Rom 12:9 - Yesus Aqa Anjam Bole

⁹ O was qu, niŋgi na tamo uŋgasari naŋgi bole qalaqalainjroqniye. Niŋgi gisaŋ na naŋgi qalaqalainjraib. Niŋgi kumbra uge kalil torei uratosib kumbra bole segi beteryosib yoqniye.

Rom 12:9 ပူးပေါင်းရင်းမြစ်များ

Matyu 26:49

Onaqa Judas a Yesus aqa areq bosiq minjej, “O Tamo Koba, kaiye.” Degsi minjsiq kundoqyej.

Jon 12:6

Judas a tamo iŋgi iŋgi saiqoji unub qaji naŋgi qa are qalsiq anjam di marosai. A bajiŋ tamo. A Yesus aqa aŋgro naŋgo silali jugwajqa quŋ taqatoqnej. Deqa naŋgi quŋ miligiq di silali ateqnab a na olo bajiŋoqnej. A deqa are qalsiq marej.

Aposel 11:23

Aisiqa Qotei a naŋgi qa dego are boleiyoqnsiqa aqaryainjroqnej di unej. Unsiqa tulaŋ areboleboleiyej. Deqa a na naŋgi kalil are siŋgilatetnjroqnsiqa minjroqnej, “Niŋgi Tamo Koba Yesus gaigai dauryoqnsib soqniye.”

2 Korin 6:6

Iga gaigai kumbra bole jiga saiqoji dauryeqnum. Iga Qotei qa qalie bole unum. Iga urur minjiŋ oqosaieqnu. Iga na tamo uŋgasari naŋgi kumbra bole enjreqnum. Iga Qotei aqa Mondor Bole aqa siŋgila oqnsim unum. Iga na tamo kalil naŋgi qalaqalaiyo kumbra osornjreqnum. Iga laŋa medabu na naŋgi qalaqalainjrosaieqnum.

2 Korin 8:8

E na niŋgi wau di yqajqa siŋgila na merŋgosai. Kristen tamo uŋgasari qudei naŋgi wau di yqajqa tulaŋ siŋgilaeqnub. Naŋgo kumbra deqa agi e na niŋgi saiŋgonum. Yim niŋgi qusib niŋgi dego qalaqalaiyo kumbra dauryqajqa tulaŋ siŋgilaqab kio di e qalieqajqa deqa niŋgi saiŋgonum.

1 Tesalonaika 2:3

Bati deqa iga niŋgi metŋgosim endegsi merŋgoqnem, “Niŋgi Yesus qa nuŋgo areqalo siŋgilatiye.” Bati di iga anjam uge bei merŋgosaioqnem. Iga nuŋgo ambleq di sosim kumbra jiga ti gisaŋ kumbra ti yosaioqnem.

1 Tesalonaika 5:15

Ariya tamo qudei naŋgi na niŋgi kumbra uge eŋgibqa niŋgi na kamba olo naŋgi kumbra uge enjraib. Niŋgi gaigai siŋgilaoqnsib Qotei aqa tamo uŋgasari naŋgi ti tamo uŋgasari kalil naŋgi ti kumbra bole bole enjroqniye.

1 Tesalonaika 5:21

Anjam kalil niŋgi queqnub qaji di niŋgi geregere quoqnsib tenemtoqnsib pegiyoqniye. Osib kumbra kalil dego pegiyoqnsib kumbra bole segi siŋgilatosib ojesoqniye.

1 Timoti 1:5

Ariya Qotei na iga aqa wau ojqajqa mergeqnu. Aqa wau agiende. Iga na tamo uŋgasari naŋgi Yesus aqa anjam minjroqnim naŋgi a qa naŋgo areqalo siŋgilatosib dena naŋgi Qotei aqa ŋamgalaq di une saiqoji sqab. Sosib kumbra dena naŋgo areqalo tigeltetnjroqnim naŋgi qalaqalaiyo kumbra dauryoqnqab.

Hibru 1:9

Ni kumbra tiŋtiŋ qa tulaŋ arearetmeqnu. Ni kumbra uge qa arearetmosaieqnu. Deqa ino Qotei na ino gateq di goreŋ bilentej. Aqa kumbra dena a na ni giltmosiqa ñam kobaquja emej. Deqa ni tulaŋ areboleboleimeqnu. Ino arebolebole dena ino kadoi naŋgo arebolebole tulaŋ buŋyejunu.”

Hibru 12:14

Niŋgi tamo kalil naŋgi ti koba na geregere lawo na sqajqa wauoqniye. Ariya kumbra bei dego niŋgi dauryiye. Kumbra agiende. Niŋgi nuŋgo segi jejamu Qotei yekritosib aqa segi kumbra boleq di sosib dauryoqniye. Tamo a Qotei aqa kumbra ti sqasai di a Tamo Koba Qotei unqa keresai.

Jems 3:17

Ariya tamo naŋgi Qotei aqaq dena areqalo bole ti powo ti eqnub qaji naŋgi kumbra tulaŋ boledamu yeqnub. Naŋgi kumbra jigat dauryosaieqnub. Naŋgi lawo na sosib tamo naŋgi jiŋga na gereinjroqnsib naŋgi qa duloqnsib kumbra bole bole enjreqnub. Naŋgi na tamo kalil naŋgi turtnjroqnsib kumbra qujai enjreqnub. Naŋgi gisaŋoqnsib laŋa babaŋ na kumbra bole dauryosaieqnub. Naŋgi bole dauryeqnub.

1 Pita 1:22

Niŋgi nami Qotei aqa anjam bole dauryoqneb. Kumbra dena niŋgi Qotei aqa ŋamgalaq di tamo bole une saiqoji soqneb. Utru deqa bini niŋgi na Qotei aqa tamo uŋgasari naŋgi tulaŋ qalaqalainjreqnub. Ariya kumbra di niŋgi olo torei siŋgilatosib nuŋgo Kristen was naŋgi siŋgila na qalaqalainjroqniye.

1 Pita 4:8

E anjam kobaquja bei dego niŋgi merŋgit quiye. Niŋgi Qotei aqa tamo uŋgasari naŋgi tulaŋ qalaqalainjroqniye. Di kiyaqa? Qalaqalaiyo kumbra na une gargekoba kabutoqnsiqa tulaŋ buŋye-junu.