Rom 16:18 - Yesus Aqa Anjam Bole

¹⁸ Tamo deqaji naŋgi gago Tamo Koba Kristus aqa wau ojosaieqnub. Naŋgi naŋgo segi jejamu qa are qaloqnsib deqa waueqnub. Osib tamo uŋgasari naŋgi walawalainjroqnsib gisa gisaŋnjroqnsibqa naŋgi nanaritnjreqnub. Deqa kumbra bole ti kumbra uge ti di naŋgi geregere poinjrosaieqnu.

Rom 16:18 ပူးပေါင်းရင်းမြစ်များ

Matyu 24:11

Gisaŋ tamo tulaŋ gargekoba naŋgi dego boqnsib tamo uŋgasari naŋgi endegsib minjroqnqab, ‘E Qotei aqa medabu o qaji tamo bole.’ Degsib naŋgi gisaŋnjroqnqab.

Matyu 24:24

Di kiyaqa? Tamo qudei naŋgi bosib gisaŋosib marqab, ‘E Kristus.’ Qudei naŋgi marqab, ‘E Qotei aqa medabu o qaji tamo bole.’ Degsib maroqnsib maŋwa kokba gargekoba babtoqnqab. Naŋgo maŋwa dena naŋgi na tamo uŋgasari kalil naŋgi ugeugeinjrqajqa deqa wauoqnqab. Osib Qotei aqa segi tamo uŋgasari nami giltnjrej qaji naŋgi dego ugeugeinjrqajqa wauoqnqab.

Matyu 6:24

Osiqa Yesus a olo anjam endegsi minjrej, “Tamo qujai a tamo kokba aiyel naŋgo sorgomq di sqa keresai. A na tamo kobaquja bei qalaqalaiyosim olo tamo kobaquja bei jeutqas. Bei aqa anjam dauryoqnsim olo bei qoreiyoqnqas. Dego kere niŋgi mandam qa iŋgi iŋgi ti Qotei ti turtnjrsib naŋgo sorgomq di sqa keresai.”

Matyu 7:15

Osiqa Yesus a olo anjam endegsi minjrej, “Niŋgi geregere ŋam atsib soqniye. Tamo qudei naŋgi na bosib gisaŋosib merŋgwab, ‘Iga Qotei aqa medabu o qaji tamo bole.’ Di gisaŋ koba. Tamo naŋgi di kaja bul lawo na nuŋgoq boqnsib walawalaiŋgoqnsib anjam merŋgeqnub. Ariya naŋgo are miligiq di naŋgi tamo uge bauŋ juwaŋ bul. Deqa naŋgi na niŋgi ugeugeiŋgwajqa laqnub. Bauŋ juwaŋ naŋgi na kaja naŋgi ñumoqnsib uyeqnub dego kere.

Jon 12:26

Tamo bei a ijo wau yqa osimqa a e daurbem. Yimqa qure e sqai qaji di ijo wau tamo a dego e ombla sqas. Tamo bei a ijo wau yoqnqas di ijo Abu na a ñam kobaquja yqas.”

Rom 14:18

Tamo naŋgi kumbra dena Kristus aqa wau ojoqnqab di Qotei a naŋgi qa tulaŋ arearetoqnqas. Yim tamo kalil naŋgi na naŋgi unjrsib marqab, “Naŋgi tamo bole.”

Rom 16:19

O was qu, e qalie, niŋgi Qotei aqa anjam geregere dauryosib laqnub. Laqnab tamo kalil naŋgi nuŋgo kumbra deqa queqnub. Deqa e niŋgi qa tulaŋ areboleboleibeqnu. Ariya e niŋgi endegsi merŋgwai. Niŋgi kumbra bole yqajqa geregere qalieosib kumbra uge yqajqa aŋgro kiñilala bul nanariosib soqniye.

2 Korin 11:3

Ariya e amal uge Satan qa are qalsim deqa e niŋgi qa ulaonum. A gisaŋ ani tamo deqa a nami Iv gisaŋyonaqa a une atej. Une di niŋgi qa bosim nuŋgo areqalo ugetetŋgimqa niŋgi Kristus a segi qujai qalaqalaiyqajqa urataib deqa e niŋgi qa ulaonum.

2 Korin 2:17

Ariya iga tamo gargekoba naŋgi bul sai. Agi tamo gargekoba naŋgi Qotei aqa anjam mareqnub di naŋgi silali oqajqa deqa osib waueqnub. Ariya iga degyosaieqnum. Qotei na iga wau egej deqa iga gisaŋ na wauosaieqnum. Iga Kristus koba na areqalo qujaitosim Qotei aqa ŋamgalaq di aqa anjam bole geregere marsim laqnum.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

Galesia 1:10

Niŋgi kiersib are qaleqnub? E anjam endi neŋgreŋyonum di mandam tamo naŋgi e qa boleqajqa kio Qotei a e qa boleqajqa kio deqa neŋgreŋyonum e? Mandam tamo naŋgi e qa boleqajqa deqa e waueqnum e? Niŋgi quiye. Mandam tamo naŋgi e qa boleqajqa deqa e waueqnum qamu e Kristus aqa wau tamo bolesai qamu.

Filipai 2:21

Tamo kalil naŋgi naŋgo segi jejamu qa are koba qaleqnub. Naŋgi Yesus Kristus aqa wau qa are qalosaieqnub.

Filipai 3:19

Tamo naŋgi di naŋgo segi jejamu qa are qaloqnsib dauryeqnub. Naŋgo areqalo di naŋgo gisaŋ qotei bul ateqnub. Naŋgi bati gaigai mandam qa iŋgi iŋgi oqajqa are tulaŋ prugnjreqnu. Naŋgi jemai kumbra yqajqa tulaŋ areboleboleinjreqnu. Deqa mondoŋ tamo naŋgi di ŋamyuoq di torei padalqab.

Kolosi 2:4

Tamo bei na bosim niŋgi gisaŋgosim walawala anjam bei niŋgi merŋgimqa niŋgi qusib dauryaib deqa e na anjam endi niŋgi merŋgonum.

Kolosi 3:24

Niŋgi qalie, mondoŋ Tamo Koba Yesus a na niŋgi awai boledamu eŋgwas. Awai di a na nami aqa segi tamo uŋgasari naŋgi enjrqa marej. Niŋgi are qaliye. Niŋgi Tamo Koba Yesus aqa wau tamo. A segi nuŋgo wau qa Gate.

2 Tesalonaika 2:10

Osim gisaŋ kumbra dena a na tamo uŋgasari padalqa gam dauryeqnub qaji naŋgi gisa gisaŋnjroqnqas. Yim naŋgi padalqab. Di kiyaqa? Qotei na naŋgi eleŋqa osiq aqa anjam bole naŋgi minjreqnaqa naŋgi deqa arearetnjrosaieqnu.

1 Timoti 6:5

Osib naŋgi gaigai ŋiriŋ anjam koba mareleŋeqnub. Tamo deqaji naŋgi areqalo tulaŋ uge na laqnub. Naŋgi Qotei aqa anjam bole qaliesai bolesai. Deqa naŋgi endegsib are qaleqnub, “Iga Qotei aqa kumbra dauryqom dena iga ñoro koba ti sqom.” O Timoti, naŋgo anjam di gisaŋ.

Jems 1:1

E Jems. E Qotei wo Tamo Koba Yesus Kristus wo naŋgo wau tamo. Niŋgi Israel naŋgo moma utru 12-pela naŋgo leŋ deqaji. Niŋgi nuŋgo segi segi qure utru uratosib jaraiosib sawa sawa kalil keretosib di unub. Deqa e na anjam endi neŋgreŋyosim niŋgi qa qariŋyonum. O was niŋgi kaiye.

2 Pita 2:3

Tamo naŋgi di mamaul ani. Deqa naŋgi na bosib gisaŋ anjam gargekoba niŋgi merŋgoqnsib dena nuŋgo silali iŋgi iŋgi yaiŋgoqnqab. Ariya tulaŋ nami Qotei na tamo naŋgi di peginjrqa bati atsiqa naŋgi qa endegsi marej, “E na tamo naŋgi di padaltnjrougetqai.” Od, tamo naŋgi di bole padalqab. Qotei a naŋgo padalqa bati qa tariŋeqnu.

Jut 1:1

E Jut. E Yesus Kristus aqa wau tamo. E Jems aqa was. E na anjam endi neŋgreŋyosim niŋgi tamo uŋgasari Qotei na metŋgej qaji niŋgi qa qariŋyonum. Gago Abu Qotei a na niŋgi tulaŋ qalaqalaiŋgeqnu. Yesus Kristus a segi na niŋgi taqatŋgeqnu.

Jut 1:12

Bati gaigai niŋgi nuŋgo iŋgi goioq di awooqnsib Qotei aqa qalaqalaiyo kumbra dauryeqnab tamo uge naŋgi di uli na boqnsib nuŋgo ambleq di kumbra tulaŋ jigat yeqnub. Naŋgi kumbra di yqajqa jemainjrosaieqnu. Naŋgi naŋgo segi jejamu qa are qaleqnub. Jagwa na awa puyeqnaqa urur koboeqnu dego kere tamo naŋgi di kumbra bole bei babtosaieqnub. Qura geitqa batieqnaqa a geitosaieqnu dego kere tamo uge naŋgi di kumbra bole bei babtosaieqnub. Iga ŋamtaŋ moio otoroqnsim taqal breinjreqnum dego kere tamo naŋgi di Qotei na osim sawa ugeq breinjrqas. Deqa mondoŋ naŋgi moiougetosib torei padalqab.

Jut 1:16

Tamo naŋgi di gaigai are ugeinjreqnaqa laŋa laŋa tamo naŋgo jejamuq di anjam qameleŋeqnub. Osib naŋgo segi areqalo uge uge dauryeqnub. Naŋgi naŋgo medabu waqtoqnsib diqoqnsib naŋgo segi ñam soqteqnub. Osib tamo uŋgasari naŋgo ñam dego laŋa soqtetnjroqnsib naŋgi walawala-injreqnub. Yim naŋgi na naŋgo areqalo dauryqajqa deqa.

Uli Anjam 1:1

Nami anjam endi uliesonaqa Yesus Kristus na olo babtej. Qotei na anjam endi Yesus osoryej. Yimqa kumbra mondoŋ urur brantoqujatqas qaji di Yesus na kamba olo aqa wau tamo naŋgi osornjrqajqa deqa. Ariya Yesus a na aqa laŋ aŋgro qariŋyonaqa a e qa bosiqa anjam endi e ebej. Yim e na kamba olo aqa wau tamo qudei naŋgi minjrqajqa deqa. E Jon. E Yesus aqa wau tamo.