Matyu 4:24 - Yesus Aqa Anjam Bole

²⁴ Onaqa tamo uŋgasari kalil Siria sawaq di soqneb qaji naŋgi anjam endegsib queb, “Yesus a maŋwa tulaŋ gargekoba yeleŋeqnu.” Degsib qusib deqa naŋgo ma tamo kalil joqsib Yesus aqa areq osi beleŋeb. Tamo ma utru segi segi osi beleŋeb. Tamo jejamu jaqatiŋnjro qaji naŋgi ti tamo mondor uge uge na ojeleŋo qaji naŋgi ti tamo gate na nanarioqnsib maŋgaloqneb qaji naŋgi ti tamo jejamu lainjro qaji naŋgi ti kalil joqsib beqnab Yesus na boletnjroqnej.

Matyu 4:24 ပူးပေါင်းရင်းမြစ်များ

Matyu 12:22

Onaqa bati di tamo bei mondor uge na medabu getentsiq ŋamdamu qandimyej qaji a tamo qudei naŋgi na Yesus aqa areq osi bonabqa Yesus na mondor uge di wiyetonaqa aqa meŋ otyonaqa aqa ŋamdamu boleosiq a sawa unsiqa anjam bole maroqnej.

Matyu 14:1

Bati deqa tamo uŋgasari naŋgi Yesus aqa kumbra qa saosib laqnabqa Mandor Koba Herot a quej.

Matyu 15:22

Gilsiq di sonaqa Kenan qaji uŋa bei a sawa dia soqnej. Sosiqa a Yesus aqa areq bosiqa siŋgila na pailyosiq minjej, “O Tamo Koba, Devit aqa Ŋiri, ni e qa are ugeimeme. Mondor uge na ijo aŋgro sebiŋ a tulaŋ ugeugeiyoqnsiq jaqatiŋ koba yeqnu.”

Matyu 17:15

“O Tamo Koba, ni ijo aŋgro mel qa are ugeimimqa aqaryaiye. A bati gaigai nanarioqnsiqa dena aqa jejamu ugeteqnu. Bati gargekoba a uloŋoqnsiqa ŋamyuoq o yaq aieqnu.

Matyu 17:18

Onaqa osi bonabqa Yesus na mondor uge di ŋiriŋtosiq minjej, “Ni aŋgro di uratosim ulaŋ.” Degsi minjnaqa mondor uge na aŋgro di uratosiq ulaŋej. Onaqa bati qujai deqa aŋgro a boleej.

Matyu 4:23

Yesus a dena walwelosiqa Galili sawa keretoqnsiqa Juda naŋgo Qotei tal miligiq giloqnsiqa Qotei aqa anjam palontosiq minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu. Anjam bole di Yesus na palontosiq minjroqnej. Osiqa tamo ma utru segi segi so qaji naŋgi boletnjroqnej.

Matyu 8:28

Onaqa Yesus aqa aŋgro naŋgi ti qobuŋ na gilsib ya agu taqal beiq di brantosib Gadara naŋgo sawaq di tiryeb. Tiryonabqa tamo aiyel naŋgi tamo sub ato sawaq dena brantosib walwelosib Yesus aqa areq beb. Tamo naŋgi di mondor uge uge na ojeleŋo qaji. Naŋgi aiyel qaja ani. Deqa tamo kalil naŋgi gam dena walwelqa keresai.

Matyu 8:33

Onaqa bel taqatoqneb qaji tamo naŋgi kumbra di unsibqa deqa jaraiosib qure miligiq aisib tamo uŋgasari naŋgi sainjreb. Osib naŋgi walwelosib tamo uŋgasari kalil naŋgi bel qa ti tamo aiyel mondor uge uge na ojeleŋo qaji naŋgi qa ti sainjroqnsib laqneb.

Matyu 8:6

“O Tamo Koba, ijo kaŋgal tamo a makobaiyqo. Aqa tanu kalil laiyosiq jejamu tulaŋ jaqatiŋugetqoqa talq di ŋeiejunu.”

Matyu 9:26

Onaqa naŋgi jaraiosib sawa sawa kalilq dia Yesus aqa kumbra deqa saoqnsib laqneb.

Matyu 9:35

Ariya Yesus a dena walwelosiqa qure kokba ti qure kiñilala ti dia brantoqnsiqa Juda naŋgo Qotei tal miligiq giloqnsiqa Qotei aqa anjam palontosiq minjroqnej. Qotei a tamo uŋgasari naŋgo Mandor Koba sosiq naŋgi taqatnjreqnu. Anjam bole di Yesus na palontosiq minjroqnej. Osiqa tamo ma utru segi segi naŋgi boletnjroqnej.

Mak 1:28

Tamo uŋgasari naŋgi Yesus qa anjam degsib mare mare laqnabqa naŋgo anjam di tulaŋ kobaonaqa Galili sawaq dia tamo uŋgasari kalil naŋgi quekriteb.

Mak 1:32

Seŋ aieqnaqa qure deqaji tamo uŋgasari ma utru segi segi so qaji naŋgi ti mondor uge uge na ojeleŋo qaji naŋgi ti naŋgo was naŋgi na joqsib Yesus aqa areq osi beleŋoqneb.

Mak 2:3

Onaqa tamo qolqe naŋgi na tamo bei jejamu laiyej qaji a saperaq di atsibqa qoboiyosib Yesus aqa talq osi beb.

Mak 2:4

Osi bosib ŋam ateb tamo tulaŋ gargekoba naŋgi siraŋme juŋeb. Deqa naŋgi Yesus aqa areq gilqa keresaiinjrnaqa tal quraq oqsib goge na waqtosibqa tamo sapera qoji gulaintosib ura uratonab Yesus aqa areq aiej.

Mak 2:9

Anjam kie e na tamo jejamu laiyqo qaji di minjqajqa wau koba sai? ‘Ino une kalil e na kobotetmonum,’ anjam de kio, ‘Ni tigelosim ino sapera osim walwel,’ anjam de kio?

Luk 2:2

Kwirinius a Siria sawaq di mandor koba sonaqa bati deqa naŋgi na naŋgo ñam sisiyeb. Naŋgi nami ñam sisiyosaioqneb.

Luk 4:14

Qotei aqa Mondor aqa siŋgila Yesus aqaq di sonaqa deqa a olo puluosiqa Galili sawaq aiej. Aisiq di sonaqa naŋgi a qa mare mare laqnabqa tamo uŋgasari kalil naŋgi quekriteb.

Luk 4:38

Onaqa Yesus a tigelosiqa Qotei tal uratosiq Saimon aqa tal gogetej. Tal gogetosiqa Saimon aqa mimibe makobaiyonaqa jejamu kaŋkaŋyonaq unej. Deqa Yesus aqa aŋgro naŋgi na minjeb, “Ni a boletime.”

Luk 5:15

Onaqa a gilsiqa a Yesus aqa anjam di dauryosai. Yesus na a boletej deqa mare mare laqnaqa aqa anjam tulaŋ kobaonaqa sawa sawa kalilq dia tamo uŋgasari gargekoba quekriteb. Deqa tamo uŋgasari tulaŋ gargekoba naŋgi Yesus aqa anjam quqwajqa marsibqa boqnsib aqa areq di korooqneb. A na naŋgo ma boletetnjrqajqa deqa ti aqa areq di korooqneb.

Luk 5:24

Ariya e Tamo Aŋgro e mandamq endia siŋgila ti unum deqa e na tamo naŋgo une kobotetnjrqa kere. Niŋgi degsib qalieqajqa deqa e na tamo di boletqai.” Yesus a na naŋgi degsi minjrsiqa tamo jejamu laiyej qaji di koqyosiqa minjej, “E ni mermqai. Ni tigelosim ino sapera osim ino talq gile.”

Luk 7:17

Yesus a kumbra di yonaqa tamo naŋgi unsib deqa mare mare laqnab anjam di tulaŋ kobaonaqa tamo uŋgasari Judia sawaq di soqneb qaji naŋgi ti tamo uŋgasari sawa bei beiq di soqneb qaji naŋgi dego kalil quekriteb.

Jon 10:21

Ariya tamo qudei naŋgi mareb, “Tamo a mondor uge ti sqas di a anjam bole deqaji marqa keresai. Mondor uge a na tamo ŋam qandimo boletqa kere e?”

Aposel 10:38

Qotei na aqa Mondor siŋgila koba ti unu qaji di Yesus yonaqa a walweloqnsiqa kumbra bole bole yoqnsiqa tamo uŋgasari Satan na ugetnjro qaji naŋgi kalil boletnjroqnej. Qotei a Yesus ombla soqneb deqa a siŋgila ti wauoqnej.

Aposel 15:23

Yesus aqa tamo uŋgasari Jerusalem qureq di soqneb qaji naŋgi na anjam di neŋgreŋyosib naŋgi aiyel enjrnabqa Antiok qureq osi aieb. Naŋgi na anjam endegsib neŋgreŋyeb, “O Yesus aqa tamo uŋgasari kalil Antiok qureq di unub qaji, kaiye. Iga na anjam endi neŋgreŋyosim niŋgi qa qariŋyonum. Iga nuŋgo Kristen was. Iga Yesus aqa aŋgro 12-pela iga ti Kristen gate kokba iga ti anjam endi neŋgreŋyosim niŋgi qa qariŋyonum. Sawa bei bei qaji tamo Antiok qure ti Siria sawa ti Silisia sawa ti dia unub qaji niŋgi qa anjam endi qariŋyonum.

Aposel 15:41

Naŋgi aiyel gilsib Siria sawa ti Silisia sawa ti ambleq na walweloqnsibqa qure qure kalilq dia brantoqnsibqa Yesus aqa tamo uŋgasari naŋgi itnjroqnsib naŋgi Qotei aqa anjam minjroqnsib siŋgilatnjroqneb.

Aposel 28:9

A degyonaqa nui deqaji tamo uŋgasari mainjrej qaji naŋgi qusibqa Pol aqa areq beqnabqa a na naŋgi kalil boletnjroqnej.

Aposel 8:7

Tamo uŋgasari gargekoba naŋgi mondor uge ti sonabqa Filip na mondor uge wiyetnjreqnaqa mondor uge naŋgi na naŋgo jejamu uratoqnsib tulaŋ koba leleŋoqnsib jaraioqneb. Tamo uŋgasari jejamu lainjro qaji ti siŋga qandamnjro qaji ti gargekoba Filip na boletnjroqnej.