Luk 17:26 - Yesus Aqa Anjam Bole

²⁶ “Noa aqa bati qa tamo uŋgasari naŋgi kumbra yoqneb dego kere e Tamo Aŋgro bqajqa bati qa naŋgi kumbra degyoqnqab.

Luk 17:26 ပူးပေါင်းရင်းမြစ်များ

Luk 17:22

Yesus a anjam degsi marsiq kobotosiqa aqa aŋgro naŋgi endegsi minjrej, “Bati bei bamqa niŋgi e Tamo Aŋgro olo bqajqa bati unqajqa maroqnqab. Ariya niŋgi bati di unqasai.

Luk 17:24

Kola minjaleqnaqa laŋ kalil suwaŋeqnu. Dego kere e Tamo Aŋgro brantitqa tamo uŋgasari kalil naŋgi e nubqab.

Luk 17:27

Agi Noa aqa bati qa naŋgi kalil iŋgi uyoqnsib ya uyoqnsib uŋa baŋ ojeleŋoqnsib sonabqa Noa a qobuŋ miligiq gilnaqa awa koba aisiqa mandam ya maqonaqa tamo kalil moreŋekriteb.

Luk 17:7

Yesus a naŋgi anjam degsi minjrsiqa olo yawo anjam bei endegsi minjrej, “Tamo bei na aqa wau tamo bei qariŋyim gilsimqa aqa kaja naŋgi taqatnjroqnqas kio aqa iŋgi wauq gilsimqa dia mandam qamsim bulyoqnqas kio ariya a wau di kobotimqa aqa tamo koba na endegsi minjqasai, ‘Ni namo iŋgi uye.’ Degyqasai.

Luk 18:8

E niŋgi merŋgwai. Qotei a na aqa segi tamo uŋgasari naŋgi urur aqaryainjroqujatqas. Ariya mondoŋ e Tamo Aŋgro laŋ goge dena bosiyqa tamo uŋgasari mandamq endi unub qaji naŋgi kumbra kieryoqnsib soqnibqa e unjrqai. Naŋgi e qa naŋgo areqalo siŋgilatosib sqab kio sai kio di geregere unqai.”

Hibru 11:7

Noa a dego Qotei qa aqa areqalo siŋgilatej. Deqa Qotei na minjej, “E bunuqna awa qariŋyit bosim mandam kalil keretqas. Deqa ni qobuŋ qujai gereiyime.” Ariya Noa a Qotei aqa anjam di aqa damu unosaisosiqa a Qotei aqa anjam di dauryosiqa aqa uŋa ti aqa aŋgro ti naŋgi padalaib deqa qobuŋ qujai gereiyej. A Qotei qa aqa areqalo siŋgilatej deqa a na tamo uŋgasari kalil mandamq di soqneb qaji naŋgo kumbra uge ubtsiq minjroqnej. A Qotei qa aqa areqalo siŋgilatosiq qobuŋ gereiyej deqa Qotei na a tamo bole une saiqoji qa minjej. Agi Qotei na tamo kalil a qa naŋgo areqalo siŋgilateqnub qaji naŋgi tamo bole une saiqoji qa minjreqnu.

2 Pita 2:5

Nami tamo uŋgasari Noa aqa bati qa soqneb qaji naŋgi Qotei qoreinjrej deqa Qotei na naŋgi dego uratnjrosai. A naŋgi dego padaltnjrej. Awa koba aisiqa mandam ya maqonaqa dena Qotei na naŋgi padaltnjrej. Ariya Qotei a Noa padaltosai. Noa a Qotei aqa kumbra tiŋtiŋ qa marsiq laqnej deqa Qotei na a ti tamo uŋgasari 7-pela naŋgi ti taqatnjrej. Deqa naŋgi bole soqneb.

2 Pita 3:6

Mandam a ya ambleq di brantonaqa bunuqna Noa aqa bati qa Qotei a olo marnaqa ya koba dosiqa mandam ya maqosiqa iŋgi iŋgi kalil padaltej.