Matyu 9:13 - Yesus Aqa Anjam Bole

¹³ Qotei aqa anjam bei nami neŋgreŋyeb qaji di niŋgi sisiyoiye. Agi nami endegsib neŋgreŋyeb, ‘Niŋgi e laŋa atraibeqnub. E nuŋgo kumbra deqa arearetbosai. Ariya niŋgi na tamo naŋgi kumbra bole bole enjroqniye. Yimqa e nuŋgo kumbra deqa tulaŋ arearetbqas.’ Niŋgi anjam di sisiyosib geregere poiŋgem.” Osiqa Yesus a olo anjam endegsi minjrej, “Tamo bei a marqas, ‘E tamo bole. E une saiqoji.’ E tamo deqaji naŋgi metnjrit ijoq bqajqa e deqa bosai. Tamo a marqas, ‘E une ti.’ E tamo deqaji naŋgi metnjrit ijoq bqajqa e deqa bem.”

Matyu 9:13 ပူးပေါင်းရင်းမြစ်များ

Matyu 12:3

Onaqa Yesus na kamba Farisi naŋgi minjrej, “Nami Devit aqa wau tamo ti naŋgi mamnjrnaqa kumbra yeb qaji di niŋgi buk miligiq di sisiyosai kio?

Matyu 12:5

Dal anjam bei dego nami neŋgreŋyeb. Anjam agiende. Atra tamo naŋgi yori bati gaigai atra tal miligiq di waueqnub. Naŋgo kumbra dena naŋgi dal anjam groteqnub. Ariya naŋgi Qotei aqa ŋamdamuq di une saiqoji. Niŋgi anjam di nami buk miligiq di sisiyosai kio?

Matyu 12:7

Osiqa olo minjrej, “Qotei aqa anjam bei dego nami neŋgreŋyeb unu. Agi endegsib neŋgreŋyeb, ‘Niŋgi e laŋa atraiboqnsib ijo ñam soqteqnub. E nuŋgo kumbra deqa arearetbosai. Ariya niŋgi tamo naŋgi qa duloqnsibqa naŋgi geregereinjroqniye. Yimqa e nuŋgo kumbra deqa tulaŋ arearetbqas.’ Niŋgi Qotei aqa anjam di sisiyosib poiŋgwo qamu niŋgi tamo une saiqoji unub qaji naŋgi gulube enjrosai qamu.

Matyu 19:4

Onaqa Yesus na kamba minjrej, “Qotei aqa anjam bei nami neŋgreŋyeb qaji di niŋgi sisiyosai kio? Anjam endegsi unu, ‘Tulaŋ nami Qotei a mandam ti iŋgi iŋgi kalil ti gereiyosiqa bati deqa a tamo wo uŋa wo dego gereinjrej.

Matyu 21:42

Naŋgi degsib Yesus minjnabqa a na olo minjrej, “Qotei aqa anjam bei unu. Niŋgi anjam di nami sisiyosai kio? Agi anjam nami endegsib neŋgreŋyeb unu, ‘Tal gereiyo qaji tamo naŋgi na tal aqa ai arqsibqa uge qa marsib taqal waiyeb. Onaqa tal aqa ai di Qotei na olo osiq tumaq di tigeltej unu. Tal aqa ai di tal siŋgilatqajqa deqa tigeltej unu. Tamo Koba Qotei a segi na tal aqa ai di tigeltej deqa iga unsim mareqnum, “Tal aqa ai di tulaŋ bolequja.” ’

Matyu 3:2

A naŋgi endegsi minjroqnej, “Qotei a nuŋgo Mandor Koba sosim niŋgi taqatŋgwajqa bati jojomqo. Deqa niŋgi are bulyiye.”

Matyu 3:8

Niŋgi are bulyqa marsibqa kumbra bole bole babtoqniye. Yim tamo naŋgi unsib marqab, ‘Bole, niŋgi are bulyonub.’

Matyu 4:17

Bati deqa Yesus na aqa wau utru atej. Wau utru atsiqa Qotei aqa anjam palontoqnsiqa tamo uŋgasari naŋgi endegsi minjroqnej, “Qotei a nuŋgo Mandor Koba sosim niŋgi taqatŋgwajqa bati jojomqo. Deqa niŋgi are bulyiye.”

Mak 12:26

“Ariya tamo naŋgi moisib olo subq na tigelqab deqa e niŋgi endegsi nenemŋgwai. Moses a nami Qotei aqa anjam bei neŋgreŋyej di niŋgi sisiyosai kio? Agi Moses a anjam endegsi neŋgreŋyej, ‘Ŋam mariŋ miligiq dia puloŋeqnaqa Qotei a ŋam puloŋq di sosiqa Moses metosiq minjej, “E Abraham aqa Qotei. E Aisak aqa Qotei. E Jekop aqa Qotei.” ’

Mak 12:33

Iga a tulaŋ qalaqalaiyosim gago are miligi ti gago powo ti gago siŋgila ti kalil a yekritqom di kumbra bolequja. Iga gago segi jejamu gereiyeqnum dego kere gago was naŋgi geregereinjroqnqom di dego kumbra bolequja. Dal anjam aiyel di tulaŋ boledamu. Iga Qotei atraiyqom di laŋa kiñala. Iga iŋgi bei ŋamyuo na koitsim Qotei atraiyqom di dego laŋa kiñala. Ariya iga dal anjam aiyel di dauryqom di tulaŋ bolequja.”

Mak 2:17

Onaqa Yesus a Farisi naŋgo anjam di qusiqa minjrej, “Tamo ma saiqoji naŋgi ma gereiyo tamo aqaq gilosaieqnub. Tamo ma ti naŋgi segi ma gereiyo tamo aqaq gileqnub. Tamo bei a marqas, ‘E tamo bole. E une saiqoji.’ E tamo deqaji naŋgi metnjrit ijoq bqajqa e deqa bosai. Tamo a marqas, ‘E une ti.’ E tamo deqaji naŋgi metnjrit ijoq bqajqa e deqa bem.”

Luk 10:26

Onaqa Yesus na kamba minjej, “Ni Moses aqa dal anjam qalie. Ni gaigai sisiyeqnum. Deqa ŋambile gaigai sqajqa gam di ni segi na mare.”

Luk 19:10

E segi Tamo Aŋgro. Deqa e na tamo uŋgasari padalo gamq di unub qaji naŋgi ŋamosiy itnjrsiy eleŋqai. Yimqa naŋgi padalo gam uratosib ŋambile gaigai sqab. E deqa mandamq aiem.”

Luk 24:47

Deqa niŋgi gilsib e qa mare mare laqnsibqa sawa sawa kalilq dia tamo uŋgasari naŋgi anjam endegsib minjroqniye, ‘Niŋgi are bulyiye. Yibqa Qotei a Yesus aqa ñam na nuŋgo une kalil kobotetŋgwas.’ Niŋgi tamo uŋgasari naŋgi anjam degsib minjroqnsib kumbra kalil e nami nuŋgo ŋamdamuq di yoqnem qaji deqa naŋgi sainjroqniye. Niŋgi Jerusalem dia wau utru atsib dena walwelosib sawa sawa kalilq dia ijo anjam minjre minjre laqniye.

Luk 5:31

Onaqa Yesus a Farisi naŋgo anjam di qusiqa minjrej, “Tamo ma saiqoji naŋgi ma gereiyo tamo aqaq gilosaieqnub. Tamo ma ti naŋgi segi ma gereiyo tamo aqaq gileqnub.

Luk 5:32

Tamo bei a marqas, ‘E tamo bole. E une saiqoji.’ E tamo deqaji metit ijoq bqajqa e deqa bosai. Tamo a marqas, ‘E une ti.’ E tamo deqaji metit ijoq bqajqa e deqa bem.”

Jon 10:34

Onaqa Yesus na kamba minjrej, “Nuŋgo dal anjam bei nami endegsib neŋgreŋyeb unu, ‘E niŋgi merŋgonum, “Niŋgi qotei.” ’ Nuŋgo dal anjam nami degsib neŋgreŋyeb unu.

Aposel 11:18

Onaqa Juda tamo Pita ŋiriŋteb qaji naŋgi aqa anjam di qusibqa naŋgo ŋiriŋ koboej. Osib naŋgi Qotei aqa ñam soqtosib mareb, “Bole, Qotei a sawa bei bei qaji tamo naŋgi dego are bulyetnjreqnu. Deqa naŋgi dego ŋambile gaigai sqab.”

Aposel 2:38

Onaqa Pita na kamba minjrej, “Niŋgi segi segi are bulyosib Qotei aqaq boiye. Babqa iga Yesus Kristus aqa ñam na niŋgi yansŋgonam Qotei na nuŋgo une kalil kobotetŋgwas. Osim aqa Mondor Bole niŋgi laŋa eŋgwas. Awai saiqoji.

Aposel 20:21

E bati gaigai Juda tamo ti Grik tamo ti naŋgi are bulyosib Qotei aqaq bosib gago Tamo Koba Yesus qa naŋgo areqalo siŋgilatqajqa deqa e siŋgila na anjam minjroqnem.

Aposel 3:19

“Deqa niŋgi quiye. Niŋgi na nuŋgo une kalil torei uratosib are bulyosib Qotei aqaq babqa a na nuŋgo une kalil kobotetŋgimqa niŋgi aqa aŋgro bole sqab.

Aposel 5:31

Yesus qujai di Qotei na laŋ qureq osi oqsiqa aqa baŋ woq di awotej. Deqa Yesus a gago Tamo Koba. A na qujai iga eleŋamqa iga padalqasai. Yesus qujai dena iga Israel tamo uŋgasari are bulyetgsim gago une kobotetgwas.

2 Pita 3:9

Tamo qudei naŋgi endegsib mareqnub, “Tamo Koba Qotei aqa anjam nami marej qaji di a olo dauryqajqa tariŋoqnsiq laŋa sokobaiyeqnu.” Di sai. A na tamo naŋgi padaltnjrqajqa arearetosaieqnu. A na tamo kalil naŋgi are bulyqajqa marsiq deqa a jiŋga na niŋgi qa tariŋoqnsiq unu.