Rom 14:9 - Yesus Aqa Anjam Bole

⁹ Kristus a dego moisiq olo ŋambile osiq subq na tigelej. Di kiyaqa? A tamo ŋambile unub qaji ti tamo moreŋeb qaji naŋgi ti naŋgo Tamo Koba sqajqa deqa.

Rom 14:9 ပူးပေါင်းရင်းမြစ်များ

Matyu 28:18

Ariya Yesus a naŋgo areq gilsiqa minjrej, “E na mandam ti laŋ ti taqatqajqa deqa ijo Abu na siŋgila kalil ijo baŋq di atqo.

Luk 24:26

Agi Qotei aqa medabu o qaji tamo naŋgi nami anjam endegsib maroqneb, ‘Kristus agi Qotei na giltej qaji a jaqatiŋ koba osim moiqas. Osim a laŋ qureq oqimqa Qotei na ñam kobaquja yqas.’ Qotei aqa medabu o qaji tamo naŋgi nami anjam degsib maroqneb. Naŋgo anjam di niŋgi qaliesai kio?”

Jon 12:24

Niŋgi quiye. E bole merŋgwai. Wit yago breiyibqa mandamq aisim moiqasai di a laŋa sqas. Ariya moiqas di a olo qoqi oqsim gei gargekoba ateleŋqas.

Aposel 10:36

Bole, nami Qotei na aqa anjam bole qariŋyonaqa Israel naŋgo segiq aiej. Anjam di aqa damu endegsi unu. Tamo uŋgasari naŋgi Qotei ti jeu sonabqa Yesus Kristus na jeu kobotej. Yesus a tamo kalil naŋgo Tamo Koba.

Aposel 10:42

Yesus a na nami iga endegsi mergej, ‘Niŋgi na tamo uŋgasari naŋgi e qa endegsib minjroqniye, “Yesus a segi qujai Qotei na giltej qaji. Deqa mondoŋ a na qujai tamo ŋambile unub qaji ti tamo nami moreŋeb qaji naŋgi ti naŋgo une qa peginjrsim naŋgi ŋamyuoq wainjrqas.” ’ Yesus a na nami iga degsi mergej.

Rom 10:9

Deqa niŋgi nuŋgo medabu waqtosib Yesus a segi qujai Tamo Koba degsib boleq na marqab di Qotei na niŋgi oqas. Qotei a Yesus subq na olo tigeltej anjam di nuŋgo are miligiq di siŋgilatosib sqab di Qotei na niŋgi oqas.

2 Korin 5:14

Kristus a na iga tulaŋ qalaqalaigej. Aqa kumbra dena a gago areqalo tigeltetgej deqa iga waueqnum. Di kiyaqa? Iga qalieonum, tamo qujai Yesus a gago kalil qa sawa osiq moiej deqa iga kalil dego moreŋem.

1 Tesalonaika 4:14

Yesus a moisiqa olo subq na tigelej anjam di iga gago areqaloq di siŋgilatejunum. Deqa iga qalieonum, mondoŋ Qotei a Yesus aqa siŋgila na Kristen tamo uŋgasari nami moreŋeb qaji naŋgi olo subq na tigeltnjrqas. Yimqa naŋgi Yesus dauryosib koba na olo mandamq aiqab.

1 Tesalonaika 5:10

Yesus a iga qa moiej deqa iga ŋambile sqom kio iga moiqom kio di uŋgum. Iga Yesus koba na ŋambile gaigai sqom.

2 Timoti 4:1

Qotei wo Kristus Yesus wo naŋgo ŋamgalaq di e ni siŋgila na endegsi mermqai. Mondoŋ Kristus Yesus a laŋ qureq dena brantosim bati deqa a na tamo uŋgasari kalil ŋambile so qaji naŋgi ti tamo uŋgasari nami moreŋeb qaji naŋgi ti naŋgo kumbra qa peginjrqas. Osim a bati gaigai naŋgo Mandor Koba sqas.

Hibru 12:2

Osim iga Yesus koqyoqnqom. Iga Qotei qa gago areqalo siŋgilateqnum kumbra di agi Yesus a segi utru. Bunuqna a na gago kumbra di torei keretqas. Yesus a qalie, a Qotei aqa anjam geregere dauryosim ŋamburbasq di moiqas di bunuqna a olo ŋambile bole osim tulaŋ areboleboleiyqas. A deqa are qalsiq siŋgilaosiq ŋamburbasq di moiej. A nami qalieej, a ŋamburbasq di moiqas di tamo uŋgasari naŋgi a qa maroqnqab, “A tamo tulaŋ uge deqa a moiqo.” Yim a jemakobaiyqas. Ariya Yesus a jemai deqa are qalosai. A Qotei aqa anjam dauryosiq moiej. Ariya bini a olo laŋ qureq dia Qotei aqa awo jaram baŋ woq di awejunu.

1 Pita 1:21

Kristus a na niŋgi aqaryaiŋgej deqa niŋgi Qotei qa nuŋgo areqalo siŋgilatosib unub. Kristus agi moinaqa Qotei na olo subq na tigeltosiqa metonaq a laŋ qureq oqsiq dia ñam kobaquja ej. Utru deqa niŋgi Qotei qa nuŋgo areqalo siŋgilatoqnsib anjam a nami marej qaji di aqa damu brantqajqa deqa tariŋoqnsib unub.

1 Pita 4:5

Ariya mondoŋ tamo naŋgi di Qotei aqa ulatamuq dia tigelosib naŋgo une di palontqab. Bati deqa Qotei na tamo ŋambile so qaji ti tamo moreŋo qaji naŋgi ti naŋgo kumbra qa peginjrsimqa naŋgi awai segi segi enjrqas.

Uli Anjam 1:18

E ŋambile gaigai sqajqa utru. Nami e moiem. Bini ni e nube. E olo ŋambile unum. E bati gaigai ŋambile sqai. E segi na moio ti moio qure ti taqatejunum.

Uli Anjam 2:8

Yesus a na e degsi merbsiqa olo endegsi merbej, “Smerna qureq dia tamo uŋgasari naŋgi ijo ñam qa koroosib loueqnub qaji naŋgo laŋ aŋgro qa anjam endegsi neŋgreŋyosim aqaq qariŋye, ‘E Yesus. E segi qujai namoq di unum. E segi qujai bunuq di sqai. Nami e moiem. Bini e olo ŋambile unum. E na anjam endi ni qa qariŋyonum.