Rom 4:17 - Yesus Aqa Anjam Bole

¹⁷ Agi Qotei aqa anjam bei nami endegsib neŋgreŋyeb unu, “O Abraham, e ni giltmonum deqa ni tamo uŋgasari sawa sawa kalilq di unub qaji naŋgo moma matu sqam.” O was qu, Abraham a Qotei qa aqa areqalo siŋgilatej deqa a Qotei aqa ŋamgalaq di gago moma matu unu. Qotei qujai di tamo moreŋo qaji naŋgi olo subq na tigeltnjreqnu. A segi na marnaqa iŋgi iŋgi kalil nami sosai qaji di branteleŋej.

Rom 4:17 ပူးပေါင်းရင်းမြစ်များ

Matyu 3:9

Niŋgi endegsib are qalaib, ‘Abraham a gago moma utru. Deqa iga Qotei aqa ŋamdamuq di tamo bole.’ Niŋgi degsib are qalaib. Niŋgi quiye. Qotei na marimqa meniŋ kalil endi dego tamo bulyosib tigelosib marqab, ‘Abraham a gago moma utru.’

Jon 5:21

Ijo Abu na tamo moreŋo qaji naŋgi olo ŋambile enjroqnsiqa subq na tigeltnjreqnu. Deqa e Qotei aqa Ŋiri e kamba dego ijo segi areqalo na tamo naŋgi ŋambile enjreqnum.

Jon 5:25

“Niŋgi quiye. E bole merŋgwai. Bati bei brantqas agi brantqo. Deqa tamo uŋgasari moreŋo qaji naŋgi ijo kakoro qusib dena naŋgi ŋambile oqab. Di kiyaqa? E Qotei aqa Ŋiri deqa.

Jon 6:63

Qotei aqa Mondor a segi na tamo uŋgasari naŋgi ŋambile enjreqnu. Nuŋgo segi jejamu na niŋgi aqaryaiŋwa keresai. Ijo anjam kalil e na merŋgeqnum qaji di Mondor aqa anjam. Anjam dena niŋgi ŋambile oqab.

Aposel 15:18

Tamo Koba Qotei aqa anjam di a nami babtej agi bini olo babtosiq mareqnu.’ Qotei aqa medabu o qaji tamo bei a nami anjam degsi neŋgreŋyej.

Rom 3:29

Deqa iga kiersi marqom? Qotei a Juda naŋgo segi Qotei e? A sawa bei bei qaji tamo naŋgo Qotei sai e? Sai. A sawa bei bei qaji tamo naŋgo Qotei dego.

Rom 4:18

Abraham a qaliesai, Qotei a kiersim aqa anjam nami marej qaji di dauryosim yqas? Ariya Abraham a Qotei qa aqa areqalo siŋgilatosiq marej, “E qalieonum, Qotei aqa anjam nami marej qaji di aqa damu brantqas.” Abraham a Qotei qa aqa areqalo siŋgilatosiq degsi qalieej deqa a tamo uŋgasari gargekoba sawa sawa kalilq di unub qaji naŋgo moma matu soqnej. Agi Qotei a nami Abraham endegsi minjej, “Ino moma naŋgi tulaŋ gargekobaqab.”

Rom 4:2

Abraham a kumbra bole yoqnej gam dena a Qotei aqa ŋamgalaq di tamo bole soqnej qamu a aqa segi ñam soqtqa kere. Ariya aqa kumbra dena a Qotei aqa ŋamgalaq di tamo bole sosai.

Rom 8:11

Qotei a na aqa Ŋiri Kristus Yesus subq na olo tigeltej. Qotei aqa Mondor a nuŋgo are miligiq di unu deqa Qotei na aqa Mondor aqa siŋgila na nuŋgo jejamu moiqas qaji di dego olo subq na tigeltosim niŋgi ŋambile eŋgwas.

Rom 9:11

Ariya Qotei aqa kumbra gaigai dauryeqnu qaji di a dauryosiq aqa segi areqalo na aŋgro qujai giltej. A aŋgro aqa wau qa are qalosai. A segi na metosiq giltej. Deqa Rebeka na aqa aŋgro aiyel naŋgi di ŋambabtnjrosaisonaqa naŋgi aiyel kumbra bole ti kumbra uge ti yosaisonabqa Qotei na Rebeka endegsi minjej, “Aŋgro namo ŋambabqas qaji a di aŋgro bunu ŋambabqas qaji aqa wau tamo sqas.”

Rom 9:26

E nami sawa bei bei qaji tamo naŋgi endegsi minjrem, ‘Niŋgi ijo tamo sai.’ Ariya bunuqna e na naŋgi olo endegsi minjrqai, ‘Niŋgi ijo segi aŋgro unub. Agi e Qotei ŋambile unum qaji.’”

1 Korin 1:28

Tamo naŋgi mandamq endia ñam ti unub qaji naŋgi na olo tamo Qotei na giltnjrej qaji naŋgi ñam saiqoji qa minjroqnsib tamo uge qa minjreqnub. Ariya tamo ñam saiqoji qa minjreqnub qaji naŋgi di Qotei na giltnjrej deqa tamo ñam ti unub qaji naŋgo ñam koba di Qotei na olo aguq ateqnu.

1 Korin 15:45

Agi Qotei aqa anjam bei nami endegsib neŋgreŋyeb unu, “Adam namij a mandam qaji ŋambile osi soqnej.” Ariya Adam bunuj a bunuqna bosiqa a segi Mondor ti sosiqa tamo uŋgasari naŋgi laŋ qaji ŋambile enjrej. Adam bunuj di Kristus.

1 Timoti 6:13

Qotei agi a na iŋgi iŋgi kalil ŋambile enjreqnu qaji aqa ŋamgalaq dia Kristus Yesus agi nami Pontius Pailat aqa ulatamuq di tigelosiq anjam ubtsiq maroqnej qaji aqa ŋamgalaq dia dego e ni anjam siŋgila na endegsi mermqai.

Hibru 11:12

Deqa Abraham a qeliosiqa aqa moiqajqa bati jojomonaqa Qotei na a dego siŋgila yonaqa a aŋgro mel qujai ŋambabtej. Deqa aqa leŋ naŋgi tulaŋ gargekobaosib mandam kalil kereteb. Bongar tulaŋ gargekoba unub dego kere Abraham aqa leŋ naŋgi ulul bul tulaŋ gargekobaeb. Deqa sisiyqa keresai.

Hibru 11:3

Iga Qotei qa gago areqalo siŋgilateqnum gam dena iga endegsi poigwo, “Bole, Qotei a segi na marnaqa laŋ ti mandam ti brantej.” Deqa iga qalieonum, iŋgi iŋgi kalil iga uneqnum qaji di Qotei a iŋgi iŋgi iga unqa keresai qaji dena gereinjrej.

Hibru 11:7

Noa a dego Qotei qa aqa areqalo siŋgilatej. Deqa Qotei na minjej, “E bunuqna awa qariŋyit bosim mandam kalil keretqas. Deqa ni qobuŋ qujai gereiyime.” Ariya Noa a Qotei aqa anjam di aqa damu unosaisosiqa a Qotei aqa anjam di dauryosiqa aqa uŋa ti aqa aŋgro ti naŋgi padalaib deqa qobuŋ qujai gereiyej. A Qotei qa aqa areqalo siŋgilatej deqa a na tamo uŋgasari kalil mandamq di soqneb qaji naŋgo kumbra uge ubtsiq minjroqnej. A Qotei qa aqa areqalo siŋgilatosiq qobuŋ gereiyej deqa Qotei na a tamo bole une saiqoji qa minjej. Agi Qotei na tamo kalil a qa naŋgo areqalo siŋgilateqnub qaji naŋgi tamo bole une saiqoji qa minjreqnu.

1 Pita 2:10

Nami niŋgi tamo uŋgasari laŋaj soqneb. Ariya bini niŋgi Qotei aqa segi tamo uŋgasari unub. Nami Qotei a niŋgi qa are boleiyosaioqnej. Ariya bini a niŋgi qa are boleiyeqnu.

2 Pita 3:8

O ijo was bole, niŋgi ijo anjam bei endi geregere qusib olo are walŋgaiq. Qotei aqa areqalo agiende. Bati qujai a wausau 1,000 dego kere. Wausau 1,000 a bati qujai dego kere. Bati qujai ti wausau 1,000 ti naŋgi ombla kerekere. Qotei aqa areqalo agide.