Kolosi 1:27 - Yesus Aqa Anjam Bole

²⁷ Qotei aqa segi areqalo na uli anjam di boleq atsiqa iga aqa segi tamo uŋgasari iga osorgej. Yim iga endegsi poigwajqa, Qotei aqa uli anjam di tulaŋ boledamu. Anjam dena Qotei na tamo uŋgasari kalil sawa bei beiq di unub qaji naŋgi aqaryainjrqas. Uli anjam di aqa damu agiende. Kristus a nuŋgo ambleq di unu. A na niŋgi eleŋosim laŋ qureq osi oqimqa dia niŋgi aqa iŋgi bole bole oqab.

Kolosi 1:27 ပူးပေါင်းရင်းမြစ်များ

Matyu 13:11

Onaqa Yesus na kamba minjrej, “Qotei a tamo uŋgasari naŋgo Mandor Koba sosiq naŋgi taqatnjreqnu. Anjam di aqa utru uliejunu. Di e na babtitqa ijo aŋgro niŋgi segi utru qalieqab. Ariya Qotei na tamo uŋgasari naŋgi di yawo anjam aqa utru osornjrqasai.

Luk 17:21

Tamo bei na bosim endegsi merŋgwasai, ‘Niŋgi uniye, Qotei na iga taqatgwa bqo agiende,’ o ‘Qotei bqo agide.’ Degyqasai. Niŋgi quiye. Qotei a nami bosiq nuŋgo ambleq endi Mandor Koba sosiq niŋgi taqatŋgeqnu.”

Jon 14:17

Aqaryaiŋgo tamo di a anjam bole qa Mondor. Tamo uŋgasari mandamq endi unub qaji naŋgi Mondor di oqa keresai. Naŋgi a unosaieqnub. Naŋgi a qa qaliesai dego. Ariya niŋgi a qa qalie. A niŋgi koba na unub. Bunuqna a bosim nuŋgo are miligiq di sqas.

Jon 14:20

Sosib bati deqa niŋgi endegsib qalieqab, e na ijo Abu beteryejunum. Niŋgi na e beterbejunub. E na niŋgi beterŋgejunum.

Jon 14:23

Onaqa Yesus na kamba minjej, “Tamo bei na e tulaŋ qalaqalaibqas di a ijo anjam dauryoqnqas. Yimqa ijo Abu na kamba tamo di qalaqalaiyimqa aqo ijo Abu wo aqaq bosim a ombla gaigai sqom.

Jon 17:26

E na ino ñam naŋgi osornjroqnem. Naŋgi olo osornjrqai. Yimqa ni na e tulaŋ qalaqalaibeqnum dego kere naŋgi dego ino qalaqalaiyo kumbra ti sqab. Amqa e segi naŋgi ti sqai.”

Jon 6:56

Tamo naŋgi ijo jejamu ti ijo leŋ ti uyqab di naŋgi e ombla sqab. E naŋgi ombla sqai.

Rom 11:33

O was qu, Qotei aqa kumbra ti aqa areqalo ti aqa powo ti di tulaŋ kokba. Di tulaŋ guma koba dego. Deqa iga na aqa areqalo di aqa utru geregere ubtsim marqa keresai. Aqa gam kalil dego iga dauryosim itqa keresai.

Rom 2:4

Ni que. Qotei a gaigai kumbra tulaŋ boledamu ni emoqnsiqa a ni qa tariŋsokobaiyeqnu. Deqa a urur ni awai uge emosaieqnu. Qotei aqa kumbra bole di ni unsim uge qa marsim gotraŋyqam e? Degaim. Ni are bulyqajqa deqa Qotei a ni qa are qaloqnsiq kumbra bole osormeqnu. Ni di qaliesai kio?

Rom 5:2

Yesus a na iga tamo uŋgasari a qa gago areqalo siŋgilateqnum qaji gam waqtetgej deqa Qotei a iga qa are tulaŋ boleiyonaqa iga eleŋej. Qotei na kumbra di iga egej deqa bini iga kumbra di osim tigelejunum. Deqa bini iga Qotei na laŋ qureq osi oqsim dia iga a ombla geregere sqajqa deqa tariŋeqnum. Iga deqa tulaŋ areboleboleigeqnaq unum.

Rom 8:10

Niŋgi une ti unub deqa nuŋgo jejamu moiqas. Ariya Kristus a nuŋgo are miligiq di unu deqa niŋgi Qotei aqa ŋamgalaq di tamo bole une saiqoji unub. Deqa Qotei aqa Mondor na niŋgi ŋambile eŋgwas.

Rom 9:23

Di kiyaqa? Aqa areqalo agiende. Tamo uŋgasari kalil naŋgi aqa riaŋ ti aqa siŋgila ti unsib qalieqajqa deqa. Ariya Qotei a tamo qudei naŋgi qa are tulaŋ boleiyeqnu. Deqa a na naŋgi so bole ti ñam koba ti enjrqajqa atej unu. Di dego tamo uŋgasari kalil naŋgi unsib qalieqajqa deqa Qotei a naŋgi qa tariŋsokobaiyeqnu.

1 Korin 3:16

Niŋgi Qotei aqa segi tal bul. Qotei aqa Mondor a nuŋgo miligiq di unu. Di niŋgi qaliesai kio?

2 Korin 2:14

Ariya e Qotei biŋiyeqnum. Di kiyaqa? A na gaigai iga aqaryaigeqnu deqa iga Kristus aqa siŋgila na qoto buŋyeqnum. Iga Qotei aqa wau ojeqnum dena tamo uŋgasari sawa sawa kalilq di unub qaji naŋgi Qotei qa bole poinjreqnu. Powo di sabaŋ quleq bolequja jagwa na osi gileqnu dego bul.

2 Korin 4:17

Di kiyaqa? Iga qalieonum, gulube ti jaqatiŋ ti iga bini eqnum qaji di tulaŋ kokba sai. Naŋgi sokiñalayosib koboqab. Iga gulube di eqnum deqa mondoŋ iga laŋ qureq dia so bole gaigai sqom. Iga qalieonum, iŋgi bole bole iga mondoŋ oqom qaji di tulaŋ boledamu. Iŋgi iŋgi dena mandam qa iŋgi iŋgi kalil tulaŋ buŋnjresqas.

2 Korin 4:6

Tulaŋ nami Qotei a iŋgi iŋgi kalil gereiyqa osiqa a endegsi marej, “Ambruq dena suwaŋ brantqas.” Ariya bunuqna Qotei aqa suwaŋ di iga qa bosiqa gago are miligi suwantetgej deqa iga Kristus aqa ulatamu uneqnum. Dena iga suwaŋ bole unsimqa Qotei aqa riaŋ ti aqa siŋgila ti geregere poigeqnu.

2 Korin 6:16

Qotei aqa atra tal ti qotei gisaŋ naŋgo atra tal ti beterosib ombla sqa kere e? Di keresai. Niŋgi qalie, Qotei ŋambile gaigai unu qaji aqa atra tal agi iga segi unum. Agi Qotei aqa anjam bei nami endegsib neŋgreŋyeb unu, “E naŋgo ambleq di sosiy walweloqnqai. E naŋgo Qotei sqai. Naŋgi ijo segi tamo uŋgasari sqab.”

Galesia 2:20

Osim e olo ŋambile bunuj em. Ariya ŋambile di ijo segi ŋambile sai. Kristus a segi ijo are miligiq di ŋambile unu. Deqa bini kumbra kalil e mandamq endi yeqnum qaji di e Qotei aqa Ŋiri qa ijo areqalo siŋgilatosim yeqnum. Agi Qotei aqa Ŋiri a na e tulaŋ qalaqalaibosiq deqa a aqa segi ŋambile uratosiq e qa moiej.

Galesia 4:19

O ijo aŋgro, niŋgi quiye. Uŋa aŋgrotqa osiq jaqatiŋyeqnu dego kere e niŋgi qa are jaqatiŋbeqnu. Di kiyaqa? Ijo areqalo agiende. Kristus a Qotei aqa aŋgro tiŋtiŋ unu dego kere niŋgi dego Qotei aqa aŋgro tiŋtiŋ soqniye.

Efesus 1:7

Qotei a iga qa are boleiyej aqa kumbra di tulaŋ kobaquja. Aqa kumbra di aqa utru agiende. A na Kristus qariŋyonaqa a iga awaigwa marsiqa moiej. Moisiqa aqa leŋ aiej dena Qotei na gago une kalil kobotetgej.

Efesus 2:22

Niŋgi dego Kristus beteryejunub deqa Qotei na niŋgi ti aqa segi tamo uŋgasari naŋgi ti koroiŋgej unub. Deqa niŋgi aqa segi tal bole unub. Qotei naŋgi aqa Mondor Bole wo naŋgi aiyel tal miligiq di sqajqa osiq tal di gereiyej.

Filipai 4:19

Iga Kristus Yesus aqa segi tamo uŋgasari unum deqa ijo Qotei na iŋgi bole bole iga egoqnqas. Deqa niŋgi iŋgi bei qa truquoqnibqa a na niŋgi eŋgoqnimqa niŋgi tulaŋ kere na sqab.

Kolosi 2:3

Qalie ti powo ti kalil di Kristus aqaq di uliejunu.

Kolosi 3:11

Iga so bunujq di unum deqa iga kalil kerekere unum. Deqa iga gago was naŋgi endegsi minjroqnqasai, “Ni Grik qaji” o “Ni Juda qaji” o “Ni muluŋ aio qaji” o “Ni muluŋ aiosai qaji” o “Ni yauŋ tamo” o “Ni yambaŋ tamo” o “Ni kaŋgal tamo” o “Ni tamo laŋaj”. Iga gago was naŋgi degsi minjroqnqasai. Di kiyaqa? Kristus a segi qujai unu. A gago kalil qa Tamo Koba.

1 Timoti 1:1

E Pol. Kristus Yesus na e qariŋbej deqa e aqa anjam marsim laqnum. Qotei agi iga padalo sawaq dena eleŋej qaji naŋgi Kristus Yesus wo naŋgi aiyel na e giltbeb deqa e naŋgo anjam marsim laqnum. Iga Yesus a olo laŋ qureq dena bam unqajqa deqa tariŋeqnum.

Hibru 6:19

Iŋgi bole bole Qotei na iga tariŋqa mareqnu qaji di iga tariŋesosim oqom. Iga deqa are qaloqnsim dena gago are miligi tulaŋ siŋgilatejunum. Gam dena iga Warum Tulaŋ Getento Koba gara gaiŋejunu qaji di torei miligiq giloqnqom.

1 Jon 4:4

O ijo aŋgro kalil, niŋgi Qotei aqa tamo. Mondor Bole a nuŋgoq di unu. Ariya gisaŋ mondor a mandam tamo naŋgoq di unu. Mondor Bole a na gisaŋ mondor di tulaŋ buŋyeqnu. Deqa niŋgi na dego gisaŋ tamo naŋgi di gotraŋnjreqnub.

Uli Anjam 3:20

“‘Ni e nube. E siraŋmeq di tigelesosimqa kindokindoŋeqnum. Tamo bei a ijo kakoro qusimqa siraŋ waqtetbqas e miligiq gilsiy aqo ombla iŋgi uyqom.