Rom 3:27 - Yesus Aqa Anjam Bole

²⁷ Deqa tamo yai na aqa segi ñam soqtqa kere? Tamo dego bei sosai. Iga gago segi ñam soqtqajqa kumbra di torei koboej. Dal anjam dauryqajqa gam dena kumbra di kobotosai. Iga Yesus qa gago areqalo siŋgilatqom gam dena qujai gago segi ñam soqtqajqa kumbra di kobotej.

Rom 3:27 ပူးပေါင်းရင်းမြစ်များ

Mak 16:16

Tamo naŋgi e qa naŋgo areqalo siŋgilatosib yanso oqab qaji naŋgi di Qotei na oqas. Ariya tamo naŋgi e qa naŋgo areqalo siŋgilatqasai qaji naŋgi di Qotei na naŋgo une qa peginjrsim awai uge enjrqas.

Jon 3:36

Tamo naŋgi Qotei aqa Ŋiri qa naŋgo areqalo siŋgilatqab qaji naŋgi ŋambile gaigai sqab. Ariya tamo naŋgi Qotei aqa Ŋiri aqa anjam dauryqa uratqab qaji naŋgi ŋambile itqasai. Qotei aqa minjiŋ naŋgoq di sqas.

Rom 10:5

Tamo naŋgi dal anjam dauryeqnub qaji naŋgi Qotei na kiersim tamo bole une saiqoji qa minjrqas? Moses a deqa osiqa nami endegsi neŋgreŋyej, “Tamo bei a dal anjam kalil dauryekritosim di a ŋambile sqas.” Moses a anjam degsi neŋgreŋyej.

Rom 11:6

A naŋgo wau qa are qalsiq naŋgi giltnjrosai. A naŋgi qa are boleiyonaq dena a na naŋgi giltnjrej. Naŋgi wau bei yib Qotei a deqa are qalsiq naŋgi giltnjrej qamu a naŋgi qa are boleiyej kumbra di laŋa uloŋej qamu.

Rom 2:17

Ariya niŋgi Juda tamo qudei niŋgi endegsib are qaleqnub, “Iga dal anjam ti unum deqa Qotei na iga pegigwasai.” Osib niŋgi nuŋgo segi ñam soqtoqnsib endegsib mareqnub, “Iga Qotei aqa tamo tiŋtiŋ.” Niŋgi degsib mareqnub.

Rom 2:23

Niŋgi nuŋgo segi ñam soqtoqnsib mareqnub, “Iga Qotei aqa dal anjam qalie bole.” Ariya niŋgi segi olo dal anjam di gotraŋyeqnub. Nuŋgo kumbra dena niŋgi Qotei aqa ñam ugeteqnub.

Rom 3:19

Iga qalie, Moses a dal anjam neŋgreŋyej di tamo naŋgi dal anjam aqa sorgomq di unub qaji naŋgi qa osiq deqa neŋgreŋyej. Deqa tamo bei a endegsi marqa keresai, “E tamo bole. E une saiqoji.” A degsi marqa keresai. Iga tamo uŋgasari kalil sawa sawa kalilq di unum qaji iga Qotei aqa ŋamgalaq di une ti unum.

Rom 3:26

Ariya bini bati endi Qotei na iga endegsi osorgeqnu, a gaigai kumbra bole tiŋtiŋ segi yeqnu. Deqa iga endegsi qalieonum, Qotei a na tamo uŋgasari Yesus qa naŋgo areqalo siŋgilateqnub qaji naŋgi tamo bole une saiqoji qa minjreqnu di a kumbra bole tiŋtiŋ yeqnu.

Rom 4:2

Abraham a kumbra bole yoqnej gam dena a Qotei aqa ŋamgalaq di tamo bole soqnej qamu a aqa segi ñam soqtqa kere. Ariya aqa kumbra dena a Qotei aqa ŋamgalaq di tamo bole sosai.

Rom 7:21

Deqa ijoq di e kumbra endegsi unonum. E kumbra bole dauryqajqa are sonaqa kumbra uge na olo gam getentetbeqnu.

Rom 7:23

Ariya e endegsi unonum. Une a ijo baŋq di ijo siŋgaq di ijo jejamu kalilq dia wauoqnsiqa Qotei aqa dal anjam ijo areqaloq di unu qaji di qoto iteqnu. Une di siŋgila koba. Deqa a na e tonto talq waibobuloqnsiqa ijo baŋ ti ijo siŋga ti ijo jejamu ti kalil di siŋgila na taqateqnu.

Rom 7:25

Od, e qalieonum. Gago Tamo Koba Yesus Kristus aqa baŋ na Qotei na e aqaryaibimqa e ijo jejamu endi uratqai. Deqa e Qotei tulaŋ biŋiyeqnum. Bole, e ijo segi areqalo na Qotei aqa dal anjam aqa sorgomq di unum. Ariya e areqalo namijq di unum deqa ijo une na e olo siŋgila na taqatbeqnu.

Rom 8:2

Di kiyaqa? Niŋgi segi segi Kristus Yesus aqa tamo deqa. Qotei aqa Mondor Bole iga ŋambile egej qaji a na niŋgi aqaryaiŋgej deqa une ti moio ti na niŋgi olo taqatŋgwa keresai. Qotei aqa Mondor a segi na niŋgi taqatŋgeqnu.

Rom 9:11

Ariya Qotei aqa kumbra gaigai dauryeqnu qaji di a dauryosiq aqa segi areqalo na aŋgro qujai giltej. A aŋgro aqa wau qa are qalosai. A segi na metosiq giltej. Deqa Rebeka na aqa aŋgro aiyel naŋgi di ŋambabtnjrosaisonaqa naŋgi aiyel kumbra bole ti kumbra uge ti yosaisonabqa Qotei na Rebeka endegsi minjej, “Aŋgro namo ŋambabqas qaji a di aŋgro bunu ŋambabqas qaji aqa wau tamo sqas.”

Rom 9:31

Ariya Israel naŋgi Moses aqa dal anjam dauryqajqa waukobaoqneb. Naŋgi are qaloqneb, gam dena naŋgi tamo bole une saiqoji sqab. Ariya naŋgi dal anjam dauryoqneb gam dena naŋgi tamo bole une saiqoji sosai.

Rom 9:32

Di kiyaqa? Naŋgi tamo bole une saiqoji sqa marsib Yesus qa naŋgo areqalo siŋgilatosai. Naŋgi maroqneb, “Iga segi waukobaosim dena iga tamo bole une saiqoji sqom.” Naŋgi tal aqa ai utru quraqyosib maŋgaleb.

1 Korin 4:7

Tamo yai na niŋgi tamo kokba atqo unub? Iŋgi bei kie nuŋgoq di unu di Qotei na niŋgi eŋgosai? Nuŋgo iŋgi iŋgi kalil agi Qotei na niŋgi eŋgej. Deqa niŋgi kiyaqa nuŋgo segi ñam olo soqtosib nuŋgo segi siŋgila na iŋgi iŋgi kalil di ejunub degsib are qaleqnub?

Galesia 2:16

Ariya iga qalieonum, tamo naŋgi Moses aqa dal anjam dauryqab dena Qotei na naŋgi tamo bole une saiqoji qa minjrqasai. Tamo naŋgi Kristus Yesus qa naŋgo areqalo siŋgilatqab gam dena qujai Qotei na naŋgi tamo bole une saiqoji qa minjrqas. Iga dego Kristus Yesus qa gago areqalo siŋgilateqnum. Di kiyaqa? Iga qalie, gam dena qujai Qotei na iga tamo bole une saiqoji qa mergwas. Iga dal anjam dauryqom gam dena sai. Di kiyaqa? Tamo bei a dal anjam dauryqas Qotei a deqa are qalsim a tamo bole une saiqoji qa minjqasai. Sai bolesai.

Galesia 3:22

Ariya degsi sosai. Agi Qotei aqa anjam bei nami endegsib neŋgreŋyeb unu, “Tamo uŋgasari kalil naŋgo une na naŋgi tonto talq di breinjrobuleqnu.” Qotei a nami anjam degsi marej. Di kiyaqa? Iga tamo uŋgasari Yesus Kristus qa gago areqalo siŋgilateqnum qaji iga na iŋgi bole bole Qotei a nami iga egwa marej qaji di olo oqajqa deqa.