Kolosi 3:15 - Yesus Aqa Anjam Bole

¹⁵ Kristus a na iga lawo kumbra egeqnu. Lawo kumbra dena nuŋgo are miligi taqatesoqneme. Qotei na niŋgi metŋgej deqa niŋgi jejamu qujai bul sosib are qujaitosib soqniye. Sosib deqa niŋgi gaigai Qotei biŋiyoqniye.

Kolosi 3:15 ပူးပေါင်းရင်းမြစ်များ

Jon 14:27

“E niŋgi uratŋgwa osiyqa nuŋgo are latetŋgwai. E segi are lawo na unum niŋgi degsib are lawo na sqajqa deqa e na nuŋgo are latetŋgwai. Mandam tamo uŋgasari naŋgi na degsib nuŋgo are latetŋgwa keresai. Deqa niŋgi are gulubeiŋgaiq. Osib ulaaib.

Jon 16:33

Niŋgi na e beterbosib are lawo na sqajqa deqa e na anjam endi niŋgi merŋgonum. Niŋgi mandamq endia sosib niŋgi gulube koba oqnqab. Deqa uŋgum. Niŋgi are siŋgilatiye. E segi na mandam endeqa siŋgila kalil gotraŋyosim tigelejunum.”

Rom 1:21

Naŋgi Qotei qa qalie unub. Ariya a segi Qotei bole naŋgi degsib marosaieqnub. Deqa naŋgi aqa ñam soqtosib a biŋiyosaieqnub. Naŋgo kumbra dena naŋgi nanaritnjroqnsiq naŋgo areqalo getentetnjreqnaqa naŋgi ambruq di laqnub.

Rom 14:17

Iga iŋgi ti ya ti uyoqnqom kumbra dena Qotei a gago Mandor Koba sosim iga taqatgwasai. Ariya iga kumbra tiŋtiŋ yoqnsim lawo kumbra dauryoqnsim Qotei aqa Mondor aqa wau na areboleboleigim sqom kumbra dena Qotei a gago Mandor Koba sosim iga taqatgwas.

Rom 15:13

O was qu, Qotei a nami iŋgi bole bole di iga egwajqa marej deqa iga bini tariŋoqnsim unum. Niŋgi a qa nuŋgo areqalo siŋgilateqnub deqa a na nuŋgo are boletetŋgimqa niŋgi tulaŋ areboleboleiŋgim lawo na sqab. Yim Qotei aqa Mondor na niŋgi siŋgilatŋgimqa niŋgi iŋgi bole bole a na eŋgwa marej qaji deqa tariŋoqnsib sqab.

Rom 5:1

Ariya iga Yesus qa gago areqalo siŋgilatem deqa Qotei na iga tamo bole une saiqoji qa mergej. Gago Tamo Koba Yesus Kristus a jeu kobotej deqa iga Qotei ombla geregere unum.

1 Korin 10:17

Bem qujai unu agi Kristus aqa jejamu. Deqa iga kalil koba na korooqnsim bem qujai di uyeqnum. Deqa iga kalil Kristus aqa jejamu qujai.

1 Korin 7:15

Ariya Kristen tamo bei aqa uŋa a Yesus qa aqa areqalo siŋgilatosai. Deqa uŋa dena tamo di uratqa marsim uratem. Tamo a deqa une saiqoji. A uratqasai di a tonto talq di sobulqas. Kristen uŋa dego aqa tamo a Yesus qa aqa areqalo siŋgilatosai. Deqa tamo dena uŋa di uratqa marsim uratem. A dego une saiqoji. A uratqasai di a tonto talq di sobulqas. Qotei a niŋgi nuŋgo Kristen was qu naŋgi koba na geregere sqajqa metŋgeqnu. Deqa niŋgi ijo anjam di dauryiye.

2 Korin 4:15

E degsi maronum. Di kiyaqa? E qalieonum, kumbra kalil gagoq di branteqnu qaji di niŋgi aqaryaiŋgwajqa deqa. Qotei a iga qa are tulaŋ boleiyeqnu aqa kumbra di tamo uŋgasari gargekoba naŋgi qa gileqnu. Deqa tamo uŋgasari naŋgi di Qotei aqa kumbra di unsib a tulaŋ biŋiyoqnsib aqa ñam soqtoqnqab.

2 Korin 9:11

Qotei a na niŋgi iŋgi iŋgi koba eŋgeqnu deqa niŋgi na kamba iŋgi iŋgi di olo oqnsib Kristen tamo uŋgasari naŋgi enjroqniye. Gago baŋ na niŋgi na naŋgi silali di enjrib naŋgi deqa tulaŋ areboleboleinjrim Qotei biŋiyoqnqab.

Efesus 4:16

Iga kalil Kristus aqa jejamu qujai deqa iga qudei aqa baŋ bul. Iga qudei aqa siŋga bul. Iga qudei aqa ŋamdamu bul. Deqa a na aqa segi baŋ ti siŋga ti ŋamdamu ti jejamu ti kalil turtoqnsiqa qujaitejunu. Deqa iga kalil Kristus beteryoqnsim aqa wau geregere ojoqnsim aqa qalaqalaiyo kumbra dauryoqnqom. Kumbra dena iga boleoqnsim siŋgilaoqnqom.

Efesus 4:4

Iga kalil tamo qujaionum. Deqa iga Kristus aqa jejamu qujai. Iga kalil Mondor qujai ejunum. Deqa Qotei na niŋgi iŋgi qujai qa tariŋqa osiq metŋgej. Iŋgi qujai di agi laŋ qaji iŋgi bole bole a na mondoŋ iga egwas qaji.

Efesus 5:1

Niŋgi Qotei aqa segi aŋgro unub. A na niŋgi tulaŋ qalaqalaiŋgeqnu. Deqa kumbra a segi yeqnu qaji di niŋgi dego dauryosib yoqniye.

Efesus 5:20

Kumbra bole kio uge kio nuŋgoq di brantoqnimqa, uŋgum, niŋgi bati gaigai gago Tamo Koba Yesus Kristus aqa ñam na Qotei biŋiyoqniye.

Kolosi 1:12

O was qu, iga degsim niŋgi qa gago Abu Qotei pailyeqnum. Deqa niŋgi na a biŋiyoqnsib soqniye. A na niŋgi kumbra boleq di breiŋgej deqa agi niŋgi dauryoqnsib unub. Deqa iŋgi bole bole a na nami laŋ goge dia gereiyetŋgej unu qaji di niŋgi mondoŋ oqsib oqab. Agi niŋgi ti Qotei aqa segi tamo uŋgasari kalil suwaŋoq di unub qaji naŋgi ti iŋgi di oqab.

Kolosi 2:7

Mandam na ŋam jirim ojesonaqa ŋam a siŋgila na tigelejunu dego kere niŋgi Kristus osib nuŋgo are miligiq di siŋgilatosib aqa kumbra dauryoqniye. Kristus aqa anjam bole iga nami niŋgi merŋgoqnem qaji di niŋgi osib nuŋgo areqaloq di siŋgilatosib soqniye. Osib niŋgi gaigai Qotei biŋiyoqniye.

Kolosi 3:17

Nuŋgo anjam maro na ti nuŋgo wau na ti nuŋgo kumbra kalil na ti niŋgi Tamo Koba Yesus aqa ñam na yoqniye. Osib niŋgi aqa ñam na Qotei Abu biŋiyoqniye.

1 Tesalonaika 5:18

Kumbra kie nuŋgoq di brantoqnim, di uŋgum, niŋgi olo Qotei biŋiyoqniye. Qotei aqa areqalo agiende. Niŋgi Kristus Yesus beteryejunub deqa niŋgi kumbra degyoqniye.

1 Timoti 2:1

Ariya e anjam kobaquja bei endegsi mermit ni qusim daurye. Ni na Kristen tamo uŋgasari naŋgi minjroqnimqa naŋgi tamo kalil qa pailyoqnebe. Yim Qotei na naŋgi aqaryainjroqnqas. Od, ni na naŋgi minjroqnimqa naŋgi Qotei biŋiyoqnebe.

1 Timoti 6:12

Tamo naŋgi Kristus qa naŋgo areqalo siŋgilateqnub qaji naŋgi tamo naŋgi siŋgila na gurguroqnsib bubuŋeqnub dego kere. Deqa ni dego siŋgila na ururoqne. Osim dena ni ŋambile bole gaigai sqam. Bole, ni nami siŋgila na tigeloqnsim tamo gargekoba naŋgo ŋamgalaq dia Kristus aqa ñam ubtsim maroqnem. Bati deqa Qotei na ni ŋambile di oqajqa marsiq metmej.

Hibru 13:15

Deqa iga bati gaigai Yesus aqa ñam na Qotei aqa ñam soqtoqnqom. Iga kumbra degyoqnqom di iga Qotei atraiyobuloqnqom. Od, bati gaigai iga gago medabu na Qotei aqa ñam soqtoqnqom.

Uli Anjam 7:12

“Bole. Iga gago Qotei qa tulaŋ areboleboleigoqnimqa aqa ñam soqtoqnqom. A powo bole ti unu. Deqa iga a biŋiyoqnsim aqa ñam soqtoqnqom. A siŋgila koba ti unu. Od, siŋgila kalil aqaq di unu. A bati gaigai degesqas. Bole.”