Rom 12:13 - Yesus Aqa Anjam Bole

¹³ Qotei aqa segi tamo uŋgasari qudei naŋgi iŋgi qa truquoqnibqa niŋgi na naŋgi aqaryainjroqniye. Tamo laŋaj naŋgi dego nuŋgo meq boqnibqa naŋgi oqnsib geregereinjroqniye.

Rom 12:13 ပူးပေါင်းရင်းမြစ်များ

Matyu 25:35

Di kiyaqa? E mambonaqa niŋgi na e iŋgi anaibeb. E ya qarbonaqa niŋgi na e ya anaibeb. E yauŋ tamo sonamqa niŋgi na e osib nuŋgo talq di geregereibeb.

Aposel 10:4

Onaqa Kornilius na laŋ aŋgro di koqyosiqa tulaŋ ulaugetosiq minjej, “O Tamo Koba, ni kiyaqa ijoq bonum?” Onaqa laŋ aŋgro dena minjej, “Qotei a gaigai ino pail queqnu. Juda tamo uŋgasari naŋgi iŋgi iŋgi saiinjreqnaqa ni na naŋgi aqaryainjreqnum. Ino kumbra di Qotei a unoqnsiq deqa a ni qa tulaŋ areboleboleiyeqnu.

Rom 12:8

A na tamo qudei naŋgi aqa segi tamo uŋgasari naŋgo areqalo siŋgilatetnjrqajqa powo enjrej deqa naŋgi naŋgo areqalo geregere siŋgilatetnjroqnebe. A na tamo qudei naŋgi silali iŋgi iŋgi jeisib tamo uŋgasari iŋgi qa truqueqnub qaji naŋgi enjrqajqa powo enjrej deqa naŋgi silali iŋgi iŋgi koba koroiyosib jeisib enjroqnebe. A na tamo qudei naŋgi aqa wau taqatqajqa powo enjrej deqa naŋgi na wau di geregere taqatoqnebe. A na tamo qudei naŋgi aqa segi tamo uŋgasari naŋgi qa dulosib geregereinjrqajqa powo enjrej deqa naŋgi arebolebole na naŋgi geregereinjroqnebe.

1 Korin 16:15

O was qu, niŋgi tamo uŋgasari Stefanas aqa talq di unub qaji naŋgi qa qalie bole. Naŋgi tamo kalil Akaia sawaq di unub qaji naŋgi qa namoosib nami are bulyeb. Naŋgi naŋgo segi areqalo na Qotei aqa tamo uŋgasari naŋgi qa waueqnub. Deqa e niŋgi siŋgila na endegsi merŋgwai.

2 Korin 9:1

Qotei aqa tamo uŋgasari Judia sawaq di unub qaji naŋgi aqaryainjrqajqa deqa silali koroiyeqnub. Wau di agi niŋgi qalieonub. Deqa e olo anjam olekoba tortoryqasai.

2 Korin 9:12

Deqa wau niŋgi yeqnub qaji dena Qotei aqa tamo uŋgasari naŋgi aqaryainjrimqa naŋgi olo iŋgi qa truquqasai. Deqa naŋgi olo Qotei tulaŋ biŋiyoqnsib sqab.

Galesia 6:10

Deqa bati soqnimqa iga na tamo kalil naŋgi kumbra bole bole enjroqnqom. Ariya iga na olo Kristus aqa tamo uŋgasari naŋgi kumbra tulaŋ boledamu enjrqajqa siŋgilaoqnqom.

1 Timoti 3:2

Deqa ni unime. Tamo bei a Kristen naŋgo gate sqajqa marsimqa a kumbra tiŋtiŋ segi dauryoqnem. Yim tamo naŋgi aqa jejamuq di une bei unqasai. Tamo di a uŋa aiyeltaiq. A uŋa qujai segi esoqnem. Osim aqa segi so geregere taqatosim areqalo bole ti sosim kumbra bole bole yoqnem. Tamo laŋaj naŋgi aqa meq boqnibqa oqnsim geregereinjroqnem. A Qotei aqa anjam palontqajqa wau geregere poiyim anjam palontoqnem.

1 Timoti 5:10

Naŋgi nami wau bole bole yoqneb deqa naŋgi tamo uŋgasari naŋgo ŋamgalaq di uŋa bole. Naŋgi na naŋgo aŋgro naŋgi geregere-injroqnsib boletnjroqneb. Tamo laŋaj naŋgi naŋgo meq beqnabqa oqnsib geregereinjroqneb. Naŋgi na Kristen tamo uŋgasari naŋgo siŋga yansetnjroqneb. Tamo uŋgasari naŋgi gulube ti sonabqa naŋgi na aqaryainjroqneb. O Timoti, ni na uŋa qobul deqaji naŋgo ñam neŋgreŋyim Kristen tamo uŋgasari naŋgi na iŋgi iŋgi qa aqaryainjroqnqab.

Taitus 1:8

Tamo laŋaj naŋgi aqa meq beqnabqa oqnsiq geregereinjreqnu di ni unsim a gate ate. A kumbra bole bole dauryqajqa are qaloqnsiq areqalo bole ti unu di ni unsim a gate ate. A kumbra tiŋtiŋ ti Qotei aqa segi kumbra bole bole ti di dauryqajqa tulaŋ areareteqnu di ni unsim a gate ate. A aqa segi so geregere taqateqnu di ni unsim a gate ate.

Taitus 3:14

Ni na Kristen tamo uŋgasari naŋgi gam osornjroqnimqa naŋgi wau bole yoqnqajqa geregere qalieqab. Qalieosib tamo uŋgasari iŋgi iŋgi qa truqueqnub qaji naŋgi aqaryainjroqnqab. Naŋgi laŋa sosib Qotei aqa kumbra dauryosaio uge.

Filemon 1:7

Od, was, ni na Qotei aqa segi tamo uŋgasari kalil naŋgi tulaŋ qalaqalainjreqnum. Ino kumbra dena ni na naŋgo are tulaŋ siŋgilatetnjreqnum. E ino kumbra deqa qusim dena ijo are latetbqoqa e tulaŋ areboleboleibqo.

Hibru 13:16

Ariya niŋgi na tamo uŋgasari naŋgi kumbra bole bole enjroqniye. Naŋgi iŋgi qudei qa truquoqnibqa niŋgi na aqaryainjroqniye. Niŋgi kumbra di urataib. Niŋgi kumbra degyoqnqab di niŋgi Qotei atraiyobuloqnqab. Yim Qotei a nuŋgo kumbra deqa tulaŋ areboleboleiyoqnqas.

Hibru 13:2

Qure bei qaji tamo naŋgi nuŋgo meq boqnib niŋgi na oqnsib geregereinjroqniye. Kumbra di niŋgi urataib. Niŋgi qalie, nami qure bei qaji tamo naŋgi nuŋgo moma qudei naŋgo meq beqnab tamo bole ede-goqnsib geregereinjroqneb. Ariya naŋgi tamo sai. Naŋgi Qotei aqa laŋ aŋgro. Nuŋgo moma naŋgi are qaleb, naŋgi tamo naŋgi gereinjreb. Di sai. Naŋgi laŋ aŋgro naŋgi gereinjreb.

Hibru 6:10

Niŋgi wau bolequja yoqnsib Qotei tulaŋ qalaqalaiyoqnsib aqa segi tamo uŋgasari naŋgi geregereinjroqneb. Niŋgi nami degyoqneb agi bini niŋgi degyeqnub. Qotei a tamo uge sai. A tamo bole deqa a nuŋgo kumbra di unoqnsiq olo are walyosaieqnu.

1 Pita 4:9

Qotei aqa tamo uŋgasari naŋgi nuŋgo talq boqnibqa niŋgi naŋgi oqnsib geregereinjroqniye. Niŋgi naŋgi aqaryainjrqajqa are ugeiŋgaiq.

1 Jon 3:17

Tamo bei a mandam endeqa iŋgi iŋgi koba koroiyosimqa ariya aqa was bei iŋgi saiqoji soqnim unsim a aqaryaiyosaiamqa iga endegsi qalieqom, Qotei aqa qalaqalaiyo kumbra tamo di aqa are miligiq di sosai.

3 Jon 1:5

O ijo was bole, ni anjam bole dauryoqnsim Kristen was naŋgi geregereinjreqnum. Osim tamo qudei naŋgo ulatamu ni qaliesai qaji naŋgi dego ni na geregereinjreqnum. Di ni kere yeqnum.