Rom 15:14 - Yesus Aqa Anjam Bole

¹⁴ O was qu, ijo are miligiq di e qalieonum, niŋgi kumbra bole gaigai yeqnub. Niŋgi tulaŋ powo koba ti unub deqa niŋgi segi segi na Qotei aqa tamo uŋgasari naŋgi gam bole osornjreqnub.

Rom 15:14 ပူးပေါင်းရင်းမြစ်များ

1 Korin 1:5

E Qotei biŋiyeqnum. Di kiyaqa? Kristus aqa anjam iga nami niŋgi merŋgoqnem qaji di nuŋgo are miligiq di siŋgila na waueqnu deqa. Niŋgi Kristus beteryejunub deqa Qotei na niŋgi kumbra bole kalil yoqnqajqa tulaŋ keretŋgej. Nuŋgo anjam maro qa ti nuŋgo powo qa ti kalil Qotei na niŋgi tulaŋ keretŋgej.

1 Korin 12:8

Qotei aqa Mondor na tamo qudei naŋgi siŋgila enjreqnu deqa naŋgi areqalo bole babtoqnsib tamo uŋgasari naŋgi minjreqnub. Mondor qujai dena tamo qudei naŋgi siŋgila enjreqnaqa naŋgi Qotei aqa qalie bole babtoqnsib tamo uŋgasari naŋgi osornjreqnub.

1 Korin 13:2

E Qotei aqa medabu osiy anjam palontoqnqai kio e Qotei aqa uli anjam kalil qalieosiy utru babteleŋqai kio e qalie koba ti sqai kio e Qotei qa ijo areqalo tulaŋ siŋgilatosiy deqa mana kobaquja minjitqa a ijo anjam dauryosim tigelosim sawa beiq gilqas kio ariya e qalaqalaiyo kumbra dauryqasai di ijo kumbra kalil di Qotei aqa ŋamgalaq di kumbra bolesai.

1 Korin 8:1

Ariya e na sulum atrainjro qaji iŋgi iŋgi uyqajqa kumbra qa niŋgi merŋgwai. Tamo qudei naŋgi endegsib mareqnub, “Iga kalil powo ti unum.” Di naŋgi bole mareqnub. Ariya naŋgo powo dena naŋgi olo tulaŋ diqoqnsib naŋgo segi ñam soqtoqnsib laqnub. Ariya iga qalaqalaiyo kumbra dauryqom dena iga Kristen tamo uŋgasari naŋgo areqalo siŋgilatetnjroqnqom.

1 Korin 8:10

Niŋgi powo ti unub qaji niŋgi sulum naŋgo atra tal miligiq gilsib dia iŋgi uyoqnib Kristen was bei powo bole osai qaji a bosim niŋgi nuŋgsimqa a endegsi are qalqas, “Kristen was qu naŋgi di iŋgi iŋgi di uyeqnub deqa uŋgum, e dego uyqai.” Osim a uloŋosim uneq aiqas.

1 Korin 8:7

Ariya Kristen tamo qudei naŋgi anjam deqa geregere poinjrosaiunu. Naŋgi nami iŋgi iŋgi oqnsib gisaŋ qotei naŋgo sulum atrainjroqneb deqa bini naŋgi endegsib are qaleqnub, “Iga sulum atrainjro qaji iŋgi di uyqom di iga sulum naŋgi di olo atrainjroqnqom. Dena iga unetqom.” O was qu, naŋgi powo bole osai deqa naŋgi degsib are qaleqnub.

2 Korin 8:7

O was qu, bati gaigai niŋgi kumbra tulaŋ boledamu yeqnub. Agi niŋgi Qotei qa nuŋgo areqalo siŋgilatoqnsib aqa anjam palontqajqa waukobaeqnub. Niŋgi Qotei qa qalie koba ti sosib deqa niŋgi aqa wau ojqajqa tulaŋ siŋgilaeqnub. Osib niŋgi iga dego tulaŋ qalaqalaigeqnub. Ariya Qotei a niŋgi qa are tulaŋ boleiyosiq aqaryaiŋgej deqa niŋgi nuŋgo kumbra di olo buŋyosib silali koroiyqajqa wau di dego yoqnsib silali atib soqnem.

Efesus 5:9

Suwaŋ a na kumbra endeqaji babteqnu. Tamo naŋgi suwaŋoq di unub qaji naŋgi kumbra bole bole yeqnub. Naŋgi kumbra tiŋtiŋ dauryeqnub. Naŋgi anjam bole mareqnub.

Filipai 1:11

O was qu, kumbra bole kalil Yesus Kristus a segi na babteqnu qaji di nuŋgoq di tulaŋ kobaoqnqajqa deqa e niŋgi qa pailyeqnum. Yim tamo uŋgasari naŋgi nuŋgo kumbra di unsib Qotei aqa ñam soqtoqnqab.

Filipai 1:7

Niŋgi ijo are miligiq di unub deqa e kere niŋgi qa degsim are qaleqnum. E tonto talq endi sqai kio e Kristus aqa anjam bole siŋgilatoqnsiy laqnqai kio di uŋgum. Qotei a e qa are tulaŋ boleiyosiq wau ebej deqa niŋgi kalil e beterbosib e ti koba na Qotei aqa wau ojeqnum.

Kolosi 3:16

Osib niŋgi Kristus aqa anjam osib nuŋgo are miligiq di siŋgilatib soqnem. Osib niŋgi na nuŋgo Kristen was qu naŋgi areqalo bole ti powo ti osornjroqniye. Yim naŋgi kumbra bole bole yoqnqajqa deqa. Niŋgi nuŋgo are miligiq di Qotei biŋiyoqnsib a qa louoqniye. Lou qudei neŋgreŋq di unu qaji dena ti lou qudei Qotei aqa Mondor na nuŋgo are miligiq di ateqnu qaji dena ti niŋgi Qotei qa louoqniye.

1 Tesalonaika 5:11

Deqa niŋgi segi segi Qotei aqa tamo uŋgasari naŋgi anjam bole minjroqnsib dena naŋgo are siŋgilatetnjroqniye. Agi bini niŋgi degyeqnub.

1 Tesalonaika 5:14

O was qu, iga na nuŋgo are tigeltetŋgimqa niŋgi na tamo naŋgi wauqajqa asginjreqnu qaji naŋgo kumbra olo tingi-tetnjroqniye. Osib tamo naŋgi ulaeqnub qaji naŋgo are siŋgila-tetnjroqniye. Osib tamo siŋgila saiqoji unub qaji naŋgi olo aqaryainjroqniye. Osib tamo kalil naŋgi lawo na geregereinjroq-niye.

2 Tesalonaika 1:11

Deqa was qu, iga bati gaigai niŋgi qa osim gago Qotei endegsi pailyeqnum, “O Abu, ni na Tesalonaika Kristen naŋgi aqaryainjroqnimqa kumbra kalil ni nami naŋgi dauryqa metnjrem qaji di naŋgi dauryoqnibqa ni unsim minjrqam, ‘Niŋgi keretonub.’ O Abu, ni na naŋgi siŋgilatnjrimqa kumbra bole kalil naŋgi yqajqa arearetnjreqnu qaji di naŋgi yoqnqab. Osib Yesus qa naŋgo areqalo siŋgilatoqnsib aqa wau geregere ojqab.” O was qu, iga degsim niŋgi qa Qotei pailyeqnum.

2 Timoti 1:5

Nami ino moma Lois naŋgi ino ai Yunis wo Kristus qa naŋgo areqalo siŋgilatoqneb dego kere bini ni dego Kristus qa ino areqalo siŋgilatejunum. E deqa are qaloqnsim unum.

Filemon 1:21

E qalieonum. Ni ijo anjam endi sisiyosim dauryosim Onesimus gereiyqam. Osim ijo anjam endi buŋyosim olo Onesimus kumbra tulaŋ boledamu yqam. Utru deqa e anjam endi neŋgreŋyosim ni qa qariŋyonum.

Hibru 5:12

Niŋgi nami are bulyeb bati olekoba gilqo. Deqa niŋgi Qotei aqa anjam plaltosib Kristen tamo uŋgasari naŋgi minjrqa kere. Ariya nuŋgo powo kobaosaiunu deqa niŋgi Qotei aqa anjam plaltsib marqa keresai. Tamo qudei naŋgi na olo niŋgi Qotei aqa anjam utruq na merŋgwab di niŋgi poiŋgwas. Niŋgi aŋgro mom muŋgum uyeqnub dego bul. Niŋgi iŋgi siŋgila uyqa kereosaiunu.

Hibru 6:9

O gago was bole, iga na anjam siŋgila niŋgi merŋgonum. Ariya iga qalieonum, niŋgi degsib padalqasai. Qotei na niŋgi aqaryaiŋgosim oqas.

2 Pita 1:12

Bole, niŋgi ijo anjam bole di qalieonub deqa agi niŋgi siŋgila na ojejunub. Ariya niŋgi anjam deqa olo are walŋgaim deqa e bati gaigai niŋgi olo merŋgwajqa are qaleqnum.

1 Jon 2:21

Niŋgi anjam bole qaliesai e deqa osim anjam endi neŋgreŋyosai. Niŋgi anjam bole qalieonub e deqa osim anjam endi neŋgreŋyonum. Niŋgi qalie, iga anjam bole marqom dena iga gisaŋ anjam bei babtqa keresai.