Kolosi 1:28 - Yesus Aqa Anjam Bole

²⁸ Kristus aqa anjam bole di iga na tamo kalil naŋgi minjreqnum. Iga areqalo bole ti powo ti sosim deqa iga na anjam di siŋgila na minjreqnum. Di kiyaqa? Naŋgi gago anjam di qusib Kristen tamo tulaŋ boledamu brantib iga na naŋgi joqsim Qotei aqa areq di atqajqa deqa.

Kolosi 1:28 ပူးပေါင်းရင်းမြစ်များ

Matyu 28:20

O ijo aŋgro, anjam kalil e nami niŋgi merŋgoqnem qaji di niŋgi walwelosib tamo uŋgasari naŋgi minjroqnsib laqniye. Laqnibqa naŋgi quoqnsib dauryoqnqab. Niŋgi segi sosib wauoqnqab edegaib. E bati gaigai niŋgi koba na wauoqnsiy sqai. Degsim soqnim soqnim diŋo bati brantqas.”

Matyu 3:7

Bati deqa Farisi tamo ti Sadyusi tamo ti tulaŋ gargekoba naŋgi Jon na yansnjrqa marsibqa aqa areq beqnabqa unjrsiqa naŋgi endegsi minjroqnej, “Niŋgi amal uge bul. Qotei a niŋgi qa minjiŋ ani oqetqo deqa a na niŋgi ŋolawotŋgwas. Yai na niŋgi merŋgwoqa Qotei aqa minjiŋ nuŋgoq aiaim deqa ulaosib ijoq bonub?

Matyu 5:48

Nuŋgo Abu laŋ qureq di unu qaji a gaigai kumbra bole tiŋtiŋ keretsiq yeqnu dego kere niŋgi nuŋgo Abu aqa kumbra di dauryosib kumbra bole tiŋtiŋ keretsib yoqniye.”

Mak 6:34

Onaqa Yesus a qobuŋ na gilsiq tiryosiqa ŋam atej tamo uŋgasari tulaŋ gargekoba nami tiryqa sawaq dia tariŋesonab unjrej. Naŋgi kaja bul mandor saiqoji. Deqa Yesus a naŋgi qa are ugeiyej. Osiqa naŋgo areq aisiqa Qotei aqa anjam gargekoba minjroqnej.

Luk 21:15

Di kiyaqa? E segi na nuŋgo medabu siŋgilatetŋgsiy areqalo eŋgitqa niŋgi kamba anjam minjroqnqab. Minjroqnibqa naŋgi na anjam bei nuŋgo jejamuq di qametŋgwa yoqnib ugeinjroqnqas.

Aposel 10:36

Bole, nami Qotei na aqa anjam bole qariŋyonaqa Israel naŋgo segiq aiej. Anjam di aqa damu endegsi unu. Tamo uŋgasari naŋgi Qotei ti jeu sonabqa Yesus Kristus na jeu kobotej. Yesus a tamo kalil naŋgo Tamo Koba.

Aposel 11:20

Ariya naŋgo ambleq di Saiprus qaji tamo qudei ti Sairini qaji tamo qudei ti soqneb. Naŋgi Antiok qureq aisib dia Grik tamo naŋgi dego Tamo Koba Yesus aqa anjam bole plaltosib minjroqneb.

Aposel 13:38

O ijo was, niŋgi geregere poiŋgem. Yesus qujai di aqa ñam na Qotei a nuŋgo une kobotetŋgwas. Iga Yesus qujai deqa anjam plaltoqnsim niŋgi merŋgeqnum.

Aposel 17:18

Bati bei Grik naŋgo qalie tamo Atens qureq di soqneb qaji naŋgi Pol ombla anjam na qoteb. Naŋgi qudei qalie tamo koba Epikurias aqa skulq dena qalie eb. Naŋgi qudei skul bei aqa ñam Stoik dena qalie eb. Pol a na naŋgi endegsi minjroqnej, “Yesus a moisiq olo subq na tigelej. Deqa mondoŋ tamo kalil naŋgi dego subq na olo tigelqab.” Pol a na naŋgi degsi minjroqnej deqa naŋgi Pol ombla anjam na qotoqnsib segi segi maroqneb, “Pol a anjam laŋa laŋa mareqnu. A anjam kie mergwajqa bqo?” Ariya tamo qudei naŋgi endegsib maroqneb, “Pol a qure bei naŋgo qotei qa mergeqnu kio?”

Aposel 17:3

Pol a na anjam aqa utru geregere plaltosiq endegsi minjroqnej, “Kristus a jaqatiŋ koba osim moiqas. Moisim olo subq na tigelqas. Qotei aqa anjam nami degsib neŋgreŋyeb unu.” Osiqa minjroqnej, “Yesus agi e niŋgi a qa merŋgeqnum qaji a bole Kristus Qotei na qariŋyej qaji.”

Aposel 20:31

Deqa niŋgi geregere ŋam atsib sosibqa ijo kumbra e bati gaigai nuŋgo ambleq di yoqnem qaji deqa are qalsib dauryoqniye. Agi wausau qalub e niŋgi koba na sosimqa niŋgi padalaib deqa qolo ti qanam ti Qotei aqa anjam niŋgi merŋgoqnsim akamoqnem. E wau di uratosaioqnem. Niŋgi ijo kumbra deqa geregere are qalsib dauryoqniye.

Aposel 3:20

Amqa Tamo Koba Qotei a na niŋgi siŋgilatŋgimqa niŋgi kalil arebolebole ti lawo na sqab. Mondoŋ a na Yesus qariŋyim nuŋgoq bqas. Tamo di agi Yesus Kristus Qotei na nami giltej qaji.

Aposel 5:42

Naŋgi Yesus aqa anjam mare mare laqajqa uratosaioqneb. Naŋgi bati gaigai Yesus aqa anjam plaltoqnsib maroqneb. Atra tal miligiq dia, tamo uŋgasari naŋgo segi segi talq dia naŋgi anjam endegsib minjroqneb, “Yesus a bole Kristus Qotei na qariŋyej qaji.”

Aposel 8:35

Onaqa Filip na minjej, “A Yesus qa neŋgreŋyej.” Osiqa anjam dena utru atsiq Qotei aqa anjam qudei ti turtosiq Yesus qa saiyoqnej.

Aposel 8:5

Filip a dego gilsiqa Samaria qureq dia tamo uŋgasari naŋgi Kristus aqa anjam minjroqnej.

Rom 16:25

Qotei a siŋgila koba ti unu deqa a na niŋgi siŋgilatŋgwas. Yim niŋgi Yesus Kristus aqa anjam bole e na mare mare laqnum qaji di osib nuŋgo areqaloq di siŋgilatqab. O was qu, tulaŋ nami Kristus aqa anjam bole di uliesoqnej.

1 Korin 1:23

Ariya Kristus a ŋamburbasq di moiej anjam di iga palontsim laqnam Juda naŋgi quoqnsib gisaŋ qa mareqnub. Grik naŋgi dego anjam di quoqnsib nanari qa mareqnub.

1 Korin 1:30

Qotei a segi na niŋgi eleŋosiqa Kristus Yesus aqa baŋq di atej unub. Deqa Kristus aqa wau na iga Qotei aqa areqalo bole ti aqa powo ti unum. Aqa wau na iga tamo bole tiŋtiŋo unum. Aqa wau na iga Qotei aqa segi kumbra boleq di sosim walweleqnum. Aqa wau na Qotei na iga gago uneq dena olo awaigej deqa gago une na iga olo taqatgosai.

1 Korin 12:8

Qotei aqa Mondor na tamo qudei naŋgi siŋgila enjreqnu deqa naŋgi areqalo bole babtoqnsib tamo uŋgasari naŋgi minjreqnub. Mondor qujai dena tamo qudei naŋgi siŋgila enjreqnaqa naŋgi Qotei aqa qalie bole babtoqnsib tamo uŋgasari naŋgi osornjreqnub.

1 Korin 15:12

Kristus a moinaqa Qotei na olo subq na tigeltej anjam di iga gaigai palontosim laqnum. Ariya kiyaqa niŋgi qudei mareqnub, “Tamo moreŋeb qaji naŋgi olo subq na tigelqasai”?

1 Korin 2:15

Deqa tamo naŋgi Qotei aqa Mondor ti unub qaji naŋgi laŋ qaji iŋgi iŋgi kalil geregere pegiyeqnub. Ariya tamo bei na naŋgo kumbra pegiyqa keresai.

1 Korin 2:6

Bole, tamo naŋgi Qotei aqa kumbra qa tulaŋ siŋgilaeqnub qaji naŋgi iga na anjam minjreqnam quoqnsib dena naŋgi powo bole ejunub. Ariya powo di mandam qaji tamo naŋgo powo sai. Powo di mandam qaji tamo kokba padalqa gamq di unub qaji naŋgo powo sai.

1 Korin 4:14

O was qu, niŋgi ijo anjam endi sisiyosib jemaiŋgwajqa e deqa neŋgreŋyosai. E nuŋgo areqalo tingitetŋgwajqa deqa osim anjam endi neŋgreŋyonum. Niŋgi ijo aŋgro bole. E niŋgi tulaŋ qalaqalaiŋgeqnum.

2 Korin 10:14

Deqa bati iga Qotei aqa anjam niŋgi merŋgoqnem bati di iga wau Qotei na egej qaji di buŋyosai. Agi iga namoqna niŋgi qa bosim Kristus aqa anjam bole niŋgi merŋgoqnem.

2 Korin 11:2

Qotei aqa tamo uŋgasari naŋgi a segi qujai tulaŋ qalaqalaiyoqnsib aqa sorgomq di sqajqa deqa a tulaŋ siŋgilaeqnu. Dego kere e dego niŋgi Kristus dauryqajqa tulaŋ siŋgilaeqnum. E segi nami niŋgi osim Kristus yonam a na niŋgi eleŋej. Deqa tamo bei na aqa duŋge nami tamo bei wo anjamosai qaji di osim tamo qujai yim a na oqas dego kere mondoŋ e niŋgi olo osiy Kristus yitqa a na niŋgi torei oqas.

2 Korin 4:5

Niŋgi quiye. Iga gago segi kumbra qa marosaieqnum. Iga endegsi mareqnum, “Kristus Yesus a gago Tamo Koba. Iga Yesus aqa anjam dauryeqnum deqa iga nuŋgo wau tamo unum.” Iga degsi segi mareqnum.

Efesus 3:8

Qotei aqa tamo uŋgasari kalil naŋgi na e tulaŋ buŋbejunub. Ariya Qotei a e qa are boleiyosiq wau ebej. E na sawa bei bei qaji tamo naŋgi Kristus aqa anjam bole minjre minjre laqajqa deqa osiq e wau ebej. Anjam bole di aqa utru agiende. Kristus na iga laŋ qaji iŋgi bole bole egeqnu. Iŋgi bole bole di aqa utru iga na ubtsim marqa keresai.

Efesus 5:27

Kristus aqa areqalo agiende. A na aqa segi tamo uŋgasari naŋgi yansnjrimqa naŋgi aqa ŋamgalaq di tulaŋ boledamu soqnib jiga bei naŋgoq di sqasai. Naŋgi aqa segi kumbra boleq di sosib une saiqoji sqab. Utru deqa a naŋgi qa moiej.

Kolosi 1:22

Ariya bunuqna Yesus a ŋamburbasq di moiej aqa kumbra dena Qotei na jeu kobotosiqa niŋgi olo eleŋej. A degyej. Di kiyaqa? A na niŋgi aqa areq joqsim bamqa niŋgi aqa segi kumbra boleq di sosib aqa ŋamgalaq di tamo tiŋtiŋo une saiqoji sqajqa deqa.

Kolosi 2:10

Iŋgi iŋgi kalil siŋgila ti unub qaji naŋgo gate koba agi Kristus a segi. Niŋgi Kristus aqa segi tamo uŋgasari unub deqa Qotei na niŋgi ŋambile eŋgej. Ŋambile di nuŋgoq di tulaŋ keretsiq maqejunu.

Kolosi 2:3

Qalie ti powo ti kalil di Kristus aqaq di uliejunu.

Kolosi 3:16

Osib niŋgi Kristus aqa anjam osib nuŋgo are miligiq di siŋgilatib soqnem. Osib niŋgi na nuŋgo Kristen was qu naŋgi areqalo bole ti powo ti osornjroqniye. Yim naŋgi kumbra bole bole yoqnqajqa deqa. Niŋgi nuŋgo are miligiq di Qotei biŋiyoqnsib a qa louoqniye. Lou qudei neŋgreŋq di unu qaji dena ti lou qudei Qotei aqa Mondor na nuŋgo are miligiq di ateqnu qaji dena ti niŋgi Qotei qa louoqniye.

Kolosi 4:12

Epafras a na dego niŋgi kaiyeiŋgwo. A nuŋgo leŋ. A Kristus Yesus aqa wau tamo. A gaigai siŋgila na niŋgi qa endegsi Qotei pailyeqnu, “O Abu, ni na Kolosi Kristen naŋgi aqaryainjrimqa naŋgi siŋgila na tigeloqnsib naŋgi Kristen tamo tulaŋ boledamu sosib ino kumbra bole keretosib ino areqalo kalil geregere qalieqab.”

1 Tesalonaika 4:6

Niŋgi na Kristen was qu naŋgi kumbra uge bei enjraib. Osib naŋgi gisaŋnjrsib naŋgo ŋauŋ ugetnjraib. Tamo Koba Qotei a na tamo naŋgi kumbra deqaji yeqnub qaji naŋgi awai uge enjrqas. Iga nami niŋgi siŋgila na degsi merŋgoqnem.

1 Timoti 3:16

Iga bole qalieonum, Qotei aqa kumbra nami ulitesoqnej qaji di tulaŋ kobaquja. Kumbra di Qotei na iga osorgonaq unem. Aqa kumbra di agiende. A segi tamo bulyonaqa tamo uŋgasari naŋgi a unoqneb. Mondor Bole a na aqa kumbra bole babtosiq osorgej. Osiq mergej, “Aqa kumbra di tulaŋ tiŋtiŋo.” Laŋ aŋgro naŋgi dego a unoqneb. Tamo naŋgi sawa bei beiq giloqnsibqa aqa anjam mare mare laqneb. Deqa tamo uŋgasari mandamq endi unub qaji naŋgi a qa naŋgo areqalo siŋgilatoqneb. Ariya Qotei na a olo osiq laŋ qureq osi oqnaqa a dia ñam kobaquja osiq unu.

1 Timoti 3:2

Deqa ni unime. Tamo bei a Kristen naŋgo gate sqajqa marsimqa a kumbra tiŋtiŋ segi dauryoqnem. Yim tamo naŋgi aqa jejamuq di une bei unqasai. Tamo di a uŋa aiyeltaiq. A uŋa qujai segi esoqnem. Osim aqa segi so geregere taqatosim areqalo bole ti sosim kumbra bole bole yoqnem. Tamo laŋaj naŋgi aqa meq boqnibqa oqnsim geregereinjroqnem. A Qotei aqa anjam palontqajqa wau geregere poiyim anjam palontoqnem.

Hibru 10:14

Yesus a bati qujai qa aqa segi jejamu osiqa Qotei atraiyej. Wau dena a na Qotei aqa segi tamo uŋgasari boledamu nami giltnjrej qaji naŋgi torei boletnjrej. Deqa naŋgi bati gaigai une saiqoji sqab.

Hibru 13:21

Qotei qujai di a na niŋgi siŋgilatŋgoqnimqa niŋgi aqa areqalo geregere dauryosib kumbra bole bole yoqniye. A gago are miligiq di wauoqnimqa iga Yesus Kristus aqa wau na kumbra kalil a tulaŋ areareteqnu qaji di yoqnsim sqom. Iga kalil bati gaigai aqa ñam soqtoqnqom. Bole.

2 Pita 3:15

Tamo Koba Yesus a jiŋga na iga qa tariŋeqnu. Deqa niŋgi endegsi poiŋgem. Yesus a na iga eleŋqajqa deqa iga qa tariŋeqnu. Qotei a na gago was bole Pol powo yonaqa a dego anjam deqaji neŋgreŋyoqnsiq niŋgi qa qariŋyoqnej.