Matyu 21:15 - Yesus Aqa Anjam Bole

¹⁵ Onaqa aŋgro du du atra tal miligiq di soqneb qaji naŋgi Yesus aqa maŋwa di unsibqa naŋgi tulaŋ koba leleŋoqnsib minjoqneb, “O Devit aqa Ŋiri, iga ni qa tulaŋ areboleboleigwo.” Onaqa dal anjam qalie tamo naŋgi ti atra tamo kokba ti naŋgi aŋgro du du naŋgo anjam di qusibqa naŋgi Yesus qa are ugeinjrej.

Matyu 21:15 ပူးပေါင်းရင်းမြစ်များ

Matyu 20:24

Yesus aqa aŋgro 10-pela naŋgo ŋamgalaq dia naŋgi aiyel aube wo na anjam di Yesus minjeb deqa naŋgi qusib naŋgi aiyel qa ŋiriŋeb.

Matyu 21:23

Yesus a na aqa aŋgro naŋgi anjam degsi minjrsiq koboonaqa a olo atra tal miligiq gilsiq dia Qotei aqa anjam palontosiq tamo uŋgasari naŋgi minjroqnej. Onaqa atra tamo kokba ti Israel naŋgo tamo bole bole ti naŋgi na aqa areq bosib nenemyeb, “Ni iga merge. Ni siŋgila qabe na osimqa kumbra endi yeqnum? Yai na ni qariŋmej deqa ni bosim wau endi yeqnum?”

Matyu 21:9

Onaqa Yesus a donki quraq di awoosiq walweleqnaqa tamo uŋgasari namooqneb qaji naŋgi ti bunuoqneb qaji naŋgi ti tulaŋ koba leleŋoqnsibqa maroqneb, “O Devit aqa Ŋiri, iga ni qa tulaŋ areboleboleigwo. Ni Tamo Koba Qotei aqa ñam na bonum deqa a na ni tulaŋ geregereimoqnqas. Deqa iga Qotei laŋ goge di unu qaji aqa ñam soqtoqnqom.” Tamo uŋgasari naŋgi degoqnsib leleŋ ti Yesus dauryoqneb.

Matyu 22:42

“Niŋgi Kristus qa kiersib are qalonub? A yai aqa ŋiri?” Onaqa naŋgi na kamba minjeb, “Kristus a Devit aqa ŋiri.”

Matyu 26:3

Yori bati koba di jojomej deqa atra tamo kokba ti Juda gate kokba ti naŋgi gilsib atra tamo gate aqa ñam Kaiafas aqa talq di koroeb.

Matyu 26:59

Onaqa atra tamo kokba ti Juda gate kokba ti naŋgi kalil koroosibqa Yesus aqa jejamuq di anjam kie qamsib dena a qalib moiqajqa deqa qairoqneb.

Matyu 27:1

Onaqa nobqolo malu qameqnaq atra tamo kokba ti Juda gate kokba ti naŋgi kalil koroesosibqa Yesus qalib moiqajqa anjam keretoqneb. Anjam kereonaq naŋgi Yesus aqa baŋ tontetosib osi gilsib Rom naŋgo Tamo Koba Pailat aqa baŋq di ateb.

Matyu 27:20

Ariya atra tamo kokba ti Juda gate kokba ti naŋgi na tamo uŋgasari kalil naŋgo areqalo tigeltetnjreb. Naŋgi na Pailat minjibqa a na Barabas uratsim enjrsim Yesus osim qalim moiqajqa deqa naŋgo areqalo tigeltetnjreb.

Matyu 9:27

Onaqa Yesus a qure di uratosiq a olo walwelosiq gileqnaqa tamo aiyel ŋamdamu geteŋnjro qaji naŋgi gam na Yesus dauryosib giloqneb. Naŋgi giloqnsib leleŋoqnsib Yesus minjoqneb, “O Devit aqa Ŋiri, ni iga qa are ugeimeme.”

Mak 11:18

Onaqa atra tamo kokba ti dal anjam qalie tamo naŋgi ti Yesus aqa anjam di qusibqa naŋgi a qa ulaosib a qalib moiqajqa gam ŋamoqneb. Di kiyaqa? Tamo uŋgasari kalil naŋgi Yesus aqa anjam quqwajqa tulaŋ arearetnjroqnej deqa.

Luk 20:1

Bati bei Yesus a atra tal koba miligiq gilsiq dia tamo uŋgasari naŋgi Qotei aqa anjam bole palontosiq minjroqnej. Onaqa atra tamo kokba ti dal anjam qalie tamo naŋgi ti Juda tamo bole bole naŋgi ti bosib nenemyeb, “Ni iga merge. Ni siŋgila qabe na osimqa kumbra endi yeqnum? Yai na ni qariŋmej deqa ni wau endi yeqnum?”

Luk 22:2

Deqa bati di atra tamo kokba ti dal anjam qalie tamo naŋgi ti Yesus qalsib moiotqajqa gam ŋamoqneb. Di kiyaqa? Naŋgi tamo uŋgasari naŋgi ulainjreb deqa.

Luk 22:66

Onaqa nobqolo malu qameqnaq Juda gate kokba ti atra tamo kokba ti dal anjam qalie tamo naŋgi ti bosib koroonabqa qaja tamo naŋgi na Yesus osi bosib naŋgo ulatamuq dia tigeltonabqa Juda tamo kokba naŋgi na nenemyeb,

Jon 11:57

Naŋgi degsib maroqneb. Di kiyaqa? Atra tamo kokba ti Farisi ti naŋgi na tamo uŋgasari naŋgi nami endegsib minjreb, “Tamo bei a Yesus qabi soqnimqa unsim bosim iga mergem. Yim iga Yesus ojsim tonto talq waiyqom.”

Jon 12:19

Ainabqa Farisi naŋgi na unjrsibqa segi segi maroqneb, “Iga Yesus siŋgila na saidyeqnamqa keresaiigeqnu. Niŋgi uniye. Tamo uŋgasari kalil naŋgi a dauryeqnub.”

Jon 4:1

Farisi naŋgi endegsib queb, “Yesus a na Jon buŋyosiqa tamo uŋgasari tulaŋ gargekoba yansnjreqnaqa naŋgi a dauryeqnub. Jon a tamo gargekoba yansnjrosaieqnu.” Farisi naŋgi degsib queb. Bole, Yesus a segi na tamo uŋgasari naŋgi yansnjrosaioqnej. Aqa aŋgro naŋgi na yansnjroqneb. Tamo Koba Yesus a qalieej, Farisi naŋgi degsib queb. Deqa a Judia sawa uratosiqa olo Galili sawaq aiej.

Jon 7:42

Kristus a Devit aqa leŋ dena ŋambabosim aqa qure utru Betlehem dena bqas. Nami Qotei aqa anjam degsib neŋgreŋyeb unu.”