Rom 12:6 - Yesus Aqa Anjam Bole

⁶ Qotei a iga qa are boleiyonaq deqa iga powo segi segi egej. A na tamo qudei naŋgi aqa medabu osib anjam palontqajqa powo enjrej deqa naŋgi a qa nuŋgo areqalo siŋgilatosib aqa anjam geregere palontoqnebe.

Rom 12:6 ပူးပေါင်းရင်းမြစ်များ

Matyu 23:34

“Deqa niŋgi quiye. E na Qotei aqa medabu o qaji tamo naŋgi ti Qotei aqa powo tamo ti Qotei aqa dal anjam qalie tamo naŋgi ti qariŋnjroqnit nuŋgoq boqnqab. Nuŋgoq boqnibqa niŋgi na naŋgi qudei ñumoqnsib moiotnjroqnqab. Osib naŋgi qudei ŋamburbasq di gaintnjrqab. Osib naŋgi qudei ojeleŋosib nuŋgo Qotei tal miligiq dia kumbaiŋnjroqnqab. Osib naŋgi qudei teteinjribqa naŋgi jaraiosib qure bei beiq giloqnqab.

Matyu 25:22

“Onaqa kaŋgal tamo 2,000 kina ej qaji a bosiqa aqa tamo koba minjej, ‘O Tamo Koba, ni unime. Ino 2,000 kina ebem qaji dena wauonamqa olo 2,000 kina bei brantej agiende.’

Luk 11:49

“Utru deqa Qotei a endegsi marqo, ‘E na ijo medabu o qaji tamo naŋgi ti tamo naŋgi ijo anjam mare mare laqnub qaji naŋgi ti qariŋnjritqa tamo uŋgasari bini bati endeqa unub qaji naŋgoq giloqnibqa naŋgi na naŋgi jeutnjroqnsib tulaŋ ugeugeinjroqnqab. Qudei ñumoqnib moreŋoqnqab.’ Qotei a powo koba ti unu deqa a degsi marqo.

Aposel 13:1

Antiok qureq dia Yesus aqa tamo uŋgasari naŋgo ambleq di Qotei aqa medabu o qaji tamo naŋgi ti Qotei aqa anjam plalto qaji tamo naŋgi ti soqneb. Naŋgo ñam agiende. Bei Barnabas. Bei Simeon aqa ñam bei Niger. Ñam di aqa damu, “Jejamu tulu.” Bei Lusius. A Sairini qaji. Bei Manain. A nami Tamo Koba Herot ombla aŋgro sosibqa tal qujaiq di boleeb. Ariya bei Sol.

Aposel 15:32

Judas wo Sailas wo naŋgi Qotei aqa medabu o qaji tamo. Deqa naŋgi aiyel anjam olekoba Yesus aqa tamo uŋgasari naŋgi minjrnab qunabqa anjam dena naŋgo are siŋgilatetnjrej.

Aposel 2:17

‘Qotei a marqo, “Diŋo bati jojomamqa e na ijo Mondor qariŋyitqa tamo uŋgasari kalil naŋgoq aiqas. Aisim nuŋgo aŋgro mel ti nuŋgo aŋgro sebiŋ ti naŋgi siŋgila enjrimqa naŋgi ijo medabu osib ijo anjam maroqnqab. Nuŋgo aŋgro wala naŋgi ti nuŋgo tamo bole bole naŋgi ti areqalo waqtetnjroqnitqa ŋeiobilqeioqnsibqa ijo kumbra gargekoba unoqnqab.

Aposel 21:9

Filip aqa asi qolqe naŋgi a ombla soqneb. Naŋgi Qotei aqa medabu o qaji uŋa.

Rom 1:11

O was qu, e niŋgi nuŋgwajqa are koba qaleqnum. Di kiyaqa? E Mondor Bole aqa anjam niŋgi merŋgitqa dena nuŋgo are siŋgilatetŋgwajqa deqa.

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

1 Korin 12:18

Ariya gago jejamu a degsi sosai. Qotei na gago baŋ ti siŋga ti ŋamdamu ti dabkala ti kalil osiqa jejamu qujaiq di ateleŋej unub. A aqa segi areqalo na degyej.

1 Korin 13:2

E Qotei aqa medabu osiy anjam palontoqnqai kio e Qotei aqa uli anjam kalil qalieosiy utru babteleŋqai kio e qalie koba ti sqai kio e Qotei qa ijo areqalo tulaŋ siŋgilatosiy deqa mana kobaquja minjitqa a ijo anjam dauryosim tigelosim sawa beiq gilqas kio ariya e qalaqalaiyo kumbra dauryqasai di ijo kumbra kalil di Qotei aqa ŋamgalaq di kumbra bolesai.

1 Korin 14:1

Deqa was qu, niŋgi gaigai qalaqalaiyo kumbra dauryosib soqniye. Sosib wau kalil Qotei aqa Mondor na niŋgi eŋgeqnu qaji di dego yqajqa tulaŋ siŋgilaoqniye. Wau boledamu bei agiende. Qotei aqa Mondor na niŋgi siŋgila eŋgimqa niŋgi Qotei aqa medabu oqnsib anjam palontoqniye. Osib wau di yqajqa tulaŋ siŋgilaoqniye.

1 Korin 14:24

Ariya niŋgi kalil Qotei aqa medabu osib anjam palontoqnib ariya tamo bei Qotei qaliesai qaji kio tamo laŋaj bei kio a nuŋgo koro miligiq gilsim nuŋgo anjam di qusim a poiyqas. Yim anjam dena aqa are qametim a aqa une qa geregere qalieqas.

1 Korin 14:29

Tamo aiyel kio tamo qalub kio naŋgi segi Qotei aqa medabu oqnsib anjam palontoqnebe. Tamo gargekoba naŋgi anjam palontoqnaib. Ariya naŋgi anjam palontosib merŋgoqnibqa naŋgo anjam bole kio sai kio deqa osib pegiyoqniye.

1 Korin 3:5

Apolos di tamo yai? E Pol e segi tamo yai? Aqo aiyel Qotei aqa wau tamo segi. Agi Tamo Koba Qotei na aqo aiyel wau segi segi egej deqa iga Kristus aqa anjam niŋgi merŋgoqnem. Onaqa niŋgi quoqnsib Kristus qa nuŋgo areqalo siŋgilateb.

1 Korin 7:7

E are qalonum, tamo kalil naŋgi e bul laŋa sqab di bole. Ariya Qotei na tamo naŋgi siŋgila segi segi enjreqnu. A na tamo qudei naŋgi siŋgila bei enjreqnu. Osiqa olo tamo qudei naŋgi siŋgila bei enjreqnu.

2 Korin 8:12

Niŋgi silali koroiyqa are soqnim niŋgi koroiyiye. Yim Qotei a niŋgi qa tulaŋ areboleboleiyqas. Niŋgi silali saiamqa di uŋgum. Koroiyaib. Qotei a deqa ŋiriŋqasai. Niŋgi silali soqnim di niŋgi koroiyiye.

Efesus 3:5

Qotei na aqa uli anjam di tamo uŋgasari nami soqneb qaji naŋgi minjrosaioqnej. Ariya bini a na aqa Mondor aqa siŋgila na anjam di babtoqnsiq aqa anjam maro tamo naŋgi ti aqa medabu o qaji tamo naŋgi ti minjreqnu.

Efesus 4:11

Deqa a segi qujai na iga wau segi segi egeqnu. Wau agiende. Tamo qudei naŋgi a na qariŋnjreqnaqa naŋgi aqa anjam maroqnsib laqnub. Tamo qudei naŋgi a na wau enjreqnaqa naŋgi aqa medabu oqnsib aqa anjam babteqnub. Tamo qudei naŋgi a na wau enjreqnaqa naŋgi Kristus aqa anjam bole palontosib laqnub. Tamo qudei naŋgi a na wau enjreqnaqa naŋgi na Kristen tamo uŋgasari naŋgi taqatnjroqnsib Qotei aqa anjam plaltosib minjreqnub.

Filipai 3:15

Niŋgi areqalo bole ti unub qaji niŋgi ijo areqalo di dauryoqniye. Ariya niŋgi qudei areqalo bei ejunub kio? Soqnim Qotei na nuŋgo areqalo di olo gereiyetŋgwas.

1 Tesalonaika 5:20

Qotei aqa medabu o qaji tamo naŋgi na anjam merŋgoqnibqa niŋgi naŋgi qa olo are ugeiŋgaiq.

2 Pita 1:20

Ariya anjam kobaquja bei endi e na merŋgit niŋgi qalieoiye. Iga gago segi areqalo dauryosim Qotei aqa medabu o qaji tamo naŋgo anjam nami neŋgreŋq di so qaji di aqa utru laŋa palontqasai.