Kolosi 3:5 - Yesus Aqa Anjam Bole

⁵ Deqa niŋgi mandam qaji kumbra kalil nuŋgo are miligiq di unu qaji di moiotiye. Mandam qaji kumbra agi ubtsiy merŋgwai. Sambala kumbra ti kumbra jiga ti kumbra uge uge yqajqa are prugŋgoqa, mandam qa iŋgi iŋgi qa maulŋgoqa. Tamo naŋgi mandam qa iŋgi iŋgi qa mamaulnjreqnu qaji naŋgi gisaŋ qotei naŋgi qa louobuleqnub.

Kolosi 3:5 ပူးပေါင်းရင်းမြစ်များ

Matyu 15:19

Iŋgi iŋgi tamo naŋgo are miligiq na branteqnu qaji agi ubtsiy merŋgwai. Areqalo uge uge, tamo qaloqa, uŋa qa laoqa, was aqa ŋauŋ anjamyoqa, bajiŋoqa, was aqa jejamu laŋa gisaŋyoqa, was yomuiyoqa.

Rom 1:26

Tamo uŋgasari naŋgi di Qotei qoreiyeqnub deqa a na kamba naŋgi uratnjreqnaqa naŋgi kumbra tulaŋ uge uge jigat yoqnqajqa are prugnjreqnu. Naŋgo kumbra jigat agiende. Uŋgasari naŋgi tamo ti ŋereŋqajqa uratoqnsibqa uŋa bei wo bei wo ŋereŋoqnsib sambala kumbra yeqnub.

Rom 1:29

Naŋgo kumbra uge agiende. Naŋgi kumbra bole tiŋtiŋ yqajqa torei urateqnub. Naŋgi ñoro koba oqajqa mamaulnjreqnu. Naŋgi tamo naŋgi jeutnjreqnub. Naŋgi tamo qudei iŋgi koba ti unub qaji naŋgi qa are ugeinjreqnu. Naŋgi tamo naŋgi ñumsib moiotnjreqnub. Naŋgi laŋa laŋa ŋiriŋoqnsib gisaŋ anjam mareqnub. Naŋgi tamo qudei naŋgo iŋgi iŋgi laŋa yainjreqnub. Naŋgi tamo qudei naŋgi ugeugeinjreqnub. Kumbra di naŋgoq di tulaŋ koba unu. Naŋgi yomueqnub.

Rom 6:13

Une na nuŋgo siŋga ti baŋ ti taqatqa laqnimqa niŋgi na olo saidyiye. Yim niŋgi kumbra uge uge yoqnqasai. Niŋgi subq na olo tigelobulosib ŋambile unub deqa niŋgi nuŋgo segi jejamu osib Qotei yiye. Yosib nuŋgo siŋga ti baŋ ti nuŋgo jejamu ti kalil Qotei aqa baŋq di atibqa a segi na taqatqas. Yim dena niŋgi kumbra bole tiŋtiŋ yoqnqab.

Rom 6:6

Iga qalie, gago areqalo namij a Kristus ombla ŋamburbasq di moiej. Yim une aqa siŋgila gago jejamuq di waueqnu qaji di koboqajqa deqa. Deqa bini iga olo une aqa sorgomq di sqasai.

Rom 7:23

Ariya e endegsi unonum. Une a ijo baŋq di ijo siŋgaq di ijo jejamu kalilq dia wauoqnsiqa Qotei aqa dal anjam ijo areqaloq di unu qaji di qoto iteqnu. Une di siŋgila koba. Deqa a na e tonto talq waibobuloqnsiqa ijo baŋ ti ijo siŋga ti ijo jejamu ti kalil di siŋgila na taqateqnu.

Rom 7:5

Nami iga areqalo namij aqa kumbra dauryoqnem bati deqa dal anjam a na gago siŋgaq di gago baŋq di gago jejamu kalilq dia areqalo uge uge tigelteqnaqa iga une yoqnem. Osim kumbra dena iga moio qa gam babtoqnem.

Rom 8:13

Niŋgi areqalo namij na walwelqab di niŋgi moreŋqab. Ariya niŋgi Qotei aqa Mondor aqa kumbra na walwelosib aqa siŋgila na nuŋgo segi jejamu aqa kumbra uge uge moiotqab di niŋgi ŋambile sqab.

1 Korin 5:1

O was qu, e anjam bei endegsi quem. Nuŋgo ambleq di tamo bei a sambala kumbra yeqnu. Aqa sambala kumbra di tulaŋ ugedamu. Tamo naŋgi Qotei qaliesai qaji naŋgi sambala kumbra deqaji yosaieqnub. Aqa sambala kumbra agiende. A na aqa abu aqa ŋauqali olo oqnsiq ombla sambalaeqnub.

1 Korin 6:11

Nami niŋgi qudei tamo deqaji soqneb. Ariya bunuqna niŋgi are bulyeb deqa Qotei na nuŋgo are miligi yansetŋgosiqa niŋgi aqa segi kumbra boleq di atsiqa Tamo Koba Yesus Kristus aqa ñam na ti gago Qotei aqa Mondor aqa siŋgila na ti niŋgi gereiŋgej. Deqa bini niŋgi aqa ŋamgalaq di tamo bole une saiqoji unub.

1 Korin 6:13

Tamo qudei naŋgi mareqnub, “Uyo iŋgi aqa wau agi aisim meneq di sqajqa. Mene aqa wau agi iŋgi uyqajqa.” Di naŋgi bole mareqnub. Ariya mondoŋ Qotei na uyo iŋgi ti mene ti di kalil torei kobotqas. Ariya gago jejamu di sambala kumbra yqajqa sai. Gago jejamu di Tamo Koba Yesus aqa. A segi na taqateqnu.

1 Korin 6:18

Deqa was qu, niŋgi gaigai sambala kumbra uratoqnsib isaq giloqniye. Une kalil tamo naŋgi yeqnub qaji di naŋgo jejamuq di beterosaieqnu. Ariya tamo naŋgi sambala kumbra yeqnub di kumbra dena naŋgo jejamuq di beteroqnsiq naŋgo jejamu ugeteqnu.

2 Korin 12:21

E olo niŋgi qa bosiy nuŋgo ambleq di tamo gargekoba nami une yoqneb qaji naŋgi are bulyosaiunub degsi unqai kio? Degsi unqai di ijo Qotei a nuŋgo ŋamgalaq di e jemai ebqas. Tamo naŋgi di naŋgo une nami yoqneb qaji agiende. Naŋgi kumbra uge jiga ti yoqneb. Naŋgi sambala kumbra yoqneb. Naŋgi kumbra uge yqajqa are prugnjroqnej. E niŋgi qa bosiy tamo naŋgi di naŋgo une olo qoreiyosai degsi unqai di e naŋgi qa are gulubeibqas. E deqa ulaeqnum.

Galesia 5:24

Tamo kalil Kristus Yesus beteryejunub qaji naŋgi na naŋgo areqalo namij ti naŋgo are prugnjrqajqa kumbra ti kalil ŋamburbasq di qamnab moiej.

Efesus 4:19

Naŋgi kumbra uge uge yoqnsib ariya naŋgi deqa jemainjrosaieqnu. Naŋgi torei kumbra ugeq aiejunub. Naŋgi kumbra uge jigat yqajqa are tulaŋ prugnjreqnu.

Kolosi 2:11

Niŋgi Kristus taqyejunub deqa niŋgi muluŋ bole ejunub. Di jejamu qaji muluŋ sai. Niŋgi Kristus aqa kumbra na nuŋgo areqalo namij aqa kumbra kalil di urateb. Di muluŋ bole agide.

1 Tesalonaika 4:3

Qotei aqa areqalo agiende. Niŋgi nuŋgo segi jejamu osib Qotei yekritosib aqa segi kumbra boleq di sosib dauryoqniye. Osib sambala kumbra kalil torei uratiye.

1 Tesalonaika 4:5

Yimqa nuŋgo areqalo uge uge dena niŋgi titŋgimqa sambala kumbra tamo naŋgi Qotei qaliesai qaji naŋgi yeqnub di niŋgi dego dauryo uge.

1 Timoti 6:10

Tamo deqaji naŋgi silali koba oqajqa tulaŋ arearetnjreqnu. Naŋgo kumbra di agi kumbra uge uge kalil naŋgo utru. Kumbra dena tamo qudei naŋgi titnjreqnaqa naŋgi Yesus qa naŋgo areqalo siŋgilatqa uratoqnsib gulube gargekoba iteqnub.

Hibru 12:16

Niŋgi na tamo naŋgi saidnjribqa naŋgi sambala kumbra yaib. Osib tamo naŋgi Qotei qoreiyqajqa dego saidnjriye. Agi nami Iso na Qotei qoreiyosiqa a aŋgro matu soqnej deqa are qalosaiosiq iŋgi bole kalil aqa abu na nami a yqajqa minjej qaji di bati qujai qa qariŋyosiq dena iŋgi awaiyosiq uyej.

Hibru 13:4

Tamo a uŋatqajqa di kumbra bole. Uŋa a tamotqajqa di dego kumbra bole. Deqa niŋgi kumbra di ugetaib. Niŋgi kumbra di geregere taqatosib dena niŋgi Qotei aqa ŋamgalaq di jiga saiqoji sqab. Niŋgi qalie, tamo uŋgasari sambala kumbra yeqnub qaji naŋgi Qotei na awai uge enjrqas.

Hibru 13:5

Niŋgi silali qa mamaulŋgaiq. Niŋgi endegsib maroqniye, “Iga silali ti iŋgi ti yala eqnum di kere.” Agi Qotei na iga segi segi endegsi mergej, “E ni uratmqasai. E ni qoreimqasai dego.”

Jems 4:1

O was qu, kiyaqa niŋgi segi segi anjam na qotoqnsib ŋiriŋkobaeqnub? Utru agiende. Niŋgi nuŋgo segi jejamu qa areboleboleiŋgeqnaqa kumbra uge uge yqajqa are prugŋgeqnu. Kumbra di nuŋgo jejamu qa sarqei kalilq di siŋgila na waueqnu. Utru deqa niŋgi anjam na qotoqnsib ŋiriŋkobaeqnub.

1 Pita 2:11

O ijo kadoi bole, nuŋgo qure bole agi laŋ goge di unu. Deqa niŋgi mandamq endia yauŋ tamo bulosib unub. Deqa e na niŋgi endegsi merŋgwai. Niŋgi nami nuŋgo areqalo namij dauryqajqa are prugŋgoqnej. Ariya areqalo namij di nuŋgo qunuŋ ti ombla qoteqnub. Deqa niŋgi nuŋgo areqalo namij di uratosib qoreiyiye.

Uli Anjam 21:8

“Ariya tamo naŋgi ulakobaoqnsib Yesus qa naŋgo areqalo siŋgilatosaieqnub qaji naŋgi kalil ŋamyuo kobaq aiqab. Tamo kumbra uge yo qaji, leŋ ojo qaji, sambala kumbra yo qaji, gumaniŋo qaji, quñam qalo qaji, qotei gisaŋ biŋinjro qaji, gisaŋ anjam maro qaji naŋgi kalil ŋamyuoq aieleŋqab. Ŋamyuoq dia meniŋ kalil yusiq ñaŋgaeqnu. Ŋamyuo di moio bunu qaji.”

Uli Anjam 22:15

Tamo naŋgi kumbra uge uge yeqnub qaji naŋgi Qotei aqa qure koba di miligiq gilqasai. Naŋgi oqeq di sqab. Tamo gumaniŋo qaji, quñam qalo qaji, sambala kumbra yo qaji, leŋ ojo qaji, gisaŋ qotei biŋinjro qaji, gisaŋ kumbra dauryqajqa tulaŋ arearetnjro qaji naŋgi Qotei aqa qure koba di miligiq gilqasai. Naŋgi oqeq di sqab.