŋgi na niŋgi olo osib dal anjam aqa sorgomq di atqa laqnib saidnjroqniye.

Efesus 1:5

Tulaŋ nami Qotei na iga qalaqalaigosiqa iga aqa segi aŋgro sqa marsiqa Yesus Kristus aqa wau na iga eleŋej. Qotei aqa segi areqalo na a degyej.

2 Timoti 1:7

Ni qalie, Qotei a na iga ulaqajqa deqa aqa Mondor iga egosai. A na iga siŋgilatgwajqa deqa aqa Mondor egej. Mondor dena gago areqalo tigeltetgeqnaqa iga tamo naŋgi qalaqalainjroqnsimqa gago so ti gago walwel ti geregere taqateqnum.

Hibru 2:15

Deqa naŋgi moiqa ulaeqnub. Naŋgi mandamq endi sonabqa Satan a na naŋgi siŋgila na ojeleŋeqnu. Ariya Yesus a na naŋgi Satan aqa baŋq dena olo eleŋqajqa marsiq moiej.

Jems 2:19

Ni mareqnum, “Bole, Qotei a segi qujai unu.” Ni kere mareqnum. Ariya mondor uge naŋgi dego degsib maroqnsib Qotei ulaiyeqnub.

1 Jon 4:18

Tamo a qalaqalaiyo kumbra dauryqas di a ulaqasai. Qalaqalaiyo kumbra aqa are miligiq di tulaŋ kobaosiq siŋgilaejunu deqa ulaqajqa kumbra aqaq di sosai. Ulaqajqa kumbra aqa utru endegsi unu. Tamo bei a qalie, mondoŋ Qotei na tamo uŋgasari naŋgo une qa naŋgi peginjrsimqa naŋgi awai uge enjrqas. A di qalie deqa a ulaeqnu. A ulaeqnu deqa iga qalieonum, aqa are miligiq di qalaqalaiyo kumbra tulaŋ siŋgilaosaiunu.