Rom 14:19 - Yesus Aqa Anjam Bole

¹⁹ Deqa iga kalil lawo na sqajqa ti gago Kristen was naŋgo are siŋgilatetnjrqajqa ti deqa are qaloqnsim wauoqnqom.

Rom 14:19 ပူးပေါင်းရင်းမြစ်များ

Matyu 5:9

“Tamo uŋgasari jeu turyoqnsibqa lawo kumbra boleq ateqnub qaji naŋgi dego tulaŋ areboleboleinjreme. Di kiyaqa? Qotei a naŋgi qa olo marqas, ‘Naŋgi ijo segi aŋgro bole.’

Mak 9:50

“Bar a bole. A qajarara koba. Ariya bar aqa qajarara koboqas di iŋgi kie na olo qajararatqas? Di keresai. Dego kere niŋgi bar bul sosibqa nuŋgo was naŋgi koba na geregere lawo na laqniye.”

Rom 12:18

Niŋgi ŋiriŋ ti qoto ti uratiye. Gam soqnimqa niŋgi gaigai tamo kalil naŋgi koba na are qujaitosib soqniye.

Rom 15:2

Iga segi segi na gago Kristen was naŋgi aqaryainjroqnqom. Osim dena iga naŋgo are siŋgilatetnjrim naŋgi bole sqab.

1 Korin 10:23

Iga kumbra kalil yqa kere. Ariya iga kumbra kalil di yqom dena iga aqaryaigwa keresai. Bole, iga kumbra kalil yqa kere. Ariya kumbra kalil dena gago areqalo siŋgilatetgwa keresai.

1 Korin 10:33

E dego tamo uŋgasari kalil naŋgi kumbra bole bole enjreqnam naŋgi ijo kumbra di unoqnsib arearetnjreqnu. E ijo segi jejamu qa are qalosaieqnum. E tamo uŋgasari gargekoba naŋgi qa are qaloqnsim aqaryainjreqnum. Yim Qotei na naŋgi oqajqa deqa.

1 Korin 14:26

Deqa was qu, niŋgi Qotei louqa korooqnsibqa niŋgi endegyoqniye. Niŋgi kalil segi segi wau ti deqa niŋgi qudei louoqniye. Niŋgi qudei Qotei aqa anjam plaltoqniye. Niŋgi qudei Qotei aqa uli anjam ubtoqniye. Niŋgi qudei meŋ bulyosib qure utru segi segi naŋgo anjam maroqniye. Niŋgi qudei qure utru segi segi naŋgo anjam aqa damu poiŋgim bulyosib palontoqniye. O was qu, nuŋgo wau segi segi dena niŋgi na Kristen tamo uŋgasari naŋgi siŋgilatnjroqniye.

1 Korin 14:3

Ariya tamo naŋgi Qotei aqa medabu oqnsib anjam palonteqnub qaji naŋgi anjam aqa damu geregere babteqnab tamo naŋgi quoqnsib poinjreqnu. Deqa anjam dena naŋgo areqalo siŋgilatetnjroqnsiq naŋgi kumbra bole yqajqa are tigeltetnjroqnsiq naŋgo are miligi boletetnjreqnu.

1 Korin 14:4

Tamo naŋgi meŋ bulyoqnsib qure utru segi segi naŋgo anjam mareleŋeqnub qaji naŋgi naŋgo segi areqalo siŋgilateqnub. Ariya tamo naŋgi Qotei aqa medabu oqnsib anjam palonteqnub qaji naŋgi na Kristen tamo uŋgasari kalil naŋgi dego areqalo siŋgilatetnjreqnub.

1 Korin 14:5

Ijo areqalo agiende. Niŋgi kalil meŋ bulyoqnsib qure utru segi segi naŋgo anjam maroqnqab di bolequja. Ariya niŋgi Qotei aqa medabu oqnsib anjam palontoqnqab di tulaŋ boledamu. Niŋgi quiye. Tamo bei a meŋ bulyosim qure utru bei naŋgo anjam maroqnim tamo bei a kamba anjam di aqa damu poiyim bulyosim palontqas di kere. Anjam dena Kristen tamo uŋgasari kalil naŋgo areqalo siŋgilatetnjrqas. Ariya anjam bulyo tamo bei sqasai di meŋ bulyo tamo aqa anjam na Kristen tamo uŋgasari naŋgo areqalo siŋgilatetnjrqasai. Deqa tamo naŋgi Qotei aqa medabu oqnsib anjam palonteqnub qaji naŋgi na meŋ bulyo tamo naŋgi tulaŋ buŋnjresqab.

1 Korin 7:15

Ariya Kristen tamo bei aqa uŋa a Yesus qa aqa areqalo siŋgilatosai. Deqa uŋa dena tamo di uratqa marsim uratem. Tamo a deqa une saiqoji. A uratqasai di a tonto talq di sobulqas. Kristen uŋa dego aqa tamo a Yesus qa aqa areqalo siŋgilatosai. Deqa tamo dena uŋa di uratqa marsim uratem. A dego une saiqoji. A uratqasai di a tonto talq di sobulqas. Qotei a niŋgi nuŋgo Kristen was qu naŋgi koba na geregere sqajqa metŋgeqnu. Deqa niŋgi ijo anjam di dauryiye.

1 Korin 8:1

Ariya e na sulum atrainjro qaji iŋgi iŋgi uyqajqa kumbra qa niŋgi merŋgwai. Tamo qudei naŋgi endegsib mareqnub, “Iga kalil powo ti unum.” Di naŋgi bole mareqnub. Ariya naŋgo powo dena naŋgi olo tulaŋ diqoqnsib naŋgo segi ñam soqtoqnsib laqnub. Ariya iga qalaqalaiyo kumbra dauryqom dena iga Kristen tamo uŋgasari naŋgo areqalo siŋgilatetnjroqnqom.

2 Korin 12:19

Niŋgi gago anjam kalil endi sisiyosib iga qa endegsib are qalaib, “Naŋgi anjam neŋgreŋyeqnub di naŋgo segi jejamu une saiqoji qa marsib deqa neŋgreŋyeqnub.” Di sai. Iga Kristus aqa tamo deqa iga Qotei aqa ŋamgalaq di anjam endi neŋgreŋyeqnum. O ijo was bole, anjam kalil iga neŋgreŋyeqnum qaji endi niŋgi siŋgilatŋgwajqa deqa neŋgreŋyeqnum.

2 Korin 13:11

Ariya was qu, e ijo anjam getentqai. Niŋgi kalil kaiye. Niŋgi torei Kristen tamo uŋgasari boledamu sqajqa siŋgilaoqniye. Niŋgi ijo anjam quoqnsib dauryoqniye. Niŋgi kalil areqalo qujaitosib soqniye. Yim Qotei a niŋgi ti sqas. Agi a na niŋgi tulaŋ qalaqalaiŋgoqnsiq lawo kumbra eŋgeqnu.

Efesus 4:12

Iga Qotei aqa segi tamo uŋgasari unum deqa Kristus a na iga aqaryaigimqa iga aqa wau geregere ojqajqa deqa are qalsiq wau segi segi egeqnu. Kristus aqa segi tamo uŋgasari naŋgi aqa jejamu qujai unub deqa iga naŋgi qa wauetnjroqnqom. Yimqa gago wau dena naŋgi siŋgila oqnsib so bole sqab.

Efesus 4:29

Niŋgi nuŋgo medabu waqtoqnsib anjam uge uge maroqnaib. Niŋgi anjam bole segi maroqnsib dena tamo naŋgi gulube ti unub qaji naŋgi olo siŋgilatnjroqniye. Yoqnim naŋgi nuŋgo anjam di quoqnib dena Qotei a naŋgi qa are tulaŋ boleiyoqnsim kumbra bole bole enjroqnqas.

1 Timoti 1:4

O was qu, gisaŋ tamo naŋgi di laŋa sa anjam ti naŋgo moma naŋgo ñam qa ti anjam koba laŋa laŋa mareleŋeqnub. Deqa ni na tamo naŋgi di minjrim naŋgo kumbra di uratqab. Naŋgo anjam di tamo uŋgasari naŋgi minjroqnsib dena naŋgo areqalo tulaŋ ugeugeiyetnjreqnub. Deqa tamo uŋgasari naŋgi di Qotei qa naŋgo areqalo siŋgilatqa yeqnab anjam dena naŋgi aqaryainjrosaieqnu. Od, iŋgi bole bole Qotei na iga egwa mareqnu qaji di naŋgi qalieqa yeqnab anjam dena naŋgi yala aqaryainjrosaieqnu.

2 Timoti 2:22

Deqa areqalo uge uge kalil aŋgro wala naŋgo are miligiq dena branteqnu qaji di ni na qoreiye. Osim ni kumbra tiŋtiŋ yqajqa wauoqnsim Qotei qa ino areqalo siŋgilatoqnsim tamo kalil naŋgi qalaqalainjroqnsim are lawo na soqne. Ni ti tamo kalil are bole na Tamo Koba Qotei qa louoqnsib aqa ñam na pailyeqnub qaji naŋgi ti kumbra di yoqniye.

Hibru 12:14

Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai.

1 Pita 3:11

A kumbra uge kalil torei qoreiyosim kumbra bole segi yoqneme. Osim tamo uŋgasari kalil naŋgi koba na are qujaitosib kumbra bole yoqnqajqa siŋgilaoqneme.