Kolosi 1:12 - Yesus Aqa Anjam Bole

¹² O was qu, iga degsim niŋgi qa gago Abu Qotei pailyeqnum. Deqa niŋgi na a biŋiyoqnsib soqniye. A na niŋgi kumbra boleq di breiŋgej deqa agi niŋgi dauryoqnsib unub. Deqa iŋgi bole bole a na nami laŋ goge dia gereiyetŋgej unu qaji di niŋgi mondoŋ oqsib oqab. Agi niŋgi ti Qotei aqa segi tamo uŋgasari kalil suwaŋoq di unub qaji naŋgi ti iŋgi di oqab.

Kolosi 1:12 ပူးပေါင်းရင်းမြစ်များ

Matyu 25:34

Osiyqa tamo bole ijo baŋ woq di unub qaji naŋgi endegsi minjrqai, ‘Ijo Abu a niŋgi qa tulaŋ areboleboleiyqo. Nami a mandam atej bati deqa a nuŋgo Mandor Koba sosim niŋgi taqatŋgwajqa marej. Deqa niŋgi ijoq boiye. Babqa ijo Abu a nuŋgo Mandor Koba sosim niŋgi taqatŋgwas.

Jon 14:6

Onaqa Yesus na minjej, “E segi gam. E segi anjam bole qa utru. E segi ŋambile qa utru dego. Deqa tamo bei a gam bei na ijo Abu aqaq oqwa keresai. Ijo Abu aqaq oqwajqa gam agi e segi qujai.

Jon 20:17

Onaqa Yesus na Maria minjej, “Ni e ojaim. Di kiyaqa? E ijo Abu aqaq oqosaiunum deqa. Ariya ni ijo was naŋgoq gilsim endegsi minjre, ‘Yesus a marqo, “E ijo Abu aqaq olo oqwai. Ijo Abu agi nuŋgo Abu dego. Ijo Qotei agi nuŋgo Qotei dego.” ’ Ni gilsim naŋgi degsi minjre.”

Jon 4:23

Ariya bati bei brantqas agi brantqo. Tamo naŋgi ijo Abu qa louqa oqnsib aqa Mondor Bole na ti kumbra bole na ti a qa louoqnqab di naŋgi bole na louqab. Yim ijo Abu a naŋgi qa tulaŋ areboleboleiyqas.

Aposel 20:32

“Bini e niŋgi Qotei aqa baŋq di ateleŋitqa a na niŋgi geregere taqatŋgoqnqas. Qotei a niŋgi qa are boleiyosiqa eleŋej anjam di niŋgi siŋgila na ojesoqnibqa anjam dena nuŋgo are siŋgilatetŋgoqnqas. Niŋgi Qotei aqa segi tamo uŋgasari a na nami gilteleŋej qaji. Deqa mondoŋ a na niŋgi iŋgi bole bole eŋgoqnqas.

Aposel 26:18

Ni naŋgoq gilsim ijo anjam minjroqnimqa naŋgi e qa poinjroqnim ambru uratosib suwaŋoq bqab. Satan a na naŋgi joqej unu. Deqa ni na naŋgi are bulyetnjroqnimqa naŋgi Satan aqa siŋgila uratosib Qotei aqaq giloqnqab. Amqa e na naŋgo une kalil kobotetnjritqa naŋgi tamo uŋgasari nami e qa naŋgo areqalo siŋgilateb qaji naŋgi ti koba na ijo segi tamo uŋgasari boledamu sqab.’

Rom 11:17

Israel naŋgi ŋamtaŋ oliv qure qaji di bul. Dani qudei Qotei na giŋgeŋnjrsiqa breinjrej. Ariya niŋgi sawa bei bei qaji tamo niŋgi nañu qaji oliv aqa dani bul. Dani di Qotei na olo eleŋosiqa ŋamtaŋ oliv qure qaji di aqa qoboq di beterteleŋej unub. Dani di agi niŋgi segi. Dani Qotei na giŋgeŋnjrsiq breinjrej qaji naŋgo sawa di agi niŋgi na olo eb. Deqa bini niŋgi ŋamtaŋ oliv qure qaji aqa dani naŋgi ti namur bole oqnsib unub.

Rom 15:27

Naŋgi naŋgo segi areqalo na silali di koroiyeb. Naŋgo kumbra di bole. Di kiyaqa? Naŋgi na kamba iŋgi deqaji olo Juda naŋgi enjrqajqa wau ti deqa. Juda naŋgi na naŋgi Qotei aqa anjam qa aqaryainjreqnub deqa naŋgi na kamba olo Juda naŋgi jejamu qa iŋgi iŋgi qa aqaryainjrqajqa wau ti.

Rom 8:17

Ariya iga Qotei aqa aŋgro unum deqa mondoŋ iga iŋgi bole bole Abu Qotei na nami iga egwa marej qaji di oqom. Iŋgi bole di agi gago was Kristus a na nami esoqnej. A jaqatiŋ ej dego kere iga dego jaqatiŋ oqnsim sqom. Ariya mondoŋ iga a ombla ñam koba osim so bole gaigai sqom.

Rom 9:23

Di kiyaqa? Aqa areqalo agiende. Tamo uŋgasari kalil naŋgi aqa riaŋ ti aqa siŋgila ti unsib qalieqajqa deqa. Ariya Qotei a tamo qudei naŋgi qa are tulaŋ boleiyeqnu. Deqa a na naŋgi so bole ti ñam koba ti enjrqajqa atej unu. Di dego tamo uŋgasari kalil naŋgi unsib qalieqajqa deqa Qotei a naŋgi qa tariŋsokobaiyeqnu.

1 Korin 8:6

Iga qalieonum, Qotei qujai unu. A gago Abu. A iŋgi iŋgi kalil qa utru. Iga aqa segi tamo uŋgasari tiŋtiŋ unum. Tamo Koba qujai dego unu. Di Yesus Kristus. A iŋgi iŋgi kalil ateleŋej. Iga kalil aqaq dena ŋambile em.

1 Korin 9:23

E kumbra kalil yeqnum qaji di e Yesus aqa anjam bole di siŋgilatqa marsim deqa yeqnum. Yimqa mondoŋ anjam bole di aqa awai Tamo Koba Yesus na e ebqas. Agi tamo kalil Yesus aqa anjam bole deqa naŋgo areqalo siŋgilateqnub qaji naŋgi awai di oqab.

2 Korin 11:14

O was qu, niŋgi naŋgo kumbra di unsib niŋgi deqa tulaŋ prugaib. Iga qalie, Satan a dego gisaŋoqnsiqa aqa kumbra bulyoqnsiqa Qotei aqa laŋ aŋgro bole riaŋ ti unub qaji naŋgi buleqnu.

2 Korin 5:5

Qotei a segi na iga ŋambile di oqajqa gam gereiyetgej. Osiqa aqa Mondor Bole iga egej. Mondor di Qotei na iga namo egej deqa iga qalieonum, bunuqna iŋgi iŋgi kalil a na iga egwa marej qaji di olo egwas.

Efesus 1:11

Qotei a segi aqa areqalo dauryoqnsiq deqa iŋgi iŋgi kalil babteleŋeqnu. Tulaŋ nami a aqa segi areqalo dauryosiq deqa a na iga Juda tamo uŋgasari Kristus beteryosim aqa segi tamo uŋgasari sqajqa deqa marsiq giltgej.

Efesus 1:18

Ijo areqalo agiende. Qotei na nuŋgo areqalo suwantetŋgimqa iŋgi bole bole a nami niŋgi eŋgwa osiq metŋgej qaji di niŋgi poiŋgwajqa deqa. Agi niŋgi iŋgi di oqajqa tariŋoqnsib unub. Iga Qotei aqa segi tamo uŋgasari unum deqa a na iŋgi bole bole di iga egwa marsiq gereiyetgej unu.

Efesus 2:18

Kristus aqa wau na iga koba na Mondor qujai ejunum. Deqa iga are qujaitosim unum. Mondor dena gam waqtetgej deqa iga gaigai gago Abu Qotei aqa ulatamuq di brantoqnqom.

Efesus 3:6

Anjam di aqa utru agiende. Niŋgi sawa bei bei qaji tamo uŋgasari niŋgi Kristus aqa anjam bole qusib nuŋgo areqaloq di ateb deqa Qotei na niŋgi ti iga ti turtgosiqa sawa qujaiq di atej. Deqa iga kalil tamo qujaionum. Deqa iga ti niŋgi ti kalil iŋgi bole bole Qotei a nami iga Kristus Yesus aqa baŋ na egwajqa marej qaji di oqom.

Efesus 4:6

Qotei qujai unu. A gago kalil qa Abu. A na qujai tamo uŋgasari kalil naŋgi taqatnjroqnsiqa naŋgo ambleq di waueqnu.

Efesus 5:11

Tamo naŋgi ambruq di sosib kumbra uge uge yeqnub qaji naŋgi ti beteroqnaib. Kumbra naŋgi yeqnub qaji dena kumbra bole bei babtosaieqnu. Deqa niŋgi na tamo naŋgi di endegsib minjroqniye, “Nuŋgo kumbra di uge.”

Efesus 5:20

Kumbra bole kio uge kio nuŋgoq di brantoqnimqa, uŋgum, niŋgi bati gaigai gago Tamo Koba Yesus Kristus aqa ñam na Qotei biŋiyoqniye.

Efesus 5:4

Anjam jiga ti nanari anjam ti alaŋ anjam ti di dego niŋgi maroqnaib. Iga anjam deqaji maroqnqasai. Niŋgi anjam bei marqa oqnsib Qotei biŋiyoqniye.

Efesus 5:8

Niŋgi nami ambruq di soqneb. Ariya bini Tamo Koba Qotei na niŋgi aqa suwaŋoq di atej unub. Deqa niŋgi suwaŋ qaji tamo uŋgasari sosib suwaŋoq di laqniye.

Kolosi 2:2

E nuŋgo are siŋgilatetŋgosiy nuŋgo areqalo tigeltetŋgitqa niŋgi na Qotei aqa segi tamo uŋgasari naŋgi tulaŋ qalaqalainjroqnsib naŋgi ti are qujaitosib sqajqa deqa are qaloqnsim waukobaeqnum. Ijo areqalo agiende. Niŋgi areqalo bole ti sosib dena niŋgi nuŋgo areqalo Kristus qa bole siŋgilatqab. Osib dena niŋgi Qotei aqa uli anjam aqa utru geregere qalieqab. Kristus a segi uli anjam di aqa utru.

Kolosi 3:15

Kristus a na iga lawo kumbra egeqnu. Lawo kumbra dena nuŋgo are miligi taqatesoqneme. Qotei na niŋgi metŋgej deqa niŋgi jejamu qujai bul sosib are qujaitosib soqniye. Sosib deqa niŋgi gaigai Qotei biŋiyoqniye.

Kolosi 3:17

Nuŋgo anjam maro na ti nuŋgo wau na ti nuŋgo kumbra kalil na ti niŋgi Tamo Koba Yesus aqa ñam na yoqniye. Osib niŋgi aqa ñam na Qotei Abu biŋiyoqniye.

Taitus 2:14

Kristus a na iga eleŋosim gago une kalil kobotqajqa deqa marsiq aqa segi ŋambile uratosiq moiej. Iga aqa segi tamo uŋgasari boledamu sosim kumbra bole bole siŋgila na dauryoqnqajqa deqa marsiq aqa segi ŋambile uratej.

Hibru 12:23

Tamo naŋgi Qotei qa korooqnsib loueqnub qaji naŋgi qa dego niŋgi beleŋeb. Tamo naŋgi di Qotei aqa segi aŋgro matu tiŋtiŋ. Naŋgo ñam agi Qotei a laŋ qureq dia neŋgreŋyej unu. Niŋgi Qotei qa ti tamo naŋgi Qotei aqa segi kumbra tiŋtiŋ dauryeqnub qaji naŋgo qunuŋ qa ti beleŋeb. Tamo naŋgi di Qotei na une saiqoji qa minjrej deqa naŋgi tulaŋ bole unub. Niŋgi Qotei agi mondoŋ tamo uŋgasari kalil naŋgo une qa peginjrqas qaji a qa beleŋeb.

Hibru 3:1

O Kristen was qu, Qotei laŋ qureq di unu qaji a na niŋgi dego metŋgej deqa niŋgi Yesus qa are qaloqniye. Qotei na Yesus qariŋyonaq mandamq aiej. A gago atra tamo kobaquja unu. Deqa iga a qa gago areqalo siŋgilatoqnsim aqa ñam boleq na maroqnqom.

Hibru 3:14

Iga nami siŋgila na Qotei qa gago areqalo siŋgilatem. Ariya gago areqalo di iga olo tulaŋ siŋgila na ojsimqa gilsim gilsim moiqom. Iga degyqom di iga Kristus aqa segi tamo uŋgasari tiŋtiŋ sqom.

Jems 3:9

Gago kumbra agiende. Iga gago medabu na gago Tamo Koba Abu Qotei aqa ñam soqtoqnsim olo puluoqnsim medabu qujai dena tamo uŋgasari naŋgi misiliŋnjreqnum. Tamo uŋgasari naŋgi di Qotei na gereinjrsiqa aqa segi so boleq di atej.

1 Pita 5:1

O Kristen gate, e niŋgi anjam endegsi merŋgwai. E dego Kristen gate deqa Kristus a ijo ŋamgalaq dia jaqatiŋ osiq moinaq e unem. Mondoŋ Kristus a olo siŋgila ti ñam koba ti brantimqa bati deqa Qotei na laŋ qure qa iŋgi bole bole e ti niŋgi ti egwas. Deqa Kristen gate, niŋgi wau endegyoqniye.

1 Jon 1:3

Iga Anjam di gago ŋamdamu na unoqnem. Iga a quoqnem. Deqa iga a qa niŋgi dego merŋgeqnum. Yim niŋgi qusibqa iga ti areqalo qujaitosim sqajqa deqa. O was qu, iga gago Abu Qotei wo aqa Ŋiri Yesus Kristus wo naŋgi ti koba na areqalo qujaitosim unum.

Uli Anjam 21:23

Qure di seŋ ti bai ti na suwantosai. Qotei aqa segi riaŋ na qure di suwantoqnqas. Kaja Du a segi qure di aqa puloŋ.

Uli Anjam 22:14

“Tamo uŋgasari naŋgo gara yansonub qatqo qaji naŋgi tulaŋ areboleboleinjrim sqab. Naŋgi ŋambile qa ŋam gei osib uyqa kere. Naŋgi Qotei aqa qure koba dego miligiq gilqa kere.

Uli Anjam 22:5

Qure dia ambruoqnqasai. Deqa lam qatrentqasai. Seŋ suwaŋoqnqasai. Tamo Koba Qotei a segi na tamo uŋgasari naŋgi suwantnjroqnqas. Yim naŋgi bati gaigai mandor kokba sqab.