Rom 15:8 - Yesus Aqa Anjam Bole

⁸ E endegsi marqai. Kristus a Juda naŋgi aqaryainjrqa oqnsiq wauoqnej. Qotei aqa anjam a bole di naŋgi qalieqajqa deqa osiq wauoqnej. Anjam Qotei na nami Juda naŋgo moma utru naŋgi minjroqnej qaji di siŋgilatqajqa deqa ti Kristus a wauoqnej.

Rom 15:8 ပူးပေါင်းရင်းမြစ်များ

Matyu 15:24

Onaqa Yesus na kamba minjrej, “Israel naŋgi kaja bul mandor saiqoji. Deqa e naŋgi segi aqaryainjrqajqa Qotei na qariŋbonaq bem.”

Matyu 20:28

E Tamo Aŋgro. Niŋgi ijo kumbra qalieosib degsib dauryoqniye. Tamo naŋgi na e aqaryaibosib wauetbqajqa e deqa bosai. E na tamo naŋgi wauetnjrqa bem. E na tamo uŋgasari gargekoba naŋgi aqaryainjrsiy ijo segi ŋambile uratosiy naŋgi eleŋqai. E deqa bem.”

Jon 1:11

A aqa segi qure utruq ainaqa aqa leŋ naŋgi a areiyosai.

Jon 10:16

Ijo kaja qudei dego jeŋ oqeq di unub. Naŋgi jeŋ miligiq endi sosai. Deqa e naŋgi dego joqsiy bosiy ijo kaja jeŋ miligiq endi unub qaji naŋgi ti turtnjrsiy jeŋ qujaiq di breinjrqai. Yim naŋgi mandor qujaiq di sosib ijo medabu dauryoqnqab.

Aposel 13:46

Deqa Pol wo Barnabas wo naŋgi na Juda tamo kokba naŋgi siŋgila na endegsib minjreb, “Qotei na aqo Barnabas wo qariŋgosiq mergej, ‘Niŋgi aisib namoqna Juda naŋgo segiq di brantoqnsib ijo anjam minjroqniye.’ Qotei na iga degsi mergej deqa iga bosim Qotei aqa anjam niŋgi Juda tamo uŋgasari namoqna merŋgonum. Merŋgonumqa agi niŋgi na gago anjam qusib gotraŋyonub. Nuŋgo kumbra dena niŋgi nuŋgo segi jejamuq di une atsib niŋgi ŋambile gaigai sqajqa gam uratonub. Deqa niŋgi quiye. Bini aqo aiyel niŋgi uratŋgsimqa sawa bei bei qaji tamo naŋgoq gilsim Qotei aqa anjam naŋgi minjroqnqom.

Rom 11:22

Niŋgi geregere are qaliye. Qotei na tamo qudei naŋgi kumbra bole enjreqnu. Osiqa olo tamo qudei naŋgi gulube enjreqnu. Tamo naŋgi aqa kumbra urateqnub qaji naŋgi di a na gulube enjreqnu. Ariya niŋgi aqa kumbra bole dauryqa siŋgilaqab di a na niŋgi kumbra bole eŋgoqnqas. Saiqas di a na niŋgi dego giŋgeŋgosim breiŋgwas.

Rom 11:30

Nami niŋgi Qotei aqa anjam gotraŋyoqneb. Ariya bini Israel naŋgi kamba Qotei aqa anjam gotraŋyeqnub. Gam dena Qotei a olo niŋgi qa are boleiyoqnsiq eleŋeqnu.

Rom 15:16

E Kristus Yesus aqa wau tamo deqa e sawa bei bei qaji tamo naŋgo ambleq dia wauoqnsim Qotei aqa anjam bole naŋgi minjreqnum. E na naŋgi osiy Qotei aqaq dia atrainjrobulitqa a naŋgi eleŋqajqa deqa waueqnum. Qotei aqa Mondor na naŋgi siŋgilatnjrimqa naŋgi Qotei aqa segi tamo uŋgasari sosib kumbra bole yoqnqajqa deqa e naŋgi qa waueqnum.

Rom 3:26

Ariya bini bati endi Qotei na iga endegsi osorgeqnu, a gaigai kumbra bole tiŋtiŋ segi yeqnu. Deqa iga endegsi qalieonum, Qotei a na tamo uŋgasari Yesus qa naŋgo areqalo siŋgilateqnub qaji naŋgi tamo bole une saiqoji qa minjreqnu di a kumbra bole tiŋtiŋ yeqnu.

Rom 3:3

Bole, Juda tamo qudei naŋgi Qotei aqa anjam di dauryosib naŋgo areqaloq di siŋgilatosaieqnub. Naŋgi urateqnub. Deqa iga endegsi marqom kio, “Qotei a gisaŋ tamo. A segi aqa anjam di dauryosaieqnu.”

Rom 4:16

Qotei a Abraham a qa ti aqa moma bunuqna brantqab qaji naŋgi qa ti are tulaŋ boleiyosiq deqa iŋgi iŋgi kalil di naŋgi enjrqa marej. Deqa tamo uŋgasari Qotei qa naŋgo areqalo siŋgilateqnub qaji naŋgi iŋgi iŋgi di oqab. Juda tamo dal anjam ejunub qaji naŋgi segi iŋgi iŋgi di oqasai. Tamo kalil Abraham aqa kumbra dauryosib Qotei qa naŋgo areqalo siŋgilateqnub qaji naŋgi dego iŋgi iŋgi di oqab. Abraham agi a iga kalil gago moma matu.

1 Korin 1:12

O was qu, niŋgi segi segi anjam na qoteqnub qaji nuŋgo utru agiende. Niŋgi qudei mareqnub, “E Pol dauryo qaji tamo.” Niŋgi qudei mareqnub, “E Apolos dauryo qaji tamo.” Niŋgi qudei mareqnub, “E Pita dauryo qaji tamo.” Ariya niŋgi qudei mareqnub, “E Kristus dauryo qaji tamo.” Niŋgi anjam na qoteqnub qaji nuŋgo utru agide.

1 Korin 10:19

Sulum atrainjro qaji iŋgi iŋgi di atraiyqa iŋgi bole e degaib. E degsi marosai. Sulum naŋgi di qotei bole e degaib. E degsi marosai.

1 Korin 10:29

Niŋgi segi unetqab e deqa merŋgosai. Tamo anjam merŋgwo qaji a are qalqas, niŋgi unetonub. E deqa niŋgi merŋgonum. Ariya Kristen was deqaji bei sosaiamqa e iŋgi uyqa are soqnim uyqai. Di une sai. Kiyaqa e tamo bei aqa areqalo dauryosiy iŋgi getentqai?

1 Korin 15:50

O was qu, e na niŋgi endegsi merŋgwai. Qotei na mandam qaji tamo naŋgi oqa keresai. Deqa a naŋgo Mandor Koba sosim naŋgi taqatnjrqa keresai dego. Gago jejamu moisim qusaqas qaji di ŋambile gaigai sqa keresai.

2 Korin 1:20

Anjam di aqa utru agiende. Qotei a nami iŋgi iŋgi gargekoba iga egwajqa marej. Kristus a odeqnu deqa Qotei na iŋgi iŋgi di iga egeqnu. Deqa iga Qotei aqa anjam di quoqnsim iga Kristus aqa ñam na mareqnum, “Di anjam bole.” Osim iga Qotei aqa ñam soqteqnum.

Efesus 2:12

bati deqa niŋgi Kristus aqaq di sosai. Niŋgi isaq di soqneb. Niŋgi Israel tamo uŋgasari naŋgi ti sosai dego. Qotei na Israel naŋgi iŋgi bole bole enjrqa minjrsiqa aqa anjam di siŋgilatosiq soqnej. Ariya anjam di a na niŋgi merŋgosai. Deqa iŋgi bole bole mondoŋ brantqas qaji deqa niŋgi tariŋosaioqneb. Niŋgi mandamq endia laŋa Qotei qaliesai soqneb.