Rom 1:14 - Yesus Aqa Anjam Bole

¹⁴ E na Grik tamo naŋgi ti yauŋ tamo naŋgi ti powo tamo ti nanari tamo naŋgi ti Yesus aqa anjam minjroqnit quqwajqa deqa Qotei na e wau ebej.

Rom 1:14 ပူးပေါင်းရင်းမြစ်များ

Matyu 11:25

Bati deqa Yesus a endegsi Qotei pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Di kiyaqa? Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu.

Luk 10:21

Bati deqa Qotei aqa Mondor a Yesus aqaq aisiq aqa areqalo siŋgilatetonaqa a tulaŋ areboleboleiyonaqa Qotei endegsi pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu. O Abu, ni degsim yeqnum di kere. Ni ino segi areqalo dauryosim agi degyeqnum.”

Aposel 22:21

Onaqa Tamo Koba Yesus na e olo merbej, ‘Ni tigelosim Jerusalem qure uratosim aie. E ni qariŋmitqa ni sawa isaq aisim dia sawa bei bei qaji tamo naŋgi ijo anjam minjroqnqam.’”

Aposel 28:2

Onaqa tamo uŋgasari nui dia soqneb qaji naŋgi kumbra tulaŋ boledamu ysibqa iga geregereigeb. Osib awa boqnej deqa iga yorgonaqa ŋam tuŋguyosib mergeb, “Niŋgi bosib ŋamyuo areq endi awooiye.” Onaqa iga ŋamyuo areq di awoonam jejamu kaŋkaŋgej.

Aposel 28:4

Onaqa nui deqaji tamo uŋgasari naŋgi amal uge Pol aqa baŋq di uñiyosiq gaiŋesonaqa unsibqa segi segi maroqneb, “Tamo endi a tamo qalo qaji kio? A yuwalq di moiosai deqa gago qotei na amal uge qariŋyqoqa a uñiyqo. Deqa a moiqas.”

Aposel 9:15

Onaqa Tamo Koba Yesus na Ananaias minjej, “Ni ijo anjam mermonum qaji endi daurye. Sol a ijo wau tamo. E na a giltonum deqa a na ijo ñam osi walwelosim sawa sawa kalilq dia tamo uŋgasari Qotei qaliesai qaji naŋgi ti mandor kokba ti Israel tamo uŋgasari naŋgi ti ijo ñam minjroqnqas.

Rom 1:22

Naŋgi diqoqnsib mareqnub, “Iga powo koba ti unum.” Di sai. Naŋgi tulaŋ nanarioqnsib laqnub.

Rom 11:25

O was qu, niŋgi segi powo koba ti unub niŋgi degsib are qalaib. Niŋgi degaib deqa e na uli anjam bei niŋgi endegsi merŋgwai. Israel tamo uŋgasari qudei naŋgo areqalo geteŋnjrejunu. Naŋgi degsib soqnib sawa bei bei qaji tamo uŋgasari Qotei na nami giltnjrej naŋgi di kalil eleŋekritosim kereamqa bati deqa a na Israel tamo uŋgasari kalil naŋgo areqalo dego waqtetnjrimqa naŋgi olo are bulyqab.

Rom 12:16

Niŋgi segi segi kalil areqalo qujaitosib soqniye. Niŋgi nuŋgo segi ñam soqtqa are qalaib. Niŋgi tamo laŋaj naŋgi koba na laqajqa areboleboleiŋgem. Niŋgi nuŋgo segi ñam soqtosib endegsib maraib, “Iga segi qalie koba ti unum.” Niŋgi degaib.

Rom 13:8

Niŋgi was bei aqa iŋgi iŋgi onub di nuŋgoq di sokobaiyaiq. A qa kamba olo yiye. Ariya iŋgi bei nuŋgoq di gaigai soqnem. Iŋgi agiende. Niŋgi qalaqalaiyo kumbra yoqnsib soqniye. Di kiyaqa? Tamo a qalaqalaiyo kumbra dauryqas di a Qotei aqa dal anjam kalil dego keretosim dauryekritqas.

Rom 16:19

O was qu, e qalie, niŋgi Qotei aqa anjam geregere dauryosib laqnub. Laqnab tamo kalil naŋgi nuŋgo kumbra deqa queqnub. Deqa e niŋgi qa tulaŋ areboleboleibeqnu. Ariya e niŋgi endegsi merŋgwai. Niŋgi kumbra bole yqajqa geregere qalieosib kumbra uge yqajqa aŋgro kiñilala bul nanariosib soqniye.

Rom 8:12

Deqa was qu, iga kumbra qujai na walwelqom. Iga areqalo namij na walwelqajqa e deqa marosai.

1 Korin 14:11

Ariya tamo bei na e anjam bei merbim qusiy aqa damu poibqasai di a e qa marqas, “A yauŋ tamo.” Yim deqa e kamba a qa marqai, “A dego yauŋ tamo.”

1 Korin 14:16

Ni ino mondor na segi Qotei pailyqam di tamo laŋaj bei a sosim ino pail di qusim poiyqasai di a endegsi marqa keresai, “Ni bole maronum.” A degsi marqa keresai. Di kiyaqa? A ino pail poiyosai deqa.

1 Korin 2:13

Iga iŋgi iŋgi deqa anjam marsim laqnum. Iga mandam qaji tamo naŋgo powo osim dena anjam marosaieqnum. Qotei aqa Mondor na iga powo egeqnu dena iga anjam mareqnum. Qotei aqa Mondor aqa anjam di iga na tamo naŋgi Qotei aqa Mondor ti unub qaji naŋgi segi minjreqnum.

1 Korin 3:18

Niŋgi na nuŋgo segi jejamu gisaŋyaib. Nuŋgo ambleq di tamo bei a mandam qaji powo ti sosim endegsi are qalqas, “E segi powo koba ti unum.” Di gisaŋ. Deqa tamo di a mati marqas, “Bole, e powo ti sosai. E nanari tamo.” Degsi marim Qotei na a olo powo yimqa dena a powo bole ti sqas.

2 Korin 10:12

Tamo qudei naŋgi diqoqnsib naŋgo segi ñam soqteqnub qaji iga naŋgi unub dego sai. Gago kumbra ti naŋgo kumbra ti kerekere unub iga degsi marqa keresai. Tamo naŋgi di naŋgo segi kumbra na naŋgo kumbra laŋa pegiyeqnub. Osib tamo qudei naŋgo kumbra na dego naŋgo segi kumbra olo pegiyeqnub. Tamo naŋgi kumbra degyeqnub qaji naŋgi tulaŋ powo saiqoji.

2 Korin 11:19

Niŋgi segi qa mareqnub, “Iga powo koba ti unum.” Maroqnsib deqa niŋgi nanari tamo naŋgi odnjreqnabqa naŋgi nanari anjam niŋgi merŋgeqnub.

Kolosi 3:11

Iga so bunujq di unum deqa iga kalil kerekere unum. Deqa iga gago was naŋgi endegsi minjroqnqasai, “Ni Grik qaji” o “Ni Juda qaji” o “Ni muluŋ aio qaji” o “Ni muluŋ aiosai qaji” o “Ni yauŋ tamo” o “Ni yambaŋ tamo” o “Ni kaŋgal tamo” o “Ni tamo laŋaj”. Iga gago was naŋgi degsi minjroqnqasai. Di kiyaqa? Kristus a segi qujai unu. A gago kalil qa Tamo Koba.

2 Timoti 2:10

Deqa e na ijo are miligi siŋgilatoqnsim gulube kalil di qoboiyoqnsim unum. E tamo uŋgasari Qotei na aqa segi qa giltnjrej qaji naŋgi aqaryainjrqajqa deqa osim gulube di qoboiyeqnum. Yimqa Qotei na naŋgi eleŋamqa naŋgi dego Kristus Yesus aqa ñam na ŋambile osib a ombla gaigai sqajqa deqa.

Taitus 3:3

Ni qalie, iga dego nami areqalo uge ti sosimqa Qotei aqa anjam gotraŋyoqnem. Bati di Satan a na iga gisa gisaŋgeqnaqa iga Qotei aqa gam bole dauryqa uratosim kumbra uge dauryqajqa are pruggeqnaqa gago segi jejamu qa tulaŋ areboleboleigoqnej. Kumbra dena iga siŋgila na ojesoqnej. Deqa iga minjiŋ ti are uge ti sosim walweloqnem. Tamo naŋgi na iga jeutgeqnabqa iga na kamba dego naŋgi jeutnjroqnem.