Rom 3:25 - Yesus Aqa Anjam Bole

²⁵ Agi Qotei a endegsi are qalej. A na Yesus qariŋyim a bosim moiim aqa leŋ aisim tamo uŋgasari kalil a qa naŋgo areqalo siŋgilateqnub qaji naŋgo une taqal waiysim aqa minjiŋ kobotqas. Kumbra dena a na iga tamo bole une saiqoji qa mergej. Aqa kumbra di a na iga osorgej. Nami Qotei a tamo naŋgi are bulyqajqa deqa marsiq naŋgi qa tariŋoqnsiqa naŋgo une qa urur kambatnjrosaioqnej.

Rom 3:25 ပူးပေါင်းရင်းမြစ်များ

Jon 6:47

Niŋgi quiye. E bole merŋgwai. Tamo a e qa aqa areqalo siŋgilatqas di a ŋambile gaigai sqas.

Aposel 14:16

Bole, nami Qotei na sawa bei bei qaji tamo naŋgi uratnjreqnaqa naŋgi naŋgo segi areqalo dauryosib laqneb.

Aposel 15:18

Tamo Koba Qotei aqa anjam di a nami babtej agi bini olo babtosiq mareqnu.’ Qotei aqa medabu o qaji tamo bei a nami anjam degsi neŋgreŋyej.

Aposel 17:30

“Nami tamo naŋgi nanari soqneb. Naŋgi Qotei qaliesai. Deqa naŋgi qotei gisa gisaŋ naŋgo sulum gereinjroqnsib biŋinjroqneb. Bati di Qotei a naŋgo kumbra di unsiqa unosaibulosiqa naŋgi kambatnjrosaioqnej. Ariya bini Qotei na tamo uŋgasari kalil sawa sawa kalilq di unub qaji naŋgi endegsi minjreqnu, ‘Niŋgi are bulyosib kumbra uge uge di uratiye.’

Aposel 2:23

Qotei na tamo di osiq nuŋgo baŋq di atej. A nami kumbra degyqa are qalsiq deqa anjam keretej. Onaqa niŋgi na Yesus osib tamo uge naŋgo baŋq di atnabqa naŋgi na osib ŋamburbasq di qalnab moiej. Nuŋgo kumbra dena niŋgi segi na Yesus qalsib moioteb.

Aposel 3:18

Nami Qotei na aqa medabu o qaji tamo kalil naŋgo medabu siŋgilatetnjreqnaqa naŋgi endegsib maroqneb, ‘Kristus agi Qotei na giltqo qaji a jaqatiŋ koba osim moiqas.’ Ariya bunuqna niŋgi na Yesus qalnab moiej. Niŋgi kumbra di yonabqa Qotei aqa medabu o qaji tamo naŋgo anjam nami maroqneb qaji di aqa damu agi brantej.

Aposel 4:28

O Qotei, ni nami marem, ‘Naŋgi na Yesus qalib moiqas.’ Ino anjam di agi naŋgi dauryosib Yesus qalnab moiej. Naŋgo segi areqalo na naŋgi Yesus qalosai. Ni nami ino segi siŋgila na ti ino areqalo na ti marnamqa deqa naŋgi na Yesus qalnab moiej.

Rom 2:4

Ni que. Qotei a gaigai kumbra tulaŋ boledamu ni emoqnsiqa a ni qa tariŋsokobaiyeqnu. Deqa a urur ni awai uge emosaieqnu. Qotei aqa kumbra bole di ni unsim uge qa marsim gotraŋyqam e? Degaim. Ni are bulyqajqa deqa Qotei a ni qa are qaloqnsiq kumbra bole osormeqnu. Ni di qaliesai kio?

Rom 3:26

Ariya bini bati endi Qotei na iga endegsi osorgeqnu, a gaigai kumbra bole tiŋtiŋ segi yeqnu. Deqa iga endegsi qalieonum, Qotei a na tamo uŋgasari Yesus qa naŋgo areqalo siŋgilateqnub qaji naŋgi tamo bole une saiqoji qa minjreqnu di a kumbra bole tiŋtiŋ yeqnu.

Rom 5:1

Ariya iga Yesus qa gago areqalo siŋgilatem deqa Qotei na iga tamo bole une saiqoji qa mergej. Gago Tamo Koba Yesus Kristus a jeu kobotej deqa iga Qotei ombla geregere unum.

Rom 5:11

Anjam bei dego unu. Gago Tamo Koba Yesus Kristus aqa siŋgila na iga Qotei ombla geregere unum deqa iga tulaŋ areboleboleigeqnu.

Rom 5:18

Iga Yesus aqa wau deqa geregere are qaloqnqom. Tamo qujai Adam a dal anjam gotraŋyej. Aqa une dena Qotei na iga tamo uŋgasari kalil une ti qa mergej. Dego kere tamo qujai Kristus a kumbra bole tiŋtiŋ yej. Qotei a deqa are qalsiqa iga kalil tamo bole une saiqoji qa mergsiqa ŋambile egej.

Rom 5:9

Kristus a moinaqa aqa leŋ aisiq gago une kobotetgej deqa bini Qotei a iga tamo bole une saiqoji qa mergeqnu. Deqa iga bole qalieonum, mondoŋ Qotei a Kristus aqa baŋ na iga oqas. Yim aqa minjiŋ oqwa batiamqa iga so bole sqom.

1 Korin 5:7

Deqa was qu, niŋgi na bem tiyeqnu qaji aqa sum namij di taqal atiye. Osib dena niŋgi olo bem bunuj bulosib sum saiqoji sqab. E qalieonum, niŋgi sum saiqoji unub koboqo. Di kiyaqa? Bem Tiyosai Qaji Uyqa Bati qa naŋgi na Kristus qalnab a kaja du bulosiq gago une qa moisiq aqa leŋ aiej.

2 Korin 5:21

Kristus a une yosaieqnu. Ariya Qotei na iga aqaryaigwa marsiq deqa a gago une kalil osiqa Kristus aqa qawarq di atnaqa a une tamo bulej. Iga Yesus beteryosim aqa siŋgila na iga Qotei aqa segi tamo uŋgasari tiŋtiŋ sqajqa deqa osiq gago une kalil osiqa Kristus aqa qawarq di atej.

Efesus 1:7

Qotei a iga qa are boleiyej aqa kumbra di tulaŋ kobaquja. Aqa kumbra di aqa utru agiende. A na Kristus qariŋyonaqa a iga awaigwa marsiqa moiej. Moisiqa aqa leŋ aiej dena Qotei na gago une kalil kobotetgej.

Efesus 2:13

Nami niŋgi isaq di soqneb. Ariya Kristus a niŋgi qa moisiq aqa leŋ aiej dena niŋgi joqsiqa Qotei aqa areq bej. Deqa bini niŋgi Kristus Yesus beteryesosibqa Qotei aqa jojomq di unub.

1 Timoti 1:15

Kristus Yesus a na iga tamo uŋgasari une yeqnum qaji iga eleŋqa marsiq deqa mandamq aiej. Anjam di bole. Tamo kalil naŋgi qusib marqab, “Bole.” O Timoti, e nami une gargekoba yoqnem deqa e na une tamo kalil naŋgi tulaŋ buŋnjroqnem.

Hibru 10:4

Anjam di aqa utru agiende. Bulmakau ti kaja du du ti naŋgo leŋ na tamo uŋgasari naŋgo une kobotqa keresai.

Hibru 11:14

Iga qalieonum, tamo naŋgi anjam degsib mareqnub qaji naŋgi naŋgo segi sqajqa sawaq oqwajqa are qaleqnub.

Hibru 11:17

Ariya Qotei na Abraham aqa areqalo tenemtqa osiqa endegsi minjej, “Ni ino segi aŋgro qujai Aisak qalsim e atraibe.” Onaqa Abraham a Qotei aqa anjam di uratosai. Bole, Qotei na nami minjej, “Ino leŋ naŋgi tulaŋ gargekobaqab.” Ariya a Qotei qa aqa areqalo siŋgilatej deqa a Aisak osiq Qotei atraiyqa gilej.

Hibru 11:7

Noa a dego Qotei qa aqa areqalo siŋgilatej. Deqa Qotei na minjej, “E bunuqna awa qariŋyit bosim mandam kalil keretqas. Deqa ni qobuŋ qujai gereiyime.” Ariya Noa a Qotei aqa anjam di aqa damu unosaisosiqa a Qotei aqa anjam di dauryosiqa aqa uŋa ti aqa aŋgro ti naŋgi padalaib deqa qobuŋ qujai gereiyej. A Qotei qa aqa areqalo siŋgilatej deqa a na tamo uŋgasari kalil mandamq di soqneb qaji naŋgo kumbra uge ubtsiq minjroqnej. A Qotei qa aqa areqalo siŋgilatosiq qobuŋ gereiyej deqa Qotei na a tamo bole une saiqoji qa minjej. Agi Qotei na tamo kalil a qa naŋgo areqalo siŋgilateqnub qaji naŋgi tamo bole une saiqoji qa minjreqnu.

Hibru 9:28

Dego kere Kristus a bati qujai qa tamo gargekoba naŋgo une qoboiyetnjrqa marsiqa aqa segi jejamu osiq Qotei atraiyej. Ariya mondoŋ a olo laŋ qureq dena bosimqa a tamo uŋgasari naŋgo une olo kobotetnjrqasai. A bosim tamo uŋgasari a qa tariŋeqnub qaji naŋgi oqas.

Hibru 9:5

Ariya dal anjam so qaji ŋam moŋgum aqa quraq dia laŋ aŋgro aiyel naŋgo sigito qunuŋ atnab soqnej. Laŋ aŋgro aiyel naŋgi di Qotei aqa siŋgila sigitoqnsib unub. Naŋgo bari na ŋam moŋgum di kabutesoqnej. Ŋam moŋgum aqa qura di tamo uŋgasari naŋgo une kobotetnjrqajqa sawa. Ariya bini e iŋgi iŋgi kalil deqa anjam koba marqasai.

1 Jon 1:10

Iga endegsi marqom, “E nami une yosaioqnem agi unum.” Degsi marqom di iga Qotei aqa ñam ugetosim a gisaŋ tamo qa minjobulqom. Deqa aqa anjam gago are miligiq di sqa keresai.

1 Jon 2:2

A gago une kobotosiqa Qotei aqa minjiŋ taqal waiyej. A iga segi aqaryaigwa osiq wau di yosai. Tamo uŋgasari kalil mandamq endi unub qaji naŋgi dego aqaryainjrqa marsiq wau di yej.

1 Jon 4:10

Qotei a qalaqalaiyo kumbra qa utru. Deqa iga endegsi are qalqasai, iga namoqna Qotei qalaqalaiyem. Di sai. Qotei a namoqna iga qalaqalaigej. Osiqa aqa Ŋiri qariŋyonaq mandamq aisiqa gago une kobotosiqa Qotei aqa minjiŋ taqal waiyej.

Uli Anjam 1:5

Yesus Kristus a Qotei aqa anjam kalil geregere palontosiq mareqnu qaji tamo. A tamo kalil naŋgi qa namoosiq subq na tigelej. A mandor kokba kalil mandamq endi unub qaji naŋgo Tamo Koba. A dego niŋgi qa are tulaŋ boleiyimqa niŋgi are lawo na soqniye. Yesus a na iga tulaŋ qalaqalaigeqnu. A moisiqa aqa leŋ aiej dena a na gago une kalil kobotetgej.

Uli Anjam 13:8

Deqa tamo uŋgasari kalil mandamq endi unub qaji naŋgi na wagme juwaŋ di biŋiyoqnsib aqa ñam tulaŋ koba soqtoqneb. Tamo uŋgasari naŋgi di Qotei a nami mandam atosaisosiqa naŋgi ŋambile gaigai sqajqa saidosiq ŋambile qa buk miligiq di naŋgo ñam neŋgreŋyosai. Buk di agi Kaja Du nami qalnab moiej qaji aqa segi buk.

Uli Anjam 20:15

Tamo uŋgasari kalil naŋgo ñam ŋambile qa buk miligiq di sosai qaji naŋgi di Qotei na breinjrnaq ŋamyuoq aieleŋeb.

Uli Anjam 5:9

Wagme qolqe naŋgi ti gate kokba naŋgi ti bosib Kaja Du aqa areq di siŋga pulutosibqa lou bunuj na endegsib louoqneb, “O Kaja Du, ni buk di osimqa kandel aqa namur buk qandratejunu qaji di waqtqa kere. Di kiyaqa? Ni lumnab moisim ino leŋ aiej dena ni na ino segi tamo uŋgasari naŋgi awainjrsimqa Qotei aqa baŋq di ateleŋem unub. Od, tamo uŋgasari leŋ segi segi qaji, anjam maro segi segi qaji, jejamu segi segi qaji, sawa segi segi qaji naŋgi ni na awainjrsimqa Qotei aqa baŋq di ateleŋem unub.