Kolosi 1:24 - Yesus Aqa Anjam Bole

²⁴ E niŋgi aqaryaiŋgwa osim deqa e jaqatiŋ koba eqnum. E ijo jaqatiŋ deqa tulaŋ areboleboleibeqnu. E na Kristus aqa segi tamo uŋgasari naŋgi aqaryainjreqnum. Naŋgi aqa segi jejamu bul. A naŋgo gate. A na naŋgi aqaryainjrqa marsiq jaqatiŋ koba ej. Aqa jaqatiŋ di koboosaiunu. Deqa e dego tamo uŋgasari naŋgi qa osimqa ijo segi jejamuq di jaqatiŋ koba eqnum. Ijo kumbra dena e na Kristus aqa jaqatiŋ dauryosim kereteqnum.

Kolosi 1:24 ပူးပေါင်းရင်းမြစ်များ

Mak 10:39

Onaqa naŋgi na minjeb, “Od, aqo aiyel oqa kere.” Onaqa Yesus a na olo naŋgi aiyel minjrej, “Bole, jaqatiŋ e oqai di niŋgi dego oqab. Gulube e oqai di niŋgi dego oqab.

Aposel 5:41

Onaqa naŋgi areboleboleinjrnaqa koro sawa di uratosib gileb. Naŋgi Yesus aqa ñam qa jaqatiŋ eb deqa Qotei a naŋgi qa marej, “Naŋgi Yesus aqa ñam qa siŋgilaonub deqa naŋgi jaqatiŋ oqa kere.” Qotei a naŋgi qa degsi marej deqa naŋgi areboleboleinjrnaq gileb.

Rom 5:3

Ariya iga deqa segi areboleboleigosai. Iga gulube oqnsim unum deqa ti areboleboleigeqnu. Di kiyaqa? Iga qalieonum, gulube dena gago are siŋgilatetgeqnaqa iga siŋgila na tigeleqnum.

Rom 8:17

Ariya iga Qotei aqa aŋgro unum deqa mondoŋ iga iŋgi bole bole Abu Qotei na nami iga egwa marej qaji di oqom. Iŋgi bole di agi gago was Kristus a na nami esoqnej. A jaqatiŋ ej dego kere iga dego jaqatiŋ oqnsim sqom. Ariya mondoŋ iga a ombla ñam koba osim so bole gaigai sqom.

1 Korin 12:27

Ariya niŋgi kalil Kristus aqa jejamu qujai. Niŋgi segi segi aqa jejamu sarqei unub.

2 Korin 12:15

E na ijo iŋgi iŋgi kalil ti ijo jejamu dego niŋgi torei eŋgwajqa areboleboleibqo. E niŋgi tulaŋ qalaqalaiŋgeqnum. Ariya kiyaqa niŋgi kamba olo e kiñala segi qalaqalaibeqnub?

2 Korin 6:10

Iga are gulubeigeqnu. Di uŋgum. Iga gaigai areboleboleigeqnu. Iga ñoro saiqoji unum. Di uŋgum. Iga na tamo uŋgasari naŋgi aqaryainjreqnam naŋgi laŋ qaji iŋgi iŋgi koba eleŋeqnub. Iga iŋgi iŋgi saiqoji unum. Ariya iga olo laŋ qaji iŋgi iŋgi kalil ejunum.

2 Korin 7:4

E qalieonum, niŋgi tamo bole deqa e anjam bei ulitqasai. E anjam kalil boleq na merŋgwai. E niŋgi qa tulaŋ areboleboleibqo. Ijo are miligi niŋgi qa tulaŋ laejunu. Iga gulube koba eqnum di uŋgum, e niŋgi qa are qaloqnsim dena ijo are miligiq di e tulaŋ areboleboleibqo.

Efesus 1:23

Qotei aqa segi tamo uŋgasari naŋgi Kristus aqa jejamu qujai. Kristus a na iŋgi iŋgi kalil ekritosiq tulaŋ keretejunu. Deqa a na Qotei aqa segi tamo uŋgasari naŋgi dego osiq tulaŋ keretnjrejunu.

Efesus 3:1

Qotei na niŋgi kumbra tulaŋ boledamu eŋgej anjam di e marsim laqnem deqa jeu tamo naŋgi na e ojsib tonto talq endia ateb unum. E Pol. E na niŋgi sawa bei bei qaji tamo niŋgi aqaryaiŋgwa osim deqa Kristus Yesus aqa wau di ojeqnum. Utru deqa e tonto talq endi unum.

Efesus 3:13

Deqa e niŋgi endegsi merŋgwai. E niŋgi aqaryaiŋgoqnsim dena e gulube koba eqnum niŋgi deqa are koba qalaib. Niŋgi are koba qalqab di niŋgi uloŋqab. Deqa niŋgi ijo gulube deqa areboleboleiŋgem. Di kiyaqa? Ijo gulube dena niŋgi aqaryaiŋgimqa niŋgi Qotei ombla so bole gaigai sqab.

Filipai 3:10

Deqa e Kristus qa bole qalieqajqa are koba unu. A subq na tigelej deqa a siŋgila ti unu. E siŋgila deqa qalieqajqa are koba unu. A jaqatiŋ osiq moiej deqa e a beteryosiy a ombla jaqatiŋ osiy moiobulqai. E a ombla areqalo qujaitosiy moiobulqajqa are qaleqnum.

Kolosi 1:18

Yesus a Kristen tamo uŋgasari naŋgo gate. Naŋgi aqa jejamu bul. A naŋgo ŋambile qa utru. A tamo kalil naŋgi qa namoosiq subq na tigelej. Deqa a segi qujai iŋgi iŋgi kalil naŋgo gate.

2 Timoti 1:8

Deqa ni gago Tamo Koba Yesus aqa anjam marsim laqajqa jemaimaiq. E segi Yesus aqa anjam marsim laqnem deqa jeu tamo naŋgi na e ojsib tonto talq endia e waibeb unum. Deqa ni e qa dego jemaimaiq. Ni Qotei aqa siŋgila osim Yesus aqa anjam bole marsim laqne. Osim dena ni e ombla gulube oqnsim sqom.

Jems 1:2

O ijo was qu, gulube utru segi segi gargekoba niŋgi qa boqnimqa uŋgum niŋgi endegsib are qaloqniye, “Iga gulube deqa areboleboleigim sqom.”