Jut 1:6 - Yesus Aqa Anjam Bole

⁶ Niŋgi laŋ aŋgro uge uge naŋgi qa are qaliye. Tulaŋ nami laŋ aŋgro qudei laŋ qureq dia Qotei aqa wau ojoqneb qaji naŋgi wau deqa areboleboleinjrosai deqa naŋgi laŋ qure uratosib jaraieb. Deqa Qotei a na naŋgi osiq sawa ambruq di breinjrsiq tontnjrej. Deqa naŋgi sawa dia tariŋsokobaiyib mondoŋ tamo peginjrqa batiamqa Qotei na naŋgi olo osimqa naŋgo une qa naŋgi peginjrqas.

Jut 1:6 ပူးပေါင်းရင်းမြစ်များ

Matyu 10:15

Niŋgi quiye. E bole merŋgwai. Mondoŋ Qotei na tamo uŋgasari naŋgo une qa peginjrqa batiamqa qure deqaji tamo uŋgasari naŋgi ijo anjam uratonub deqa Qotei na naŋgi tulaŋ padaltnjrougetqas. Ariya Sodom qure ti Gomora qure ti naŋgi Qotei na mondoŋ degsim padaltnjrqasai. A na naŋgi gulube kiñala enjrqas. Di kiyaqa? Naŋgi ijo ñam qaliesai deqa.”

Matyu 25:41

“Ariya tamo uge ijo baŋ qonaŋq di unub qaji naŋgi endegsi minjrqai, ‘Niŋgi tamo tulaŋ ugedamu. Deqa niŋgi jaraiiye. Jaraiosib aisib ŋamyuo gaigai yuejunu qaji dia soqniye. Satan aqa laŋ aŋgro naŋgi ti dia sqab. Naŋgi dia sqajqa deqa Qotei a nami ŋamyuo di gereiyej.

Matyu 8:29

Naŋgi aiyel Yesus aqa areq bosib leleŋkobayosib minjeb, “O Qotei aqa Ŋiri, ni iga kiergwajqa bonum? Iga padalqajqa bati bosaisonaqa ni laŋa ambleq di iga jaqatiŋ egwa bonum e?”

Jon 8:44

Niŋgi nuŋgo abu Satan aqa aŋgro. Niŋgi nuŋgo abu Satan aqa areqalo dauryqajqa tulaŋ siŋgilaeqnub. Satan a nami tamo qalo qaji tamo soqnej agi bini unu. A kumbra bole dauryosaieqnu. Di kiyaqa? A kumbra bole dauryqajqa torei urateqnu. A anjam marqas di a gisaŋ anjam segi marqas. A gisaŋ anjam qa utru. A gisaŋ tamo. A gisaŋ anjam kalil aqa abu.

Rom 2:5

Ino are miligi geteŋejunu deqa ni are bulyosai. Ino kumbra dena ni na ino awai uge tombol ateqnum. Deqa mondoŋ diŋo batiamqa Qotei a kumbra tiŋtiŋ na tamo naŋgo une qa minjrsimqa aqa minjiŋ boleq atsim awai tulaŋ ugedamu ni emqas.

Efesus 6:12

Niŋgi geregere are qaliye. Iga mandam tamo uŋgasari naŋgi ti qotosaieqnum. Iga Satan aqa mondor uge uge naŋgi ti aqa gate kokba ti iŋgi iŋgi kalil siŋgila ejunub qaji naŋgi ti qoteqnum. Gate kokba naŋgi di ambru qa bati endeqa mandam taqatoqnsib unub. Iga mondor uge uge kalil laŋ goge di unub qaji naŋgi ti qoteqnum.

Hibru 10:27

Iga degyqom di iga Qotei qa ulaugetosim a gago une qa pegigwa bati qa tariŋoqnqom. Pegigwa bati deqa Qotei na aqa jeu tamo kalil naŋgi ojeleŋosim ŋamyuo kaŋkaŋ kobaq di breinjrqas. Ŋamyuo di agi Qotei na atej unu.

2 Pita 2:4

Niŋgi qalie, nami laŋ aŋgro qudei naŋgi une ateb. Onaqa Qotei a na naŋgi uratnjrosai. A naŋgi osiqa tontnjrsiqa sub guma kobaq di breinjrej di unub. Sub di ambru koba. Sub dia ŋamyuo unu. Ariya laŋ aŋgro uge naŋgi di subq dia tariŋesoqnibqa mondoŋ Qotei a naŋgo une qa peginjrsim awai uge enjrqas.

2 Pita 2:9

Ariya was qu, Tamo Koba Qotei a nami degsiqa tamo uge uge naŋgo une qa maroqnsiq naŋgi padaltnjroqnej. Deqa iga qalieonum, tamo naŋgi Qotei dauryeqnub qaji naŋgi gulube iteqnabqa a na olo naŋgi eleŋeqnu. Naŋgi eleŋqajqa gam di Qotei a bole qalie. Tamo uge uge naŋgo kumbra di dego Qotei a qalie. Deqa mondoŋ a na naŋgi osim naŋgo une qa peginjrsim awai uge enjrqas.

Jut 1:13

Jagwa na yuwal tigelteqnaqa yuwal korkorteqnaqa mormaŋ aieqnu dego kere tamo naŋgi di kumbra uge uge babteleŋoqnsib naŋgi naŋgo kumbra uge deqa jemainjrosaieqnu. Naŋgi bongar bul laŋ goge dia naŋgo gam grotoqnsib laŋa laŋa laqnub dego kere. Deqa mondoŋ Qotei na tamo naŋgi di breinjrim sawa ambruq aieleŋosib bati gaigai dia sqab. Sawa ambru di Qotei na nami naŋgi gereiyetnjrej unu.

Uli Anjam 20:10

Satan a na naŋgi walawalainjroqnej deqa Qotei na a waiyim ŋamyuoq aiqas. Ŋamyuoq dia meniŋ kalil yusiq ñaŋgaeqnu. Wagme juwaŋ wo Satan aqa gisaŋ anjam maro tamo wo naŋgi aiyel nami ŋamyuoq di wainjreb unub. Deqa Satan a dego Qotei na waiyim ŋamyuoq aisim naŋgi aiyel koba na bati gaigai qolo ti qanam ti ŋamyuoq dia jaqatiŋ oqnsib sqab.

Uli Anjam 20:2

Aisiq amal kobaquja di ojsiq sil dena tontej. A wausau 1,000 tontim sqas. Amal di nami soqnej qaji. Aqa ñam Satan. Aqa ñam bei, “Tamo Kalil Naŋgo Ñam Ugetnjro Qaji Tamo.”