Kolosi 2:8 - Yesus Aqa Anjam Bole

⁸ O was qu, niŋgi geregere ŋam atsib soqniye. Tamo qudei naŋgi bosib naŋgo segi powo na ti gisaŋ anjam na ti nuŋgo areqalo bulyetŋgosib niŋgi naŋgo anjam dauryqajqa walawala-iŋgoqnqab. Deqa niŋgi naŋgo anjam di dauryaib. Tamo naŋgi di naŋgo moma naŋgi ti mondor uge uge laŋ ti mandam ti taqatejunub qaji naŋgi ti naŋgo anjam dauryeqnub. Naŋgi Kristus aqa areqalo dauryosaieqnub.

Kolosi 2:8 ပူးပေါင်းရင်းမြစ်များ

Matyu 10:17

Niŋgi tamo naŋgi qa geregere ŋam atsib soqniye. Tamo qudei naŋgi na bosib niŋgi ojeleŋosib tamo kokba naŋgo ulatamuq dia niŋgi tigeltŋgoqnqab. Osib nuŋgo jejamuq di anjam gargekoba laŋa laŋa qametŋgoqnsib naŋgo Qotei tal miligiq dia niŋgi kumbaiŋgoqnqab.

Matyu 16:6

Deqa Yesus a na naŋgi endegsi minjrej, “Niŋgi geregere ŋam atsib soqniye. Farisi ti Sadyusi ti naŋgo bem tiyeqnu qaji sum dena bem tiyekritosim tulaŋ kobaqujaqas. Deqa niŋgi geregere ŋam atsib soqniye.”

Matyu 7:15

Osiqa Yesus a olo anjam endegsi minjrej, “Niŋgi geregere ŋam atsib soqniye. Tamo qudei naŋgi na bosib gisaŋosib merŋgwab, ‘Iga Qotei aqa medabu o qaji tamo bole.’ Di gisaŋ koba. Tamo naŋgi di kaja bul lawo na nuŋgoq boqnsib walawalaiŋgoqnsib anjam merŋgeqnub. Ariya naŋgo are miligiq di naŋgi tamo uge bauŋ juwaŋ bul. Deqa naŋgi na niŋgi ugeugeiŋgwajqa laqnub. Bauŋ juwaŋ naŋgi na kaja naŋgi ñumoqnsib uyeqnub dego kere.

Aposel 17:18

Bati bei Grik naŋgo qalie tamo Atens qureq di soqneb qaji naŋgi Pol ombla anjam na qoteb. Naŋgi qudei qalie tamo koba Epikurias aqa skulq dena qalie eb. Naŋgi qudei skul bei aqa ñam Stoik dena qalie eb. Pol a na naŋgi endegsi minjroqnej, “Yesus a moisiq olo subq na tigelej. Deqa mondoŋ tamo kalil naŋgi dego subq na olo tigelqab.” Pol a na naŋgi degsi minjroqnej deqa naŋgi Pol ombla anjam na qotoqnsib segi segi maroqneb, “Pol a anjam laŋa laŋa mareqnu. A anjam kie mergwajqa bqo?” Ariya tamo qudei naŋgi endegsib maroqneb, “Pol a qure bei naŋgo qotei qa mergeqnu kio?”

Aposel 17:32

Pol a Atens qureq dia tamo uŋgasari naŋgi anjam degsi minjrnaqa naŋgi Yesus subq na tigelej anjam di qusibqa naŋgi qudei Pol kikiyeb. Ariya naŋgi qudei na Pol minjeb, “Anjam di bunuqna ni na olo mergim iga quqwom.”

Rom 16:17

O was qu, nuŋgo ambleq di tamo qudei naŋgi Qotei aqa anjam niŋgi nami qusib dauryeb qaji di gotraŋyoqnsib olo bulbulyoqnsib naŋgo kumbra dena naŋgi na Kristen tamo uŋgasari naŋgi potoaiyeltnjroqnsib uneq breinjreqnub. Deqa e niŋgi siŋgila na endegsi merŋgwai. Niŋgi tamo deqaji naŋgi qa geregere ŋam atoqniye. Osib naŋgi qoreinjroqniye.

1 Korin 10:12

Ariya tamo bei a endegsi are qalqas, “E siŋgila na tigelejunum.” Osim a geregere ŋam atem. A uloŋosim uneq aio uge.

1 Korin 8:9

Ariya niŋgi geregere are qaliye. Niŋgi qalie, niŋgi iŋgi bei uyqa are soqnim niŋgi uyiye. Di une sai. Ariya niŋgi iŋgi uyibqa tamo naŋgi powo bole osai qaji naŋgi niŋgi nuŋgsib dena uloŋosib uneq aiqab di niŋgi olo iŋgi di uyaib.

2 Korin 10:5

Areqalo uge uge ti gisaŋ anjam na ti tamo naŋgi Qotei qalieqajqa gam getentetnjreqnu deqa iga na olo gotraŋyeqnum. Osim iga tamo naŋgo areqalo kalil bulyetnjreqnam naŋgi Kristus aqa anjam dauryqajqa are qaleqnub.

Galesia 1:14

E ijo moma naŋgo kumbra kalil dauryqajqa tulaŋ siŋgilaoqnem. Ijo kumbra dena e na ijo kadoi naŋgi tulaŋ buŋnjroqnem. Ijo kadoi naŋgi agi Juda tamo naŋgi.

Galesia 4:3

Dego kere iga nami aŋgro kiñilala bul sosimqa bati deqa iga mondor uge uge mandam ti laŋ ti taqatejunub qaji naŋgo sorgomq di soqnem.

Galesia 4:9

Ariya bini niŋgi Qotei bole qalieonub. A niŋgi qa dego bole qalieqo. Deqa kiyaqa niŋgi olo puluosib mondor uge uge naŋgi daurnjrqajqa are qaleqnub? Kiyaqa niŋgi olo naŋgo kaŋgal tamo bul sqajqa are qaleqnub? Niŋgi qalie, mondor uge uge naŋgi dena niŋgi aqaryaiŋgwa keresai.

Galesia 5:15

Ariya niŋgi segi segi ŋiriŋoqnsib qotoqnaib. Qotoqnqab di niŋgi koba na uneq aisib padalqab.

Efesus 2:2

Bati deqa niŋgi mandam qa kumbra uge uge na walweloqneb. Niŋgi mondor uge uge laŋ goge di unub qaji naŋgo gate koba Satan aqa kumbra dauryoqneb. Satan a mondor uge siŋgila koba deqa a tamo naŋgi Qotei aqa anjam gotraŋyeqnub qaji naŋgo are miligiq di siŋgila na waueqnu.

Efesus 4:20

E are qalonum, niŋgi Kristus aqa anjam nami quoqneb. Agi anjam plalto tamo naŋgi na Yesus aqa anjam bole plaltosib merŋgoqneb. E qalie, naŋgi na niŋgi olo sawa bei bei qaji tamo naŋgo kumbra uge olo dauryqajqa deqa merŋgosaioqneb.

Efesus 5:6

Niŋgi geregere ŋam atiye. Tamo qudei naŋgi na niŋgi kumbra uge deqaji yqajqa titŋgoqnsib anjam laŋa laŋa merŋgoqnibqa niŋgi naŋgo anjam di qusib naŋgi daurnjraib. Tamo uŋgasari Qotei aqa anjam gotraŋyeqnub qaji naŋgi kumbra deqaji yeqnub deqa Qotei a naŋgi qa tulaŋ minjiŋ oqeteqnu.

Filipai 3:2

Niŋgi geregere ŋam atsib soqniye. Tamo qudei naŋgi bauŋ juwaŋ bul sosib kumbra uge uge yoqnsib laqnub. Tamo deqaji naŋgi Israel naŋgo kumbra dauryqajqa tulaŋ siŋgilaoqnsib deqa naŋgi na iga kalil muluŋ waigwajqa mareqnub. Naŋgo muluŋ di bolesai.

Kolosi 2:18

Tamo qudei naŋgi na niŋgi endegsib merŋgwab, “Niŋgi nuŋgo segi ñam tentoqnsib olo laŋ aŋgro naŋgi qa louoqniye. Iga ŋeiobilqei na kumbra di unsim deqa niŋgi degsi merŋgonum.” O was qu, niŋgi tamo di naŋgo anjam quetnjraib. Tamo deqaji naŋgi naŋgo areqalo namij dauryoqnsib endegsib mareqnub, “Iga powo bole ti unum.”

Kolosi 2:20

Niŋgi Kristus koba na moreŋeb deqa niŋgi mondor uge uge laŋ ti mandam ti taqatejunub qaji naŋgo sorgomq di sosai. Deqa kiyaqa niŋgi olo mandam tamo naŋgo kumbra dauryeqnub? Kiyaqa niŋgi naŋgo dal anjam dego dauryeqnub?

Kolosi 2:22

Dal anjam di jejamu qa iŋgi iŋgi qa anjam. Iga jejamu qa iŋgi iŋgi qa are qalsim wauqom di keresai. Iŋgi iŋgi di urur koboqab. Dal anjam di mandam tamo naŋgi na babtoqnsib iga dauryqa mergeqnub.

Kolosi 2:23

Bole, iga endegsi unobuleqnum. Dal anjam kalil dena gago are tigeltetgeqnu deqa iga Qotei qa bole louoqnsim gago segi are miligi tentoqnsim gago jejamu qaloqnsim siŋgilateqnum. Deqa tamo qudei naŋgi are qaleqnub, dal anjam kalil di areqalo bole ti powo ti babteqnu. Ariya degsi sosai. Niŋgi quiye. Dal anjam dena iga aqaryaigwa keresai. Iga dal anjam di dauryqom dena iga gago areqalo namij aqa kumbra uratqa keresai bolesai.

1 Timoti 6:20

O Timoti, Qotei na ni wau emej deqa ni wau di geregere taqatesoqne. Tamo qudei Qotei aqa areqalo dauryosai qaji naŋgi anjam uge uge mareleŋeqnub. Deqa ni naŋgo anjam di qoreiyosim naŋgi uratnjrsim isaq gile. Tamo naŋgi di mareqnub, “Iga powo bole ti unum.” Di gisaŋ. Naŋgi Qotei jeutoqnsib aqa areqalo dauryqa uratoqnsib anjam uge uge mareleŋeqnub.

2 Timoti 3:13

Tamo uge uge naŋgi ti gisaŋ tamo naŋgi ti brantoqnsib tamo uŋgasari naŋgi gisa gisaŋnjroqnqab. Deqa Satan a na kamba dego gisaŋ tamo naŋgi di gisa gisaŋnjroqnqas. Yim naŋgo kumbra di tulaŋ ugedamuqas.

Hibru 13:9

Deqa tamo qudei naŋgi bosib anjam utru segi segi na nuŋgo are tigeltetŋgibqa niŋgi naŋgo anjam di dauryaib. Osib Qotei aqa gam urataib. Qotei a iga qa are tulaŋ boleiyeqnu anjam dena iga gago are siŋgilatoqnqom. Tamo qudei naŋgo iŋgi uyo qa anjam mareqnub. Anjam di gisaŋ. Anjam di laŋa jejamu qa anjam. Deqa anjam dena iga gago are siŋgilatqa keresai. Tamo uŋgasari naŋgi iŋgi uyo qa anjam di dauryeqnub ariya kumbra dena naŋgi yala aqaryainjrosaieqnu.

Hibru 3:12

O was qu, niŋgi geregere ŋam atoqniye. Niŋgi ŋam atqasai di nuŋgo ambleq di was bei aqa areqalo ugeosim a Yesus qa aqa areqalo siŋgilatqa uratosim Qotei ŋambile gaigai unu qaji a qoreiyo uge.

1 Pita 1:18

Niŋgi qalie, nami niŋgi nuŋgo moma naŋgo kumbra uge uge dauryoqneb. Ariya Qotei a nuŋgo kumbra ugeq dena niŋgi olo awaiŋgej. Mandam qa ñoro ti gol ti silva ti koboqas qaji dena niŋgi awaiŋgosai.

2 Pita 3:17

O ijo was bole, niŋgi diŋo bati qa anjam di bole qalieonub deqa niŋgi geregere ŋam atoqniye. Niŋgi ŋam atqasai di dal anjam gotraŋyo qaji tamo naŋgi bosib niŋgi gisaŋgosib titŋgibqa niŋgi siŋgila na tigelesqa uratosib uloŋo uge.

2 Jon 1:8

Deqa niŋgi geregere ŋam atoqniye. Gago wau iga nami nuŋgo ambleq di yoqnem qaji di niŋgi olo urato uge. Niŋgi siŋgila na tigeloqniye. Osib di niŋgi awai bole oqab.