Kolosi 3:11 - Yesus Aqa Anjam Bole

¹¹ Iga so bunujq di unum deqa iga kalil kerekere unum. Deqa iga gago was naŋgi endegsi minjroqnqasai, “Ni Grik qaji” o “Ni Juda qaji” o “Ni muluŋ aio qaji” o “Ni muluŋ aiosai qaji” o “Ni yauŋ tamo” o “Ni yambaŋ tamo” o “Ni kaŋgal tamo” o “Ni tamo laŋaj”. Iga gago was naŋgi degsi minjroqnqasai. Di kiyaqa? Kristus a segi qujai unu. A gago kalil qa Tamo Koba.

Kolosi 3:11 ပူးပေါင်းရင်းမြစ်များ

Jon 14:23

Onaqa Yesus na kamba minjej, “Tamo bei na e tulaŋ qalaqalaibqas di a ijo anjam dauryoqnqas. Yimqa ijo Abu na kamba tamo di qalaqalaiyimqa aqo ijo Abu wo aqaq bosim a ombla gaigai sqom.

Jon 15:5

“E segi wain ŋamtaŋ bole. Niŋgi ijo dani bul. Tamo bei a e beterbesqas di e dego a beteryesqai. Yimqa a gei koba ateleŋoqnqas. Niŋgi e uratbqab di niŋgi kumbra bole bei yqa keresai.

Jon 17:23

E ijo segi tamo uŋgasari naŋgoq di unum. Ni ijoq di unum. Kumbra dena naŋgi kalil dego aqo aiyel koba na are qujaitosib sqab. Soqnibqa mandam endeqa tamo uŋgasari naŋgi na unjrsibqa qalieqab, ni na e qariŋbonam bem. Osib qalieqab, ni na e tulaŋ qalaqalaibeqnum dego kere ijo segi tamo uŋgasari naŋgi dego ni na tulaŋ qalaqalainjreqnum.

Aposel 15:17

Amqa sawa bei bei qaji tamo naŋgi e itbqa maroqnsib ijoq boqnqab. E na naŋgi giltnjritqa naŋgi ijo segi tamo uŋgasari sqab.”

Aposel 28:2

Onaqa tamo uŋgasari nui dia soqneb qaji naŋgi kumbra tulaŋ boledamu ysibqa iga geregereigeb. Osib awa boqnej deqa iga yorgonaqa ŋam tuŋguyosib mergeb, “Niŋgi bosib ŋamyuo areq endi awooiye.” Onaqa iga ŋamyuo areq di awoonam jejamu kaŋkaŋgej.

Aposel 28:4

Onaqa nui deqaji tamo uŋgasari naŋgi amal uge Pol aqa baŋq di uñiyosiq gaiŋesonaqa unsibqa segi segi maroqneb, “Tamo endi a tamo qalo qaji kio? A yuwalq di moiosai deqa gago qotei na amal uge qariŋyqoqa a uñiyqo. Deqa a moiqas.”

Rom 1:14

E na Grik tamo naŋgi ti yauŋ tamo naŋgi ti powo tamo ti nanari tamo naŋgi ti Yesus aqa anjam minjroqnit quqwajqa deqa Qotei na e wau ebej.

Rom 10:12

Iga Juda tamo ti Grik tamo ti iga kalil kerekere unum. Tamo Koba Kristus a gago kalil qa Tamo Koba. Deqa a na tamo kalil Kristus metoqnsib pailyeqnub qaji naŋgi tulaŋ geregereinjreqnu.

Rom 3:22

Gam agiende. Tamo uŋgasari Yesus Kristus qa naŋgo areqalo siŋgilateqnub qaji naŋgi segi Qotei na tamo bole une saiqoji qa minjreqnu. Gam di segi. Gam bei saiqoji.

Rom 3:29

Deqa iga kiersi marqom? Qotei a Juda naŋgo segi Qotei e? A sawa bei bei qaji tamo naŋgo Qotei sai e? Sai. A sawa bei bei qaji tamo naŋgo Qotei dego.

1 Korin 12:13

Di kiyaqa? Qotei aqa Mondor a segi qujai na iga kalil eleŋosiqa turtgej deqa iga kalil tamo qujaionum. Iga Juda tamo ti Grik tamo ti kaŋgal tamo ti tamo laŋaj ti kalil Qotei aqa Mondor qujai di osim a ya jumbum bul uyoqnsim dena iga siŋgila eqnum.

1 Korin 14:11

Ariya tamo bei na e anjam bei merbim qusiy aqa damu poibqasai di a e qa marqas, “A yauŋ tamo.” Yim deqa e kamba a qa marqai, “A dego yauŋ tamo.”

1 Korin 7:19

Niŋgi muluŋ aieb kio niŋgi muluŋ aiosai kio di laŋa. Ariya niŋgi Qotei aqa dal anjam dauryqab di kumbra bole utru ti.

Galesia 2:20

Osim e olo ŋambile bunuj em. Ariya ŋambile di ijo segi ŋambile sai. Kristus a segi ijo are miligiq di ŋambile unu. Deqa bini kumbra kalil e mandamq endi yeqnum qaji di e Qotei aqa Ŋiri qa ijo areqalo siŋgilatosim yeqnum. Agi Qotei aqa Ŋiri a na e tulaŋ qalaqalaibosiq deqa a aqa segi ŋambile uratosiq e qa moiej.

Galesia 5:6

Tamo a Kristus Yesus beteryesqas di a marqas, iga muluŋ aiqom di laŋa. Iga muluŋ aiqasai di dego laŋa. Ariya iga Kristus qa gago areqalo siŋgilatosim dena iga qalaqalaiyo kumbra dauryoqnqom di kumbra bole utru ti.

Efesus 1:23

Qotei aqa segi tamo uŋgasari naŋgi Kristus aqa jejamu qujai. Kristus a na iŋgi iŋgi kalil ekritosiq tulaŋ keretejunu. Deqa a na Qotei aqa segi tamo uŋgasari naŋgi dego osiq tulaŋ keretnjrejunu.

Efesus 2:14

Kristus a segi na jeu kobotej deqa bini iga so bole unum. Nami Juda tamo naŋgi ti sawa bei bei qaji tamo naŋgi ti jeu soqneb. Deqa jeŋ a naŋgo ambleq di sosiqa naŋgi getentnjresoqnej. Ariya Kristus a moisiq dena jeŋ di waqtosiqa jeu kobotej. Osiqa Juda naŋgi ti sawa bei bei qaji naŋgi ti turtnjrsiqa sawa qujaiq di atej.

Efesus 2:15

A moiej gam dena a na Moses aqa dal anjam kalil taqal atekritej. A degyej. Di kiyaqa? A na Juda tamo naŋgi ti sawa bei bei qaji tamo naŋgi ti turtnjrim naŋgi tamo bunuj qujaiosib sqajqa deqa. Kumbra dena a na jeu kobotosiqa iga lawo kumbraq di atej unum.

Efesus 3:17

Osib naŋgi Kristus qa naŋgo areqalo siŋgilatqab dena Kristus a naŋgo are miligiq di sqas. O Abu, ni na Efesus naŋgi siŋgilatnjrimqa qalaqalaiyo kumbra naŋgo are miligiq di tulaŋ siŋgilatib soqnim naŋgi siŋgila na tigelesqab. Mandam na ŋam jirim ojesonaqa ŋam a siŋgila na tigelejunu dego kere.” O was qu, e niŋgi qa degsim Qotei pailyeqnum.

Efesus 3:6

Anjam di aqa utru agiende. Niŋgi sawa bei bei qaji tamo uŋgasari niŋgi Kristus aqa anjam bole qusib nuŋgo areqaloq di ateb deqa Qotei na niŋgi ti iga ti turtgosiqa sawa qujaiq di atej. Deqa iga kalil tamo qujaionum. Deqa iga ti niŋgi ti kalil iŋgi bole bole Qotei a nami iga Kristus Yesus aqa baŋ na egwajqa marej qaji di oqom.

Efesus 6:8

Niŋgi are qaliye. Tamo bei a wau bole yimqa di Tamo Koba Yesus a na kamba awai tulaŋ boledamu yqas. A tamo laŋaj kio a kaŋgal tamo kio di uŋgum a wau bole yimqa di Tamo Koba Yesus a na kamba awai tulaŋ boledamu yqas.

Kolosi 2:10

Iŋgi iŋgi kalil siŋgila ti unub qaji naŋgo gate koba agi Kristus a segi. Niŋgi Kristus aqa segi tamo uŋgasari unub deqa Qotei na niŋgi ŋambile eŋgej. Ŋambile di nuŋgoq di tulaŋ keretsiq maqejunu.

1 Jon 5:20

Iga qalie, Qotei aqa Ŋiri a bosiq iga powo egej. Yim iga Qotei qa bole qalieqajqa deqa. Iga Qotei beteryejunum. Iga aqa Ŋiri Yesus Kristus dego beteryejunum. Yesus a segi Qotei bole. A segi ŋambile gaigai sqajqa utru.

2 Jon 1:9

Tamo bei a Kristus aqa anjam ojqa uratosim olo anjam bei totoryosim dauryqas di a Qotei ombla sqa keresai. Ariya tamo bei a Kristus aqa anjam siŋgila na ojesqas di Abu Qotei wo aqa Ŋiri wo naŋgi a koba na sqab.