Rom 2:15 - Yesus Aqa Anjam Bole

^15-16 Naŋgo kumbra dena Qotei aqa dal anjam naŋgo are miligiq di neŋgreŋyej qaji di olo boleq ateqnu. Naŋgo are miligiq di naŋgi kumbra bole ti kumbra uge ti qalie unub. Dena iga osorgeqnu, dal anjam a naŋgo are miligiq di waueqnu. Deqa mondoŋ naŋgo areqalo dena naŋgi endegsi minjrqas, “Niŋgi une ti.” Osim naŋgo kumbra qudei qa naŋgi endegsi minjrqas, “Nuŋgo kumbra di bole.” Bati deqa Qotei na tamo kalil naŋgo kumbra ti naŋgo anjam ti naŋgo are miligiq di uliejunu qaji di boleq atekritosim dena naŋgi peginjrqas. Anjam bole e palonteqnum qaji di aqa damu endegsi merŋgwai. Mondoŋ Qotei a Kristus Yesus aqa wau na tamo kalil naŋgo kumbra qa naŋgi peginjrqas.

Rom 2:15 ပူးပေါင်းရင်းမြစ်များ

Jon 8:9

Onaqa naŋgi Yesus aqa anjam di qusibqa naŋgi segi segi kalil oqedosib jaraieb. Tamo kokba naŋgi namoosib jaraionab qudei bunueb. Osib Yesus uratonab a segi di soqnej. Uŋa di a Yesus aqa ulatamuq di tigelesoqnej.

Aposel 23:1

Onaqa Pol a Juda tamo kokba naŋgi koqnjrsiqa endegsi minjrej, “O ijo was niŋgi quiye. E nami Qotei aqa ŋamgalaq dia kumbra bole bole yoqnem agi bini yoqnsim unum. Deqa e are gulube saiqoji.”

Aposel 24:16

E subq na tigelo bati qa tariŋeqnum deqa e bati gaigai ijo segi so geregere taqatoqnsimqa Qotei aqa ŋamdamuq dia, tamo uŋgasari kalil naŋgo ŋamdamuq dia kumbra bole bole yoqnsim laqnum.

Rom 2:14

Bole, sawa bei bei qaji tamo naŋgi dal anjam saiqoji unub. Ariya naŋgi qudei naŋgo segi areqalo na dal anjam aqa kumbra dauryeqnub. Bole, naŋgi dal anjam saiqoji unub. Ariya naŋgi dal anjam aqa kumbra dauryeqnub deqa iga qalieonum, dal anjam a naŋgo areqaloq di bole waueqnu.

Rom 2:27

Bole, niŋgi Juda tamo deqa niŋgi dal anjam ejunub. Niŋgi muluŋ dego aieqnub. Ariya niŋgi dal anjam gotraŋyoqnqab di tamo naŋgi muluŋ aiosaieqnub qaji naŋgi nuŋgo jejamuq di anjam qametŋgwab. Di kiyaqa? Naŋgi Qotei aqa dal anjam dauryeqnub deqa. Naŋgi segi muluŋ aiosai di uŋgum.

Rom 9:1

E Kristus aqa tamo deqa e niŋgi anjam bole merŋgwai. E niŋgi gisaŋ anjam merŋgwasai. Qotei aqa Mondor na e areqalo ebeqnu deqa e qalieonum, ijo anjam endi bole.

2 Korin 1:12

O was qu, e ijo kumbra bei endeqa tulaŋ areboleboleibqo. Ijo are miligiq di e qalieonum, e kumbra bole tiŋtiŋ segi dauryoqnsim yeqnum. Kumbra Qotei na osorbej qaji di segi e dauryoqnsim yeqnum. E mandam tamo naŋgoq dena powo osim kumbra di yosaieqnum. Qotei a e qa are boleiyosiq kumbra di osorbej deqa e yeqnum. Deqa e tamo uŋgasari kalil naŋgo ambleq dia kumbra di yeqnum. Agi e nuŋgo ambleq di dego nami kumbra di tulaŋ koba yoqnem.

2 Korin 5:11

Ariya iga Tamo Koba Yesus qa ulaoqnsim aqa sorgomq di unum deqa iga tamo uŋgasari naŋgo are bulyetnjroqnim naŋgi Yesus qa naŋgo areqalo siŋgilatqajqa deqa waueqnum. Iga wau di ugetosaieqnum. Qotei a segi gago areqalo ti gago kumbra ti qalie. Ariya e niŋgi qa qalieonum, nuŋgo are miligiq di niŋgi dego qalieonub, iga wau bole yeqnum.

1 Timoti 4:2

Bati di gisaŋ tamo naŋgi boqnsib gisaŋ anjam di tamo uŋgasari naŋgi minjroqnqab. Tamo naŋgi di naŋgo areqalo tulaŋ niñaqejunu. Deqa naŋgi naŋgo segi une poinjrqa keresai.

Taitus 1:15

Tamo uŋgasari Qotei aqa ŋamgalaq di une saiqoji unub qaji naŋgi mareqnub, “Iŋgi iŋgi kalil Qotei na atej qaji di jiga saiqoji.” Osib uyeqnub. Ariya tamo uŋgasari kumbra jigat dauryoqnsib Kristus qa naŋgo areqalo siŋgilatosaieqnub qaji naŋgi mareqnub, “Iŋgi iŋgi kalil Qotei na atej qaji di jigat.” Osib uyqa urateqnub. Di kiyaqa? Naŋgo areqalo ti naŋgo are miligi ti di tulaŋ jigat deqa.