Kolosi 2:19 - Yesus Aqa Anjam Bole

¹⁹ Tamo deqaji naŋgi Kristus beteryosaieqnub. Ariya Kristus a gago gate. Iga aqa jejamu qujai. Iga aqa siŋga ti baŋ ti bul. A na iga siŋgilatgeqnu deqa iga kalil jejamu qujaiq di turtejunum. Qotei aqa siŋgila na iga boleoqnsim siŋgilaeqnum.

Kolosi 2:19 ပူးပေါင်းရင်းမြစ်များ

Luk 5:38

Ariya a ya nobu kaja aqa jegara na gereiyo qaji bunujq di wain bunuj qamimqa ombla bole sqab.

Jon 17:21

O Abu, ni ijoq di unum. E dego inoq di unum. Aqo aiyel are qujaitosim unum. Ijo segi tamo uŋgasari kalil naŋgi dego aqo aiyel koba na are qujaitosib sqajqa deqa e ni pailmonum. Soqnibqa mandam endeqa tamo uŋgasari naŋgi na unjrsibqa naŋgi dego e qa naŋgo areqalo siŋgilatqab. Osib qalieqab, ni na e qariŋbonam bem.

Aposel 4:32

Bati deqa tamo uŋgasari Yesus qa naŋgo areqalo siŋgilateb qaji naŋgi kalil areqalo qujaitosib soqneb. Tamo bei na aqa iŋgi iŋgi saiaosiq aqa segi qa marosaioqnej. Naŋgo iŋgi iŋgi kalil di koba qaji degsib maroqnsib Yesus aqa tamo uŋgasari kalil naŋgi jeisib enjroqneb.

Rom 11:17

Israel naŋgi ŋamtaŋ oliv qure qaji di bul. Dani qudei Qotei na giŋgeŋnjrsiqa breinjrej. Ariya niŋgi sawa bei bei qaji tamo niŋgi nañu qaji oliv aqa dani bul. Dani di Qotei na olo eleŋosiqa ŋamtaŋ oliv qure qaji di aqa qoboq di beterteleŋej unub. Dani di agi niŋgi segi. Dani Qotei na giŋgeŋnjrsiq breinjrej qaji naŋgo sawa di agi niŋgi na olo eb. Deqa bini niŋgi ŋamtaŋ oliv qure qaji aqa dani naŋgi ti namur bole oqnsib unub.

1 Korin 1:10

Ariya was qu, e gago Tamo Koba Yesus Kristus aqa ñam na niŋgi siŋgila na endegsi merŋgwai. Niŋgi kalil areqalo qujaitosib anjam qujai maroqniye. Niŋgi anjam bei bei qa ŋiriŋosib pupoaib. Niŋgi areqalo qujai ti sosib koba na geregere soqniye.

1 Korin 11:3

Ariya niŋgi ijo anjam bei dego qusib poiŋgem. Tamo kalil naŋgo gate agi Kristus. Uŋa naŋgo gate agi naŋgo tamo naŋgi. Ariya Kristus aqa gate di Qotei.

1 Korin 3:6

E wauq di iŋgi yagem. Apolos a na wau taqatoqnej. Ariya Qotei a segi na iŋgi boleteqnu.

Efesus 1:22

Qotei na iŋgi iŋgi kalil osiqa Kristus aqa sorgomq di atej unub. Deqa a iŋgi iŋgi kalil di naŋgo gate koba unu. Siŋgila dena a Qotei aqa segi tamo uŋgasari naŋgo gate koba sosiqa naŋgi taqatnjreqnu.

Efesus 1:23

Qotei aqa segi tamo uŋgasari naŋgi Kristus aqa jejamu qujai. Kristus a na iŋgi iŋgi kalil ekritosiq tulaŋ keretejunu. Deqa a na Qotei aqa segi tamo uŋgasari naŋgi dego osiq tulaŋ keretnjrejunu.

Efesus 2:21

Tal di aqa tanu kalil naŋgi Kristus beteryejunub deqa naŋgi kalil koba na siŋgila na tigelejunub. Qotei a na tal di gereiyoqnsiq unu. Deqa tal di kobaqujaoqnsiqa Tamo Koba Qotei aqa segi tal bul tigelejunu.

Efesus 4:3

Osib niŋgi nuŋgo Kristen was kalil naŋgi koba na are qujaitosib lawo na sqajqa siŋgilaoqniye. Kumbra di agi Qotei aqa Mondor na iga osorgeqnu.

Efesus 5:29

Iga qalie, tamo naŋgi naŋgo segi jejamu jeutosaieqnub. Naŋgi naŋgo jejamu iŋgi bole anaiyoqnsib geregereiyeqnub. Kristus a na aqa segi tamo uŋgasari naŋgi geregereinjreqnu dego kere.

Filipai 1:27

Ijo anjam kobaquja bei agiende. Niŋgi Kristus aqa anjam bole di geregere dauryosib walweloqniye. Yim e olo niŋgi qa bosiy nuŋgwai kio endi sosiy niŋgi qa anjam laŋa quqwai kio di uŋgum, e qalieqai, niŋgi siŋgila na tigeloqnsib areqalo qujai na wauoqnsib tamo uŋgasari naŋgo are tigeltetnjreqnabqa naŋgi Kristus aqa anjam bole quoqnsib naŋgo areqaloq di siŋgilateqnub.

Kolosi 1:10

Osib naŋgo walwel ti naŋgo kumbra ti Tamo Koba Yesus aqa walwel ti aqa kumbra ti keretqab. Yim deqa ni naŋgo kumbra kalil qa tulaŋ areboleboleimoqnqas. O Abu, ni na Kolosi Kristen naŋgi aqaryainjroqnim naŋgi kumbra bole bole degsib yoqnsib ni qa geregere qalieoqnib naŋgo qalie di tulaŋ kobaoqnqas.”

Kolosi 1:18

Yesus a Kristen tamo uŋgasari naŋgo gate. Naŋgi aqa jejamu bul. A naŋgo ŋambile qa utru. A tamo kalil naŋgi qa namoosiq subq na tigelej. Deqa a segi qujai iŋgi iŋgi kalil naŋgo gate.

Kolosi 2:2

E nuŋgo are siŋgilatetŋgosiy nuŋgo areqalo tigeltetŋgitqa niŋgi na Qotei aqa segi tamo uŋgasari naŋgi tulaŋ qalaqalainjroqnsib naŋgi ti are qujaitosib sqajqa deqa are qaloqnsim waukobaeqnum. Ijo areqalo agiende. Niŋgi areqalo bole ti sosib dena niŋgi nuŋgo areqalo Kristus qa bole siŋgilatqab. Osib dena niŋgi Qotei aqa uli anjam aqa utru geregere qalieqab. Kristus a segi uli anjam di aqa utru.

1 Tesalonaika 3:12

Gago areqalo bei dego agiende. Tamo Koba Qotei a na niŋgi siŋgilatŋgimqa qalaqalaiyo kumbra nuŋgoq di tulaŋ kobaamqa niŋgi na Qotei aqa segi tamo uŋgasari naŋgi ti tamo kalil naŋgi ti tulaŋ qalaqalainjroqnqab. Agi iga na niŋgi tulaŋ qalaqalaiŋgeqnum dego kere.

1 Tesalonaika 4:10

Agi niŋgi na Kristen tamo uŋgasari Masedonia sawaq di unub qaji naŋgi qalaqala-injreqnub. Ariya was qu, iga na nuŋgo are siŋgilatetŋgimqa niŋgi qalaqalaiyo kumbra di olo torei siŋgilatosib yoqniye.

2 Tesalonaika 1:3

O was qu, iga gaigai niŋgi qa are qaloqnsim deqa Qotei biŋiyeqnum. Iga kere degyeqnum. Di kiyaqa? Nuŋgo areqalo Yesus qa siŋgilateqnub qaji di tulaŋ kobaqujaeqnu. Niŋgi segi segi na nuŋgo Kristen was qu naŋgi qalaqalainjreqnub. Nuŋgo kumbra di dego tulaŋ kobaqujaeqnu.

1 Pita 3:8

Ariya e na ijo anjam endi kobotqa osiy niŋgi endegsi merŋgwai. Niŋgi kalil koba na geregere are qujaitosib soqniye. Sosibqa tamo kalil naŋgi qa duloqnsib Qotei aqa tamo uŋgasari naŋgi dego qalaqalainjroqnsib naŋgi qa are boleiŋgoqneme. Osib nuŋgo segi ñam aguq atoqniye.

2 Pita 3:18

Gago Tamo Koba Yesus Kristus agi iga eleŋej qaji a niŋgi qa are boleiyeqnu. Niŋgi a qa bole qalieonub. Ariya a niŋgi qa are boleiyeqnu aqa kumbra dena niŋgi olo siŋgilatŋgimqa niŋgi aqaq dena qalie koba oqniye. Kristus a ñam koba ti unu deqa iga bini bati endeqa aqa ñam soqtoqnqom. Osim bati gaigai aqa ñam soqtoqnsim sqom. Bole.