Rom 14:18 - Yesus Aqa Anjam Bole

¹⁸ Tamo naŋgi kumbra dena Kristus aqa wau ojoqnqab di Qotei a naŋgi qa tulaŋ arearetoqnqas. Yim tamo kalil naŋgi na naŋgi unjrsib marqab, “Naŋgi tamo bole.”

Rom 14:18 ပူးပေါင်းရင်းမြစ်များ

Mak 13:34

Niŋgi ijo anjam endi poiŋgwajqa deqa yawo anjam bei endegsi merŋgwai. Tamo kobaquja bei a sawa isaq gilqa osimqa aqa wau tamo naŋgo baŋq di aqa tal ti iŋgi iŋgi ti uratetnjrsimqa naŋgi wau segi segi enjrqas. Osim aqa wau tamo bei minjqas, ‘Ni siraŋmeq di tigelesosim geregere ŋam atoqne.’

Jon 12:26

Tamo bei a ijo wau yqa osimqa a e daurbem. Yimqa qure e sqai qaji di ijo wau tamo a dego e ombla sqas. Tamo bei a ijo wau yoqnqas di ijo Abu na a ñam kobaquja yqas.”

Aposel 10:35

Deqa Qotei na iga Juda tamo segi oqasai. Sawa sawa kalilq dia tamo uŋgasari kumbra bole bole yoqnsib Qotei aqa sorgomq di unub qaji naŋgi dego a na eleŋeqnu.

Rom 12:11

Niŋgi gaigai siŋgila na Qotei aqa wau ojoqniye. Qotei aqa Mondor a nuŋgoq aioqnsim are tigeltetŋgoqnim niŋgi Tamo Koba Yesus aqa wau ojqajqa tulaŋ siŋgilaoqniye.

Rom 14:4

Ni tamo kiero deqa ni na tamo bei aqa wau tamo a uge qa minjqam? A siŋgila na wau bole yqas kio aqa wau uloŋqas kio di aqa wau qa gate a segi na pegiyqas. Ariya e qalieonum, a siŋgila na tigelosim wau bole yqas. Di kiyaqa? Tamo Koba Qotei na a siŋgilatimqa a siŋgila na tigelesqas.

Rom 16:18

Tamo deqaji naŋgi gago Tamo Koba Kristus aqa wau ojosaieqnub. Naŋgi naŋgo segi jejamu qa are qaloqnsib deqa waueqnub. Osib tamo uŋgasari naŋgi walawalainjroqnsib gisa gisaŋnjroqnsibqa naŋgi nanaritnjreqnub. Deqa kumbra bole ti kumbra uge ti di naŋgi geregere poinjrosaieqnu.

Rom 6:22

Ariya nuŋgo une na niŋgi tonto talq waiŋgobulonaq sonabqa Qotei a dena olo niŋgi eleŋej. Deqa bini niŋgi Qotei aqa segi wau tamo unub. Deqa niŋgi iŋgi bole bole endi oqnqab. A na niŋgi aqa segi kumbra boleq di atimqa niŋgi kumbra bole bole a tulaŋ areareteqnu qaji di yoqnqab. Osib niŋgi ŋambile gaigai sqab.

1 Korin 7:22

Tamo naŋgi kaŋgal tamo sonabqa Qotei na metnjrej qaji naŋgi Tamo Koba Yesus aqa. Deqa naŋgi aqa ŋamgalaq di kaŋgal tamo sosai. Dego kere tamo naŋgi kaŋgal tamo sosai sonabqa Qotei na metnjrej qaji naŋgi olo Kristus aqa kaŋgal tamo bul unub.

2 Korin 4:2

Kumbra uge uge kalil tamo naŋgi ulitosib yeqnub qaji di iga qoreiyeqnum. Iga gisaŋ kumbra na walwelosaieqnum. Iga Qotei aqa anjam bulbulyo-saieqnum. Iga boleq di anjam bole segi mareqnum. Yim tamo kalil naŋgi gago kumbra di unsib naŋgo are miligiq di qalieqab, bole, iga Qotei aqa ŋamgalaq di wau bole yeqnum.

2 Korin 5:11

Ariya iga Tamo Koba Yesus qa ulaoqnsim aqa sorgomq di unum deqa iga tamo uŋgasari naŋgo are bulyetnjroqnim naŋgi Yesus qa naŋgo areqalo siŋgilatqajqa deqa waueqnum. Iga wau di ugetosaieqnum. Qotei a segi gago areqalo ti gago kumbra ti qalie. Ariya e niŋgi qa qalieonum, nuŋgo are miligiq di niŋgi dego qalieonub, iga wau bole yeqnum.

2 Korin 5:9

Ariya iga mandamq endia sqom kio iga laŋ qureq oqsim dia sqom kio iga deqa are qalqasai. Kumbra Tamo Koba Yesus a areareteqnu qaji di segi iga dauryoqnsim sqajqa are qaleqnum.

2 Korin 6:4

Iga Qotei aqa wau tamo deqa iga gaigai tamo uŋgasari kalil naŋgo ŋamgalaq di kumbra bole yeqnum. Gulube bei bei gagoq di branteqnaqa iga siŋgila na tigeloqnsim gulube di qoboiyeqnum. Tamo qudei naŋgi na iga ugeugeigeqnab iga naŋgi qa ulaosaieqnum. Une bei bei na iga padaltgwa laqnaqa iga na olo gotraŋyeqnum.

2 Korin 8:21

Di kiyaqa? Iga kumbra bole segi dauryqajqa deqa. Iga Tamo Koba Qotei aqa ŋamgalaq di segi kumbra bole yqajqa are qalosai. Iga tamo uŋgasari naŋgo ŋamgalaq di dego kumbra bole yqajqa are qaleqnum.

Filipai 4:18

E silali iŋgi iŋgi kere unu. E iŋgi bei qa truquosaieqnum. Di kiyaqa? Niŋgi na silali di Epafroditus yonabqa a na osi bosiq ebej. Niŋgi silali qa e aqaryaibeb deqa niŋgi Qotei atraiyobuleb. Atraiyo iŋgi di quleq bole ti. Qotei a atraiyo iŋgi deqa tulaŋ areboleboleiyqo.

Filipai 4:8

Ariya was qu, e anjam qujai bei unu. Anjam agiende. Niŋgi gaigai kumbra endeqa are qaloqniye. Kumbra bole ti kumbra tiŋtiŋ ti kumbra jiga saiqoji deqa ti kumbra Qotei a tulaŋ qalaqalaiyeqnu qaji deqa ti kumbra tamo naŋgi yeqnab iga unoqnsim deqa areboleboleigeqnu qaji kumbra deqa ti kalil are qaloqnsib soqniye.

Kolosi 3:24

Niŋgi qalie, mondoŋ Tamo Koba Yesus a na niŋgi awai boledamu eŋgwas. Awai di a na nami aqa segi tamo uŋgasari naŋgi enjrqa marej. Niŋgi are qaliye. Niŋgi Tamo Koba Yesus aqa wau tamo. A segi nuŋgo wau qa Gate.

1 Timoti 2:3

Kristen tamo uŋgasari naŋgi degsib pailyoqnibqa Qotei agi iga eleŋej qaji a naŋgi qa tulaŋ areboleboleiyqas. Pailyo deqaji Qotei aqa ŋamgalaq di tulaŋ boledamu.

1 Timoti 5:4

Ariya uŋa qobul qudei naŋgo aŋgro ti moma ti unub. Deqa ni na naŋgo aŋgro ti moma ti minjrimqa naŋgi endegsi poinjrem. Naŋgo wau bole agi naŋgi na naŋgo ai naŋgi taqatnjroqnsib iŋgi iŋgi enjroqnqab. Naŋgi nami aŋgro kiñilala sonabqa naŋgo ai naŋgi waukobaoqnsib naŋgi gereinjroqneb. Ariya bini naŋgo ai naŋgi qobulonub deqa naŋgi na kamba naŋgi taqatnjrqab. Naŋgi kumbra di yqab di Qotei a naŋgi qa areboleboleiyqas.

1 Pita 2:12

Bini niŋgi sawa bei bei qaji tamo naŋgo ambleq di sosib deqa niŋgi naŋgo ŋamgalaq dia kumbra bole bole dauryoqniye. Yimqa mondoŋ tamo uŋgasari peginjrqa batiamqa naŋgi nuŋgo kumbra bole di unsibqa naŋgo yomu anjam niŋgi qa maroqneb qaji di uratosib Qotei aqa ñam soqtoqnqab.

1 Pita 2:20

Ariya niŋgi kumbra uge yibqa nuŋgo wau qa gate naŋgi deqa niŋgi luŋgib niŋgi jaqatiŋ qoboiyqab di Qotei a niŋgi awai bole eŋgwasai. Ariya niŋgi kumbra bole yibqa nuŋgo wau qa gate naŋgi na olo niŋgi luŋgib niŋgi jaqatiŋ qoboiyqab di Qotei a nuŋgo kumbra deqa tulaŋ areboleboleiyqas.

1 Pita 2:5

Niŋgi dego tal aqa ai bul ŋambile unub. Qotei na niŋgi aqa segi tal sqa marsiq deqa aqa Mondor aqa siŋgila na niŋgi gereiŋgeqnu. Yim niŋgi aqa segi atra tamo boledamu sosib Yesus Kristus aqa ñam na nuŋgo segi jejamu Qotei atraiyoqnib a niŋgi qa tulaŋ arearetoqnqajqa deqa.

1 Pita 3:16

Ariya niŋgi anjam siŋgila na minjraib. Niŋgi lawo kumbra na ti kumbra bole na ti naŋgi anjam minjroqniye. Osib niŋgi gaigai Qotei aqa ŋamgalaq di une saiqoji soqniye. Bole, niŋgi Kristus dauryoqnib jeu tamo naŋgi nuŋgo kumbra bole di unsib deqa niŋgi anjam uge merŋgoqnsib misiliŋgoqnqab. Ariya bunuqna naŋgi naŋgo anjam deqa olo jemainjrqas.