Kolosi 2:2 - Yesus Aqa Anjam Bole

² E nuŋgo are siŋgilatetŋgosiy nuŋgo areqalo tigeltetŋgitqa niŋgi na Qotei aqa segi tamo uŋgasari naŋgi tulaŋ qalaqalainjroqnsib naŋgi ti are qujaitosib sqajqa deqa are qaloqnsim waukobaeqnum. Ijo areqalo agiende. Niŋgi areqalo bole ti sosib dena niŋgi nuŋgo areqalo Kristus qa bole siŋgilatqab. Osib dena niŋgi Qotei aqa uli anjam aqa utru geregere qalieqab. Kristus a segi uli anjam di aqa utru.

Kolosi 2:2 ပူးပေါင်းရင်းမြစ်များ

Matyu 11:25

Bati deqa Yesus a endegsi Qotei pailyej, “O Abu, ni segi laŋ qa ti mandam qa ti Koba. Deqa e ni biŋimosim ino ñam soqtonum. Di kiyaqa? Ijo anjam e na tamo uŋgasari naŋgi minjreqnum qaji di ni na tamo powo ti unub qaji naŋgi qa ulitoqnsimqa tamo aŋgro du du bul naŋgi segi qa babteqnam naŋgi poinjreqnu.

Matyu 11:27

Yesus a degsi Qotei pailyej. Osiqa marej, “Ijo Abu na iŋgi iŋgi kalil ijo baŋq di ateleŋej unu. E Qotei aqa Ŋiri. Tamo bei a e qa qaliesai. Ijo Abu a segi e qa qalie. Tamo bei a ijo Abu qa qaliesai dego. E segi ijo Abu qa qalie. Ariya e na tamo qudei naŋgi ijo Abu osornjreqnum. Naŋgi dego ijo Abu qa qalie.

Matyu 13:11

Onaqa Yesus na kamba minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya Qotei na tamo uŋgasari naŋgi di yawo anjam aqa utru osornjrqasai.

Luk 1:1

O Tamo Koba Tiofilus, nami kumbra kalil Qotei a gago ambleq di yoqnej qaji di aqa wau tamo naŋgi unoqnsib iga saigoqneb. Deqa tamo gargekoba naŋgi qusib neŋgreŋyeleŋeb.

Jon 10:30

Aqo ijo Abu wo iga tamo qujai.”

Jon 10:38

Ariya e Qotei aqa wau yeqnum. Deqa niŋgi ijo anjam quib ugeiŋgim niŋgi ijo wau uniye. Unsib poiŋgwas, bole, e Qotei aqa Ŋiri. Osib dena niŋgi geregere qalieqab, ijo Abu na e beterbejunu. E na ijo Abu beteryejunum.”

Jon 16:15

Ijo Abu aqa iŋgi iŋgi kalil di ijo dego. Deqa e niŋgi merŋgonum, Qotei aqa Mondor a ijo anjam osim niŋgi merŋgoqnqas.”

Jon 17:3

Ŋambile gaigai sqajqa kumbra agiende. Tamo ŋambile gaigai sqab qaji naŋgi ni qa qalieqab. Agi ni segi Qotei bole. E Yesus Kristus qa dego naŋgi qalieqab. Agi ni na e qariŋbonam bem.

Jon 5:17

Onaqa Yesus a naŋgo anjam di qalieosiqa naŋgi minjrej, “Ijo Abu a nami gaigai wauoqnej agi bini wauoqnsi unu. Deqa e dego waueqnum.”

Jon 5:23

E wau di yeqnum deqa tamo kalil naŋgi ijo Abu aqa ñam soqteqnub dego kere naŋgi ijo ñam dego soqtetboqnqab. Di kiyaqa? E Qotei aqa Ŋiri deqa. Tamo naŋgi ijo ñam soqtosaieqnub qaji naŋgi ijo Abu e qariŋbej qaji aqa ñam dego soqtosaieqnub.

Jon 6:69

Iga ni qa gago areqalo siŋgilatosim endegsi qalieonum, Qotei aqa segi Tamo Bole a na nami giltej qaji agi ni qujai.”

Aposel 4:32

Bati deqa tamo uŋgasari Yesus qa naŋgo areqalo siŋgilateb qaji naŋgi kalil areqalo qujaitosib soqneb. Tamo bei na aqa iŋgi iŋgi saiaosiq aqa segi qa marosaioqnej. Naŋgo iŋgi iŋgi kalil di koba qaji degsib maroqnsib Yesus aqa tamo uŋgasari kalil naŋgi jeisib enjroqneb.

Rom 15:13

O was qu, Qotei a nami iŋgi bole bole di iga egwajqa marej deqa iga bini tariŋoqnsim unum. Niŋgi a qa nuŋgo areqalo siŋgilateqnub deqa a na nuŋgo are boletetŋgimqa niŋgi tulaŋ areboleboleiŋgim lawo na sqab. Yim Qotei aqa Mondor na niŋgi siŋgilatŋgimqa niŋgi iŋgi bole bole a na eŋgwa marej qaji deqa tariŋoqnsib sqab.

Rom 16:25

Qotei a siŋgila koba ti unu deqa a na niŋgi siŋgilatŋgwas. Yim niŋgi Yesus Kristus aqa anjam bole e na mare mare laqnum qaji di osib nuŋgo areqaloq di siŋgilatqab. O was qu, tulaŋ nami Kristus aqa anjam bole di uliesoqnej.

Rom 2:4

Ni que. Qotei a gaigai kumbra tulaŋ boledamu ni emoqnsiqa a ni qa tariŋsokobaiyeqnu. Deqa a urur ni awai uge emosaieqnu. Qotei aqa kumbra bole di ni unsim uge qa marsim gotraŋyqam e? Degaim. Ni are bulyqajqa deqa Qotei a ni qa are qaloqnsiq kumbra bole osormeqnu. Ni di qaliesai kio?

1 Korin 14:31

Niŋgi segi segi kalil kumbra di dauryosib Qotei aqa medabu oqnsib anjam palontoqniye. Palontoqnib Kristen tamo uŋgasari kalil naŋgi qusib qalie osib anjam dena naŋgo are siŋgilatetnjroqnqas.

1 Korin 2:12

O was qu, iga mandam qaji mondor osai. Iga Mondor Bole Qotei aqaq dena bej qaji di em. Deqa iŋgi iŋgi kalil Qotei na iga egeqnu qaji di Mondor na iga osorgeqnu deqa iga qalie.

Galesia 3:28

Deqa niŋgi endegsib maraib, “E Juda qaji” o “E Grik tamo” o “E kaŋgal tamo” o “E kaŋgal tamo sai.” o “E tamo” o “E uŋa”. Niŋgi degsib maraib. Niŋgi Kristus Yesus beteryejunub deqa niŋgi kalil tamo qujai bul unub.

Efesus 1:7

Qotei a iga qa are boleiyej aqa kumbra di tulaŋ kobaquja. Aqa kumbra di aqa utru agiende. A na Kristus qariŋyonaqa a iga awaigwa marsiqa moiej. Moisiqa aqa leŋ aiej dena Qotei na gago une kalil kobotetgej.

Efesus 3:16

Deqa e siŋga pulutoqnsim niŋgi qa endegsi Qotei pailyeqnum, “O Abu, ni iŋgi bole bole Efesus naŋgi gereiyetnjrem deqa ni na ino Mondor naŋgo are miligiq di atim soqnim dena naŋgi tulaŋ siŋgilaqab.

Efesus 3:3

Qotei aqa anjam di nami ulitesoqnej. Ariya a na olo boleq atsiqa e osorbej. Agi e deqa anjam truquyala endego neŋgreŋyonum.

Efesus 6:22

E na a qariŋyonum niŋgi qa bqo. Iga kiersim unum di a na niŋgi merŋgwas. Osim nuŋgo are siŋgilatetŋgwas.

Filipai 2:1

Kristus a na nuŋgo are siŋgilatetŋgeqnu e? A na niŋgi qalaqalaiŋgoqnsiqa nuŋgo are latetŋgeqnu e? Qotei aqa Mondor a na niŋgi beterŋgejunu e? Niŋgi nuŋgo was naŋgi qa are boleiŋgeqnaqa naŋgi qa duleqnub e?

Filipai 3:8

E Juda naŋgo kumbra uratqa segi marosai. E mandam qa kumbra kalil dego uratqa maronum. E ijo Tamo Koba Kristus Yesus qa bole qalieonum. Ijo qalie di tulaŋ bolequja e degsi unonum. Deqa e qalieonum, mandam qa kumbra kalil di qalam jiri bul. Deqa e Kristus segi dauryqajqa are unu. E mandam qa kumbra kalil di uratekritosiy Kristus segi ojqai.

Kolosi 1:26

Tulaŋ nami Qotei aqa anjam di ulitesoqnej. Deqa tamo uŋgasari kalil naŋgi aqa anjam di qalieosaisoqneb. Uliesosiq bosi bosiq ariya bini Qotei na aqa anjam di olo boleq atnaqa aqa segi tamo uŋgasari naŋgi qusib poinjrej.

Kolosi 1:27

Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

Kolosi 1:9

Iga nuŋgo kumbra bole deqa qusimqa bati deqa iga niŋgi qa pailyqa osim utru atem. Deqa bini iga gaigai niŋgi qa Qotei pailyoqnsim unum. Iga endegsi pailyeqnum, “O Abu, ni na Kolosi Kristen naŋgi aqaryainjrimqa naŋgi ino areqalo geregere poinjrqas. Yimqa ino Mondor na naŋgi powo enjroqnimqa naŋgi ino anjam kalil geregere qalieosib dauryoqnqab.

Kolosi 2:19

Tamo deqaji naŋgi Kristus beteryosaieqnub. Ariya Kristus a gago gate. Iga aqa jejamu qujai. Iga aqa siŋga ti baŋ ti bul. A na iga siŋgilatgeqnu deqa iga kalil jejamu qujaiq di turtejunum. Qotei aqa siŋgila na iga boleoqnsim siŋgilaeqnum.

Kolosi 3:14

Osib niŋgi qalaqalaiyo kumbra yoqniye. Qalaqalaiyo kumbra a na kumbra kalil tulaŋ buŋnjreqnu. Osiqa kumbra bole kalil dego siŋgilatoqnsiq iga Kristen tamo uŋgasari kalil iga turtgeqnu. Deqa iga kalil areqalo qujaitoqnsim qalaqalaiyo kumbra dauryoqnsim sqom.

Kolosi 4:3

Niŋgi iga qa dego Qotei pailyoqniye. Niŋgi endegsib pailyoqniye, “O Abu, ni na Pol aqa wau qujai naŋgi ti gam waqtetnjroqnimqa naŋgi medabu waqtoqnsib Kristus aqa anjam nami uliesoqnej qaji di marsib laqnqab.” O was qu, jeu tamo naŋgi Kristus aqa anjam di quqwa asginjreqnu deqa naŋgi e ojsib tonto talq endia waibeb unum.

Kolosi 4:8

E na a qariŋyonum niŋgi qa bqo. Di kiyaqa? Iga kiersi unum di a na niŋgi saiŋgim niŋgi qusib dena nuŋgo are siŋgilatqab.

1 Tesalonaika 1:5

Iga nami Kristus aqa anjam bole nuŋgoq osi bem. Iga laŋa anjam maro na osi bosai. Iga Qotei aqa siŋgila na ti aqa Mondor Bole aqa kumbra na ti osi bem. Bati deqa iga gago areqalo Kristus qa siŋgilatonamqa niŋgi di uneb. Iga nuŋgo ambleq di sosimqa niŋgi aqaryaiŋgoqnem. Gago kumbra di niŋgi segi qalie.

1 Tesalonaika 3:2

Marsimqa Timoti qariŋyonam niŋgi qa bej. Timoti a gago Kristen was bole. A Qotei aqa wau tamo. A Kristus aqa anjam bole maro qaji tamo. Iga na a qariŋyonam niŋgi qa bej. A na niŋgi aqaryaiŋgosim nuŋgo areqalo Yesus qa siŋgilateqnub qaji di olo siŋgilatetŋgwajqa deqa marsim a qariŋyonam niŋgi qa bej.

1 Tesalonaika 5:14

O was qu, iga na nuŋgo are tigeltetŋgimqa niŋgi na tamo naŋgi wauqajqa asginjreqnu qaji naŋgo kumbra olo tingi-tetnjroqniye. Osib tamo naŋgi ulaeqnub qaji naŋgo are siŋgila-tetnjroqniye. Osib tamo siŋgila saiqoji unub qaji naŋgi olo aqaryainjroqniye. Osib tamo kalil naŋgi lawo na geregereinjroq-niye.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

Hibru 10:22

A na aqa segi leŋ bilentonaqa gago are miligiq aiej. A gago kumbra uge kalil qa are qalsiqa gago une kobotetgej. Deqa iga qalieonum, iga Qotei aqa ŋamgalaq di une saiqoji unum. A gago jejamu ya na yansetgej deqa kumbra gisaŋ kalil gago are miligiq di unu qaji di iga taqal waiyqom. Osim Qotei qa gago areqalo siŋgilatosim aqa areq giloqnqom. Utru deqa Yesus a na aqa segi leŋ bilentonaqa gago are miligiq aiej.

Hibru 6:11

Ariya gago areqalo agiende. Niŋgi kalil degsib siŋgila na wauoqniye. Osib mondoŋ Qotei na niŋgi olo boletŋgwajqa deqa tariŋoqnsib soqniye.

2 Pita 1:10

O was qu, Qotei a nami niŋgi giltŋgosiq metŋgej deqa niŋgi aqa segi tamo tiŋtiŋ sqajqa siŋgilaoqniye. Niŋgi degyqab di niŋgi uloŋqa keresai.

2 Pita 1:3

Yesus Kristus a segi Qotei. A siŋgila koba ti unu. Aqa siŋgila dena a na gago ŋambile siŋgilatetgwajqa deqa marsiq iŋgi iŋgi tulaŋ boledamu iga egej. Aqa kumbra dena a na iga aqaryaigej deqa iga Qotei aqa kumbra geregere dauryeqnum. Iga Kristus qa bole qalieonum deqa iga kumbra degyeqnum. Aqa segi ñam koba na ti aqa siŋgila na ti aqa kumbra bole na ti a na iga metgej.

2 Pita 3:18

Gago Tamo Koba Yesus Kristus agi iga eleŋej qaji a niŋgi qa are boleiyeqnu. Niŋgi a qa bole qalieonub. Ariya a niŋgi qa are boleiyeqnu aqa kumbra dena niŋgi olo siŋgilatŋgimqa niŋgi aqaq dena qalie koba oqniye. Kristus a ñam koba ti unu deqa iga bini bati endeqa aqa ñam soqtoqnqom. Osim bati gaigai aqa ñam soqtoqnsim sqom. Bole.

1 Jon 3:19

Iga na tamo uŋgasari naŋgi qalaqalainjroqnqom di iga endegsi qalieqom, iga anjam bole dauryeqnum. Deqa iga gago une bei qa are gulubeigimqa uŋgum iga Qotei aqa ulatamuq di are lawo na sqom. Di kiyaqa? Qotei a iŋgi iŋgi kalil qa qalieqo. Aqa qalie dena gago are tulaŋ buŋyejunu.

1 Jon 5:7

Tamo qalub naŋgi Yesus aqa kumbra qa anjam palonteqnub.