Matyu 5:30 - Yesus Aqa Anjam Bole

³⁰ Ino baŋ wo na ni titmosim uneq waimqa laqnimqa baŋ di gentosim waiy. Ino jejamu taqal qujai loumimqa ni une atqasai di kere. Ariya Qotei na ino jejamu taqal kalil ŋamyuoq waiyetmqas di keresai.”

Matyu 5:30 ပူးပေါင်းရင်းမြစ်များ

Matyu 11:6

Ariya niŋgi quiye. Tamo naŋgi e nubsib e qa naŋgo areqalo siŋgilatosib olo ijo ñam ulontosaieqnub qaji naŋgi tulaŋ areboleboleinjrim sqab.”

Matyu 13:21

Ariya anjam di naŋgo are miligiq tulaŋ guma aiosai. Deqa naŋgi sokiñalayibqa bunuqna Qotei aqa anjam gotraŋyo qaji tamo qudei naŋgi bosib naŋgi gulube enjrsib ugeugeinjrqab. Yimqa naŋgo areqalo Yesus qa siŋgilateqnub qaji di naŋgi olo ulontqab.

Matyu 16:23

Onaqa Yesus a bulosiqa Pita koqyosiqa ŋiriŋtosiq minjej, “Ni Satan bul. Deqa ni ijo qoreq gile. Ni ijo gam getentetbaim. Ni Qotei aqa areqalo dauryosai. Ni mandam tamo naŋgo areqalo dauryonum. Dauryosim agi ni na anjam di merbonum.”

Matyu 17:27

Deqa e atra tal qaji takis atqa uratqai di kere. Di kiyaqa? E segi Qotei aqa Aŋgro deqa. Uŋgum. Iga takis o qaji tamo naŋgo are ugetetnjrqasai. Deqa ni alile aisim yima waiysim qe namoqna oqam qaji di aqa medabu waqtosimqa aqa medabu miligiq di silali bei soqnim unqam. Unsim silali di osi gilsim gago aiyel qa takis atqa osimqa takis o qaji tamo naŋgi enjre.” Onaqa Pita a Yesus aqa anjam di dauryosiqa aisiq qe aqa medabu miligiq di silali itsiqa osi gilsiq takis o qaji tamo naŋgi enjrej.

Matyu 18:8

Ino baŋ na kio ino siŋga na kio ni titmosim uneq waimqa laqnimqa di gentosim waiy. Ni baŋ geŋo sosimqa ino baŋ na une bei yqasai di kere. Ni siŋga geŋo sosimqa ino siŋga na une bei yqasai di kere. Di ni ŋambile gaigai sqam. Ariya ni baŋ aiyel ti sosimqa ino baŋ na une yqam di keresai. Di Qotei na ni ŋamyuoq waimqas. Ni siŋga aiyel ti sosimqa ino siŋga na une yqam di dego keresai. Di Qotei na ni ŋamyuoq waimqas. Ŋamyuo di gaigai yuoqnsim sqas.

Matyu 22:13

Onaqa mandor koba a na aqa kaŋgal tamo naŋgi minjrej, ‘Tamo di siŋga ti baŋ ti tontetosib oqeq waiyibqa sawa ambruq di soqnem. Sawa dia tamo naŋgi akamkobayoqnsib pailoqnsib naŋgo jaqatiŋ qa qalagei anjam ateqnu.’

Matyu 25:20

Onaqa kaŋgal tamo 5,000 kina ej qaji a na 5,000 kina bei olo osi bosiqa aqa tamo koba minjej, ‘O Tamo Koba, ni unime. Ino 5,000 kina nami ebem qaji dena wauonamqa olo 5,000 kina bei brantej agiende.’

Matyu 26:31

Naŋgi manaq oqoqnsibqa Yesus na minjrej, “Qolo qujai endeqa niŋgi kalil ijo ñam ulontosib e uratbosib jaraiqab. Nuŋgo kumbra deqa Qotei aqa anjam bei nami endegsib neŋgreŋyeb unu, ‘E na kaja naŋgo mandor qalitqa kaja naŋgi segi segi jaraiqab.’ Qotei aqa anjam nami degsib neŋgreŋyeb.

Matyu 5:22

Ariya e na dal anjam di buŋyosiy niŋgi endegsi merŋgwai. Tamo bei na aqa was laŋa ŋiriŋtqas di a une ti sqas. Tamo bei na aqa was laŋa misiliŋyqas di a une kobaquja yqas. Deqa a ojsib Juda gate kokba naŋgo ulatamuq di tigeltosib aqa une ubtetqab di kere. Ariya tamo bei na aqa was laŋa minjqas, ‘Ni tulaŋ nanari, areqalo saiqoji,’ degyqas aqa une deqa Qotei na a osim ŋamyuoq waiyqas.

Matyu 5:29

“Ino ŋamdamu wo na ni titmosim uneq waimqa laqnimqa ŋamdamu di otorosim waiy. Ino jejamu taqal qujai loumimqa ni une atqasai di kere. Ariya Qotei na ino jejamu taqal kalil ŋamyuoq waiyetmqas di keresai.

Mak 9:43

Ino baŋ na ni titmosim uneq waimqa laqnimqa baŋ di gentsim waiy. Ni baŋ geŋo sosimqa ino baŋ na une bei yqasai di kere. Di ni ŋambile gaigai sqam. Ariya ni baŋ aiyel ti sosimqa ino baŋ na une yqam di keresai. Di Qotei na ni ŋamyuoq waimqas. Ŋamyuo di mosoqasai. Gaigai yuoqnqas. Ŋamyuoq dia tamo naŋgo ambli bati gaigai sosibqa naŋgi moreŋqa keresai.

Luk 12:5

Tamo niŋgi ulaiyqab qaji agi deqa merŋgwai. Qotei a segi nuŋgo jejamu moiotosim bunuqna nuŋgo qunuŋ dego ŋamyuoq waiyqa kere. Deqa niŋgi a segi ulaiyiye.

Luk 17:2

Tamo dena ijo aŋgro kiñala endego bei e qa aqa areqalo siŋgilatqo qaji di osim uneq waiyqas di uge. Tamo qudei naŋgi na tamo di ojsib meniŋ kobaquja osib sil na aqa kakoroq di tontosib waiyib ya robuq aisim moiqas di kere. Deqa niŋgi segi segi geregere ŋam atsib soqniye.

Rom 9:33

Agi Qotei aqa anjam bei nami endegsib neŋgreŋyeb unu, “Niŋgi quiye. E na tal aqa ai utru bei giltem unu. Deqa tal aqa ai utru di tamo naŋgi quraqyosib maŋgalqab. E na tal aqa ai utru di olo osiy tal siŋgilatqajqa deqa Saion qureq di tigeltit sqas. Tamo naŋgi tal aqa ai utru deqa naŋgo areqalo siŋgilatqab di naŋgi jemainjrqasai.”

1 Korin 8:13

Deqa e damu bei uyitqa dena ijo was a uneq aiqas di e olo damu uyqasai. Ijo was a uloŋosim uneq aiaim deqa e damu uratqai.

Galesia 5:11

O was qu, e tamo naŋgi muluŋ aiqajqa minjroqnem qamu kiyaqa jeu tamo naŋgi na e ugeugeibeqnub? E tamo naŋgi muluŋ aiqajqa minjroqnem qamu jeu tamo naŋgi na ŋamburbas qa anjam jeutosai qamu.

1 Pita 2:8

Qotei aqa anjam bei dego nami endegsib neŋgreŋyeb unu, “Tamo qudei naŋgi tal aqa ai di quraqyoqnsib maŋgaleqnub.” O was qu, tamo naŋgi di Qotei aqa anjam gotraŋyeqnub. Utru deqa naŋgi tal aqa ai di quraqyoqnsib maŋgaleqnub. Naŋgi kumbra uge uge yeqnub deqa Qotei na naŋgi padaltnjrqas. Qotei a nami naŋgi qa degsi marej.