Rom 11:20 - Yesus Aqa Anjam Bole

²⁰ Di bole. Ariya Qotei aqa kumbra di aqa utru agiende. Israel naŋgi Qotei qa naŋgo areqalo siŋgilatosai deqa Qotei na naŋgi giŋgeŋnjrsiqa breinjrej. Ariya niŋgi Qotei qa nuŋgo areqalo siŋgilatejunub deqa Qotei na niŋgi olo eleŋej. Di nuŋgo wau na sai. Deqa niŋgi nuŋgo segi ñam soqtosib diqaib. Niŋgi ulaoiye.

Rom 11:20 ပူးပေါင်းရင်းမြစ်များ

Luk 18:14

Yesus a yawo anjam degsi minjrsiqa olo minjrej, “Niŋgi quiye. E bole merŋgwai. Takis o qaji tamo di aqa une kalil Qotei na kobotetonaqa a olo puluosiqa aqa talq aiej. Ariya Farisi tamo di aqa une Qotei na kobotetosai. Di kiyaqa? Tamo kalil naŋgo segi ñam soqteqnub qaji naŋgi di Qotei na olo naŋgo ñam aguq atetnjrqas. Ariya tamo naŋgi naŋgo segi ñam aguq ateqnub qaji naŋgi di Qotei na olo naŋgo ñam soqtetnjrqas.”

Aposel 18:6

Degsi minjreqnaqa Juda naŋgi Pol aqa anjam di qusib gotraŋyoqnsib Pol misiliŋyoqneb. Deqa Pol a na aqa segi gara jugo tumbrum butuyosiqa minjrej, “Niŋgi padalqab di nuŋgo segi une na niŋgi padalqab. Ijo une na sai. Deqa bini e niŋgi uratŋgsiy sawa bei bei qaji tamo naŋgoq giloqnsiyqa Yesus aqa anjam naŋgi segi minjroqnqai.”

Rom 11:18

Deqa niŋgi endegsib are qalaib, “Iga tamo bole deqa iga na ŋamtaŋ oliv qure qaji aqa dani naŋgi buŋnjrejunum.” Niŋgi degsib are qalqab di niŋgi mati olo endegsib are qaliye. Ŋamtaŋ oliv aqa jirim na niŋgi namur eŋgeqnu. Niŋgi na ŋamtaŋ oliv aqa jirim namur yosaieqnub.

Rom 11:21

Niŋgi are qaliye. Ŋamtaŋ oliv qure qaji aqa dani di Qotei na giŋgeŋnjrsiqa breinjrej. Dego kere niŋgi nuŋgo segi ñam soqtosib diqwab di a na niŋgi dego giŋgeŋŋgosim breiŋgwas.

Rom 12:16

Niŋgi segi segi kalil areqalo qujaitosib soqniye. Niŋgi nuŋgo segi ñam soqtqa are qalaib. Niŋgi tamo laŋaj naŋgi koba na laqajqa areboleboleiŋgem. Niŋgi nuŋgo segi ñam soqtosib endegsib maraib, “Iga segi qalie koba ti unum.” Niŋgi degaib.

Rom 12:3

Qotei a e qa are boleiyonaq deqa wau ebej. Deqa e niŋgi segi segi endegsi merŋgwai. Niŋgi nuŋgo segi powo ti kumbra ti soqtosib nuŋgo was qudei naŋgi buŋnjrqa are qalaib. Niŋgi nuŋgo kumbra geregere tenemtosib areqalo bole ti sosib Qotei qa nuŋgo areqalo siŋgilatoqniye. Ariya a na niŋgi segi segi siŋgila eŋgej qaji di olo soqtosib nuŋgo was qudei naŋgi buŋnjraib.

Rom 3:3

Bole, Juda tamo qudei naŋgi Qotei aqa anjam di dauryosib naŋgo areqaloq di siŋgilatosaieqnub. Naŋgi urateqnub. Deqa iga endegsi marqom kio, “Qotei a gisaŋ tamo. A segi aqa anjam di dauryosaieqnu.”

1 Korin 10:12

Ariya tamo bei a endegsi are qalqas, “E siŋgila na tigelejunum.” Osim a geregere ŋam atem. A uloŋosim uneq aio uge.

1 Korin 15:1

Ariya was qu, Yesus aqa anjam bole e nami palontosim niŋgi merŋgoqnem qaji di bini e olo pulutsiy niŋgi merŋgwai. Anjam di niŋgi nami qusib dauryeb. Deqa e qalieonum, bini niŋgi anjam di siŋgila na ojsib tigelejunub.

1 Korin 16:13

Ariya was qu, niŋgi geregere ŋam atoqniye. Osib niŋgi siŋgila na tigelesosib Yesus qa nuŋgo areqalo siŋgilatoqniye. Niŋgi iŋgi bei qa ulaaib. Niŋgi siŋgila na soqniye.

2 Korin 1:24

Niŋgi Yesus qa nuŋgo areqalo siŋgilateqnub nuŋgo areqalo di iga na taqatgwajqa e deqa merŋgosai. Iga qalieonum, niŋgi nuŋgo areqalo di siŋgila na ojsib tigelejunub. O was qu, niŋgi tulaŋ areboleboleiŋgwajqa deqa iga niŋgi ti waueqnum.

2 Korin 10:5

Areqalo uge uge ti gisaŋ anjam na ti tamo naŋgi Qotei qalieqajqa gam getentetnjreqnu deqa iga na olo gotraŋyeqnum. Osim iga tamo naŋgo areqalo kalil bulyetnjreqnam naŋgi Kristus aqa anjam dauryqajqa are qaleqnub.

Filipai 2:12

Ariya was qu, e qalieonum, niŋgi gaigai ijo anjam dauryeqnub. Ariya bini niŋgi olo siŋgila na dauryoqniye. E niŋgi koba na sqai bati deqa segi sai. Bini e isaq endi unum deqa niŋgi ijo anjam dauryqa urataib. Niŋgi ijo anjam olo siŋgila na dauryoqniye. Qotei na niŋgi padalo sawaq dena eleŋej deqa niŋgi ulaosib siŋgila na wauoqniye.

Kolosi 2:7

Mandam na ŋam jirim ojesonaqa ŋam a siŋgila na tigelejunu dego kere niŋgi Kristus osib nuŋgo are miligiq di siŋgilatosib aqa kumbra dauryoqniye. Kristus aqa anjam bole iga nami niŋgi merŋgoqnem qaji di niŋgi osib nuŋgo areqaloq di siŋgilatosib soqniye. Osib niŋgi gaigai Qotei biŋiyoqniye.

2 Tesalonaika 2:4

Satan aqa tamo di a na qotei gisaŋ kalil naŋgi jeutnjroqnqas. Osim a diqoqnsim aqa segi ñam soqtoqnsim qotei gisaŋ naŋgi di tulaŋ buŋnjrqas. Deqa a Qotei aqa atra tal koba miligiq gilsim di awoosim marqas, “E segi Qotei.”

1 Timoti 6:17

O Timoti, ni na tamo naŋgi mandam qa silali ti ñoro ti ejunub qaji naŋgi endegsim minjroqne. Niŋgi diqosib nuŋgo segi ñam soqtaib. Nuŋgo ñoro di urur koboqas deqa niŋgi ñoro deqa are siŋgilataib. Niŋgi Qotei qa nuŋgo areqalo siŋgilatosib soqniye. Qotei agi a na iŋgi bole bole kalil iga egeqnaqa iga oqnsim areboleboleigeqnu.

Hibru 3:12

O was qu, niŋgi geregere ŋam atoqniye. Niŋgi ŋam atqasai di nuŋgo ambleq di was bei aqa areqalo ugeosim a Yesus qa aqa areqalo siŋgilatqa uratosim Qotei ŋambile gaigai unu qaji a qoreiyo uge.

Hibru 3:19

Deqa iga qalieonum, Israel tamo uŋgasari naŋgi Qotei qa naŋgo areqalo yala siŋgilatosaioqneb. Utru deqa naŋgi Qotei aqa aqarato sawa miligiq gilqa keresai.

Hibru 4:11

Ariya iga aqarato sawa di miligiq gilqajqa tulaŋ siŋgilaqom. Siŋgilaqasai di nuŋgo ambleq di tamo bei a Israel naŋgo kumbra dauryosim Qotei aqa anjam gotraŋyosim uloŋo uge.

Hibru 4:6

Anjam dena iga endegsi osorgwo, Qotei aqa aqarato sawa di agi unu. Deqa tamo qudei naŋgi miligiq gilqab. Ariya tamo naŋgi Qotei aqa anjam bole nami quoqneb qaji naŋgi aqa anjam di gotraŋyoqneb deqa naŋgi aqa aqarato sawa miligiq gilosai.

Jems 2:19

Ni mareqnum, “Bole, Qotei a segi qujai unu.” Ni kere mareqnum. Ariya mondor uge naŋgi dego degsib maroqnsib Qotei ulaiyeqnub.

Jems 4:6

Ariya Qotei a iga qa are tulaŋ boleiyeqnu. Deqa aqa anjam bei nami endegsib neŋgreŋyeb unu, “Tamo naŋgi naŋgo segi ñam soqteqnub qaji naŋgi Qotei na olo jeutnjreqnu. Ariya tamo naŋgi naŋgo segi ñam aguq ateqnub qaji naŋgi qa Qotei a olo are boleiyoqnsiq gereinjreqnu.”

1 Pita 1:17

Niŋgi Qotei metoqnsib minjeqnub, “O gago Abu.” Abu di a gago ñam qa are qalsiq iga pegigosaieqnu. A gago segi segi kumbra unoqnsiq dena iga pegigeqnu. Deqa bati niŋgi mandamq endi sosibqa niŋgi endegsib maroqniye, “Mandam endi gago qure utru sai.” Degsib maroqnsib Qotei qa ulaoqnsib aqa sorgomq di geregere soqniye.

1 Pita 5:12

Anjam truquyala endi Sailas na e aqaryaibosiqa neŋgreŋyosiq niŋgi qa qariŋyqo. E qalieonum, Sailas a gago Kristen was bole. O was qu, Qotei a niŋgi qa are tulaŋ boleiyeqnu. E segi qalieo-num, Qotei a bati gaigai aqa kumbra di niŋgi osorŋgeqnu. E aqa kumbra deqa osim anjam endi neŋgreŋyonum. Deqa ijo anjam endena e na nuŋgo are tigeltetŋgitqa niŋgi siŋgila na tigelesoqniye.

1 Pita 5:9

Ariya niŋgi Kristus qa nuŋgo areqalo siŋgilatoqnsib Satan gotraŋyoqniye. Niŋgi qalie, niŋgi jaqatiŋ eqnub dego kere Qotei aqa tamo uŋgasari sawa sawa kalilq di unub qaji naŋgi dego jaqatiŋ eqnub.

Uli Anjam 18:7

A na aqa segi ñam soqtoqnsiqa sambalaosiq laqnsiqa kumbra uge uge yeqnu. Niŋgi aqa kumbra deqa keretosib a jaqatiŋ koba yibqa a akamugetqas. A segi mareqnu, ‘E mandor koba. E ijo segi awo jaram kobaq di awejunum. E uŋa qobul sai. Gulube bei ijoq bqa keresai. Deqa e akamqasai.’

Uli Anjam 3:17

Ni ino segi ñam soqtoqnsim mareqnum, “E silali koba ti. E ñoro koba ejunum. E iŋgi bei qa truquosai.” Ni degsi maraim. Di ni gisaŋonum. Ni laŋ qure qa iŋgi iŋgi tulaŋ saiqoji. Ni tulaŋ sougetejunum. Ni ŋam qandimo unum. Ni yosi laqnum. Di ni segi poimosai.