Matyu 19:28 - Yesus Aqa Anjam Bole

²⁸ Onaqa Yesus na minjrej, “Niŋgi quiye. E bole merŋgwai. Mondoŋ Qotei a laŋ bunuj ti mandam bunuj ti atimqa bati deqa e Tamo Aŋgro ñam kobaquja osiy ijo segi awo jaram kobaq di awesqai. Sosiyqa niŋgi tamo uŋgasari e daurbeqnub qaji metŋgitqa niŋgi dego awo jaram kokba 12-pelaq di awoeleŋqab. Awoeleŋosib Israel naŋgo moma 12-pela naŋgo leŋ kalil naŋgi taqatnjroqnqab.

Matyu 19:28 ပူးပေါင်းရင်းမြစ်များ

Matyu 16:27

E Tamo Aŋgro. Mondoŋ e ijo Abu aqa riaŋ ti sosiy aqa laŋ aŋgro naŋgi joqsiy bosiy tamo uŋgasari kalil naŋgo kumbra segi segi qa peginjrsiy naŋgo segi segi awai keretsiy enjrqai.

Matyu 19:27

Onaqa Pita na Yesus minjej, “O Tamo Koba, ni une. Iga gago iŋgi iŋgi kalil uratosimqa ni daurmonum. Deqa iga awai kie oqom?”

Matyu 20:21

Onaqa Yesus na kamba minjej, “Ni iŋgi kie qa merbqam?” Onaqa a na Yesus minjej, “Mondoŋ ni gago Mandor Koba sosimqa bati deqa ni marimqa ijo aŋgro aiyel endi naŋgi ino baŋ woq di ino baŋ qonaŋq di awoqab.”

Matyu 25:31

Yesus a na aqa aŋgro naŋgi yawo anjam degsi minjrsiq koboonaqa olo anjam bei endegsi minjrej, “Mondoŋ e Tamo Aŋgro ñam kobaquja oqai. Osiy Qotei aqa laŋ aŋgro kalil naŋgi joqsiy olo mandamq aisiy ijo segi awo jaram kobaq di awesqai.

Matyu 6:33

Ariya niŋgi kumbra endi qujai yoqniye. Niŋgi Qotei aqa sorgomq di geregere soqnibqa a nuŋgo Mandor Koba sosim niŋgi taqatŋgoqnqas. Osib niŋgi aqa kumbra tiŋtiŋ dauryoqniye. Niŋgi degyqab di Qotei na kamba iŋgi bole bole dego niŋgi eŋgoqnqas.

Matyu 8:20

Onaqa Yesus na minjej, “Bauŋ juwaŋ naŋgi tal ti. Agi sub miligiq di ŋereŋeqnub. Qebari naŋgi simi ti. Deqa naŋgi simiq di ŋereŋeqnub. Ariya e Tamo Aŋgro ŋeiqajqa tal saiqoji. Deqa ni e daurbqajqa gulube koba.”

Mak 10:37

Onaqa naŋgi aiyel na Yesus nenemyeb, “Mondoŋ ni riaŋ koba ti laŋ goge dena bosim gago Mandor Koba sosimqa bati deqa ni marimqa aqo aiyel ino baŋ woq di ino baŋ qonaŋq di awoqom.”

Aposel 3:21

A laŋ qureq oqej di unu. A di soqnimqa Qotei na mandam bunuj ti laŋ bunuj ti atqa bati brantimqa a olo bqas. Qotei a nami marej, ‘E mandam bunuj ti laŋ bunuj ti atqai.’ Osiqa aqa anjam di aqa medabu o qaji tamo naŋgi minjrnaqa naŋgi na neŋgreŋyeb.

2 Timoti 2:12

Iga siŋgila na tigeloqnsim gulube kalil qoboiyoqnsim unum deqa mondoŋ iga Kristus ombla mandor kokba sqom. Ariya iga a qoreiyqom di a na kamba iga qoreigwas.

2 Pita 3:13

Ariya Qotei a nami endegsi marej, “E na laŋ bunuj ti mandam bunuj ti olo gereiyqai.” A degsi marej deqa iga di unqajqa tariŋoqnsim unum. Laŋ bunuj ti mandam bunuj ti dia kumbra bole tiŋtiŋ gaigai sqas.

Uli Anjam 11:16

Onaqa gate kokba 24 Qotei aqa ŋamgalaq dia naŋgo awo jaramqsi awesoqneb qaji naŋgi siŋga pulutosib ŋam quosib Qotei louetoqneb.

Uli Anjam 12:1

Ariya laŋ goge dia Qotei aqa maŋwa bei brantonaq unem. E unem di uŋa bei tigelesoqnej. Uŋa di a seŋ na kabuosiqa baiq di tigelesoqnej. Aqa gateq di bongar 12-pela atsiq soqnej.

Uli Anjam 20:4

Onaqa e olo ŋam atsimqa awo jaram kokba qudei unjrem. Awo jaram kokbaq dia tamo qudei naŋgi awoeleŋesoqneb. Tamo naŋgi di Qotei na wau enjrnaqa naŋgi awo jaram kokbaq dia awoosib tamo uŋgasari naŋgo kumbra qa naŋgi peginjroqneb. Onaqa e olo ŋam atsimqa tamo uŋgasari tulaŋ gargekoba nami moreŋo qaji naŋgo qunuŋ unjreleŋem. Tamo uŋgasari naŋgi di Yesus qa naŋgo areqalo siŋgilatoqneb qaji. Naŋgi nami Yesus aqa ñam maroqnsibqa Qotei aqa anjam siŋgila na ojesoqneb deqa jeu tamo naŋgi na naŋgo kakoro giŋgeŋnjrnab naŋgi moreŋeb. Tamo uŋgasari naŋgi di wagme juwaŋ wo aqa sulum wo biŋinjrosaioqneb. Naŋgo lanjaqsi baŋqsi wagme juwaŋ aqa toqor osai. Deqa naŋgi olo ŋambile osib wausau 1,000 Kristus ombla mandor kokba sqab.

Uli Anjam 21:5

Onaqa Qotei a awo jaram kobaq di awesosiq marej, “Niŋgi quiye. E iŋgi iŋgi kalil bunuj atonum.” Osiqa merbej, “Ni anjam kalil endi neŋgreŋye. Anjam endi bole kalil. Tamo naŋgi qusib marqab, ‘Bole.’”

Uli Anjam 22:2

Ya qalaqsi ŋambile qa ŋamtaŋ bei tigelesoqnej. Ŋam di bai segi segi qa gei utru segi segi yoqnqas. Bai bei gei utru bei yqas. Bai bei gei utru bei yqas. Degsim gilsim gei utru 12-pelatqas. Aqa baŋga na tamo uŋgasari sawa sawa kalilq di unub qaji naŋgo ma kobotetnjroqnqas.

Uli Anjam 22:5

Qure dia ambruoqnqasai. Deqa lam qatrentqasai. Seŋ suwaŋoqnqasai. Tamo Koba Qotei a segi na tamo uŋgasari naŋgi suwantnjroqnqas. Yim naŋgi bati gaigai mandor kokba sqab.

Uli Anjam 3:21

Tamo a Satan ombla qotsim siŋgilaqas di e na minjitqa aqo ombla ijo awo jaram kobaq di awoqom. Nami e segi qoto siŋgilaosimqa aqo ijo Abu wo aqa awo jaram kobaq di awoem dego kere.

Uli Anjam 4:4

Ariya e olo ŋam atsimqa awo jaram kokba 24 unjrem. Awo jaram kokba 24 dena Qotei aqa awo jaram ambletesoqneb. Gate kokba 24 naŋgi awo jaramq di awoeleŋesoqneb. Naŋgi gara qat olekokba jigeleŋosib mandor kokba naŋgo gate tatal wala ti gol na gereiyo qaji di ateleŋosib soqneb.

Uli Anjam 7:4

Onaqa tamo gembub naŋgi toqor eleŋeb di marnab quem. Tamo 144,000 naŋgo lanjaq di toqor ateleŋonab e unem. Tamo naŋgi di Israel naŋgo moma utru 12-pela naŋgo leŋ deqaji.