Matyu 5:29 - Yesus Aqa Anjam Bole

²⁹ “Ino ŋamdamu wo na ni titmosim uneq waimqa laqnimqa ŋamdamu di otorosim waiy. Ino jejamu taqal qujai loumimqa ni une atqasai di kere. Ariya Qotei na ino jejamu taqal kalil ŋamyuoq waiyetmqas di keresai.

Matyu 5:29 ပူးပေါင်းရင်းမြစ်များ

Matyu 10:28

Niŋgi jeu tamo naŋgi ulainjraib. Naŋgi nuŋgo jejamu segi qalsib moiotqa kere. Naŋgi nuŋgo qunuŋ moiotqa keresai. Deqa niŋgi naŋgi ulainjraib. Qotei a segi ulaiyiye. A na tamo naŋgo qunuŋ ti jejamu ti padaltnjrsim naŋgi ŋamyuoq breinjrqa kere.

Matyu 11:6

Ariya niŋgi quiye. Tamo naŋgi e nubsib e qa naŋgo areqalo siŋgilatosib olo ijo ñam ulontosaieqnub qaji naŋgi tulaŋ areboleboleinjrim sqab.”

Matyu 16:26

Tamo bei a mandam qa ñoro kalil koroiyqas di mondoŋ aqa segi qunuŋ padalqas. Yimqa ñoro dena a kiersim aqaryaiyqas? Di keresai. Aqa qunuŋ padalqas di a awai kie atsim dena aqa qunuŋ olo ŋambile sqas? Di keresai.

Matyu 17:27

Deqa e atra tal qaji takis atqa uratqai di kere. Di kiyaqa? E segi Qotei aqa Aŋgro deqa. Uŋgum. Iga takis o qaji tamo naŋgo are ugetetnjrqasai. Deqa ni alile aisim yima waiysim qe namoqna oqam qaji di aqa medabu waqtosimqa aqa medabu miligiq di silali bei soqnim unqam. Unsim silali di osi gilsim gago aiyel qa takis atqa osimqa takis o qaji tamo naŋgi enjre.” Onaqa Pita a Yesus aqa anjam di dauryosiqa aisiq qe aqa medabu miligiq di silali itsiqa osi gilsiq takis o qaji tamo naŋgi enjrej.

Matyu 19:12

Ariya niŋgi quiye. Tamo qudei naŋgo jejamu bolesai. Naŋgi degsib ai miligiq na ŋambabeb. Deqa naŋgi uŋa oqa keresai. Tamo qudei naŋgi tamo qudei na welum etnjreb deqa naŋgi aŋgrotqa keresai. Deqa naŋgi dego uŋa oqa keresai. Naŋgi laŋa unub. Ariya tamo qudei naŋgi segi Qotei aqa wau ojqa marsibqa uŋa oqa urateqnub. Tamo qudei naŋgi kumbra di dauryqa kere deqa naŋgi kumbra degyeqnub.”

Matyu 23:15

“O dal anjam qalie tamo ti Farisi ti niŋgi ŋam atiye. Niŋgi anjam maro aiyelteqnub qaji tamo. Deqa niŋgi sawa sawa kalil keretoqnsibqa tamo qujai segi nuŋgo anjam dauryqa osib anjam mare mare laqnub. Yuwal dego niŋgi qobuŋ na keretoqnsibqa anjam mare mare laqnub. Ariya tamo qujai a nuŋgo anjam qusim nuŋgo kumbra dauryqas di a na niŋgi buŋgosim tamo tulaŋ ugedamu sqas. Deqa a niŋgi qa namoosim ŋamyuoq aiqas. Nuŋgo kumbra deqa niŋgi tulaŋ padalougetqab.

Matyu 23:33

Niŋgi amal uge bul. Deqa mondoŋ Qotei a nuŋgo une qa merŋgsim niŋgi ŋamyuoq breiŋgwas. Yimqa niŋgi kiersib olo bole sqab? Keresai.

Matyu 5:22

Ariya e na dal anjam di buŋyosiy niŋgi endegsi merŋgwai. Tamo bei na aqa was laŋa ŋiriŋtqas di a une ti sqas. Tamo bei na aqa was laŋa misiliŋyqas di a une kobaquja yqas. Deqa a ojsib Juda gate kokba naŋgo ulatamuq di tigeltosib aqa une ubtetqab di kere. Ariya tamo bei na aqa was laŋa minjqas, ‘Ni tulaŋ nanari, areqalo saiqoji,’ degyqas aqa une deqa Qotei na a osim ŋamyuoq waiyqas.

Matyu 5:30

Ino baŋ wo na ni titmosim uneq waimqa laqnimqa baŋ di gentosim waiy. Ino jejamu taqal qujai loumimqa ni une atqasai di kere. Ariya Qotei na ino jejamu taqal kalil ŋamyuoq waiyetmqas di keresai.”

Mak 8:36

Tamo bei a mandam qa ñoro kalil koroiyqas di mondoŋ aqa segi qunuŋ padalqas. Yimqa ñoro dena a kiersim aqaryaiyqas? Di keresai.

Luk 12:5

Tamo niŋgi ulaiyqab qaji agi deqa merŋgwai. Qotei a segi nuŋgo jejamu moiotosim bunuqna nuŋgo qunuŋ dego ŋamyuoq waiyqa kere. Deqa niŋgi a segi ulaiyiye.

Rom 6:6

Iga qalie, gago areqalo namij a Kristus ombla ŋamburbasq di moiej. Yim une aqa siŋgila gago jejamuq di waueqnu qaji di koboqajqa deqa. Deqa bini iga olo une aqa sorgomq di sqasai.

Rom 8:13

Niŋgi areqalo namij na walwelqab di niŋgi moreŋqab. Ariya niŋgi Qotei aqa Mondor aqa kumbra na walwelosib aqa siŋgila na nuŋgo segi jejamu aqa kumbra uge uge moiotqab di niŋgi ŋambile sqab.

1 Korin 9:27

Osim dena e na ijo segi jejamu qaloqnsim siŋgilateqnum. Yim ijo jejamu a ijo areqalo dauryqajqa deqa. E na tamo uŋgasari naŋgi Yesus aqa anjam bole minjre minjre laqnum. Ariya bunuqna e segi awai bole osaiaim deqa e na ijo segi jejamu qaloqnsim siŋgilateqnum.

Galesia 5:24

Tamo kalil Kristus Yesus beteryejunub qaji naŋgi na naŋgo areqalo namij ti naŋgo are prugnjrqajqa kumbra ti kalil ŋamburbasq di qamnab moiej.

Kolosi 3:5

Deqa niŋgi mandam qaji kumbra kalil nuŋgo are miligiq di unu qaji di moiotiye. Mandam qaji kumbra agi ubtsiy merŋgwai. Sambala kumbra ti kumbra jiga ti kumbra uge uge yqajqa are prugŋgoqa, mandam qa iŋgi iŋgi qa maulŋgoqa. Tamo naŋgi mandam qa iŋgi iŋgi qa mamaulnjreqnu qaji naŋgi gisaŋ qotei naŋgi qa louobuleqnub.