Rom 14:2 - Yesus Aqa Anjam Bole

² Tamo qudei naŋgi Yesus qa naŋgo areqalo siŋgilateqnub deqa naŋgi iŋgi uyo bei getentosaieqnub. Kalil uyeqnub. Ariya tamo qudei naŋgo areqalo kiñala siŋgilaosaiunu deqa naŋgi wagme qudei uyosaieqnub. Kalil getenteqnub.

Rom 14:2 ပူးပေါင်းရင်းမြစ်များ

Rom 14:1

Tamo bei a Yesus qa aqa areqalo siŋgilateqnu ariya aqa areqalo di kiñala siŋgilaosaiunu. Deqa niŋgi a qoreiyaib. Niŋgi a osib Kristen naŋgo ambleq osib boiye. Niŋgi aqa kumbra qudei uge qa minjsib a ombla anjam na qotoqnaib.

Rom 14:14

Tamo Koba Yesus a na e powo ebej deqa e qalieonum, iŋgi iŋgi kalil Qotei na ateleŋej qaji di aqa ŋamgalaq di jiga bei saiqoji. Ariya Kristen was bei a iŋgi bei qa endegsi are qalqas, “Iŋgi di jigat.” A degsi are qalqas deqa a iŋgi di getentqas.

Rom 14:20

Niŋgi iŋgi uyo qa are qalsib dena Qotei aqa wau ugetaib. Bole, niŋgi iŋgi iŋgi kalil uyqa kere. Ariya niŋgi iŋgi bei uysib dena nuŋgo was bei uneq waiyqab di niŋgi kumbra uge yonub.

Rom 15:1

Iga Kristen tamo siŋgila ti unum qaji iga na Kristen was qudei siŋgila saiqoji unub qaji naŋgi aqaryainjroqnsim naŋgo gulube qoboiyetnjroqnqom. Iga gago segi jejamu aqaryaiyqajqa are qalqasai.

1 Korin 10:25

Niŋgi maket dena damu awaiyoqnsib uyoqniye. Damu di nami sulum naŋgi atrainjroqneb kio sai kio niŋgi deqa are koba qalsib nenemoqnaib. Niŋgi osib uyoqniye.

1 Korin 8:9

Ariya niŋgi geregere are qaliye. Niŋgi qalie, niŋgi iŋgi bei uyqa are soqnim niŋgi uyiye. Di une sai. Ariya niŋgi iŋgi uyibqa tamo naŋgi powo bole osai qaji naŋgi niŋgi nuŋgsib dena uloŋosib uneq aiqab di niŋgi olo iŋgi di uyaib.

1 Korin 9:22

Tamo naŋgi siŋgila saiqoji unub qaji naŋgi dego e na oqajqa deqa e naŋgo kumbra dauryoqnsim siŋgila saiqoji sobulosim dena e na naŋgi are bulyetnjreqnam naŋgi Kristus aqaq beqnub. O was qu, e tamo kalil naŋgo sorgomq di sosim naŋgo kumbra dauryeqnum. Di kiyaqa? E na naŋgi qudei are bulyetnjroqnit naŋgi Kristus aqaq bqajqa deqa.

Galesia 2:12

Aqa kumbra uge agiende. Jems a na Juda Kristen tamo qudei muluŋ aiqajqa siŋgilaoqneb qaji naŋgi qariŋnjrnaqa naŋgi Antiok beb. Ariya naŋgi bosaisonabqa Pita a sawa bei bei qaji tamo naŋgi koba na iŋgi uyoqneb. Ariya naŋgi bonabqa Pita a naŋgi qa ulaosiq deqa a sawa bei bei qaji tamo naŋgi olo tututnjrej.

1 Timoti 4:4

Iga qalie, iŋgi iŋgi kalil Qotei na atej qaji di bole. Deqa iga iŋgi bei getentqasai. Iga Qotei biŋiyoqnsim iŋgi iŋgi kalil di oqnqom.

Taitus 1:15

Tamo uŋgasari Qotei aqa ŋamgalaq di une saiqoji unub qaji naŋgi mareqnub, “Iŋgi iŋgi kalil Qotei na atej qaji di jiga saiqoji.” Osib uyeqnub. Ariya tamo uŋgasari kumbra jigat dauryoqnsib Kristus qa naŋgo areqalo siŋgilatosaieqnub qaji naŋgi mareqnub, “Iŋgi iŋgi kalil Qotei na atej qaji di jigat.” Osib uyqa urateqnub. Di kiyaqa? Naŋgo areqalo ti naŋgo are miligi ti di tulaŋ jigat deqa.

Hibru 13:9

Deqa tamo qudei naŋgi bosib anjam utru segi segi na nuŋgo are tigeltetŋgibqa niŋgi naŋgo anjam di dauryaib. Osib Qotei aqa gam urataib. Qotei a iga qa are tulaŋ boleiyeqnu anjam dena iga gago are siŋgilatoqnqom. Tamo qudei naŋgo iŋgi uyo qa anjam mareqnub. Anjam di gisaŋ. Anjam di laŋa jejamu qa anjam. Deqa anjam dena iga gago are siŋgilatqa keresai. Tamo uŋgasari naŋgi iŋgi uyo qa anjam di dauryeqnub ariya kumbra dena naŋgi yala aqaryainjrosaieqnu.

Hibru 9:10

O was qu, dal anjam di uyo iŋgi qa ti ya uyo qa ti yanso oqajqa ti deqa mareqnu. A jejamu qa iŋgi iŋgi qa segi mareqnu. Ariya Qotei na dal anjam di tamo uŋgasari naŋgi enjrej. Osiqa endegsi are qalej, “Naŋgi mati dal anjam di dauryosib giloqnib bunuqna batiamqa e na iŋgi iŋgi kalil tingitnjrit koboamqa e olo gam bunuj naŋgi osornjrqai.”