Matyu 16:17 - Yesus Aqa Anjam Bole

¹⁷ Pita na kamba Yesus degsi minjnaqa a na minjej, “O Saimon, Jona aqa ŋiri, ni tulaŋ areboleboleimeme. Di kiyaqa? Ino anjam merbonum di mandam tamo bei na babtosiq mermosai. Ijo Abu laŋ qureq di unu qaji a segi na anjam di babtosiq mermqo.

Matyu 16:17 ပူးပေါင်းရင်းမြစ်များ

Luk 22:32

O Pita, e ni qa gaigai endegsim Qotei pailyeqnum, ‘O Abu, ni na Pita aqa areqalo siŋgilatetimqa a e uratbqasai.’ E ni qa degsim pailyeqnum. Bole, ni mati uloŋqam. Ariya bunuqna ni olo are bulyosimqa ijoq bqam. Bosim ino was naŋgi siŋgilatnjroqnqam.”

Jon 1:42

Degsi minjsiqa Saimon osiq Yesus aqa areq osi gilej. Onaqa Yesus na Saimon unsiqa minjej, “Ni Saimon, Jon aqa ŋiri. Bunuqna ino ñam Sifas mermoqnqab.” Ñam “Sifas” di Hibru anjam. Gago anjam, “Pita.” Aqa damu, “Meniŋ.”

Jon 6:45

Qotei aqa medabu o qaji tamo naŋgi nami anjam endegsib neŋgreŋyeb unu, ‘Qotei a na tamo uŋgasari kalil naŋgi aqa kumbra osornjroqnim naŋgi a qa qalieoqnqab.’ Deqa tamo uŋgasari kalil ijo Abu aqa anjam quoqnsib a qa qalieeqnub qaji naŋgi ijoq beqnub.

1 Korin 15:50

O was qu, e na niŋgi endegsi merŋgwai. Qotei na mandam qaji tamo naŋgi oqa keresai. Deqa a naŋgo Mandor Koba sosim naŋgi taqatnjrqa keresai dego. Gago jejamu moisim qusaqas qaji di ŋambile gaigai sqa keresai.

Galesia 1:16

Osiqa bati a nami atej qaji di brantonaqa a na aqa Ŋiri Yesus e osorbej. Yim e na aqa anjam bole osiy giloqnsiy tamo uŋgasari sawa bei beiq di unub qaji naŋgi minjre minjre laqajqa deqa. Onaqa bati di e na tamo qudei naŋgi endegsi nenemnjrosaioqnem, “Yesus a tamo kiero?” o “E Yesus aqa anjam kiersi palontoqnqai?” Qotei a segi na e giltbej deqa e tamo qudei naŋgi degsi nenemnjrosaioqnem.

Efesus 2:8

Niŋgi Kristus qa nuŋgo areqalo siŋgilatonabqa Qotei a niŋgi qa are boleiyej aqa kumbra dena a na niŋgi eleŋosiq ŋambile eŋgej. Kumbra di niŋgi segi na yosai. Qotei a na niŋgi laŋa eŋgej.

Efesus 3:5

Qotei na aqa uli anjam di tamo uŋgasari nami soqneb qaji naŋgi minjrosaioqnej. Ariya bini a na aqa Mondor aqa siŋgila na anjam di babtoqnsiq aqa anjam maro tamo naŋgi ti aqa medabu o qaji tamo naŋgi ti minjreqnu.

Efesus 6:12

Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum.

Hibru 2:14

Yesus aqa aŋgro naŋgi di mandam tamo. Deqa Yesus a naŋgi bulosiqa a dego mandam tamo bulyosiq moiej. A Satan aqa siŋgila kobotqa marsiq deqa moiej. Satan a moio qa utru. A na tamo uŋgasari naŋgi moiotnjreqnu.

1 Pita 5:1

O Kristen gate, e niŋgi anjam endegsi merŋgwai. E dego Kristen gate deqa Kristus a ijo ŋamgalaq dia jaqatiŋ osiq moinaq e unem. Mondoŋ Kristus a olo siŋgila ti ñam koba ti brantimqa bati deqa Qotei na laŋ qure qa iŋgi bole bole e ti niŋgi ti egwas. Deqa Kristen gate, niŋgi wau endegyoqniye.

1 Jon 4:15

Tamo bei a endegsi marqas, “Yesus a Qotei aqa Ŋiri.” Degsi marqas deqa Qotei na a beteryesqas. Yimqa a na kamba dego Qotei beteryesqas.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.