Rom 12:7 - Yesus Aqa Anjam Bole

⁷ A na tamo qudei naŋgi aqa segi tamo uŋgasari naŋgi aqaryainjrqajqa powo enjrej deqa naŋgi na tamo uŋgasari naŋgi di geregere aqaryainjroqnebe. A na tamo qudei naŋgi aqa anjam plaltqajqa powo enjrej deqa naŋgi aqa anjam geregere plaltoqnebe.

Rom 12:7 ပူးပေါင်းရင်းမြစ်များ

Matyu 28:19

Deqa niŋgi walwelosib sawa sawa kalil keretoqnsibqa tamo uŋgasari kalil naŋgi ijo anjam minjroqnsib laqniye. Minjroqnibqa naŋgi ijo anjam quoqnsib dauryoqnsibqa ijo segi aŋgro bole sqab. Deqa niŋgi na ijo Abu aqa ñam na ti e Qotei aqa Ŋiri ijo segi ñam na ti Qotei aqa Mondor Bole aqa ñam na ti naŋgi yansnjroqniye.

Jon 3:2

A qolo Yesus aqa areq bosiqa minjej, “O Qalie Tamo Koba, iga qalieonum, Qotei na ni qariŋmej deqa ni bosim gago qalie tamo unum. Qotei a tamo bei ombla sqasai di a maŋwa ni yeqnum qaji di babtqa keresai.”

Aposel 13:1

Antiok qureq dia Yesus aqa tamo uŋgasari naŋgo ambleq di Qotei aqa medabu o qaji tamo naŋgi ti Qotei aqa anjam plalto qaji tamo naŋgi ti soqneb. Naŋgo ñam agiende. Bei Barnabas. Bei Simeon aqa ñam bei Niger. Ñam di aqa damu, “Jejamu tulu.” Bei Lusius. A Sairini qaji. Bei Manain. A nami Tamo Koba Herot ombla aŋgro sosibqa tal qujaiq di boleeb. Ariya bei Sol.

Aposel 20:20

Niŋgi qalie, e bati gaigai nuŋgo koro sawaq dia, nuŋgo segi segi talq dia nuŋgo are siŋgilatetŋgwajqa anjam merŋgoqnem. E anjam deqaji niŋgi merŋgwajqa uratosaioqnem.

Aposel 20:28

O ijo was niŋgi nuŋgo segi segi jejamu geregere taqatosib Qotei aqa tamo uŋgasari naŋgi dego geregere taqatnjroqniye. Qotei aqa tamo uŋgasari naŋgi kaja bul. Qotei na aqa segi Ŋiri Yesus Kristus aqa leŋ na naŋgi awainjrej. Deqa niŋgi na naŋgi geregere taqatnjroqnsibqa naŋgo mandor bole soqniye. Wau di Qotei aqa Mondor na niŋgi eŋgej.

Aposel 6:1

Bati deqa Juda tamo uŋgasari tulaŋ gargekoba naŋgi are bulyoqnsib Yesus qa naŋgo areqalo siŋgilatoqneb. Juda tamo uŋgasari qudei naŋgi Grik naŋgo laŋ deqaji. Deqa naŋgi Grik anjam qalie. Ariya Juda tamo uŋgasari qudei naŋgi Hibru qaji. Deqa naŋgi Hibru anjam qalie. Bati bei Grik qaji Juda naŋgi tigelosib Hibru qaji Juda naŋgi qa ŋiriŋeb. Di kiyaqa? Iŋgi jeio batieqnaqa naŋgi na Grik qaji Juda naŋgo uŋa qobul naŋgi uratnjroqnsib naŋgo segi uŋa qobul naŋgi iŋgi jeisi enjroqneb.

1 Korin 12:28

Qotei na Kristen tamo uŋgasari naŋgi wau segi segi enjreqnu. Naŋgi qudei a na qariŋnjreqnaqa naŋgi aqa anjam osi walweloqnsib mare mare laqnub. Naŋgi qudei a na wau enjreqnu deqa naŋgi aqa medabu oqnsib anjam geregere palonteqnub. Naŋgi qudei a na wau enjreqnu deqa naŋgi aqa anjam plaltoqnsib kumbra Qotei a tulaŋ areareteqnu qaji di tamo uŋgasari naŋgi osornjreqnub. Naŋgi qudei a na siŋgila enjreqnu deqa naŋgi aqa maŋwa babteleŋeqnub. Naŋgi qudei a na siŋgila enjreqnu deqa naŋgi tamo mainjro qaji naŋgi olo boletnjreqnub. Naŋgi qudei a na wau enjreqnu deqa naŋgi na tamo uŋgasari naŋgi aqaryainjreqnub. Naŋgi qudei a na Kristen gate ateqnu deqa naŋgi na Kristen tamo uŋgasari naŋgi geregere taqatnjreqnub. Naŋgi qudei a na meŋ bulyetnjreqnu deqa naŋgi qure utru segi segi naŋgo anjam mareleŋeqnub.

1 Korin 12:5

Iga Tamo Koba Yesus aqa wau segi segi ojeqnum. Ariya Yesus a segi qujai Tamo Koba.

1 Korin 14:26

Deqa was qu, niŋgi Qotei louqa korooqnsibqa niŋgi endegyoqniye. Niŋgi kalil segi segi wau ti deqa niŋgi qudei louoqniye. Niŋgi qudei Qotei aqa anjam plaltoqniye. Niŋgi qudei Qotei aqa uli anjam ubtoqniye. Niŋgi qudei meŋ bulyosib qure utru segi segi naŋgo anjam maroqniye. Niŋgi qudei qure utru segi segi naŋgo anjam aqa damu poiŋgim bulyosib palontoqniye. O was qu, nuŋgo wau segi segi dena niŋgi na Kristen tamo uŋgasari naŋgi siŋgilatnjroqniye.

Galesia 6:6

Kristen gate naŋgi wauoqnsib Qotei aqa anjam palontosib merŋgeqnub. Deqa niŋgi na kamba naŋgi iŋgi iŋgi qa aqaryainjroqniye.

Efesus 4:11

Deqa a segi qujai na iga wau segi segi egeqnu. Wau agiende. Tamo qudei naŋgi a na qariŋnjreqnaqa naŋgi aqa anjam maroqnsib laqnub. Tamo qudei naŋgi a na wau enjreqnaqa naŋgi aqa medabu oqnsib aqa anjam babteqnub. Tamo qudei naŋgi a na wau enjreqnaqa naŋgi Kristus aqa anjam bole palontosib laqnub. Tamo qudei naŋgi a na wau enjreqnaqa naŋgi na Kristen tamo uŋgasari naŋgi taqatnjroqnsib Qotei aqa anjam plaltosib minjreqnub.

Kolosi 4:17

Ariya niŋgi na Arkipus endegsib minjiye, “Qotei a na ni wau emqo deqa wau di ni na taqatosim geregere wauoqne.”

1 Timoti 2:7

Qotei a na e aqa anjam marsiy laqajqa deqa osiq e giltbej. Deqa e aqa anjam marqajqa wau ti. E bole mermonum. E gisaŋosai. E sawa bei bei qaji tamo uŋgasari naŋgi qa gilsiy Qotei aqa anjam minjroqnitqa naŋgi qusib Kristus qa naŋgo areqalo siŋgilatosib aqa anjam bole poinjrqajqa deqa osiqa e wau ebej.

1 Timoti 3:2

Deqa ni unime. Tamo bei a Kristen naŋgo gate sqajqa marsimqa a kumbra tiŋtiŋ segi dauryoqnem. Yim tamo naŋgi aqa jejamuq di une bei unqasai. Tamo di a uŋa aiyeltaiq. A uŋa qujai segi esoqnem. Osim aqa segi so geregere taqatosim areqalo bole ti sosim kumbra bole bole yoqnem. Tamo laŋaj naŋgi aqa meq boqnibqa oqnsim geregereinjroqnem. A Qotei aqa anjam palontqajqa wau geregere poiyim anjam palontoqnem.

1 Timoti 4:16

Ni ino segi kumbra ti ino anjam maro ti geregere taqatosim siŋgila na Qotei aqa wau yoqne. Yimqa ino wau dena Qotei na ni ti tamo uŋgasari kalil ino anjam qusib dauryeqnub qaji naŋgi ti oqas.

1 Timoti 5:17

Kristen gate naŋgi wau bole yeqnub deqa ni na tamo uŋgasari naŋgi minjrimqa naŋgi na Kristen gate naŋgo ñam soqtetnjroqnsib naŋgi iŋgi iŋgi qa aqaryainjroqnebe. Kristen gate qudei naŋgi Qotei aqa anjam palontqajqa waukobaoqnsib Qotei aqa gam bole tamo uŋgasari naŋgi osornjreqnub. Deqa ni na tamo uŋgasari naŋgi minjrimqa naŋgi na Kristen gate naŋgi di tulaŋ geregereinjroqnebe.

2 Timoti 2:2

Anjam kalil e tamo gargekoba naŋgo ŋamgalaq di palonteqnam ni quoqnem qaji di ni na osim olo tamo qudei Qotei aqa anjam siŋgila na ojeqnub qaji naŋgi di minjroqne. Yimqa naŋgi kamba anjam di olo tamo qudei naŋgi dego minjroqnqab.

2 Timoti 2:24

Ni na Tamo Koba Qotei aqa wau tamo naŋgi minjrimqa naŋgi anjam na qotoqnsib ŋiriŋoqnaib. Naŋgi na tamo kalil naŋgi kumbra bole enjroqnebe. Tamo qudei naŋgi na bosib naŋgi gulube enjribqa naŋgi deqa ŋiriŋaib. Naŋgi kamba olo Qotei aqa kumbra bole naŋgi osornjroqnebe.

2 Timoti 4:2

Deqa ni Kristus aqa anjam palontqajqa siŋgilaoqne. Yimqa tamo qudei naŋgi ino anjam quqwa arearetnjroqnqas. Ariya tamo qudei naŋgi ino anjam quqwa asginjroqnqas. Di uŋgum. Ni gaigai Kristus aqa anjam naŋgi siŋgila na minjroqne. Osim anjam dena naŋgo are qametnjroqnsim naŋgo areqalo tigeltetnjroqne. Yim naŋgi are bulyoqnsib Qotei aqa kumbra dauryoqnqab. Deqa ni gaigai kumbra lawo na naŋgi gereinjroqnsim Qotei aqa kumbra naŋgi osornjroqne.